Bahan Sermon

tu Minggu XIV Dung Trinitatis, 21 September 2014

Sermon HKBP Ressort Sion Nauli Sosa

Jumat, 05 September 2014 di HKBP Hutaraja Lamo

Jona 3 : 10 – 4 : 11

Dihaholongi Debata do saluhut bangso

Oleh : Pdt Michael Opel Panjaitan S.Th

Patujolo

Di hami sandiri, menarik situtu do angka barita di Bibel na mamaritahon taringot tu parsaoran ni sasahalak tu Debata. Tarida do sian i parsaoran na rosu antara ni jolma tu Debata, sipata marsialusan, jala patar muse disi parbinotoan ni Debata na so hadodoan, na sai maralo tu pamingkirion ni jolma. Di turpuk ni jamita dison, mandele do si Jona na sinuru tu huta Ninive, ala disesa Debata dosa ni pangisi ni huta i. Hape nunga mamolus sada pengalaman na so halupahon si Jona, na masuk tu bagasan ni sada dengke na balga. Tolu ari tolu borngin ma si Jona di bagasan dengke i, jala sai martangiangi do ibana disi sahat ro di na disuru Debata dengke i mangutahon ibana muse tu pasir (2:1-11). Naeng taida ma jolo pangalaho ni Debata sian barita ni turpuk on, laho mangarataratai panandaonta tu Debata Sitolusada i.

Tafsiran ni turpuk

Panolsolion ni roha ni pangisi ni huta Ninive, dohot kesadaran akan keberdosaan (ida bindu 4:1-9) mambahen nasida malua, gabe marpangulahi roha ni Debata dompak nasida. Uhuman naung ditotophon hian gabe Debata sandiri do manundatisa, siala las do roha ni Debata mangida pangisi ni huta Ninive. Tontu sahali, mansai las situtu do nang roha ni pangisi ni huta i ala marpangulahi roha ni Debata dompak nasida. Alai adong na so las rohana di na sao saut lalu uhuman na tu huta i, i ma si Jona sandiri. Na manghilala do si Jona, marisuang do hape pengalamanna i na madabu tu laut jala dibondut dengke na balga ibana. Boi do muruk jolma di halalas ni roha ni Debata?

Unang sai marsidalian di jolo ni Debata

Di Bibelta ndang adong dipatorang disi sibonsirina na maporus si Jona sian adopan ni Debata. Manang ala ni biarna tu pangisi ni huta Ninive, manang hal na asing ndang taboto dohot pasti. Alai dibahen si Jona do pembelaanna di bindu 4:2, didok ibana ala naung ditanda ibana do Debata parasi roha jala pardenggan basa, na lambat tarrimas, parasi roha godang jala na olo sumolsol rohaNa taringot tu hamagoan. Ala ni i do ninna umbahen na maporus ibana sian parsuruon ni Debata. Jala gabe kenyataan do i, ndang dabuon ni Debata be uhuman tu Ninive dung diida na disolsoli huta i do hape hajahatonna na sai laon. On do na so tarjalo roha ni si Jona, diulahi ibana ma muse mangalului dalan tu hamateanna.

Ndang muba ianggo pangalaho ni Debata

Di na diida si Jona, na so muba hape pangalaho ni Debata pardenggan basa jala parasi roha godang, gabe malua Ninive sian uhuman, ndang tarjalo rohana. Gabe muruk do ibana dompak Debata. Alai ro ma sungkunsungkun sian Debata tu ibana, na patut do ibana muruk? Sifat Allah yang kekal, yang diikuti dengan sifat-sifatNya yang lain, menjadi persoalan bagi Yunus. Dohot pandohan na asing, ndang satuju si Jona di sifat-sifat ni Debata. Hape songon na sinuru ni Debata ibana, ingkon dos nian pangalahona tu Debata, i ma barita hangoluan do sasintongna na binaritahonna i tu Ninive. Nang pe marrumang ancaman kehancuran, alai di balik ni i adong do tawaran pengampunan. Jala ditangihon pangisi i huta Ninive do soara ni Tondi i na mangonjar rohana mangidohon hasesaon ni dosa, marhitehite na patuduhon panolsolion ni roha. Mangula do sifat Allah yang kekal, parasi roha godang, pardenggan basa na sumurung, jala na olo sumolsol rohaNa taringot tu hamagoan. Barita nauli do i di parhuta Ninive.

