Jeremia 20 : 7 – 13 Mangihuthon Jesus Mamorsan Silang

 Jeremia 20 : 7 – 13

Mangihuthon Jesus Mamorsan Silang

I. Patujolo

Jeremia ima anak ni malim Hilkia di Anatot di luat Benjamin (1 : 1). Jeremia dipabangkit masa ni Joiakim, anak ni si Josia, raja sian Juda sahat ro di ujung ni pasampulusada taonhon hinarajahon ni si Sedekia, anak ni si Josia, raja ni Juda, sahat ro dihabubuang ni Jerusalem palimabulanhon (1 : 3). Sada halongangan na di patupa Debata tu si Jeremia ima tagan so dijadihon di bortian nunga ditanda Debata ibana, jala nunga diparbadiai Debata si Jeremia, huhut dipabangkit Debata ibana gabe panurirang tu angka bangso (bnd. 1 : 5). Disoarahon Debata tu si Jeremia, asa unang mabiar maradophon manang ise, siala Ahu donganmu, paluahon ho (bnd. 1 : 8). Hupabangkit ho laho mangurati dohot maniaphon, mangago dohot mangaloha, paulihon dohot manuan, ima padan ni Debata tu si Jeremia (bnd. 1 : 10).

Marragam do angka hamaolon dohot hasusaan na diadopi ni si Jeremia. Ndang adong hasatiaan ni bangso Israel di Jahowa Debata. Tongtong dope nasida manomba ganaganaan, mamele jala mangulahon marmainan di ngolu parsaripeon i atik pe nunga di habuangan Babel nasida. Alani i, mangalualu panurirang Jeremia tu Debata ala ni dokdok ni ulaon na pinasahat ni Debata tu ibana. Boasa masa na songon i di nasida. Tapaihutihut ma hatoranganturpuk Jamita on

 

II. Hatorangan Ni Turpuk

Didok panurirang Jeremia diturpuk on, ingkon idaonna do partubolon ni Jahowa tu angka halak na mangharingkothon hosana. Ala sai hata panguhuman do na pinabotohononna tu bangso i. dung i dielek si Jeremia do bangso i asa maporus sian huta Jerusalem, ala ingkon lengsehonon ni raja Nebukadnesar huta i dohot bagasjoro ni Debata. Alani i, didok halak do na pengkhianat si Jeremia asa maporus sian huta i. Nang pe manimbil halak Israel sian parpadanan nasida dohot Debata, marhitehite na laho nasida marsomba tu debata sileban ni halak Kanaan. Manongtong do asi ni roha ni Debata di bangso i tu habuangan Babel. Pitupulu taon leleng ni bangso i di buang tu Babel (Jer. 25 : 12). Ro Debata papunguhon nasida asa mulak tu tano na niuarihon ni Jahowa asa gabe milik pusaka nasida. Asa manongtong asi ni rohaNa tu bangso i. Siala di oloi Jeremia pandohan ni Debata, gabe sireheon ni na torop i ganup ari ibana, siala tongtong ibana mambaritahon denggan basa dohot asi ni roha Debata, (ayat 7). Jolma na lea do ibana siala barita nauli sibaritahononna. Gok pangarupaon dohot hamagoan tarlumobi pangareheon dohot insakinsak ganup ari di jalo si Jeremia (ayat 8 – 9). Atik pe secara hajolmaon ndang margogo ibana, alai tongtong ibana pasahathon saluhutna tu Tuhan i. Torop jolma tingki i manghalomohon asa madabu si Jeremia siala mamaritahon Tuhan i (ayat 10). Dipasahat si Jeremia saluhutna tu Jahowa Debata, dihaporseai ibana, Debata mamaloshon saluhutna (bnd. Rom. 12 : 19) (ayat 12). Didok Jeremia “marende ma hamu, mamuji Ibana, siala Ibana paluahon halak na pogos tondi sian tangan ni angka parjahat” (ayat 13).

