BAHAN SERMON HKBP RESORT AGAPE P.KERINCI MINGGU XVI DUNG TRINITATIS NA SUN BADIA DO DEBATA JALA PARBINOTO DI NA SALUHUTNA (HABAKUK 1:12-17)

 

BAHAN SERMON HKBP RESORT AGAPE P.KERINCI

MINGGU XVI DUNG TRINITATIS

NA SUN BADIA DO DEBATA JALA PARBINOTO DI NA SALUHUTNA

                                                                      (HABAKUK 1:12-17)

 

I.   PATUJOLO

Habakuk ima panurirang ni Debata na mangula di harajaon Jehuda di na lam jonok partingkian ni Jehuda tarbuang tu Babel di masa ni raja Joyakim. Tangkas do diida ibana hinadeak ni hajahaton, papeol uhum, dohot ginjang ni roha ni Jehuda hatiha i na so hombar tu sangkap nang aturan ni Debata paboa ingkon bangso na badia nasida ala Debata na badia do Jahowa, (Pat. Hab. 1:1-4; 3 musa 11:45). Dang ditutuptupi Panurirang Habakuk hajahaton ni Jehuda I di adopan ni Debata. Di bagasan kondisi na songoni sahat do tona ni Debata tu Habakuk paboa na naing lalu ma uhum ni Debata tu nasida marhite sada bangso ima bangso Kasdim (Hab. 1: 5-11). Kasdim/Babel ima sada bangso na bolon hatiha i na laho patundukhon nasida jala boanonna tu Babel bahen tawanan/hatoban. Sungkunsungkun do roha ni Habakuk di angka na laho masa i songon na pinatorang ni turpuk jamita on.

II.    HATORANGAN

Mangihuthon sistem harajaon ni Israel, digoari ma i Teokrasi na marlapatan Debata do raja. Asa molo pe dipabangkit raja di tongatonga ni bangso i, ndada na marlapatan gabe meret Debata sian “jabatan ni raja manang sitiop uhum partimbo”, manang gabe uhum jala aturan ni raja na dipabangkit  i na marlangku di tonga ni bangso i. Asa holan parhitean do angka raja i laho manguluhon bangso ni Debata i asa hombar tu uhum ni Debata. Domu tusi ma ala Debata do na gabe raja, sada kunci keberhasilan ni bangso i ima di tangan ni Debata. Gombaran ido na hinatindangkon ni Habakuk di ayat 12 i uju na nidokna “Nda ho do ale Jahowa Debatangku sian na robi dope na sun badia di ahu?. Ndang tagamon mate hami loasonmu”.  Lapatanna tuk, jala marhuaso situtu do Debata mangaramoti bangsona, ndang tagamon manang ise boi pasaehon nasida. Alai angkup ni i tangkas diboto Habakuk naeng paloason ni Debata Babel ima bangso na so mananda Debata laho manaluhon jala patundukhon nasida. Tutu sungkunsungkun do roha ni Habakuk di na masa i. Tung tagamon ma paloason ni Debata na badia i bangso na so mananda Debata mambondut na tumigor sian bangso na so mananda Debata i? (ayt.13; Bangso na tumigor sian ibana (Babel): diparhatutu Habakuk do nunga na jahat diula Jehuda, alai boasa justru bangso na jumahat na so marsomba tu Debata dipangke manguhum Jehuda ima Babel?.) . Tung pasombuon ni Debata ma Jehuda songon angka dengke nang gulokgulok na so margogo jala na so adong mangarajai manang manguluhon? (ayt 14) Songon na pinaandar nangkin Debata do na gabe raja jala na gabe penentu ni kejayaan ni Jehuda.

Dungi, tung sude do nasida masuk tu jala jala dipapungu tu bagasan hadanghadangan, lapatanna boanonna ma Jehuda i gabe tawanan tu Babel?. (ayt.15). Nda gabe lam ginjang ma roha ni Babel i di na masa i, jala lam mariaia nasida marsomba tu debata sileban i na dihaporseai nasida mangurupi Babel patundukhon Jehuda? (ayt 16). Manang di pandohan na asing, ala ido tradisi hatiha i, molo adong sada bangso na talu, ndada holan bangso i disi na talu, alai dohot do nang debata nasida na talu. Songoni nang baliksa, molo monang sada bangso, dihaporseai do nang naung monang debata sinombanasida I maradophon debata ni bangso na talu i. Asa marhadomuan tu sungkun sungkun ni Habakuk di bagasan ayat 16 i, boi dohonon dohot sederhana, tung talu ma Debata Jahowa maradophon debata ni Babel?. Jala na parpudi, tung  paloason ni Debata ma Babel manguduti hajahaton na pinatupa nasida i? (ayt.17).