Ketidaksadaran ni si Jona

Jala sasintongna, na so disadari si Jona do, naung jumolo do ibana hape mengalami sifat Allah yang kekal, na tinandana hian. Di na dialo ibana parsuruon na ro tu ibana, gabe naeng melarikan diri ibana sian parsuruonna i, marpangulahi do roha ni Debata dompak ibana. Sasintongna tama do ibana hona uhuman, alai ternyata dipaimbaru Debata do parsuruon na tu ibana i, jala dilehon do kesempatan kedua tu ibana. Pengampunan do i. Molo songon i do hape, boasa ndang tarjalo rohana di na dipalua Debata huta Ninive sian uhuman?

Boasa tung diarsakhon si Jona hamamago ni na so hinangaluthonna?

Jadi dung laho si Jona tu halongonan, dipadiri Debata ma disi hau dulang (pohon jarak) bahen parlinggomanna. Alai marsogotna i, dipamate Debata do muse hau dulang i marhitehite na dibahen disi gulokgulok. Sian na masa i, dipatorang Debata do tu si Jona makna peristiwa na sebenarna: ndang patut nian, marsak si Jona ala dipalua Debata bangso na manolsoli dosa dohot hajahatonna. Sasintongna ingkon dohot do marlas ni roha si Jona ala ni haluaon ni jolma. Songon i do di Agendanta, dung simpul dijahahon bagabaga ni Debata taringot tu hasesaan ni dosa ni jolma, dihatahon ma muse “Hasangapon di Debata na di ginjang!” (ida Luk. 2:14). Ende ni surusuruan do i di parsorang ni Jesus Kristus di borngin i, na mamboan haluaon tu jolma manisia. Marlas ni roha do nang angka surusuruan marnida jolma manisia na manjalo haluaon, nda tung gabe sogo roha ni angka surusuruan i. Hape na masa di si Jona, tung holong do rohana di hau dulang na mangalinggomi ibana sian logo ni ari, las do rohana, nang pe so ibana na manuan, na manubuhon jala ndada ibana nampuna hau i. Hape, ianggo di Debata, Ibana do na manompa saluhutna bangso, Ibana do nampuna saluhut bangso na adong di portibi on, termasuk Ninive. Tung so marasi ni roha Debata di angka bangso na tinompaNa? (ayat 11).

Dihaholongi Debata do saluhut bangso

Songon i ma pangalaho ni Debata na manghaholongi angka na tinompaNa, na so tarjuaNa do pangalaho haholongonNa i. Lumobi di pangisi ni huta Ninive, na dietong Debata bangso na oto, na so malo mananda dia tanganna parsiamun, dia parhambirang. Hape diboto nasida do mulak tu Debata! Jadi, boi masa do tarbalik situasi ni kehidupan on. Panurirang ni Debata do si Jona, hape hampir-hampir ndang taruli haluaon ibana dibahen kesombongan imanna.

Sipahusorhusoron

Antong, sian bahan sermon di ginjang, tabuat ma pigapiga poin na gabe jamita sian turpuk jamita on, i ma:

1. Taulahon ma parsuruon ni Debata na tu hita, unang manirpang hita sian dalan naung tinontuhon tu hita. Molo tarjou hita patupahon na denggan, so tung tajua i, so tung maporus hita sian panjouon i.

2. Unang adong di hita roha na mangiburu, na so manghalomohon na uli jinumpangan ni dongan. Marlas ni roha ma hita rap dohot angka na marlas ni roha, tangis ma hita rap dohot angka na tangis.

3. Dihaholongi Debata do saluhut bangso, dibahen i, ndang adong dalanta nanggo saotik manghasogohon na hinaholongan ni Debata. Lapatanna, tahaholongi ma sude jolma.