III. Sipahusorhusoron

1.     Unang hita manimbil marsomba tu debata sileban manang aha pe na masa dibagasan ngolunta. Songon na masa di bangso Israel, mura – mura bangso i manimbil sian Tuhan

2.     Sada parsiajaran na arga di hita, asa tongtong marbarita nauli hita, denggan manang na so denggan tingki na. Manang didia pe hita mamaritahon hata ni Debata, tongtong satia hita di Ibana. Amen

 

Ibadah Padang Parompuan HKBP Maduma Pangkalan Kerinci

 

I.                   Run Down Acara Ibadah Padang

 

II.                 IBADAH

1.     Marende BE No. 569 : 1-2      “O Debata Tung Longang Do Rohangku”

Ø    O Debata tung longang do rohangku molo hubereng na tinompaMi. Saluhut Bintang hilap dohot ronggur manghatindanghjon hasangaponMi. Reff: Marende au Tuhan mamuji Ho O Debata sangap do Ho, marende au Tuhan mamuji Ho O Debata sangap do Ho.   

Ø    Di ladang di adaran dohot tombak, marende pidong tung mansai sonang. Punsu ni dolok sunge dohot rura, mamaritahon sangapMi Tuhan. Reff: Marende au Tuhan …..

2.     Votum/Intoitus-Tangiang

L:         Marhitehite goar ni Debata Ama dohot goar ni AnakNa Tuhan Jesus Kristus dohot goar ni Tondi Parbadia na tumompa langit dohot tano on.

S:         Amen.

L:         Songon on hata ni Tuhan Jahowa: Manang ise na mamelehon hamauliateon, i do na pasangap Ahu jala mambahen dalan, asa Hupatuduhon tu ibana hatuaon ni Debata.

S:         Halelluya

L:         Martangiang ma hita. Ale Jahowa Tuhannami mandok mauliate do hami tu joloM sadari on ala diparhatopot rohanami do godang ni asi ni rohaM dohot pasupasuM na sai tongtong marmuduhon jala mangiringiring pardalanan ni ngolunami siganupari. Sahat tu tingki on boi hami hipas jala  marlas ni roha sahat tu inganan on, di Ibadah Padang Parompuan rap dpohot keluarga na pinatupa ni huriaM HKBP Maduma sadari on. Ale Tuhan diida Ho do hami di ombas on, hupapulik hami tingkinami na arga na pinasahatMi tu hami, laho mandohoti kegiatan on,  asa anggiat marhite angka kegiatan na naeng sipatupaonnami gabe lam martambatamba hinsa ni rohanami laho mamuji dohot pasangaphon goarMu na badia i huhut asa lam imbaru  gogo dohot las ni rohanami mangulahon angka tugas dohot tanggungjawabnami siganup ari di tongatonga ni bagasnami nang di tonga ni huriaM.. Pos do rohanami Tuhan ditatap Ho do hami sian habangsaMi, antong usehon ma angka pasupasuM dohot denggan ni basaM tu hami saluhutna angka na pungu ro sadari on marsomba tu adopanMu na badia i. Antong asi ma rohaM di hami sai jongjongi jala sondangi ma parpunguannami on, baen sangap dohot pamujian di goarMu na sun badia i.

S:         Amen.

 

3.     Marende BE No. 716: 3   “Di Na Mamolus Sandok Ngolu On”

Ø  Ula na denggan tu halak sude, songon binaenNa tu ho,

Ingot urupi luhut na gale, gabe parholong ma ho. Bahen ma ahu parhiteanMu pasupasuM mabaor ma i. Ale Tuhanku patupa ma au, baen pasupasu tu dongan sude.

 

4.      Epistel: Psalmen 146 : 1-8

.

 

5.     Marende BE No. 557:1-2      “Dao Dumenggan”

Ø    Dao dumenggan, asi ni rohaM. Dao ummarga sian ngolungkon. Sai pujionku ma Ho Tuhanku, Dao ummarga, asi ni rohaM.

Ø  Ala goarMu ro do au tu Ho, Herbang tanganhu, lao mamuji Ho, Dao ummarga sian ngolungku, Dao dumenggan asi ni rohaM.

6.     Renungan

7.     Marende BE No. 187:3    “ Denggan Do PanoguM Ale Jahowa”

Ø  Dialo Ho sude na jungkat roha, na timbo I dipatutoru Ho. Alai sude na serep i marroha, i do na sai diasiasi Ho. Parhata gogo di tano on dihagigihon rohaMi sude, na dangol i ditatap Ho hape, naeng urupanMu angka i tongtong .

