PARTURE NI PARMINGGUON DI HKBP DISTRIK X MEDAN ACEH DI MINGGU UJUNG TAON PARHURIAON – PARNINGOTAN DI ANGKA NA MONDING

PARTURE NI PARMINGGUON DI HKBP DISTRIK X MEDAN ACEH                   DI MINGGU  UJUNG TAON PARHURIAON – PARNINGOTAN              DI ANGKA NA MONDING                                                                                                Minggu Pa-23 Dung Trinitatis, Tanggal 23 Nopember 2014

JESUS DO HAHEHEON DOHOT HANGOLUAN

I.        ACARA IBADAH           (U= Uluan     H= Huria     S=  Sude )

1.      Pangaradeon dohot joujou

U.   Huria ni Tuhanta,  andorang so tapungka parsombaonta tu adopan ni Jahowa, tama do jumolo pabotohonon, ia parminggunta sadari on, ndada parminggupon na somal, alai na khusus do. Hombar tu Kalender taon parhuriaon, minggu sadarion digoari do minggu ujung taon parhuriaon. Dipasunggulhon kalender taon parhuriaon I do, na ingkon sahat do hita tu tingki parujungan, ima ari ni Tuhan i.  Na ingkon marujung do saluhut na tinompa ni Tuhan i,  termasuk hita jolma manisia. Angkup ni i, laos digoari do minggu sadari on : Minggu parningotan di angka na monding, laho pasunggulhon tu hita asa mangarade hita tu ari parujungan i marhite haporseaon dohot panghirimon na togu di Kristus i, ai holan di bagasan JESUS DO HAHEHEON DOHOT HANGOLUAN.

2.      Marende  BE.  3: 1-3        ( Puji Jahowa  ale tondingku )     BL. 137

Ø  Puji Jahowa ale tondingku, puji Ibana Debatami. Tagan so sude dope bohalhu, naeng pujionhu basaNa i. Sitompa daging, tondi pe ingkon dipuji sasude. Haleluya, haleluya.  

Ø  Tubu ni jolma do nang na sangap jala na mulak tu tano i. Tahitahina pe laho do monjap, molo dibondut tanoman i. Ndang jolma hasonanganhi, Debata do haposanhi. Haleluya, haleluya.

                                                          …………( jongjong)……

Ø  Martau halak na niondingan ni Debatanta Jahowa i. Angka na hot marhaporseaon, di Jesus Kristus Tuhanta i. Molo Debata donganmu, ndang adong hurang tuamu. Haleleuya, haleluya.

3.      Votum –Introitus  :

U.  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, na tumompa langit dohot tano  on.

H.   Amen

U.  Dungo ma hamu, jala martangiang, asa unang bongot hamu tu pangunujunan. Managam ma hamu, dungo ma hamu jala martangiang, ai ndang diboto hamu mamang andigan tingki ni i.

H.    ( mangendehon BE.  539 :1 : Sai Hutagam do Tuhanku )

Ø  Sai hutagam do Tuhanhu, sai masihol rohangki, di haroro ni Tuhanhu, amen sai tibu ma ro. Sai mardongan olopolop huriaM managam Ho. Maranatha ro o Tuhan. Amen sai tibu ma ro.

U.  Magira ma Au ro. Tiop ma na di ho unang adong na mambuat  tumpalmi.

H.    (mangendehon BE. 539:3 )

Ø  Sai rade ale tondingku, tagam panjouonNa i. Sai tu langit an manomu, ho di Jesus Tuhanmi. Sai mardongan….

U.  Songon on do hata ni Tuhan Jesus: Na maonang i do siparulosan dohot angka ulos na saksak. Jala ndang sesaonKu goarNa sian pustaha hangoluan, jala parhatopotonKu do goarna di jolo ni Damang  dohot di jolo ni angka surusuruanNa.

