Mateus 5 : 1 – 12 Topik Minggu : “Martua Di Bagasan Tuhan i”

 

Bahan Sermon Parhalado HKBP Resort Agape Pangkalan Kerinci

Jamita Minggu Septuaginta, 01 Pebruari 2026

Mateus 5 : 1 – 12

Topik Minggu : “Martua Di Bagasan Tuhan i”

 

Patujolo

Adong tolu ulaon ni Jesus di portibi on, ima marjamita (preaching), Mangajari (teaching) dohot pamalumhon sahit (healing). Torop do halk na mangihuthon Jesus hatiha i jala marragam do angka motivasina, adong angka na naeng mangido hamamalum ni sahit, adong na mauas umbege jamitaNa dohot pangajarionNa, adong naeng marnida tanda halongangan, alai laos adong do tong na naeng mangonggop hasalaan ni Jesus. Ndang dihalomohon Jesus angka na mangihuthon Ibana holan naeng marnida tanda halongangan sambing manang holan ala na mangido na ringkot tu pardagingon. Asa dibagasan roha na polin/bulus nasida mangihuthon Jesus, Alani i dipasahat Jesus ma pangajarionNa tu natorop i dohot tu angka siseanNa marhite jamita dolok (Mat 5 – 7) songon na tangkas taida marhite jamita on, na jotjot digoari parhatuaon na ualu (ucapan Bahagia).

Hatoranagan 

1.       Martua ma na pogos tondi, ai di nasida do harajaon banua ginajng i ( ay 3). Hata martua dison ima  “makarioi” na boi marlapatan maruntung, tarpasupasu  di adopan ni Debata. Hata pogos dison ima sian hata “ptokoi” na marlapan na pogos, na so adong bagasna dohot na so adong hepengna. Boasa didok Jesus martua ma na pogos tondi di adopan ni Debata. Molo tapamanat di hatiha i torop angka na mangihuthon Jesus sian horong ni “ptokoi” manang angka na pogos. Suang songon i nang angka na manjalo halongangan (malum sian na pangpang, mapitung, malua sian tondi na hodar) angka on tong do sian horong ni ptokoi na identik  tu haporsuhon. Pangalaho on ma  na mangonjar angka na pogos bulus pasahathon dirina tu panarihonon ni Debata jala mangokuhon paboa portibion na godang sitaonon dohot haporsuhon, ndada inganan na hot. Dihasiholi roha nasida do inganan na manongtong na so adong be haporsuhon aeonna ima surgo na hot salelengna. Marasing sian angka na mora na madabu tu ginjang ni roha hinorhon ni sinadonganna. Cenderung marpangunsandean tu hamoraonna, mura tarihot tu haulion ni portibion gabe lupa tu surgo hasonangan na hot saleleng ni lelengna. Boi tapatudos tu dolidoli na mora i (Mat 19) na mangarajumi artana i boi gabe jaminan ni ngoluna dohot pinomparna marsundutsundut.

2.       Martua ma na marsak roha ai siapulon do nasida ( ay 4). Godang angka na masa na boi mambaen hita jolma marsak. Boi do alani hamatean, sahit, boi do alani hasalaan manang dosa na binahenna. Alani disungguli Jesus do asa unang marsak, ala di sude angka na masa i adong do pangapulion dohot gogo sian Debata. Na pasti, ia angka arsak i, adong do ujungna jala nunga diparade Debata surgo inganan na sonang na so dais be tusi arsak, iluilu dohot angka haporsuhon nang hamatean pe. Nang tu angka halak na marsak alani dosana dapotan apulapul do sian Debata marhite hasesaan ni dosa.

3.       Martua ma na lambok roha, ai teanon nasida do tano on (ay 5). Hata lambok dison ima sian hata “praeis” na marlapatan lambok, marsabam ni roha nang di tingki masa harugian hinorhon ni pambaenan ni halak. Alai boi tong lambok dalam arti ndang pola mambaloshon hasalaan ni halak.

4.       Maartua ma na mauas male mida hatigoran, ai sipabosuron do nasida (ay 6). Mauas male mida hatigoran, ima songon pardagingon na mangharingkothon sipanganon, suang songon i ma nang partondion mangharingkothon sipanganon. Nasa na mambahen hatigoran gabe sipanganon dohot siinumonna, ido sipabosuron ni Debata. Songon na hea didok ni Jesus, ia sipanganonna ima mangulahon lomo ni roha ni Debata.

5.       Martua ma na asi roha, ai siasian do nasida (ay 7). Hata na asi roha/murah hati, ima sian hata “elemones”. Asi ni roha ima parange na olo manghaholongi. Ndada holan marpardomuan tu na olo mangalehon, alai dohot do nang pambaenan na olo marpamuati dohot manesa dosa songon na niajarhon ni Jesus di tangiang Ale Amanami.

