1 Petrus 1 : 13 - 18 Topik : “Mangolu Dibagasan Parange Na Badia”

 

MINGGU QUASIMODOGENITI MINGGU, 12 APRIL 2026

Nats : 1 Petrus 1 : 13 - 18

Topik : “Mangolu Dibagasan Parange Na Badia”

PATUJOLO

Molo tauji manggombarhon di bagasan pingkiranta adong ma dua galas di adopanta. Sada galas kaca sian kristal, bagak idaon, jala arga muse galas i. Alai sada hahuranganna, i ma di galas i kotor, adong orbuk di bagasanna. Na sada na i galas palastik, dang bagak jala mura muse argana. Tung pe songon i, ias do galas palastik i. Molo ro ma sungkun sungkun tu hita, galas na dia ma pangkeonta molo naeng minum hita? Pos do roha, sude hita mangalusi sungkun sungkun i galas palastik i do. Ala ni aha? Ala ias tung pe mura. Galas na mansai arga i, molo adong do orbuk di bagasanna, jala ndang ias, ndang tarpangke i jala ndang marlapatan i. Songon i ma na dipangido turpuk jamita on tu angka na porsea i hombar tu Topik di Minggu ima Minggu Quasimodogeniti asa di ngoluna siapari “Mangolu Dibagasan Parange Na Badia”.Borat do memang tantangan na taadopi ala haporseaonta di Kristus Jesus tarlumobi molo maringanan hita songon paisolat jala halak dagang di luat ni halak na so sahaporseaon jala so saparadatan dohot hita. Songon barita na uli on na dipasahat Apostel Petrus, sahalak sian sisean ni Tuhan Jesus tu halak Kristen na di parserahan (berdiaspora) i ma

di Pontus, Galatia, Kappadosia, Asia dohot Bitinia (1 Pet 1 1-2). Marhite suratna on ro do Apostel Petrus manungguli, dohot mangapuli huhut laho pasabamhon roha ni Huria i asa tongtong nasida marsihohot manghaporseai dohot manghaholongi Debata. Diramoti Debata do HuriaNa i di bagasan hagogoonNa marhite haporseaon na mambahen hita sahat tu haluaon i (1:5). Ringkot do tajalo hagogoonNa i, ala diloas Debata do i asa teruji haporseaonta i (1:7). Asa diujungna manjalo tumpal hangoluan i do hita angka na porsea i (Pat Pangk 210c). Jala on do panghirimon na ojak tu haporseaon dohot holong ni roha. Paboa ujung ni haporseaon ima haluaon ni tondi ni angka na porsea (1:9). Alani i ma ingkon tongtong ma na porsea i patupahon paralohon tu dosa jala mangolu dibagasan habadiaon dohot mangolu dibagasan parange nabadia, ala songon na didok Heber 12:14 “Anggo so badia, dang adong idaonta Tuhan I”

HATORANGAN NI TURPUK

Dibagasan ayat 13 dibuhai do marhite hata “Dibahen i…lapatanna ingkon adong do tindak lanjut sian angka na porsea I sebagai tanda nunga manjalo haluaon ni tondi sian Debata. Aha ma i?

1.    Hohosi Hamu Ma Rohamuna/ Siapkanlah akal budimu.

Apostel Petrus manggombarhon roha i songon gonting na ringkot di lehon hohos. Hatiha i pahean ni halak Timur, asa sigop ibana manghobasi, ingkon dihohosi ibana ma di bagian gontingna. Boasa ma ingkon roha di hohosi? Ala songon na didok Poda 4 : 23 “Sian saluhut sijagaon i, gumodang ma jaga roham, ai sian i do ruar angka mual hangoluan. Jala hombar tu Markus 21-23 “Ai sian bagasan, sian roha ni jolma i do ro pingkiran na jahat, parmainanon, panangkoon, pamunuon, pangalangkupon, pangahution, hajahaton, pangansion, pargadombuson, panorgangon, panginsahion, ginjang dohot neang ni roha.Na ro sian bagasan do saluhut angka hajahaton ondeng, jala angka i do na mangaramuni jolma. Molo nunga di hohosi roha I, denggan ma ngolu ni angka na porsea i. Habadiaon i dimulai sian bagasan ngolu roha ni angka na porsea i. Aha na haruar sian roha ni jolma na porsea i, sian i ma tarida ise dirina, jala songon dia ngoluna. Ala ni i ma ganup na porsea ingkon rade di roha dohot di pingkiran. Ingkon sadalan roha dohot pingkiran.