            Songoni godang jala ganjang ma sungkunsungkun na tubu di roha ni Panurirang Habakuk marnida na laho masa tu Jehuda i. Hira so tarjalo rohana na masa i, jala hira na suhar tu pingkiranna na laho masa i. Jala manghamham sude sungkunsungkun i,  aha jala songondia do sasintongna sangkap ni Debata na laho patupaonNa?.

III.     PANUTUP/REFLEKSI

Tutu boi do godang sungkunsungkun na tubu di rohanta tarlumobi molo taida na masa i hira so siat tu roha nang pingkiranta na boi berujung tu kebingungan pola tahe na deba mungkin mansalahon Tuhan i. Manang, boi do ra sarupa sungkunsungkun di roha nang pingkiranta dohot sungkunsungkun na pinatolhas ni panurirang Habakuk on. Dison ma hinaringkot ni panindangion paboa diboto Debata do aha na naeng siulahononna dohot na nanaeng sipamasaonna, alani  ingkon marsitutu do hita marhatopothon paboa saluhut sangkap na denggan do sinangkapan ni Debata tu na niasiannna. Manang di pandohan na sederhana, taingot ma songondia do hadirion ni Debata I, ima paruhum na tigor jala parasi roha di angka na tigor marroha.  Asa domu tusi ingkon di bagasan hasatiaon dohot haporseaon do hita paidaida pambahenan ni Debata i sahat tu ujungna. Asa ndang boi hita marnida holan sian jolo manang holan intap ni parsitongaan, alai ingkon singkop do idaonta sahat tu ujungna.

 Tarlumobi songon na masa di bagasan turpuk on, boi do gabe ganggu rohanta molo mansohot hita manjaha holan intap ni ayat 17 on. Alai molo tauduti sahat tu bindu na mangihut tontu dapot hita do alus taringot tu sungkunsungkun ni Habakuk on. Di bindu 2 patar do dialusi Debata Habakuk paboa ndada na masisombu Debata mida hajahaton ni Jehuda, jala ndada na masisombu Ibana nang marnida hajahaton ni Babel, ai Debata na badia do ibana na so lomo roha paidaida hajahaton. Alani hombar tu habadiaon ni Debata ingkon hona uhum do nasa na so tigor, alai anggo halak partigor i mangolu do binahen ni parsihohotonna marhaporseaon (2:4). Jala molo pe dipangke Debata Babel ndada na laho maniaphon/membinasakan Jehuda, alai manguhumi manang mangajari nasida do taringot tu identitas nasida bangso ni Debata na so boi maralo tu uhum manang aturan ni Debata.

Alani do molo tauduti manjaha tu bindu 3, tangkas gabe sai songonna maila do Habakuk jala unduk di alus ni Debata maradophon sungkunsungkunna i, jala diujungna gabe diolophon ibana Debata di bagasan hatigoranNa i. (3:18-19). Asa sian i tangkas ma di hita, Debata do na umbotoan di saluhut na naeng sipamasaonNa ndada jolma i. Ise ma ulaning jolma i (na ditompa) martimbangkon Debata (Panompa), umbahen na gabe jolma i na manuturi Debata di sangkap nang pambahenanNa nang di bagasan huasoNa i? (pat.Jes 40:13-14; Rom 11:33-34). Alani i sikapta di na mangadopi angka ragam ni sungkunsungkun na songon na masa di Habakuk on ima, na parjolo ingkon borhat sian panandaion taringot tu hadirion ni Debata i do na berdaulat di saluhut na tinompana. Jala na paduahon ingkon tangkas di bagasan haundukon ni roha maradophon hahomion/Kedaulatan Debata i (kita harus menghormati sisi misteri keagungan Allah yang tidak mungkin bisa dimengerti/dijangkau sepenuhnya oleh manusia yang pada hakekatnya adalah terbatas). Asa di bagasan hahomion/kedaulatan ni Debata i do Ibana mangaturhon saluhutna tu hadengganon.  Tuk do Ibana mambahen sangkap na denggan nang di bagasan angka hamaolon na suhar tu pingkiran ni hajolmaonta (Pat. 1 musa 50:20; Rom 8:28).   

                                                                                                                  Pdt. T. A Gultom, S. Th