8.     Tangiang Pangondianon

9.     Marende BE No. 487: 1---- “Tung Halak Na Margogo Sipartangiang i”   (Pasahathon Pelean)

Ø  Tung halak na margogo sipartangiang i, dokdok pe sitaonon ndang olo talu i. Pos situtu rohana di Debatana i, Tuhanna manaluhon sude pangalo i.

Ø  Nang hirahira mogap dibaen sitaonon i. Marsinggang do ibana managam Tuhan i. Dung jumpang pe tingkina sumurut arsak i. Tarapul ma Rohana dibaen Tuhanna i

Ø  Imbaru panghirimon nang hagogoon i. Margogo marsahala do partangiang i. Togu muse langkana lao marjamita i. Ai Kristus do donganana di ulaonna i.

10.Tangiang Pelean/Ale Amanami/Pasu pasu

III.             PENGUMUMAN SIAN PENGURUS

IV.              COFFE BREAK

V.                 LATIHAN KOOR

VI.              GAMES

VII.           MAKAN BERSAMA

VIII.        BERENANG

IX.              COFFE BREAK

X.                 PETUTUPAN

XI.              SAYONARA

EV: JEREMIA 15:15-21 “HATAMI DO LAS NI ROHANGKU”

 

BAHAN SERMON PARHALADO HKBP RESORT AGAPE PANGKALAN KERINCI

MINGGU, 30 AGUSTUS 2026

EV: JEREMIA 15:15-21                                                                        EP: 2 TIMOTEUS 4:6-8

“HATAMI DO LAS NI ROHANGKU”

I.                Patujolo

Koor AMA MADUMA HKBP MADUMA PANGKALAN KERINCI

Panurirang Jeremia i ma sahalak anak ni malim, sorang jala magodang di Anatot di tingki panggonggomion ni raja Manasye. Songon sahalak panurirang, Jeremia manghobasi tu harajaon Israel Selatan (Jehuda). Di ida ibana do Israel ditaluhon, ditaban bangso Babel, dohot bagas joro di Jerusalem dirongsohon. Buku panurirang Jeremia patuduhon songon dia dokdok ni ulaon panurirangon i, mamboan tona na mansai borat, alai si Jeremia tongtong marroha na lambok huhut magopu (Jer. 8: 21 – 9: 1). Songon sahalak parroha na lambok alai gabe magopu ma ala barita na binoanna i ditulak jala dialo angka panurirang pargapgap, malim, raja dohot torop sian bangso i. Nang pe songoni pangalaho ni bangso i tongtong do dihobasi ibana, hansit do alai ditaon ibana, borat do alai dituhuk ibana, sihabiaran do alai barani do ibana, mangandung/tumatangis do ibana alai tonggor do matani haporseaonna tu Debata, jala lungun do alai satia do ibana mangalangkahon ulaon i. Sai jotjot panurirang Jeremia didok songon “The weeping Prophet” atau Nabi yang menangis (bdk. Jer 9: 1). Di saluhut angka na masa dibagasan pardalanan ni panghobasion ni si Jeremia, sahat ma hita di turpuk ta Bindu 15 on, manang na jotjot didok “Confessions of Jeremiah” manang Panghatidanghonon sian Jeremia marhite naeng dipataridahon tu hita ima saluhut alualu ni si Jeremia tu Jahowa Debata di bagasan panghobasionna manurirangi angka pangisi ni Bangso Jehuda i.

II.     Hatorangan ni Turpuk

Ayat 15

Diboto jala dihaporseai panurirang Jeremia do, paboa saluhut diboto jala diantusi Debata aha na niadopanna. Alai nang pe songoni tongtong do dipatolhas ibana alualuna dohot lungun ni rohana tu Debata. Di alualuna i, mangelek do panurirang Jeremia asa sai diingot jala diluluhon Debata ibana, asa unang salpu ngoluna sian panatapan dohot panarihononNa. Mangelek ibana asa Debata patupahon partubolan maradophon angka na mangelele ibana. Ndang dirajumi panurirang Jeremia asa ibana ma na mambaloshon hajahaton ni angka na manghasogohon ibana, alai tu Debata do dipatolhas, asa Debata ma napatupahon uhumNa

Ayat 16

Di dokdok ni parsorion na ni adopanna i, Hata ni Debata do na gabe las ni roha ni panurirang Jeremia. Ndang adong ojahan na asing nda holan Hata ni Debata sambing do. Las ni rohana ndang disuhat marhite sinadongan, marhite arta, manang hasangapon. Ojahan ni las ni rohana holan ala jumpang dohot Hata ni Debata. Boasa? Ai Hata ni Debata do gogo mangadopi hasosahan i, Hata ni Debata do bisuk mangadopi angka panurirang pargapgap dohot panggonggomi i.

