DITALUHON JESUS TONDI NA JAHAT (Lukas 8: 26-39)

 DITALUHON JESUS TONDI NA JAHAT

(Lukas 8: 26-39)

Horas ma di hita angka dongan. Mangarade ma hita muse tu panghobasion minggu I dung Trinitatis.

Di jolo ni turpuk on, patar do huaso ni Jesus pamenak habahaba siappalautus di tao Galilea. Di turpuk on, marlayar ma Jesus dohot sisean i tu luat Gadara (Jordania), tu duru ni Israel. Dipatupa Jesus do disi huasona manaluhon tondi na jahat. Idaonta dison, ndada tarihot huaso ni Jesus i holan di huta ni halak Jahudi, alai dohot do duru ni bangso i (ayat 26). Universal do huaso ni Tuhan i; ndada marbontis manang sektarian. Diboan jala dipatupa Jesus do nang haluaon tu horong ni angka sipelebegu pe.

Di Gadara, dapot Jesus ma sahalak sinonggopan ni tondi na hodar. Nunga na nia lelengna ndang be marabit (salangsalang) ibana, ndang olo mian di jabu alai mian di parbandaan do. Nunga dirajai tondi na hodar i dirina. Agan pe dirante jala dibeanghon, diropuhi tondi na jahat i do rantena i huhut manogihonsa tu na holom di parbandaan. Dihibahiba tondi na hodar i do ibana bahir sian jabuna, sian parmianan ni halak na mangolu disarat tu inganan ni angka naung mate (ayat 27, 29).  

   

Ditanda jala diboto tondi na hodar i do na gok huaso Jesus, alai ndang manahan jumpang tu Jesus. Mangangguhi do sibolis i jala manungkap di joloNa laos marsoara na gogo: ”Marhua Ho tu ahu, Jesus, Anak ni Debata na tumimbul ? Huelekelek Ho, unang ahu arsahi ! ” (ayat 28). Diparuar Jesus ma tondi na hodar i. Marhuaso do Jesus paruar nasa tondi na hodar na manggompang tu hita pe, manang Loksa pe i manang Legion. Tarparuar Jesus do i sian hita (ayat 30).    

Diparuar Jesus do tondi na hodar i, jala bongot tu punguan ni babi na manjampal di robean (ayat 31-34). Marbubur ma angka babi i tu tao laos mate mogap (pat. Mrk 5:13 hirahira 2000 toropna). Marnida huaso ni Jesus na manaluhon tondi jahat i, maporus ma angka parmahan i, dibaritahon ma i di huta dohot di ladang. Dung i jumpang nasida ma na sinonggopan ni tondi na hodar i nunga marabit, marroha jala hundul di lambung ni pat ni Jesus (ayat 35-36). 

Ditaluhon Jesus do tondi na hodar i. Masa ma transformasi di parngoluon ni jolma i. Jolma naung pinamalumNa i, nunga muba gabe denggan marpahean; ndang haurahan. Na so marabit hian (hina), nuaeng gabe marabit jala marulos (hormat). Nunga mulak ibana marsaor tu jabuna, ndada parbandaan be parmiananna. Na pinamalum ni Jesus, sai hundul do ibana donok tu Jesus, ndada pasuruthon dirina sian Tuhan i (pat. BE. 214 "Sonang di lambung Jesus...").

Jolma na nirajaan ni tondi na hodar, dipadonok ma dirina mar-Tuhan jala mangarangguthon Jesus di ngoluna. Sumurut do tondi na hodar sian hita molo sai rosu parsaoranta di jabunta be. Sai unang tapaduru dongan nang keluarga sian tonga-tonga ni jabunta. Uli do pangidoan ni halak na tinadinghon ni tondi na hodar i naeng mangihuthon jala mandongani Jesus, alai dipamuli Jesus do ibana bongot tu jabuna pajojorhon na binahen ni Debata tu ibana. Unang sai pintor girgir marbarita tu duru, alai sai jumolo ma radoti parsaoran na rosu di tonga ni bagasmu. 

Parsaoran na rosu di tonga ni jabu, mansai balga do panghorhonna padao roha na sibolison sian hita. Molo adong anggota keluarganta na sai mian bahir di duru ni bagasta, tadapothon ma, tajou, tajanghon, tahaol jala taumma. Sotung tapaduru manang tapasuhi nasida gabe dao sian hita. Alai na ummangat, tapangido ma tongtong Debata mian di bagasan rumah-tangganta, rap mengkel marlas ni roha, dung i sumurut ma sibolis i sian hita. 

Pangasahon ma huaso ni Jesus i, sai pamonangonNa do hita mangalo nasa sumbia ni sibolis. Dungo ma hita, ai maotaot do sibolis i songon babiat na marauang mangalului sibondutonna (1 Pet 5:8). Unang kompromi dohot sibolis, alai lam rosu ma parsaoranta di jabunta be. Padonok ma hundul raphon Jesus, paihutihut angka partangiangan, parmingguon nang manjahai Hata ni Debata. Didok Endenta i: “Sai ro do setan i manaiti rohangki dao sian Ho. Ipe ingani ahu, ai molo Ho di ahu, ingkon manigor lao musu naung ro” (BE. 275:2). Amen !

