Minggu, 26 April 2026 (Minggu Jubilate) ULAON NI APOSTEL 2 : 22 – 28

 

Minggu, 26 April 2026 (Minggu Jubilate)

ULAON NI APOSTEL 2 : 22 – 28

Topik : “Las Rohangku Jala Marolopolop Soarangku”

I.  Patujolo:

Hata ni Debata Di Uloan Ni Apostel 2:22-28 on i ma sada tona na ganjang, sapartolo isi ni tona i diuhal do sian padan na Robi. Nang pe tung mansai balga do tutu haadongan ni Tondi Parbadia di masa i, alai tong do fokusna tu Jesus Kristus. Sude na masa i tudos tu panurirangion ni Jesus, na hehe ma Jesus tu surgo jala tondi porbadia maringanan di huria i. Ai dang mamboan hamuliaon tu diriNa sandiri Tondi Parbadia i alai tu Jesus naung hehe i do. Panindagion ni si Petrus sandiri dison dirajumi angkal jolma sada sian godang ni panurirang naung dipatolhas di Ulaon Ni Apostel 2:27. Dihatindanghon si Petrus do ia Tuhan i, i ma Jesus Kristus naung bangkit, naung hehe. Jamita si Petrus fokus tu tolu aspek ni ngolu dohot panghobasion ni Kristus, i ma Partaonan, hamatean dohot hananaekNa. Asa malua ganup na porsea jala na manjou goar ni Tuhan i, marhite goar ni Jesus i (Ulaon 2 : 21).

II.  Hatorangan Ni Turpuk

1.      Ayat 22-23 Jamita ni Apostel Petrus do turpukta on, di naung tangkas barani jala dihatindangkon ibana Jesus I do Tuhan na mate jala hehe sian na mate i. Dung songgop Tondi Parbadia tu sisean ni Jesus hombar tu na pinarbagaNa gabe sitindangingi (saksi) ma nasida di sandok na binege dohot na nidana taringot tu Jesus. Marlas ni roha do nasida jala barani gabe sitindangi ni Kristus i (saksi Kristus). Lumobi Apostel Petrus, andorang so songgop Tondi Parbadia i, mabiar situtu do ibana manghatindangkon Jesus i. Pola sahat tu na tolu hali disoadahon ibana na so tinandana Jesus i. Alai anggo nuaeng di turpuk on (Ulaon ni Apostel 2:22-28) ida ma nunga dipagogo Apostel Petrus soarana marbarita na uli, marjamita manghatindanghon Jesus I do Tuhan tu adopan ni bangso Israel, bangso na so porsea jala na manulak dohot na marparsilangkon Jesus i. Marolopolop tondina manghatindangkon Jesus i. Ala mangula do Debata dibagasan Jesus marhite angka tanda naung dipatupa Jesus dibagagasan panghobasionNa. Ido umbahen di ondolhon si Petrus do panghobasion ni Jesus marhite tolu hata i ma: gogo (dynamis), mujizat (teras) dan tanda (semeion). Ia gogo marpangantusion ma i tu “huaso” di hataridaan ni Debata, hata “Mujizat” marlapatan ma i di angka ulaon na somal di respon ni angka jolma mangida, jala hata “tanda” marpangantusian adong arga di balik ni angka ulaon i. Alai nang pe songon i sai rap do muncul hataridaan ni na tolu hata on di panghobasion ni Jesus dohot na masa di bangso israel na haruar sian tano Mesir, hataridaan ni hata i merujuk tu sejarah na masa di padan na Robi.

2.      Ayat 24 Di jamita ni si Petrus, Debata do na paheheon Jesus. Ibana do di pahehe Debata, dung di harhari bernit ni hamatean, ai ndada na hatiopan hamatean Ibana. Di pamerengon ni si Petrus haheheon ni jesus ingkon jadi jala masa, didok ibana haheheon ni Jesus i ma haluan sian na mate. Hita pe angka naung mambege jala manghaporseai Jesus i do Tuhan, Mesias, Sipalua sandok jolma nang portibi on, naeng dohot marlas ni roha, marolopolop tondinta mamaritahon huaso, habalgaon dohot holong ni Jesus i di pardalanan ni ngolunta. Ai dipatandahon Debata do tu hita Jesus na sian Nasaret i, hinorhon ni hagogoon, halongangan dohot angka tanda na pinatupa ni Debata marhite Jesus, singkop saluhutna marhite Ibana. Rade Jesus manaon na porsuk humonghop hita pardosa, asa dapotan haluaon hita. Ido unok ni las ni rohanta. Ndang tartiop hamatean i, tanoman i be angka na porsea di Jesus Kristus i. On ma holongNa na so hadodoan i. Ndang diloas hita haholongan ni Debata, ditiop hamatean i, alai ingkon malua do nasa na porsea na manjou goarNa, ima Jesus i.

