EPESUS 5: 8-14 “Marparange Songon Anak Hatiuron”

 

MINGGU LETARE (15 MARET 2026)

EPESUS 5: 8-14

“Marparange Songon Anak Hatiuron”

Epesus ima sada huta na torop halak Jahudi jala angka na porsea tu Jesus Kristus, targoar do huta epesus on ima huta na berkembang marhite angka ngolu ni jolma di bidang per ekonomian, budaya, nang angka hamajuan na asing. Jala ido mambaen nang pe angka na porsea nasida alai mansai gogo do tong pengaruh ni angka hamajuan i tarlumobi ma angka parsiajaran na sesat, debata sileban, jala adong jongjong sada kuil Artemis di huta epesus.

Dibagasan situasi na songon ro ma si Paulus laho manosoi huria Epesus asa marparange songon angka anak hatiuron, na hot di haporseaonna, jala marsinondang di tonga-tonga angka ugamo na asing. Tarlumobi laho marpangalaho angka na denggan di ganup pardalanan ngolu nasida, nang di angka hamajuan pe naeng ma nian marsinondang ngolu nasida gabe anak hatiuron.

I.       Hatorangan ni Turpuk Ayat 8-10

Di suraton si Paulus do tu halak Efesus surat on laho pasahaton tu nasida angka jolma na holom, jolma na so tumanda Debata, marparange di haholomon ima di angka ngolu na porsea tu debata sileban, okultisme, jala mandua nasida sian haporseaon nasida tu Tuhan Jesus Kristus.

Alai nuaeng nasida nungga gabe mangolu di bagasan Kristus dang di bagasan hagolapon be ngolu nasida. Jala nungga gabe anak hatiuron nasida saluhut na, di pangke si Paulus hata Hatiuron asa kontras (Lawan kata) tu hata hagolapon. Marthite hatiuron i patar sude ngolu nasida gabe ngolu na imbaru, ngolu na mambaon hadameon nang angka pambaenan na dumenggan.

Angka anak hatiuron marparange songon Tuhan Jesus do ima habasaon, hatigoran, dohot hasintongan ido tanda jala parbue ni angka jolma na mangolu di hatiuron, angka anak hatiuron diboto nasida do dia lomo roha ni Debata, jala angka dia do na naeng siulaon nasida di pardalanan ni ngolu na. Ayat 11-14

Molo nunga mangolu di hatiuron unang be nian saor tu angka ulaon haholomon ingkon gabe mamintori jala mamisang angka jolma na mangolu di hagolapon. Ndang adong na buni na sinondangan ni na tiur. Patar do i sude di adopan ni Debata, songon dia pe malo ni jolma laho manutupi dosa dohot angka ulaon hagolapon i di tingki na patar do i saluhutna di adopan ni Debata. Alani do dipangido si Paulus asa dungo angka jolma na mangolu di hagolapon i unang be sai tarlalap di angka ulaon jala ngolu hagolapon i naeng ma nian ditadingkon saluhut angka ulaon na hurang denggan. Saluhutna nasida nungga gabe anak ni Debata jala anak hatiuron. Mangolu jala mian ma di hatiuron.

 

Aplikasi

1.      Gabe anak hatiuron.

Di pardalanan ni ngolunta on ra maol do laho pasidingho diri sian hagolapon na sai jot-jot dope hita diela-ela sibolis. Alai nga taboto be songon dia ngolu ni angka anak hatiuron ima angka na mangolu dibagasan hata ni Debata na patar jala tiur ulaonna.

2.      Ngolu na marparbue.

Songon hata ni Debata di Galatia 5: 22-23 “angka on do parbue ni tondi, Holong dohot las ni roha, dame dohot lambas ni roha, habasaron, habasaon, haporseaon, halambohon dohot hatomanon. Jala on ma nian parbue ni ngolu angka anak hatiuron i.

3.      Tarsunggul jala hehe ma angka na tarpodom, angka na di hagolapon dope jala angka na mangula di dosa. Naeng ma nian gabe hatiuron jala gabe sondangan ni Jesus Kristus. AMIN

C.Bvr. Ernita Silaban S. Ag