Evangelium :1 Kronika 22: 14-19

 

Bahan Sermon Resort Agape Pangkalan Kerinci Bulan Maret MINGGU, 08 MARET 2026

Evangelium :1 Kronika 22: 14-19

“MANGALEHON ROHA DOHOT PARTONDION MANGALULUI DEBATA”

1.      Patujolo

Buku Kronika masuk do tu horong kitab sejarah di padan na robi, na ginurithon ni si Ezra sahalak malim jala siboro surat (ahli taurat). Bukku on digurithon tu halak Israel paska habuangan ni Israel di Babel manang dung mulak halak Israel tu Jerusalem. Jumpang nasida do naung malengse angka bagas di huta i, songoni bagas joro ni Debata. Ringkot adong ojahan siihuthon dohot siulahonon nasida laho manguduti ngolu muse. Sialani digurithon bukku on laho padimundimunhon partondion ni bangso i marhite paboahon sejarah ni bangso ni Debata di haporseaonna dohot parsombaonna tu Debata. Di pasal 22 on, ditaringoti do keteladanan ni Raja David tagan so mate ibana (dihatuaonna).

Songon na sinangkapan ni Debata, dipasahat Raja David do ulaon pajongjong bagas joro tu anakna Salomo. Mangihuthon ayat 7-10, ndang diloas Debata si David paulihon bagas joro i, ala nunga gok mudar durus dibahen ibana maradophon angka musu, alani disangkapi Debata ma na gabe sian pinomparna do laho paulihon bagas joro i. Alai nang pe ndang diloas Debata si Daud paulihon bagas joro i, ndang gabe mandele ibana jala mansohot laho pasauthon sangkap ni Debata. Alai sebalikna, nang pe dibagasan hasusasaan marsitutu do ibana paradehon angka na ringkot tu pembangunan ni bagas joro i, songon peleanna, asa dihirim ibana lam timbul goar dohot hamulion ni Jahowa di tano on.

2.      Hatorangan ni turpuk

Ayat 14-16. Dipungka do turpuk on dohot hata “idama” sian “wehinneh” “lihatlah”, sada penekanan do on, asa mengalihkan pandanganta fokus tu sada hal na ringkot. Mangihuthon turpuk on hata “idama” ima asa bangso Israel mamparateatehon parsitutuon ni raja David mangalehon na adong di Ibana bahen hasasaut hajongjongan ni bagas joro ni Debata nang pe di bagasan hasusaan Ibana. Dipelehon ibana do saratus ribu talenta sere, sajuta talenta perak, tombaga, dohot sere na so habilangan godangna, songoni hau dohot batu. Namangihut, didok “nang pe dibagasan hasusaan ahu” (beonyi) sian hata ani lapatanna hapogoson, hasusaan, pardangolan, dohot partinaonan. Margombarhon pardalanan ni ngolu na binolusna sahat ro di naung matua ibana. Alai ndang gabe manundati sangkap paulihon bagas joro i. Didok muse “nunga huparade hian”, lapatanna ndang holan niat, manang rencana alai konsisten paradehon, patupahon

na ummuli tu bagas joro ni Debata nang pe ndang ingkon ibana pasauthon bagas joro i, nang pe ndang goarna na tarida jala tarbarita. Ndang holan paradehon sian na adong di ibana, alai dohot nang na tukang na mamandei bagas joro i diparrohahon ibana. Dungi dihinsati jala ditona i ma asa hehe si salomo laho paulihon bagas joro i, jala dipaborhat dibagasan tangiang: sai didongani Jahowa ma ho (ayat 16). Didongani sian hata (immak)lapatanna diramoti, didongani, rap dohot Debata. Alani idaonta ma sangkap pajongjong bagas joro ndang holan haradeon, hagogoon, dohot hatauon ni Jolma, alai saluhutna ingkon mardonganhon Jahowa do asa tulus.

Ayat 17-19. Nunga tangkas taida parsitutuon ni Raja David paradehon peleanna laho paulihon inganan na badia tu Jahowa, jala dipasahat ma ulaon i tu si salomo, anakna. Dungi diayat 17-19 idaonta ma muse pangodolhononna tu namparateatehon ngolu partondion laho mangalului Jahowa dohot lomo ni rohaNa. Asa ndang holan na pajongjonghon, alai ingkon borhat sian roha na mananda pambahenan ni Debata di tongatonga ni bangso i, ima Debata na paluahon nasida sian parhatobanon, mangalehon tano bahen inganan nasida, jala monang maralohon bangso na asing. Homonangani ndada holan hagogoon militer, alai hataridaan pangaramotion ni Debata do di nasida (ayat 18). Asa molo taida usaha, kerja keras (parsitutuon) ni raja David diayat 14, alai diayat 18-19 ima patuduhon na dihalomohon Debata ndang usaha ni jolma sambing alai borhat ma sian nasa roha dohot hosa mangulului Jahowa. “Roha” (lebab) ima inganan ni Debata manghatai tu ganup jolma asa tubu holong, las ni roha, pangantusion dohot pangoloion. “Hosa” (nepesh) martudu tudu tu ngolu na nilehon ni Debata tu jolma, asa dipangke ma roha dohot hosa laho mangului Jahowa, mangulului lomo ni rohaNa. Hajongjongan inganan na badia ndada holan bangunan fisik alai dohot nang nang pamatang (roha, pingkiran) gabe bagas joro, inganan parmianan ni Debata. Alani dipasahat ma i tu angka induk ni Israel, asa sada roha nasida jala diurupi si salomo paulihon inganan na badia i. Ima tanda pangarajumion dipandonganion ni Debata dingolu ni bangso israel songon bangso na pinillit.

3.      PENUTUP

Gabe parsiajaran na arga do na pinatupa ni si David tu halak Israel na mulak sian habuangan, nang tu saluhut angka na porsea, asa ganup na porsea tu Debata marsitutu patupahon naummuli tu Debata. Nang dibagasan hasusaan, partinaonan ngolu raja David, ndang manundati ibana laho patimbulhon goarna. Alani, hasusaan ndang gabe sidalian hape laho mangaradoti na ringkot tu ulaon partondion.

Pajongjong inganan nabadia (bagas joro) ni Debata ima sada sian hataridaan ni haporseaon na mangolu. Jala ingkon memehonon ni na tumua ma haporseaon songoni tu angka sundut na umposo asa parsidohot paulihon inganan

na badia tu Debata di bagasan biar dohot roha na unduk tu Debata. Parsitutuon pasauthon na sinangkapan ni Debata ingkon tarida marhite pangulahonon (usaha) unang ma holan niat/tekad, songon raja David marsitutu paradehon angka na ringkot laho paulihon inganan na badia i. songoni ma nang hita, di angka sangkap na uli tu joloan ni ari, unang ma holan hata dohot rencana, alai konsisten jala martangiang ma hita laho pasauthonsa.

Rajumanta do bagas joro ni Debata ndada holan secara fisik, alai pamatangta pe gabe bagas joro ni Debata jala tondi parbadia maringanan di bagasan dirinta, ala nunga dipalua Debata hita sian gomgoman ni Dosa. Alani tahangoluhon ma hataNa dohot lomo ni rohaNa. Hehe ma ganup na porsea laho mangulahon angka parsuruon ni Debata, ingkon nasa roha dohot hosa ma hita mangalului lomo ni rohaNa. Ingkon pos rohanta sai donganan ni Debata do bangsona na porsea di Ibana. Ibana do paluahon hita jala mangalehon hangoluan tu hita.

C. Pdt. Siska. O. Simamora, S. Si (Theol)