H.   Haleluya, Haleluya , Haleluya  ( diendehon )

U.  Martangiang ma hita.   Ale Tuhan Jesus, Tuhan ni angka na mate dohot angka na mangolu. Ho do nampuna hami, manang mangolu manang mate pe hami. Nang pe mardalan hami di rura ni linggoman ni hamatean, ndang huhabiari hami be hamatean, ai Ho do dongannami.  Ndang tartiop hamatean manang tanoman be hami, ai Ho do Tuhannami, naung humophop hami. Jala Ho nampuna hami. Ro hami nuaeng tu Ho: sahat tu Ho ma tondinami dohot dagingnami, asa di Ho hami manang na mangolu manang na mate pe. Sai tiop ma tangannami, urupi hami marhitehite panghophopMi, asa sahat hami tu hangoluan na so ra suda. Amen.                         ..….(hundul)………

4.      Marende   B.E.  834: 1-2  ( Na Masihol do Rohangku )

Ø  Na masihol do rohangku tu na sonang i, tu inganan ni Tuhanta i. Tano on ro di sudena pangisina i susa, sai susa rohangki. Marolopolop rohangki, di surgo, di na sonang i. Soada na hurang, sabam, sonang rohangki, molo dung sahat au tusi.

Ø  Ai andigan idaonhu haholonganhi raphon Jesus alealengki. Haholongan na badia  sian Jesus i, sonang, sai sonang rohangki. Marolopolop, …..

5.      Patik:

U.  Tangihon hamu hata ni Debata, na gabe patik ni minggu ujung taon parhuriaon on, na laos minggu parningotan di angka na monding, ima na tarsurat di  2 Korint 15: 19-21 : Ai anggo holan di tano on hita manghirim di Kristus i, jolma na dumangol do hita sian saluhutna. Alai nunga hehe Kristus i sian na mate, Ibana do parjolo ni angka na monding. Ai songon marhite  sian sada jolma  songgop hamatean, songon i do  marhite sian sada jolma  haheheon ni angka na mate. 

Antong rap mangido gogo ma hita laho mangulahon na hombar tu patik i.

S.  Ale Tuhan Debata, sai pargogoi ma hami, mangulahon na hombar tu patikMi. Amen.

6.      Koor  :

7.      Marende BE.  677: 1, 3 ( Mansai Lambok )

Ø  Mansai lambok Tuhan Jesus manjou, manjou ho dohot au. Ida Ibana paima haroromu, mulak ma ho dohot au. Antong sai ro ma ho, angka na sorat sai ro ma ho, mansai lambok Tuhan Jesus manjou pardosa mulak ma ho.         

                                                            ….. ( jongjong )……..

Ø  Ngolu ni jolma hatop do lao salpu, salpu do ho dohot au. Ai hamatean musu na jumoorbut, mangonggop ho dohot au. Antong sai ro …..

8.      Tangiang Manopoti dosa- Hasesaan ni dosa

U.  Tapaunduk jala tapaserep ma rohanta di adopan ni Debata na sun badia i, laho manopoti angka dosanta, martangiang ma hita. Ale Tuhan Debata, Pargogo na so hatudosan, Parasiroha na sumurung. Ama ni Tuhan Jesus Kristus Sipangolu hami.  Hami halak pardosa na dangol on ro tu jolo ni habangsa habadionMi manopoti jala manganggukhon  dosanami. Mansai jotjot huarsahi hami Ho marhitehite pikkiran dohot hata  dohot pambahenannami na roa i. Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami. Nang dongannami ndang  doshon dirinami hubahen hami. Dibahen i tama do rimasanMu hami tu hamatean salelengna i.

H.   (mangendehon BE.  683 : 1 :( Di AdopanMu Jesus )

Di adopanMu Jesus lea tutu do  diringkon.  Dibaen godang ni dosangkon, di adopanMu Jesus.

U.  Alai na maporus do hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami ala ni Tuhan Jesus Kristus, Anak haholongan ni rohaM, Sipangolu hami dohot ala ni GoarMu na badia i. Ale Tuhan, sai asi ma rohaM di hami halak na dangol on.  Amen

H.  ( mangendehon BE. 683:3 )

Di adopanMu Jesus, tarsolsoli bagi rohangkon. Muba ma au tu jolo on, di adopanMu Jesus.

U.   Hata ni Debata, bagabaga taringot tu hasesaan ni dosanta . Songon on do panghaholongi ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na saleleng ni lelengna di Ibana.  Hasangapon di Debata na di ginjang !