Pdt Banner Siburian/br Siagian

Medan

SATIA MANGHOBASI TUHAN I (1 Raja 19:15-21)

SATIA MANGHOBASI TUHAN I

(1 Raja 19:15-21)

Turpuk on, marisihon parsuruon ni Jahowa tu si Elia di Horeb dohot hababangkit ni si Elisa gabe panurirang singkat ni si Elia. Elia halak Tisbi sian halak paisolat di Gilead, manurirangi tongon di gomgoman ni raja Ahab di Israel. Diulahon si Ahab do sogo ni roha ni Jahowa, lobi sian saluhut jolma naung jumolo sian ibana (1 Raj 16:29-33). Dibuat ibana do si Isebel bahen jolmana jala marsomba ibana tu debata Baal.

Ro do si Elia paingothon raja i. Uhumon ni Debata do raja i ala ni ulaonna na jahat i (pat. Ahab mate di parporangan maradophon Halak Aram; 1 Raj 22:29-40). Didok si Elia do na so tupa ro nambur manang udan tu tanoi manang piga taon. Masa ma logo ni ari ranggapuri (hurang lobi 3,5 taon) sahat tu nidokna muse asa ro udan (1 Raj 17:1). Dipatudu si Elia do na so margogo Baal i maradophon Jahowa marhite sada partontangan pameleon di Karmel, pola diseati si Elia 450 halak panurirang baal di sunge Kison.

Gabe ro ma si Isebel mangondam panurirang Elia. Didok si Izebel, pinsangon ni angka debatana do ibana, molo so buatonna hosa ni si Elia marsogotna i, songon na binahen ni si Elia tu angka panurirangna i (ayat 2). Gabe maporus ma si Elia tu halongonan. Mandele do ibana. Nunga pola marmurukmuruk ibana humophop ulaon ni Jahowa, hape ditadingkon bangso i do parjanjianna tu Jahowa. Maloha do langgatanNa, dibunu angka panurirangNa marhite podang jala dohot do hosana naeng buatonna. Dipangido ma asa dibuat Jahowa nian hosana, ai so marguna dihilala na niulana dohot na hinalojahonna, lumobi di na so marnamuba roha si Ahab nang bangso i.

Di na tahuton jala loja, mangulon ma ibana marlinggom di toru ni hau tadatada. Ro do Debata manopot jala mangurupi ibana marhite surusuruan na manjama ibana huhut sumarihon sipanganonna asa sumuang gogona. Dung i borhat ma ibana tu Horeb, mardalan opat pulu ari nari lelengna, huhut marborngin di sada liang disi.

On ma alus ni Debata tu panaritaon dohot pandelean ni si Elia di Horeb. Dipangido ibana do nunga sae mangula jala tagonan ma dibuat Jahowa nian hosana. Hape suhar do di rohana alus ni Debata, marhite na marsuru ibana laho mamiahi si Hasael bahen raja gumonggom Aram, mamiahi si Jehu gabe raja ni Israel dohot mamiahi si Elisa gabe panurirang singkat ni si Elia (ayat 4). Marhite nasida na tolu i ma naeng patolhason ni Debata uhuman tu bangso i.

Marhite parsuruon i, dijou jala disuru do ibana (nang hita saonari) asa satia hita mangoloi jala manghobasi Tuhan i. Dipangke Debata do jolma i di ganup partingkian laho patulushon sangkapNa, agan pe ndang hea Debata marojahan tu pingkiran dohot panghilalan ni jolma. Agan pe mandele naposo ni Debata, manang merasa gagal jala sai hira na sasadasa na tading, alai tongtong do mangula Debata.   

Didok si Elia hira sahalakna nama na tading. Hape didok Debata adong dope 7000 halak nari di bangso Israel na so olo marsomba tu baal. Disura roha ni si Elia holan sasadasa nama na tading, gabe hira na so parduli Debata di ibana, hape dipadiri Debata do di Ibana torop na satia mangihuthon Ibana. Tupa, jotjot do songon i panghilalaanta sai songon tandiang na hapuloan uju taadopi hamaolon. Hape, tung so sea do dipasombu Debata angka naposoNa mangadopi huhut manaon di paraloan ni haporseaonta.

Dung i jumpangsa si Elia ma si Elisa, anak ni si Sapat, na tongon maninggala dohot sampulu dua pasang horbo. Dilingkuphon si Elia ma sampesampena tu ibana, songon tanda otoritas panjouon profetis tu si Elisa. Dung i diihuthon ibana ma si Elia manghobasi gabe parhaladona. Dung i, ditadingkon si Elisa do ulaonna i, marlojong ma ibana mangihuthon jala manghobasi si Elia songon parhaladona.    

Mulak ma si Elisa, dibuat ibana ma sapasang horbo, dipotongi ma i laos ulaula ni horbo i do dibahen marmasak juhut i laos dilehon panganon ni angka na posona. Dipelehon ibana do ulaonna songon sijama ninggala (pangola hauma) laho mangoloi panjouon na jinalona. On ma haunduhon na so marlaok. Hibul do rohana manghobasi Tuhan i.

Satia ma hita mangoloi parsuruon ni Tuhan i jala marhobas di Ibana. Marsihohot ma hita mar-Tuhan, sotung mimbar gabe marsomba tu debata baal ro di angka utiutian ni portibi on. Taingot ma, ndang hea dipasombu Debata punjung sasada hita manghaporseai jala manghobasi Ibana. Unang mansohot hita patupahon na denggan hombar tu lomo ni roha ni Tuhan i. Molo loja hita jala mandate, pargogoanNa jala sarihononNa do ngolunta, ai diparar do hita gabe ulaula di tanganNa laho tulus sangkap dohot lomo ni rohaNa. Amen !

Pdt Banner Siburian/br Siagian

Medan