Minggu Kantate, 3 Mei 2026 Marende tu Jahowa 2 Musa 15: 1 – 14

 

Minggu Kantate, 3 Mei 2026

Marende tu Jahowa

2        Musa 15: 1 – 14

 

1.      Patujolo ni Turpuk

Buku 2 Musa ima buku napaduahon di Bibel ta i na sian Padan na Robi, digoar do buku on kitab Keluaran ianggo di bahasa Indonesia. Jala molo di hata Junani (Septuaginta, di abad ke- 3 sM) mamangke hata Exodos dohot di bahasa latin (Vulgata di taon 400M) mamangke hata Exodus, jala hombar tu angka bahasa Inggris didok ma goarna Exodus na marlapatan Haruruar manang Keluaran gabe sada pangantusian sian piga hata na marasing i. Goar ni buku on gabe sada gombaran taringot tu isina i ma masa pardalanan ni bangso Israel dinaharuar sian tano Misir laho mandapothon tano Parjanjian manang tano Kanaan. Laos marhite i tangkas panggonopion ni padan ni Debata tu angka ompu ni bangso Israel, i ma na laho mangalehon tu nasida tano Parjanjian/Kanaan jala torop ma pinompar ni nasida. Alai molo dibagasan bahasa Batak didok do goar ni buku on “Buku Musa Paduahon” hombar sian terjemahan bahasa Jerman didok “Buku Musa yang Kedua” laho mangondolhon tu namasa di buku on taringot tu pamilliton ni Debata tu si Musa na laho manguluhon bangso Israel haruar sian tano Misir hombar tu sangkap ni Debata. Di buku 2 Musa on barita taringot tu haruruar ni bangso Israel sian parhatobanon di Mesir gabe sada barita naumbalga marhite haluaon na pinatupa ni Debata boi tolhas nasida manaripari laut rara. Haruruar ni bangso i sian Misir, gabe unok ni haluaon di padan na robi, bangso Israel dipangke Debata gabe ulaulaNa laho paluahon saluhut jolma manisia.

2.      Hatorangan ni Turpuk

Ayat 1, Ende las ni roha na mambaritahon hamonangon dipatubegehon halak Israel gabe parbue ni haporseaon ni nasida tu Debata, alani saluhut nasida marende mandok “ Marende ma ahu tu Jahowa, ai marmulia situtu Ibana, hoda dohot parsihundulna diusophon tu bagasan laut”. Marhitehite ende pujipujian on nasida laho manghatindanghon, holan alani pangurupion ni Debata do nasida boi mamolus sian Laut Rara, pandohan hoda dohot parsihundulna diusophon tu bagasan laut martudutudu tu halak Misir na mate uju mangalele halak Israel i, umbahen na malua sian pangaleleon ni halak Misir. Molo sian hagogooon dohot na adong di nasida, ndang tarbahen nasida mamolus laut namaraek i, ai ndang tarbahen nasida mardalan diatas ni aek laut i, na so tuk dipingkiran ni bangso i do i. Alai Jahowa Debata na patupahon halongangan di nasida, jala halak Misir i ndang dipaloas tolhas manaripari laut i, ai gabe sumuang ma angka aek i mangalingkupi hureta dohot angka parsihundul ro di sude parangan ni raja Parao, gabe ndang adong na teba nanggo sada.

 Ayat 2-3, Jahowa napapartarhon hamuliaonNa tu si Musa dohot napaluahon bangsoNa sian tangan ni halak Misir, marhite i dihatindanghon nasida ise Jahowa di nasida, na ingkon pasangapon jala pujian nasida di ngoluna. Marhite pandohan “Debata ni damang/Allah bapaku” marningot nasida tu Debata ni angka ompu ni halak Israel, laos i do na hot nuaeng gabe Debata ni nasida. Hombar tu panindangion i lam tangkas dihaporseai nasida pandonganion ni Jahowa dipardalanan ni bangso i. Pardalanan ni bangso Israel on laho patuduhon haluaon na balga na mambahen nasida hot marhaporseaon tu Jahowa. Holan tangan ni Debata do na tuk patupahon halongangan i marhorhon haluaon bolon dinasida. Jala laos marhite pandohan “Jahowa do goarna” laho patuduhon ndang adong debata na asing dungkon ni Ibana na tuk paluahon nasida.

Ayat 4-10, Uhuman na masa tu halak Misir ala ni hatangkangonna, ai dung diboto raja Parao naung lintun bangso i laho, mansai muruk situtu ma ibana. Dipatangkang raja Misir i ma rohana, mandok asa dilele halak Isreal na dibagasan pardalanan i. Pola dipambuat onom ratus hureta angka na pinillit dohot tolu halak be parmusu di atas ni saluhutna. Jadi dilele halak Misir ma nasida, gabe dapotsa nasida marsaro mardonokhon laut. Gabe mabiar situtu ma halak Israel dung dibereng naung jonok raja Parao lao mandapothon nasida, jadi mangangguhi ma halak Israel tu Jahowa. Didok rohani nasida ndang adong be dalan nasida malua sian halak Misir i, ingkon mate na ma nasida di halongonan. Ai nunga dipudi nasida halak Misir, jala dijolo nasida Laut rara. Alai dipapos si Musa do roha nasida, Jahowa, Debata ni Israel i do dongan nasida na tuk paluahon nasida sian tangan ni halak Misir. Diloas Debata do nasida mamolus laut rara i.