H.   Amen.                                                            ….… (hundul)…….

9.      Koor :

10.  Marende   BE. 213:1,4 ( Dung Sonang Rohangku )   BL.   115

Ø  Dung sonang rohangku dibaen Jesus i, porsuk pe hutaon dison. Na pos do rohangku di Tuhanta I, dipasonang tongtong rohangkon. Sonang do, sonang do, dipasonang tongtong rohangkon.

Ø  Mangolu nang mate di Jesus do au, Ibana haporusanhi. HataNa sambing do partogi di au, ai na tau haposanku do i.  Sonang do….

11.  Epistel

U.  Hata ni Debata na gabe Epistel di parmingguonta sadari on, ima na tarsurat di buku Panurirang Hesekiel 34: 20-24, tajaha ma secara responsorial: Dibahen i songon do hata ni Tuhan Jahowa tu nasida: Idama ma, Ahu sandiri mamutus uhum di holangholang ni birubiru angka na mokmok martimbanghon birubiru na marniang.

H.   Ala didorongi hamu marhite lambung dohot abara, jala ditimbangi hamu marhitehite tandukmuna saluhut birubiru angka na gale i, paima pola marserak nasida tu balian dibahen hamu.

U.  Dibahen i Ahu ma manolongi birubirungKu, asa unang be ripe pupusan, jala Ahu mamutus uhum di holangholang ni birubiru martimbanghon birubiru.

H.   Jala Ahu patindang di nasida sada parmahan, asa ibana marmahan nasida, ima naposongKu si David. Ibana marmahan nasida, jala ibana gabe parmahan di nasida.

U.  I do sahatna.  Martua do  na tumangihon hata ni Debata jala na umpeopsa.

H.   Amen.

12.  Marende  BE. 188: 1, 6   ( Jahowa Siparmahan Au )       BL.  131

Ø  Jahowa Siparmahan au, ndang hurang manang aha. Ai nasa jea dipadao  do sian dorbiaNa.  Tongon dibaen na lomak i, lao pangoluhon tondingki, dibaen asi rohaNa.     …..( jongjong )…

Ø  Tongtong do denggan ni basaM jambarhu di ngolungku. Tongon do asi ni rohaM mangihut di langkangku. Dung i dung suda bohalhi, sai ingananhu jabuMi, saleleng ni lelengna.

13.  Manghatindanghon Haporseaon

U.  Tahatindanghon ma haporseaonta i, songon na hinatindanghon ni donganta sahaporseaon  di sandok portibi on.  Rap hita mandok:

H.   Ahu porsea di Debata Jahowa……

14.  Koor

15.  Tingting

16.  Acara Parningotan di angka na monding

U.     Saonari sahat ma hita tu acara khusus, ima parningotan di angka na monding. Adong do hata na mandok “momento mori”  na marlapatan ingot ma ari hamamatem. Molo dijahahon pe angka nasida naung jumolo monding i, ndada na parigatrigat bulung pasigatsigat bulung gaol, ndada na parigatrigat sinalungun manang pasunggulsunggul sinadangol. Asa ganup do hita tangkas  maboto,  jala mangarade diri dibagasan haporseaon,  na ingkon  mate do hita muse songon nasida naung jumolo mate i.  Ndang tarpasiding hamatean i, ai nunga torop  angka dongan na jumolo sahat tusi, jala hata ni Debata do i.  Ingot jala haporseai ma, nunga jumolo Jesus mamolus hamatean i, jala nunga ditaluhon Ibana hamatean i marhite naung hehe sian na mate. Dibahen i binsan sadihari dope, lam pasolhot ma dirim tu Jesus, asa tau ho parjambar di haheheon  dohot hangoluanNa i.  Antong marende ma hita.

H.     Marende  BE. 334:  1   ( Nasa Jolma Ingkon mate )    BL.    186

Ø  Nasa jolma ingkon mate, ingkon mago sibuk i. Na mangolu ingkon mate asa tung denggan muse. Daging on do gabe bangke jala ingkon do malangke, asa   sogot bangkit tu hasangaponna i.

U.     Tabege goar-goar ni ruas ni huria…….  on, na monding di bagasan sataon parhuriaon ima sian tanggal 25  Nop. 2013 s/d 23 Nop. 2014 ), na jinahon ni  ………..