Ayat 17

Dipabotohon panurirang Jeremia do paboa na ndang hea ibana rap hundul dohot halak pangarehe asa las rohana, asa mengkel ibana. Mamulik ibana ala tung tangkas diboto ia Hata ni Debata ingkon patolhason marhite ulaon na marsitutu. Dipillit ibana do punjung sian angka pangarehe asa unang marlaok tona manang Hata ni Debata, alai asa tongtong polin jala badia. Tarida do parsitutuon ni ibana mamehon ngolu tu hapeahan na sintong.

Ayat 18

Diulahi panurirang Jeremia muse patolhashon ponjot ni rohana tu Debata. Hira na tubu do pandelean ala hira so maralus alualu dohot elehelek na i. Ndang adong dope masa songon na nihirimna i.

Ayat 19 – 21

Ditangihon jala dialusi Debata do hape alualu dohot elehelek ni panurirang Jeremia, ndang salpu boti manang dipasombu ibana. Debata do na padirihon naposoNa si Jeremia songon parik haksa na gogo. Songon dia pe gogo dohot godang ni musu na ro manahop ngoluna, Debata do na mangalinggomi dohot mangondihonsa. Debata na manjaga sian tangan ni angka parjahat dohot angka pangarupa. Pangodihonon ni Debata mangalehon hamonangan maradophon angka naposoNa. Molo Debata donganta, ise ma alonta? On ma sitiopan na gomos di panurirang Jeremia mangulahon ulaon parsuruon na dokdok i.

III.   Sipahusorhusoron

a. Panurirang Jeremia marhobas di tongatonga ni partingkian na mansai maol. Mamungka sian haposoonna nunga disuru Debata ibana laho manurirangi maradophon bangso na tangkang roha. Borhat do ibana nang pe dokdok, ala diboto jala dihaporseai ibana do na marsuru i ima Debata Jahowa. Debata do na marsuru gabe arga ma parsuruon i. Hita pe angka na sinuru ni Debata Jahowa di tongatonga ni portibi on. Songon halak na porsea, songon parhalado, songon angka naposoNa naeng ma arga di rohanta parsuruon naung sahat tu hita ai sian Debata do i.

b. Ndada holan ulaon i na dokdok, alai halak na niadopanna pe maol do, ima angka panurirang pargapgap dohot panggonggomi na jogal roha. Magopu do rohana jala melengleng ateate hinorhon ni panosak ni na masa i, alai ndang sumurut ibana. Hot do ibana jongjong songon sahalak panurirang. Boi do masa tu hita angka na dokdok jala maol nang di partingkian on. Mangadopi i, godang do na sumurut, mabiar, lomos rohana manang gabe manundalhon Debata. Gabe tiruan na arga ma tutu pambahenan ni panurirang Jeremia, ndang adong sidalian laho sumurut sian parsuruon ni Debata.

c. Ndang ragam dihasiholi ibana laho mambahen las rohana, alai molo nunga tolhas Hata ni Debata tu ibana singkop ma dihilala panurirang Jeremia. Ojahan na arga situtu do on. Marhobas songon sahalak parbarita nauli ndang mardangkai hagiot ni rohana. Tulus jala bulus do rohana marhobas, pos rohana na sarihonon ni Debata do ngoluna jala apulanNa molo masa parsorion.

d. Debata do na mangondihon jala mangaramoti. Molo marsihohot mangasahon dohot manghaposi Debata idaon ni angka naporsea i ma tanda hadirion ni Debata di ngoluna. Songon tema tahun Transformasi: Pengajaran Iman di Tengah Keluarga, naeng ma tangkas ganup keluarga/rumatangga marhaporseaon jala manghangoluhon parbue ni haporseaon. Hata ni Debata naeng tongtong marsaringar di tongatonga ni bagasta ganup, asa sude mardame sonang jala mangulahon lomoNa di bagasan las ni roha. Amen