I. PATUJOLO

Jesus Kristus ima teladan dihita halak Kristen, na serep maroha (teladan kerendahan hati dan ketaatan yang mendatangkan kemuliaan). Di Minggu

Palmarum on, taringot hita tu sada peristiwa haroro ni Jesus tu Jerusalem na ditomu do ibana mardongan maremare (Daun Palem) songon simbol hamonangon (kemenangan) dohot hagogoon (kekuatan) jala joujou: “Hosiana! Pinuji ma na ro marhitehite Goar ni Tuhan i!”. Ala piga ari dungkon panomuoni, joujou ni torop halak i muba ma gabe: “Silangkon Ibana”. Boasa boi muba roha ni jolma? Ala ndang diantusi nasida hian “Raja” na songon dia Jesus

i. Di pingkiran ni halak Jahudi tingki i, Raja na naeng ro ima Raja na marhagogoon (politis), na mamboan sinjata, na naeng mangalo penjajahan Roma jala na mamboan hamuliaon na tarida, Hape haroro ni Jesus marasing sian na dipingkiran nasida, Ia Jesus ro gabe Naposo na Serep Roha. Turpuk Pilippi 2:5- 11 on laho patoranghon tu hita songon dia do sasintongna Jesus i, Ibana do Debata na gabe jolma, na mate di silang, alai na dipatimbul do Jesus i Gabe Tuhan. (Paulus naeng paingothon tu hita marhite turpuk on, molo naeng tapuji Jesus gabe Tuhan di Minggu Palmarum on, unang ma tapuji ibana holan alani “HagogoonNa” alai tapuji ma tong Tuhanta i alani Haserepon ni RohaNa. Paulus mangalehon sada haporseaon ia Kristus Jesus na Gabe Tuhan i, ndang mamereng hamuliaon i gabe sada paruntungon na gomos ditiop (sebagai milik yang harus dipertahankan) alai ala dipaserep do diriNa (Mengosongkan diri). Umbahen didok di ayat. 5 i asa marroha songon parrohaon ni Kristus ma hita. Asa tiruan ni Kristus i ma taparrohaon, dia ma i? Ima boi tabereng di hatorangan ni turpuk na adong di bahan sermonta on.

II. HATORANGAN

Mangalehon roha dohot pikiran asa Sarupa dohot Kristus (5)

Di bagasan ayat 5, andorang so dipatorang si Paulus, songon dia pambahenan Kristus, na ingkon si ihuthononta. Parjolo dipasahat ibana asa hita mambahen rohatta dohot pikiranta Sarupa dohot Kristus (meneladani Kristus). Songoni do parngoluan na dipasupasu Debata, na mambahen Kristus gabe pusat (sentral) di parngoluonta.

Jesus paserep rohaNa gabe hatoban (Pengosongan diri: knosis 6-8)

Jesus I ro sian Ama na di banua ginjang, tuat di portibion, jala dipatutori ibana do dirina. Ndang dirajumi rohaNa, TudosNa i tu Debata (tidak menganggap kesetaraan dengan Allah itu sebagai milik yang harus dipertahankan). Di paboa Apostel do tu hita, ia Ibana do Rupa ni Debata na gabe silehon hosani nasa na mangolu, jala nunga mian di Ibana hamuliaon Debata. Alai dipaserep ibaNa do diriNa gabe jolma na manghilalaon songon dia mangolu rap dohot angka dosa, jala dihilala ibana do songon di ana male, hansintan, mauas. Pola do didok di ayat 7 “dirumari do diriNa jala disolukkon rupa ni Hatoban.”. Hatoban ima molo

talapati secara hajolmaon, boi do pangantusion ni on ima songon budak na dipaksa laho mangoloi angka parsuruon ni tuan na. Jala on do na gabe sada keraguan di angka na porsea hatihai, boasa sahalak Raja olo gabe jolma/Hatoban? Dilea i? Pangalapation na naeng pasahaton ni turpukta on ima na pataridahon haroro ni Kristus tu portibion ndang na holan dipujipuji songon pejabat, penguasa na adong di portibi on, alai laho manghobasi (Melayani bukan untuk dilayani) do Ibana laho mangajari hita jolma dohot paluahon hita jolma sian haholomon ima hadosaonta i.