U.  Nunga tabege goar –goar ni donganta sian huria on na monding di bagasan sataon parhuriaon on. Songon dia do pandok ni hata ni Debata taringot hamatean dohot haheheon sian na mate ?   Didok hataNa i do: Alai naeng ma tangkas botoonmun ale angka dongan, taringot tu angka naung monding i, asa unang marsak hamu songon angka na leban, na so marpanghirimon.

H.   Ai molo porsea hita, naung mate  Jesus dohot hehe, sandok togihonon ni Debata do  rap dohot Jesus nang angka naung monding marhitehite Ibana.

U.   Ai hata ni Tuhan i do na hupasahat hami tu hamu: Ia mangolu pe hita angka na mian ro haroro ni Tuhan i, ndada sumurung hita  sian nasida naung monding i.

H.   Ai na tuat ma Tuhan i,  sian banua ginjang mardongan suraksurak, marsoara ma raja ni surusuruan, tarbege ma sarune ni Debata. Dungi hehe ma jumolo angka na mate di bagasan Kristus.

U.   Dung songon i, hita angka na mangolu dope angka na mian i, taitonNa ma hita raphon nasida di bagasan angka ombun, laho manomunomu Tuhan i tu langit an. Jadi olat ni i sai tongtong ma hita  rap dohot Tuhan i.  

H.   Dibahen tama antong, lam sumurung hita di parange na badia, dohot hadaulaton,  jala taharingkoti ma asa didapot Tuhan i hita so martihas, so hasurahan alai di bagasan dame.

U.   Jala  unang  be sai marsak rohamuna marningot angka nasida naung monding, alai naeng tarapul jala benget  di bagasan panghirimon na mangolu. Songon nidok ni endenta sian  buku ende nomor 347 : 1-3  (BL.11) , “sai masipaidaan do sogot angka na porsea i, dung sahat be langkana tu hasonangan I”, jongjong ma hita, laos taendehon ma. (lembut).

Ø  Sai masipaidaan do na porsea i. Dung sahat be langkana tu hasonangan, tu hasonangan i, tu hasongan i.

Ø  Antong burju ma hita mangalo dosa i. Sai unang tading hita di tonga  dalan i, di tonga dalan i, di tonga dalan i.

Ø  Sai masipaidaan ma hita on muse di lambung ni Tuhanta i dung monang hita be, dung monang hita, dung monang hita be.

U.   Martangiang ma hita   ( baca Agenda bag. E : II  Parningotan di angka na monding, jala dung amen hundul ma saluhutna )    

17.  Marende  BE.541: 1- (Na Mulak Jesus i )   BL. 373  Pel. IA& I B

Ø  Na mulak Jesus I di hasangapon i. Mangalap na badia I tu hasonangan i. Hutundalhon ma na di pudingki, Jesus ma haposanhi di haroroNa i.

Ø  So tung na tading au, di haroroNa i. So tung ditiop rohangkon na olo sego i. Hutundalhon ma……                    

Ø  Nang arta sangap i, tu aha ringkot i, na tinggal do sudena i di hamagoan i.  Hutundalhon ma….

Ø  Ias ma rohangki dibaen mudarNa i. So tung di haroroNa i ramun sambing ma i. Hutundalhon ma….

18.  Jamita   Johannes 11: 25-26 .

19.  Marende  BE. 544: 1-  (Molo Ro Panjou ni Tuhan )   BL.419  Pel.  II

Ø  Molo ro panjou ni Tuhan molo salpu tingki on, molo binsar bintang sipaias i. Jala sahat ma tu ginjang angka na tinobus I, dohot au dibaen Tuhanta lao tusi. Molo jouon ni Tuhanta angka goar di pustaha, dibaen asi ni rohaNa, alusanhu: O Tuhanhu, au di-son.

Ø  Molo dapot tingki hehe angka na tinobus i, idaon nasida Tuhan Jesus i. Di panghuling ni sarune lao manomu Tuhan i, dohot au dibaen Tuhanta lao tusi. Molo jouon, …..

Ø  Dibaen i,  o ale dongan ringgas be hita on, pararathon harajaonNa i tongtong. Ai dung salpu tingki on na masuk be tu surgo i, dohot au dibaen Tuhanta lao tusi. Molo jouon, ….

