BAHAN SERMON JAMITA MINGGU PENTAKOSTA PADUAHON II ( 25 Mei 2026) DIBASABASAHON DEBATA TONDINA (Nehemia 9: 20-31)

 

BAHAN SERMON JAMITA MINGGU PENTAKOSTA  PADUAHON II ( 25 Mei 2026)

DIBASABASAHON DEBATA TONDINA (Nehemia 9: 20-31)

 

I.                   Patujolo

Nehemia ima sahalak pejabat di Istana Persia  di masa harajaon ni Artahasta I dung i laho muse ibana tu Jerusalem laho pasidunghon Tembok kota naung sega i. Jala buku Nehemia on di surathon di periode dung habuangan Babel  hira-hira abad pa-5 sM. Di Bindu 9 on ima bagian tangiang pangongkoun dosa ni bangso Israel jala mangalehon panindangion na mansai gogo taringot tu ulaon Tondi ni Debata naung mangula di angka partingkian na salpu. Jala martangiang do bangso Israel dung mulak nasida sian habuangan Babel na niuluhon ni angka malim jala marningot do   nasida di angka ulaon na so satia tu Debata, ido umbaen di pasahat nasida angka tangiang dohot elekelek na tu adopan ni Debata.

II.                Hatorangan ni Turpuk

Ayat 20-25

Di buhai do marhite ayat 20 on ai nungga dibasabasahon Tondi ni Debata. Jala dibaritahon do saluhut angka pambaenan ni Debata tu nasida nungga pola opat pulu taon lelengna di parmudumudu Debata nasida marhite angka naposo na. Tondi ni Debata na gabe  hataridaan holong ni Debata tu nasida. TondiNai marguna songon parhitean ni banua ginjang laho mangaleon Hatuaon, Bisuk, dohot partinandaan tu sangkap dohot lomo ni roha Debata.

Alai nang pe nungga tarpasupasu ngolu nasida di alo jala dilaosi nasida do patik dohot uhum ni Debata dohot angka panurirang naung di pabangkit Debata laho manguluhon nasida. Alai tung mansai tangkas do dibuhai marhite ayat 21-25 songon dia hataridaan holong ni Debata tu nasida. Nunga di patorop angka pomparan nasida songon bintang di langit, nungga bongot nasida tu huta naung dijanjihon hian tu angka ompunasida, jala dilean do kebebasan tu nasida laho mangula suguru di lomo roha ni nasida. Saluhut nungga dipasahat tu nasida alai aha do unok manang respon ni nasida di angka pasupasu ni Debata?

Ayat 26-31

On ma unok ni pangongkuon ni dosa, di rajumi  bangso i do na sai mulakhulak laho mangulahon dosa. Nasida do na sai mangula angka hajahaton hape nungga dijalo nasida angka basabasa na sian Debata. Jala tangkas do di pasahat di ayat 26 “ Hape lam jungkat nasida laho mangunturi jala mangalo patik ni Debata.” Alai marhite tondi ni Debata hasabaron na so marnamontok maralahon nasida. Jala di ayat 27 dipatudu do panghorhon ni na mangalo tu Debata alai laos di patudu do mansai marsitutu Debata marhite TondiNa laho mangula, mangapoi, paingothon, dohot manjou nasida asa mulak tu Debata. Punsu ni sude pambaenan ni Debata tarida ma di ayat 31 na mandok : ndang laos sun disiaphon Debata bangso i ala Debata parasiroha jala pardengganbasa do ibana. Jala basabasa na nidok na dison ima Tondi ni Debata na mian dibagasan holong ni roha.

III.             Aplikasi

Di pardalanan ni ngolu ta on tung mansai ragam situtu do angka pasupasu dohot basabasa ni Debata alai dia do na umarga sian saluhut basabasa na dipasahat Debata ima TONDI PARBADIA, na maringan dibagasan ganup hita. Hasasaor ni Tondi Parbadia bukti holong ni Debata tu angka jolma na tinompa na, jala marhite tondi i do dalanta laho mangantusi saluhut angka na masa di ganup pardalanan ni ngolunta, na mambaen hita lam tang di haporseaon. Suang songon i do bangso Israel i martangiang nasida di masa habuangan Babel jala marhite tondi ni Debata do di rajumi nasida saluhut angka sala na jala dipasahat nasida saluhut angka pambaenan ni Debata na sun denggan i.

Marhite turpuk on naeng ma nian mangolu jala mian ma Tondi ni Debata di ngolu ta ganup. Asa marhite parngolunta si ganup ari, di hagaleon, hajahaton, dohot di sitaonon jala di ragam ni parungkilon na marlaok dosa, tongtong ma tatangihon soara ni Tondi na manjou hita laho pasahaton tangiang hasesaan ni dosa, mangido gogo tu hamubaon ni roha, jala pasahaton saluhut panghirimonta tu Debata. Di tongatonga ni portibion na lam hatop mubauba on, tongtong satia ma hita di panjouonna ima gabe sitindangi Kristus. AMIN.

                                               

                                                C.Bvr Ernita Silaban S.Ag (HKBP Ebenezer Toro)