Songon dia boi nasida mamolus sian laut Rara i? songon sada peristiwa naso mungkin masa, marhite na disuruh Debata si Musa manghindat tungkotna jala patoltol tangan na tu atas laut jala patolak asa mamolus ma bangso Israel i sian tonga-tonga laut i. Gabe mabaor laut i dibahen Jahowa marhite alogo na pur sian purba, gabe tolak ma angka aek i. Umbahen na boi bongot bangso Israel sian tonga tonga ni laut na mahiang i, ala hira dorpi angka aek i di siamun dohot dihambirang nasida. Gabe taripar bangso Israel na mamolus laut rara i. Alai mangihut do halak Misir sian pudinasida, nasa hoda ni raja Parao, angka huretana dohot angka parsihundulna tu tongatonga ni laut. Dungi marsuru ma Debata tu si Musa asa dipatoltol muse tanganna tu atas laut i, asa sumuang aek i laho mangalingkuphon halak Misir. Dung dipatoltol si Musa tanganna tu atas laut gabe ditunggalinghon Jahowa ma halak Misir tu tongatonga ni laut i. Halongangan bolon do na pinatupa ni Debata dibagasan ngolu ni halak Israel i. Tung tangkas do diida halak Israel tangan na timbul na binahen ni Jahowa tu halak Misir, gabe mabiar bangso i mida Jahowa, jala porsea nasida tu Jahowa dohot tu si Musa naposoNa i. Marhite i ma di bindu 15 on, dipasahat si Musa dohot halak Israel ende pujipujian tu Jahowa. Huaso ni Debata mangatasi saluhutna, alogo dohot aek dipangke Debata laho mangaropuhi musuh.

 Ayat 11-12, Holan Jahowa Debata, ndang adong na asing sian Ibana, na songkal, nabadia jala na marmulia. Dibagasan ende pujipujian nasida, dipangke nasida do sungkun-sungkun na bersifat Retoris na laho manghatindanghon ise Jahowa Debata. Marhite sungkun-sungkun i tung tangkas habalgaon ni Debata na mangatasi saluhutna. Ende on gabe alus ni haporseaon nasida hombar tu angka naung tangkas diida jala dipanghilalahon nasida songon dia pambahenan ni Debata nasuntimbul i paluahon nasida.

Ayat 13-14, Dihatindanghon halak Israel haporseaon nasida tu Debata marhite ende pujipujian ala marningot nasida di saluhut na pinatupa ni Debata di haluaonna. Dibagasan ende i, laos dipatolhas nasida angka naung dipatupa Debata, ima songon dia Debata paluahon nasida. Gabe songon bentuk pengulangan peristiwa marhite ende pujipujian dibagasan parsaoran tu Debata. Gabe patar ma angka naung masa di ari naung salpu, ima angka halongangan na pinatupa ni Jahowa mangudut do i masa tu nasadari i, dohot tu partingkian na naeng ro dingolu nasida nang diangka pomparan nasida. Dihatindanghon nasida saluhut pambahenan ni Debata na paluahon nasida mambahen angka hitir jala tahuton sahat tu na manimbasnimbas halak Pilistim dohot angka bangso na asing.

3.      Sipahusorhusoron

 Pardalanan ni bangso Israel laho sahat tu tano Kanaan, tano Parjanjian ima gabe gombaron ni paradalanan ni ngolu ni angka na porsea na gok angka paraloan dohot sitaonon na ingkon tasalpuhon. Tu saluhut jolma do boi masa parungkilon, arsak, sitaonon angka tantangan na marragam i, boi doi marhitehite parsahiton, parhepengon/ekonomi, parsoalan di tongatonga ni keluarga. Marsomba tu angka ganaganaan, dohot angka sisombaon na asing. Dongan sahaporseaon pardalanan ni ngolu bangso Israel na gok sitaonon i, mangajari hita pasahathon saluhut pardalanan ni ngolunta tu Jahowa, holan dibagasan Debata boi tarbolus hita dalan “buntu” hira so adong be dalan disi, alai tuk do Debata mambungka dalan na sipata ndang siat tapingkiri. Marhite pardalanan ni halak Isarel di turpuk on, laho paingothon hita asa manahan di angka sitaonon i, ai tuk do Debata mangalehon dalan mangurupi hita. Alani ta padao ma ngolu na gok parungutuguton tu Debata, ai ndang na dipasombu hita, alai dalan ni Debata doi laho pa tang haporseaonta, alani tapadenggan pangalahonta, ta patinggil sipareaon haporseaonta tu Debata. Tapaloas ma Debata mangula di ngolunta hombar tu lomo ni rohaNa. Alani i Markantate ma hita, pasahathon ende pamujionta tu Jahowa, huhut patubegehon angka habalgaon, hamuliaon ni Jahowa tu angka na humaliang. Hombar tu goar ni minggu KANTATE, na marlapatan endehon hamu ma di Jahowa ende na imbaru (Psal 98:1), jala dipahombar tu topik ni minggu ta “Marende tu Jahowa” aha do na boi putihanta sian turpuk on, asa tarbahen hita hot markantate manang ngolu na tongtong marende tu Jahowa, ima pasahat pamujionta dohot saluhut pardalanan ni ngolunta tu Tuhan Debata. Amen