20.  Agenda: Tangiang-Ende  Pelean, Ale Amanami, Pasupasu. Amen3x

                                                                               

PARTURE  NI PARMINGGUON

 DI HKBP DISTRIK X MEDAN ACEH:

MINGGU UJUNG TAON PARHURIAON –

PARNINGOTAN DI ANGKA NA MONDING

                                   

TOPIK:

JESUS DO HAHEHEON DOHOT HANGOLUAN

Oleh : Pdt Gerhard P Sihombing, M,Th

Debata Manjou Jala Marsuru Naposona

                                                                                             Teks  :  Jeremia 1 : 4-10

Debata Manjou Jala Marsuru Naposona

Patujolo

Konteks  ni turpuk on, ima taringot tu panjouon dohot parsuruon ni Debata tu naposoNa si Jeremia gabe panuirang, di masa andorang so tarbuang  sahat tu partingkian na tarbuang bangso Juda tu Babel. Tarjaou do panurirang Jeremia di habajaronna laho pangingothon bangso i asa marhamuabon. Na mangula do si Jeremia gabe panurirang di keadaan social politik dohot agama di Juda na kacabalau. Ingkon pangiton ni si Jeremia ma raja ni Juda asa unang “bekerjasama” tu angka bangso sileban di bidang social, ekonomi dohot politik. Mara bolon do hatiha i tu Juda cara na songon i, ai ingkon do jaloon ni Juda kehadiran ni debata sileban di tonga ni bangso i. Ndang sala na kerja sama  dohot na sama-sama bekerja di angka ngolu siganup ari alai unang ma sahat tu na “manjehehon” ugamo manang Tuhan i, jala gabe mamboan mara tu bangso. Marhite turpuk on naeng idaonta songon dia ma Debata manjou na gabe naposoNa, jala angka aha ma siulaonna.  Di konteks ni turpuk on “naposo” ni Tuhan terbatas do di ulaon parsuruon gabe panurirang, alai di jamita boi pahembanghon ala sude do na porsea di Kristus tarrajum naposo ni Tuhan i.  

Hatorangan

1.      Tangihon ma suara panjouon ni Tuhan i.

Marragam do cara ni Debata manjou jolma i gabe naposoNa. Godang do jolma na berkeinginan gabe parhalado di tonga ni huria alai ndang saut. Adong do halak na so adong hian rohana , bahkan alo tu rohana gabe parhalado alai gabe boi parhalado.  Adong muse do na sian hametmeton nunga sai dipasuman dirina naeng gabe parhalado, adong na tulus alai adong na so tulus. adong do sian mulana nunga diparade Debata, alai adong do na tarjou panandaon , pertobatan dohot dung magodang isara ni si Paulus. 

Ndada jolma i sandiri na mambahen ibana gabe parhalado di huria i, alai Tuhan nampuna huria i do.  Ndada hamu mamillit Ahu, alai Ahu do mamillit hamu jala hupadiri hamu asa laho hamu marparbue (Joh.15:16); Ndada angka sisean i na mamillit Tuhan Jesus gabe guruna, alai Jesus sandiri do na manodo  jolma i gabe siseanna (Mat. 10: 1-8). Songon i do na masa tu Jeremia na bajar i, dijou Debata Ibana asa manurirangi di tonga bangso na rundut i. Ndada halak na manjujui ibana, manang na borhat sian keinginanna, alai na dibege ibana do suara  panjouon dohot parsuruon i sian Tuhan i.  Angka jolma na tubu rohana naeng marhobas di ulaon ni Tuhan i dohot angka naung marhobas tama do merenungkan “ Aha do na mangonjar dohot na mangihot rohana gabe parhobas di ulaon ni Tuhan i ?”.  Denggan do ratarataanta suara panjounta  gabe parhalado ni huria i, asa taboto mulak tu motivasi na sintong i.  Manang dia pe latarbelakang  dohot dalan ni Debata manjou angka naposoNa, saluhut do nasida  naposo ni Tuhan. Alai na rumingkot ima boha do hita “menghargai” manang mangulahon  panjouon dohot silehonlehon na tu hita be. Dibahen sai tongtong ma tangi di suara ni Tuhan i, na manjou, na manungguli jala na mangari naposoNa.