2.    Torang ma rohamuna/ Waspadalah

Boasa ma ingkon torang roha ni angka na porsea i? Ala molo tajaha di 1 Petrus 5:8 adong musunta i ma sibolis i, na tongtong maotaot ibana songon babiat na mangalului siboduntonna.a Molo nunga torang roha i, dibagasan na porsea i masa ma habisuhon, diboto dia ma na ingkon diulahon hombar tu lomo ni Tuhan i, jala dia ma na ingkon sipasidingonna, boi ma ibana mangarajai dirina (Poda 25:28), jala denggan ma marpingkir dohot mambuat haputusan na denggan.

3.    Marpanghirimon di Asi ni roha di Hapataran i Jesus Kristus

On ma dasor manang fokus di angka na porsea i. Boasa ma angka na porsea i ingkon

marpanghirimon? Ala portibi on ndang inganan na hot di angka na porsea i, ala nunga sega dibahen dosa dohot sibolis i. Panghirimon di “masa depan yang pasti”. Nunga diulahon Debata di sude na nidokNa i (padanNa), jala pasti do patupaonNa di ari na naeng ro on. Angka na porsea i, angka na tarpillit gabe Anak ni Debata. Di onjar motivasi panghirimon i, tingki haroroNa di bagasan hamuliaonNa huhut manaluhon sude angka musu-musuNa, ima hamatean dohot sibolis i, asi ni roha dohot haluaon i sahat ma tu hita jala rap ma hita dohot Ibana (Pangk 21: 1-5). Di tingki bangso Israel haruar sian Misir, disuruh Debata do nasida paiashon jabu naisda sian sagu sagu na so niigaran mangararati roti na manggombarhon ingkon ias do bangso i jala badia songon Debata badia do Ibana (patudus Epistel 3 Musa 20 : 1- 7). Ganup na porsea i nunga ditobus Debata di bagasan Kristus marhite mudarNa na durus di dolok Golgata gabe Ibana do nampuna hita, jala hita nampuna Ibana (1:18-19). Ingkon tapataridahon do on tu angka na dihumaliangta songon dakdanak sipangoloi. Taboto do angka dakdanak mansai ura do dilatih, diparenta jala sipangoloi do nasida. Ingkon adong “Transformasi” di bagasan dirinta parjolo marhite manandinghon angka pangalaho pangalaho sangkap sangkap ni roha uju di haotoon na jolo. Ndang holan dirajai hagiot ni parmainanon alai dohot do angka hamongkuson, pargadombuson (pat Gal 5:19-21; Mrk 7:21-22). Alai ala nunga Debata nampuna hita, sipangoloi ndang alani keterpaksaan, alai ala ni asi ni roha ni Debata. Tabahen ma i gabe gaya hidup, gabe kebiasaan na denggan ma di tonga tonga ngolu ni angka na porsea. Dibagasan ngolu siapari, ingkon adong ma masa di hita sungkun sungkun “aha do naeng dohononMu Tuhan? Aha do naeng hubahen Tuhan? Taooloi jala taulahon ma.

Alani i gabe badia ma angka na porsea i. Badia berarti pulik sian “gaya hidup” portibion (Pat Rom 12:2). Molo portibion lomo rohana margabus, molo angka na badia, ndang be diulahon margabus. Molo portibion lomo rohana korupsi, naeng ma nian angka na badia jotjot mangalehon (2 Korint 9:7b). Badia marlapatan gabe nampuna ni Debata do hita (1 Pet 2:9). Molo didok Debata nampuna hita, tontu do ingkon marpingkir hita mangulahon na so dihalomohon ni Debata. Badia ima sorminan pangalaho ni Debata, umbaheni ma gabe dasor di hita asa badia ma nang hita on sude (3 Musa 11:44).

SIPAHUSORHUSORON

Minggu Quasimodogeniti na marlapatan songon posoposo na imbaru tubu na uasan di susu na tama. Songon posoposo na imbaru tubu i ma nang angka na porsea i, mauas di susu na tama I ma Hata ni Debata na hasea do i mamodai, maminsang, pauliulihon, manogunogu di bagasan hatigoran, asa rimpas halak ni Debata hobas tu nasa ulaon na denggan (2 Tim 3:16-17), tarlumobi ma di Hata ni Debata na mangolu i, ima Jesus Kristus, ido na manobus hita sian dosa dohot hamatean asa badia hita, asa gabe anak ni Debata hita. Alani i ma tapatuduhon ma i marhite marparange na badia songon topik di minggunta sadarion. Badia hita ndang holan di gareja, di parkarejoanta, keluarga dohot didia hita maringanan dohot marulaon, unang be dirajai hagiot ni daging, emosi. Badia

dang pilihan I, alai sada keharusan do I di bagasan ngolu ni angka na porsea, ala Badia do Debata. AMEN

Pdt. Donna K. Sinaga, S. Th/Maduma