3.      Ayat 25 -31 Patoguhon barita naeng hehe Jesus, dilehon si Petrus do hatorangan, na parjolo sian hata ni Debata (ay. 25-31) dohot na paduahon pengalaman na sandiri (ay. 32). Sian cara ni si Petrus mengelehon angka hatorangan manang barita i lebih diondolhon si Petrus do angka na masa di hata ni Debata sian angka pengalaman ni jolma manisia. Boasa haheheon ni Jesus dang hatiopan manang tarelakhon, na parjolo, nungga dinubuathon ni hata ni Debata (ay. 25-31), nungga dihatindakhon di Bibel. Pangaramotion ni Debata dang holan di portibion alai dohot di banua toru. Ngolu ni jolma na sintong ndang diloas Debata mago manang mintop “Ai dang pasombuonMu diringku di banua toru jala dang loasonMu na badiaMi marnida habusuhon. Nungga dipabotohon Ho tu ahu angka dalan hanguloan, gohanMu do ahu halalas ni roha di adopan mi.

Dohot ma nang hita manghatindangkon, jamita ni Apostel Petrus naung gabe sitindangi (saksi Kristus, Kristen, pengikut Kristus) di Kristus naung hehe i, I do Tuhan, Debata ni saluhut bangso. Naeng dohot hita tongtong marlas ni roha, marolopolop tondinta, ai dibagasan linggom ni pandonganion ni Debata do hita marhite Jesus i. Ndada Tuhan na mate Ibana, songon na ni dok ni angka na so porsea, Tuhan na mangolu do Ibana. Nunga dihatindangkon i, sian na robi jala di pasingkop dibagasan Jesus. Ibana do Immanuel i, las ma rohanta, dongananna do hita rasirasa ro ajal ni hasiangan on. Ai marhahonaan tu Ibana do pandok ni si Daud ujui na mandok: Tongtong do huida Tuhanhi di jolongku, ai di siamunhu do Ibana, asa unang humordit ahu (ay. 25)

Panindangion ni Apostel Petrus songon ni hatindakkon ni raja Daud ujui, songon ni nang tu hita di tingki on, mangolu manang mate pe hita nunga singkop di bagasan Kristus Jesus. Nang pe ingkon malangke, maradian dagingta, mulak tu tano pambuatanta hian, alai panghirimonta di holong dohot huaso ni Kristus i, pangoluonNa, paheheonNa do tondita muse songon Jesus Kristus naung hehe i. Marolopolop ma tondinta ai ndang diloas Debata marhite Jesus Kristus hita dihamatean salelengnai i. On ma tanda ni holongNa na so habilangan i sibaritahononta tu sandok houm nang bangso di sandok portibi on. Jesus Kristus na patupa hangoluan na salelenglelengna di angka na porsea. Ai ndang pasombuonMu diringku di banua toru jala ndang loasonMu na badiaMi marnida habusuhon (ay. 27).

III.               Panimpuli

Mar-Jubilate, mandok mauliate di sude pambahenan ni Debata, marhite Jesus Kristus. Rade Jesus manaon na porsuk humonghop hita pardosa, asa dapotan haluaon hita. Ido unok ni las ni rohanta. On ma holongNa na so hadodoan i. Ndang diloas hita

haholongan ni Debata, ditiop hamatean i, alai ingkon malua do nasa na porsea na manjou goarNa, ima Jesus i. Di las ni rohanta di na mar-Jubilate hita, ala naung taboto dalan tu haluaon i, ngolu na manontong i ima surgo i. Holan marhite Jesus do jumpang hita i. Tung tuani ma dipatupa Ibana dalan hangoluan i, jala dipabotohon Ibana tu hita Hangoluan salelengna i. Gok las ni roha hita sogot mamuji, pasangap Debata diadopanNa i.

CBVR. Laura Butarbutar, S.Ag/Epiphanias Km 79