2.      Dijou ndada siala keistimewaanta

Molo tatanda do dirinta di adopan ni Debata , tung mametmethu do jolma i  gabe naposoNa , sipasahat tona ni Debata. Ai na badia jala na songkal do Debata,  hape hita jolma na gok hagaleon,dohot dosa. Tarlobi molo diperhadaphon muse tu balga ni tantangan  na ingkon adopan ni naposo ni Tuhan i.  Silehonlehon ni Debata do  hapistaran, hatuaon, hagogoon, torop ni partubu, dohot sinadongan alai ingkon tangkas botoon jala haporseanta ndada binahen ni i umbahen na dijou Debata hita gabe naposona di huria i.  Siala ni i: habajaron, hapogoson, hametmeton dohot  jenjang pendidikan ndada gabe hatontuon na mutlak i manjadihon naposo ni Debata., alai na boi hasea do i gabe alat pendukung dipanjouon parsuruon i. Gabe hamba Tuhan mutlak do otoritas ni Debata. Molo otoritas ni Debata do panjouon gabe naposo ni Debata, tama ma antong angka  na tarjou unduk, marhaserepon, jala pangoloi di sude ulaon na pinasahat ni Tuhan i tu hita marhite huria i hombar tu angka tohonanta be jala dao sian angka sidalian.  Taloas ma Debata na mangula, unang ma pikkiranta, roha-rohanta, malo-malonta, dohot hagogoonta, alai tapangasahon ma pandonganion, bisuk dohot hagogoon ni Tuhan i, asa tau hita mangulahon ulaon ni Tuhan i

3.      Ulaon ni Naposo ni Tuhan i.

Ulaon na borat jala na gok tantangan / resiko do molo rade hita gabe naposo ni Tuhan i. Ai ingkon hatindanghononta ma na sintong i, jala ingkon aloonta ma angka pangalaho, ulaon dohot hasomalan na so hinalomohon ni Tuhan i. Tung songon dia pe maolna dohot tantangan na ingkon masa di tonga ni panghobasionta i, ndang jadi sumurut, alai tapangasahon jala ingkon pos do rohanta di Ibana na manjou jala marsuru hita tu ulaon i.  Di bahen i tama do ganup naposo ni Tuhan ingkon tongtong di bagasan haserepon ni roha, jala martangiang asa didongani jala dirupi hita. Sipasidingon do neang dohot langgus ni roha di sude ulaon tarlobi di ulaon ni Tuhan i . Ai ndang tarula hita agia aha molo so mardonganhon Kristus i (Joh.15:5), alai saluhut do tarpatupa hita di bagasan Ibana na margogoihon hita ( Fil.4:13).

Hahonaan tu Jamita

1.      Jamita on na naeng pangingothon angka ruas ni huria naung gabe partohonan asa tongtong mangargahon tohonan na jinalona be di tonga ni huria, masyarakat dohot secara langsung tu Tuhan i.

2.      Huaso dohot hagogoon na sian Tuhan i do na patauhon angka parhalado mangulahon tohonanna be, ndada siala ni hadirion ni jolma i, dibahen i serep ma rohanta jala tongtong marpasaoran na sintong tu Tuhan i.

3.      Hahonaan tu ruas: Angka naposo ni Tuhan i do parhalado i, na sinuruna laho paingothon hita asa mulak sian “haholomon”, jala asa mian di bagasan “hatiuron”. Dibahen i tama do ingkon las rohanta siala barita na uli na pinasahat ni angka naposo ni Tuhan i. Angka ruas na porsea di Kristus, na tarrajum do nasida songon angka malim, naposo ni Tuhan i, di bagasna, ulaonna, masyarakat (1 Pet.2:9).  Siala ni i ganup ma halak Kristen  mangolu hombar tu hata ni Debata na dijabarkan marhite angka ruhut-uhut na denggan na mengatur parngoluon asa patar harajaon ni Tuhan i di portibi on.

4.      Turpuk on boi do sada ojahan dohot motivasi di hita nang di huria pe laho mempersiapkan generasi muda    ( Yeremia tarjou di bawah umur ) laho pauliulihon huria, dohot bangsonta.

                                                                                                                     =Pdt Gerhard P Sihombing,