Haunduhon ni Roha sahat tu Hamatean di Hau Pinarsilang (Ay.8)

Ta ida do di bagas ayat on, puncak ni haserepon ni roha ni Jesus Kristus. Na dipasahat apostel Paulus: “Ibana nunga patoru diriNa, mangoloi sahat tu hamaten di Hau Pinarsilang”. Haunduhon Kristus tarida ma sian na mangoloi ibana di parsuruon ni Debata Amana I. Dang manjua Ibana, di angka sitaonon i, marsitutu do dipasahat Jesus i diriNa gabe dalan laho paluahon angka Jolma i. patuduon, ndang holan mementingkon diriNa sandiri. Nang pe nunga diboto Ibana, songon dia partdingni, pardalananna, di hau pinarsilang na gabe dalan hamatean na lea (paling hina) hatihai. Ala pangantusion angka jolma, taringot tu hau pinarsilang hatihai, ia halak na madabu tu uhum na diparsilanghon, ima halak na marlea, na mambahen tindakan kejahatan/kriminal. Mate di hau pinarsilang lapatanna mate songon sahalak parjahat na mansai lea. Unduk do roha ni Kristus dohot alani holongNa ingkon dalanan ni Jesus do proses i asa disesa nasa dosanta dipaingot tu hita angka halak na porsea, asa maniru hadirion ni Jesus hita, ima ndada holan dihasangapon maniru Jesus, alai maniru Jesus na boi manaon na hansit alani Kristus, sahat tu hamateanta.

Panindangion: Jesus Kristus Do Tuhan (Ay.9-11)

Haserepon ni roha ni Kristus Tuhanta i gabe dalan hamuliaon na sian Debata jala dipatimbul do Ibana. Dipasahat do tu Kristus i huaso partimbo na mangarajai saluhut na adong. Ibana mangarajai portibion ro di nasa isina. Ibana mangarajai saluhut jolma manisia. Ingkon tu Jesus Kristus do hita marsomba, ndang tu Kesar, ndang tu hepeng manang mammon. Anak ni Debata do Ibana, naung manaek tu banua ginjang, jala hundul di siamun ni Debata Ama. Na ro ibana muse tu tano on laho manguhumi na mangolu dohot na mate. Jesus do Tuhan! Hamonangan ni Kristus ndang marhite Sinjata, alai marhite haserepon ni RohaNa na mangalo Hamatean.

III. SIPAHUSORHUSORON

· Marhite minggu palmarum on, di dok tu hita: serep maroha ma hita songon Kristus i. Ima molo nunga adong roha ni Kristus di hita. Roha ni Kristus ima na olo mengalah, na paserep roha. Nian songoni ma hita angka halak na porsea, ndang

egois (mementingkan diri sendiri). Serep marroha songon Jesus I, unang marginjang niroha. Molo tung pe adong hasurunganta (jabatan, talenta, arta, status), serep ma hita mamangke i, jala ta pangke ma i mambahen angka nauli na denggan di dongan. Molo ginjang ni roha na tabahen di angka parsaoranta boi do i gabe patubu parsalisihan, alai molo serep ni roha do na tabahen di si ma ro dame.

· Ta ida do Jesus Kristus na unduk rohana mangoloi Debata. Nian songoni ma hita diparngoluonta, unduk rohanta mangoloi Debata, mangulahon angka hata ni Debata di bagas parngoluonta. Ketaatan dia membawaNya kepada kemuliaanNya.

C. Pdt. Novita Maranata br. Silalahi, S. Th

SI HOBASI HATA I

Rabu, 22 April 2026

Turpuk: Pilippi 2: 5 –11 Topik Minggu: Jesus Kristus do Tuhan