Jamita Evangelium Jesaya 11:1-10

 

Bahan sermon HKBP Resort Kisaran

Tu Minggu 27 Nopember 2022 Minggu Advent I

TOPIK : RAJA NI HADAMEON NA NAENG RO I

Ev. Jesaya 11:1-10

I. Patujolo

Tongon di tano Babel do bangso Juda dipasahat si Jesaya barita on. Lungun situtu dihilala ala naung lengse Jerusalem dohot Bagas Joro na badia pinajongjong ni raja Salomo na tarbarita i. Nunga maheu be luhut nasida ala naung mago sude na tau sihalashononna. Isara hau,nunga rumpak bangso i ala naung tartaban di tano na leban. Lea nasida ala ingkon mangolu dao sian bonapasogit. Di taon 586 andorang so hatutubu ni Kristus do masa i dibahen raja Babel, Nebukadnezar. Nunga lobi 2600 taon dung dipaboa si Jesaya hata ni Jahowa tu bangso Juda, alani ringkot situtu nuaeng taida lapatan ni hata i di ngolunta.

Dung tabege barita masa sian turpuk on jala dung tajaha angka pandohan na binaritahon ni si Jesaya, tung maol do gombarhononhon hinauli ni na naeng masa sipatupaon ni Tuhan i. Suhar ni naung hea masa do nilumbahon ni panurirangion i molo di pahombar tu harajaon dohot panggonggomion. Andorang di Jerusalem dope bangso i nunga godang bangkit raja dohot panuturi di tongatonga nasida. Tarhirim do bangso i di panggomgomion nasida ala so hombar tu patik dohot uhum ni Jahowa. Mangahut tu diri na be do angka partogi ni bangso i. Di papeol uhum holan laho pamorahon dirina. Torop jolma marpogos digosagosa angka na gogo. Nang angka na sopot so marama so marina dohot angka na mabalu pe nunga marsingkor ala so adong na mangondihon. Hombar tu na masa i ma ro uhum sian Jahowa. Diloas ma bangso Babel laho manaban jala dibuang bangso i tu Babel. Ingkon taononnasida do na masa i asa olo mananda hadirion ni Jahowa jala asa muba sian parange naso unjur tu lomo ni roha ni Debata. Alai, marhite panurirangion on laos di paboa ma tu bangso i, ndang na dibolongkon Jahowa nasida di tano na leban i, alai naeng manjou nasida mulak tu dalan na sintong. Ala nunga dao partogi ni bangso i manimbil sian hasintongan, dipabotohon ma ndan na songon i na naeng ro i, i ma Mesias i. Ise do Raja i?

II. Hatorangan

1. Tunas sian tungko ni si Isai

Hot do habangsa ni si David di adopan ni Jahowa. Nang pe hira naung mago harajaon i sian pomparanna ala naung tartaban luhut nasida alai dilumbahon do tu nasida na ingkon ruar sada tunas sian tungkona jala marparbue sada tubis na tubu sian uratna. Nang pe naung marumpak harajaon i alai ndang laos mago ai martumbur do muse sada tunas sian i. Tunas na ruar i ma pahothon harajaon ni si David. Nang pe naung tarrimas Jahowa mamereng pangalaho ni angka raja na manghunduli habangsa ni si David, alai ndang gabe disosa Jahowa uariNa tu nasida. Nuaeng na gabe tandi i ma Jahowa sandiri pajongjonghon harajaon i.

2. Disonggopi Tondi ni Jahowa

Ndada holan huaso alai dohot do nang sahala harajaon i marhuraja di hadirion ni Raja i. Tondi ni Jahowa do na songgop tu ibana i do na sai marniula na manghamham: (a) manggohi hadirion, paiashon daging nang tondi; manguluhon ngoluna; (b) mamparbisuhi dohot mangajari; (c) mananda na masa di ngolu ni jolma; (d) mangalehon panuturion mananda na sintong; (e) huaso laho manguhum dibagasan hatigoran; (f) pangantusion di ngolu partondion laho mangulahon na hombar tu lomo ni roha ni Jahowa; (g) biar mida Jahowa di sude panggulmiton.

Tangkas do di padan na robi barita taringot tu raja na disonggopi Tondi ni Jahowa. Pandonganion ni Jahowa do apala lapatanna disi. Molo so didongani Tondi ni Jahowa sahalak raja sursar do pingkiran dohot pambahenanna songon na masa di ngolu ni si Saul. Alai, raja David dohot Salomo, ala didongani Tondi ni Jahowa nasida, marhasil do sude panghobasionna songon sada raja na manggomgomi di tonga ni bangso. Asa, molo di ibana do Tondi i, marlapatan ma, Jahowa do na mangarajai ngoluna, pambahenanna pe ingkon sai hombar ma tu lomo ni roha ni Debata. I do umbahen ndang adong biar di angka naung sinonggopan ni Tondi ni Jahowa tung ise pe diadopi marparkaro laho manghajongjonghon hatigoran.

3. Patupa ngolu na marhasonangan

Dung di bagasan hasintongan parsaoran ni jolma ginomgoman ni Raja i, hasonangan ma na ingkon daionnasida. Ndada holan parsaoran di hajolmaon alai dohot do nang di sude na tinompa ni Debata. Hira so siat do nian tu pingkiran pinaboa ni panurirang i, songon dia tagamon boi rap manjampal lombu dohot babiat? Na somal lombu do dipangan babiat, ai i do sipanganonna. Songon dia muse manggompang babiat di lambung ni hambing? Sude pandohan di ayat 6-8 ndada nipi manang holan anganangan sambing. Di porlak Eden, di panompaon ni jolma na parjolo i nunga hea masa i. Ndang masiallangan angka na tinompa i. Sonang do luhut masilului sipanganonna. Molo didok manjampal na marlapatan manggagat duhut manang ramba angka na tubu di porlak i do sude. Nang jolma na parjolo i pe sian parbue ni hau do sipanganon ni nasida. Asa singkop do diparade Debata di angka na tinompaNa i. Alai dung madabu tu bagasan dosa jolma i, gabe hurangan ma nasida.Pangalaosion di tona ni Jahowa do mambahen jolma i sai mauas jala male ala ndang sian hata ni Debata be hangoluannasida.

III. Panimpuli

Ia Mesias na pinarbagabaga ni angka panurirang di padan na robi, i ma Tuhan Jesus Kristus. Ibana do Raja, naung ro manopot pardangolan ni portibi on. Ibana do anak ni si David naung manghamonanghon hamatean marhite haheonNa laho manobus pardosa. Ibana do Anak ni Debata na gabe jolma ro laho pahothon hatigoran dohot hasintongan. Pardengganan do diboan Ibana tu portibi on. Dung masa hadameon i di tano on, ndang adong be sihabiaran. Dakdanak na metmet pe boi ma marmeam dohot ulok dari. Nang angka binatang i pe ndang masiallangan be. Di ayat 9 didok „ndang adong be na manjahati di dolok habadiaonku“, martudutudu tu Jerusalem manang Sion do i. Disi do bangso i ro marsomba mamboan angka pelean tu adopan ni Jahowa. I do di pangantusion ni halak Israel. Alai di angka na porsea di Jesus Kristus, ndang holan Sion be inganan habadiaon ni Jahowa. Didia pe tahe jolma i dung dijanghon Mesias, Raja hadameon i, ndang be manjahati roha nang pingkiranna. Amen