6.       Martua ma parroha na ias, ai idaon nasida do Debata (ay 8). Parroha na ias ”khataros” marlapatan polin rohana (murni hatinya). Roha ima pamusatan ni parngoluon ni jolma. Sian roha do tubu sangkap na roa nang na denggan. Di Poda 23 : 4 didok:”Sian saluhut sijagaonmi, gomodang ma jaga roham, ai sian i ao ruar angka mual hangoluan”

7.       Martua ma sibahen dame, ai goaron do nasida anak ni Debata ( ay 9). Halak sibahen dame “Eirene” goaron do nasida anak ni Debata. Asa idaonta  ma dison, tanda anak ni Debata ima gabe siboan jala sipatupa hadameon, ndada sipatupa hamusuon. Songon Jesus Raja ni  hadameon i, tontu songon angka anak ni Debata, ndang dao / asing ngolunta sian Ibana na ro tu portibion mamboan hadameon.

8.       Martua ma na pinaburuburu ni halak alani hatigoran, ai di nasida do harajaon banua ginjang i (ay 10). Pinaburuburu alani hatigoran na nidokna dison ndada holan marpardomuan tu pardagingon sambing, alai boi do pinaburuburu secara psikis. Pinaburuburu di pardagingon manghorhon hansit ni daging (luka jasmani), alai pinaburuburu psikis (luka bathin). Unang ma nian pinaburuburu alani hasalaan manang hajahaton na binahen, alai naeng ma alani na na mangaradoti hatigoran manang hata ni Debata.

9.       Martua ma hamu molo diinsahi halak hamu manang dipatubutubu ragam ni angka hata na roa, na so tutu dompak hamu alani Ahu. Adong do deba Halak mangae na porsuk alani dosana, ndada  termasuk na martua angka halak sisongon i (1 Petrus 2: 20, 1 Petrus 4 : 15). Alai Halak na martua ima na hona insak dohot na pinaburuburu alani hatigoran, alani Kristus. Godang do Halak manaon na porsuk manang tekanan ala parsitutuonna mangihuthon Jesus jala mangolu hombar tu lomo ni rohaNa (Mat 10: 16, 25, 34 – 36, Ulaon 14: 22)

10.   Las ma rohamuna jala marolopolop, ai godang do upamuna di banua ginjang i, ai songon i do dipaburuburu angka panurirang na jumolo sian hamu. On ma sada hasurungan di ngolu ni angka na porsea, mangarajumi, gabe sada las ni roha (kebahagiaan) molo pe dipaburuburu halak alani hatigoran. Ngolu ni angka panurirang na manghajongjonghon hatigoran, ndada diloas Debata  gabe magopo, laos ima sada tiruan di ngolu ni angka na porsea (1 Kor 1 : 22 – 23, 2 Kor 4: 2, Joh 15: 18 – 20)

Molo tapamanat pandohan ni Jesus di jamita dolok on, tutu boi do i maralo tu pikiran hajolmaon, ala memang maralo situtu do i tu pamingkirion dohot cara pandang ni portibion tu pandohan ni Jesus i. Songon dia ma tutu martua angka na pogos, na marsak roha, na mauas male, na pinaburuburu dohot na hona insak alani hatigoran.

Sipahusorhusoron  

1.       Mangajarhon Hata ni Debata. Diajari Jesus do angka natorop i taringhot tu hata ni Debata, patuduhon hinaringkot ni  pangajarion di hata ni Debata. Boha do ia di partingkianta on, tarida dope hinaringkot ni na mangajarhon hata ni Debata? Sotung do ala ronsot ni angka ulaon gabe tartinggal sihol ni roha manjangkon pangajarion di hata ni Debata? Pangahuashonon ni roha manangantusi hata ni Debata, marhite i do lam tau hita patupahon angka na denggan hombar tu lomo ni roha ni Debata.

2.       Naeng ma gabe angka halak na martua hita hombar tu pamerengan ni Debata, ndada di pamerengan ni jolma. Tutu boi do jumpang parungkilon nang hamaolon alani ni parsihohotonta mangulahon hata ni Debata. Alai taingot ma, gabe Halak na martua do hita di adopan ni Debata. Unang ma hita manaon na porsuk alani dosa manang hajahaton.

3.       Diarahon turpuk on do hita asa mangulahon na denggan tu saluhut Halak, ido  sada hataridaan ni hasatiaonta tu Debata. Marhite jamita dolok on dipataridahon Jesus do keberpihakanNa tu angka na pogos, angka na manaon na porsuk, na so mardihadiha, saluhutna  gabe angka siasian di adopan ni Debata. Antong burju ma hita mangulahon ulaonta dibagasan hatigoran. Molo pe sipata masa angka arsak dohot haporsuhon, saluhutna i gabe dalan lam pasolhothon ngolunta ma i tu Debata asa sai tongtong hita marsigantung tu pangurupion ni Debata, ido ngolu ni angka anak ni Debata jala panean di harajaonNa. Amen.