Jamita Evangelium 4 Musa 6 : 22 – 27)

 

BAHAN SERMON PANGULA NI HURIA SARESSORT AGAPE PANGKALAN KERINCI

MINGGU EXAUDI “SAI TANGIHON MA SOARANGKU ALE JAHOWA (Psalm 27:7)

Topik : DIPASUPASU JALA DIRAMOTI JAHOWA MA HO (4 Musa 6 : 22 – 27)

 

I. PATUJOLO

       Si Musa do na manurat buku 4 Musa (Bilangan) on, ima na marisihon taringot tu pardalanan ni ngolu ni Bangso na pinillit ni Debata ima bangso Israel sian halongonan Sinai sahat tu Moab na gok hamaolon, parungkilon, parmaraan dohot ancaman sian bangso na asing na laho paagohon hosa nasida. Ido umbahen dipaingot Debata do Bangso i marhite naposoNa si Musa asa tongtong satia manghaporseai Tuhan i jala mangolu dibagasan haunduhon di aturan, hata dohot patik ni Debata, asa tung di dongani, diurupi dohot dipasupasu Debata nasida. Jala turpuk jamita biddu onom on manaringoti taringot tu Bagabaga ni halak Nasir na pasahathon dirina tu Jahowa (Nazar khusus orang Nazir yang mengkhususkan diri bagi Tuhan) 1-21. Dohot Hata pasupasu ni Malim (Ucapan berkat imam) 22-27, ima na gabe turpuk na laho sisermononta dibagasan tingki on.

 

ll. HATORANGAN NI TURPUK

       Si Musa ima naposo ni Debata na parjolo sahali dipillit dohot dipabangkit Debata di tongatonga ni bangso israel, jala naposo na manjalo Patik na sampulu sian Debata di dolok Sinai, jala naposo na parjolo na pajumpang dohot mangkatai dohot Debata laho pasahathon hataNa na laho siulahononna (Ay 22) ima na laho sipatolhasononna tu si Aron dohot angka anakna ima Nadap, Abihu, Eleasar dohot si ltamar dinalaho mamasumasu bangso lsrael (Ay 23). Jala na laho sibotoonta ima ia Si Aron ima sikkat ni si Musa laho manghatai (juru bicara) (2Mus 4:14), dohot Malim na parjolo di pabangkit Debata (2Mus 28:1) di tongatonga ni bangso lsrael. Ala ni i sikkat ni Debata do si Aron dohot sude ianakhonna laho pasahathon pasupasuNa tu bangso na pinillitNa ima bangso Israel.

       Ayat 24-27 on ima hata pasupasu (ucapan berkat)  on dang na hasil perenungan ni si Musa, jala dang na binahen ni si Aron, alai hata na sian Debata sandiri do i tu si Musa dinalaho siulahonon ni si Aron dohot angka anakna laho mamasumasu bangso israel. Artina hata pasupasu i dang sian jolma alai sian Debata tu hita jolma na tinompaNa. Hata Dipasupasu (diberkati), Diramoti (melindungi), Dipasondanghon Jahowa ma bohiNa tu ho (Tuhan menyinari engkau dengan wajahNya), Asi roha (kasih karunia), Didompakhon Jahowa ma bohiNa tu ho  (Tuhan menghadapkan wajahNya kepadamu),  dohot Dipasaorhon ma dame tu tondim (memberi engkau damai sejahtera), ima na pataridahon dengganbasa dohot asi ni roha ni Debata ditongatonga ni bangso israel dohot tu angka na porsea, dohot na mandok ia Debata sai tongtong olo rade jala satia mandongani, mangurupi bahkan mangalehon angka pasupasuNa tu bangso na pinillitNa dohot tu angka na porsea i nang i di pardagingon (sipanganon, siinumon, parabiton, hahipason, gogo, pangaramotion dohot haluaon),  nang dohot di partondion (ada hubungan yang intim antara Allah dengan umatNya melalui iman). Marhite hata pasupasu (ucapan berkat) i dipatuduhon do ia bangso israel ima bangso na pinillit ni Debata jala dimateraihon sebagai milik Allah artinya mereka hidup dibawah kendali dan naungan Tuhan. Ido umbahen dang diloas Debata bangso na pinillitNa i mangolu hombar tu lomo ni rohana sandiri, alai naeng ma nian mangolu dibagasan panoguon ni Debata marhite angka naposo napinillitNa jala mangolu dibagasan aturan dohot lomo ni roha ni Debata, asa tung unang lilu dohot  mago (binasa) ngolunasida alai mangolu dibagasan las ni roha songon na binabagabagahon ni Debata. Ido umbahen hata pasupasu (ucapan berkat)  on dang holan diampehon si Aron tu halak israel alai dohot do nang tu hita marhite tangiang pangujungi di ulaon parmingguon, ima na mandok asa porsea jala las ma rohanta na didongani, diramoti dohot dipasupasu Debata do hita laho mandalani dohot mangulahon ulaonta manang didia dohot manang sadihari pe.

 

lll. PANIMPULI

       Sude do hita jolma mangharingkothon dohot mamarluhon pasupasu dibagasan ngolu on, dengan tujuan asa sonang parngoluanta. Hape panghorhon ni dosa hamaolon, parungkilon dohot hasusaan do, jala saleleng mangolu hita diportibion pasti taadopi do i. Alai anggo halak na marhaporsean di Tuhan i do ibana songon si Musa, si Aron dohot si Daud pasti do marsihohot mangido pangurupion holan tu Tuhan i marhite haporseaon na togu dohot polin dibagasan tangiang songon na nidok ni Minggu Exaudi on “Sai tangihon ma soarangku ale Jahowa”. Ala Debata do mual ni pasupasu di tongatonga ni portibion, antong naeng ma nian hita satia marsihohot manghaporseai Ibana marhite na rade mangolu hombar tu aturan dohot hataNa, asa tung taruli hita dipasupasu saleleng mangolu dihasiangan on dohot dihangoluan na salelengnilelengna. Amen.