JAMITA EVANGELIUM Minggu, 26 April 2026 (Minggu Jubilate) ULAON NI APOSTEL 2 : 22 – 28 Topik : “Las Rohangku Jala Marolopolop Soarangku”

 

JAMITA EVANGELIUM

Minggu, 26 April 2026 (Minggu Jubilate)

ULAON NI APOSTEL 2 : 22 – 28

Topik : “Las Rohangku Jala Marolopolop Soarangku”

I. Patujolo:

1. Selamat Paskah ma di hita saluhutna. Tongon di partingkian minggu dung pesta Paskah do minggu sadari on, ima minggu Jubilate. Sahat tu minggu hahasaor ni Tondi Parbadiaa (Pentakosta) ima ari palimapuluhon dung haheheon ni Jesus i sian na mate, sai tongtong do pe hita marningot habalgaon ni Pesta Paskah i.

2. Laos i do sintuhu ni las ni rohanta di na mar-Jubilate hita, asa marolopolop tu Debata ma sandok tano on (Psalm 66:1) mangendehon hagogoon, hamuliaon dohot hasangapon ni Debata huhut mamaritahon pandonganion ni Debata marhite Jesus naung hehe i, Debata na mangolu do Ibana.

3. Ido nang ojahan ni Barita Na uli, Jamita ni Apostel Petrus (Ulaon ni Apostel 2: 14-35) taringot tu Jesus na rade mate manaon na porsuk di hau parsilang i, jala manaluhon hamatean marhite haheheonNa i. Ibana do Kristus, Mesias naung binagabagahon ni Debata sian na robi sian pinompar ni si Daud. Laos Jesus i do na binaritahon ni angka Panurirang di Padan na Robi, pasingkophon bagabaga ni Debata tu nasa jolma. Asa malua ganup na porsea jala na manjou goar ni Tuhan i, marhite goar ni Jesus i (Ulaon 2 : 21)

II. Jubilate : “Las rohangku jala marolopolop soarangku”

1. Jubilate: Marolopolop tondingku dohot au malua hinorhon ni goar ni Tuhanku Jesus i. Jamita ni Apostel Petrus do turpukta on, di naung tangkas barani jala dihatindangkon ibana Jesus I do Tuhan na mate jala hehe sian na mate i. Dung songgop Tondi Parbadia tu sisean ni Jesus hombar tu na pinarbagaNa gabe sitindangingi (saksi) ma nasida di sandok na binege dohot na nidana taringot tu Jesus. Marlas ni roha do nasida jala barani gabe sitindangi ni Kristus i (saksi Kristus). Lumobi Apostel Petrus, andorang so songgop Tondi Parbadia i, mabiar situtu do ibana manghatindangkon Jesus i. Pola sahat tu na tolu hali disoadahon ibana na so tinandana Jesus i. Alai anggo di turpuk on (Ulaon ni Apostel 2: 14-35) ida ma nunga dipagogo Apostel Petrus soarana marbarita nauli, marjamita manghatindanghon Jesus I do Tuhan tu adopan ni bangso Israel, bangso na so porsea jala na manulak na marparsilangkon Jesus i. Marolopolop tondina manghatindangkon Jesus i. Hita bangso Israel na imbaru, angka na porsea di Jesus tangihon jala hatindanghon, Jamitahon ma Jesus di ngolum (ay.22-23)

Hita pe angka naung mambege jala manghaporseai Jesus i do Tuhan, Mesias, Sipalua sandok jolma nang portibi on, naeng dohot marlas ni roha, marolopolop tondinta mamaritahon huaso, habalgaon dohot holong ni Jesus i di pardalanan ni ngolunta. Ai dipatandaphon Debata do tu hita Jesus na sian Nasaret i, hinorhon ni hagogoon, halongangan dohot tanda angka na pinatupa ni Debata marhite Jesus, singkop saluhutna marhite Ibana. On do parjolo sibaritahononta songon na binaritahon ni Apostel Petrus tu hita, di pardalanan ni ngolunta. Mar-Jubilate, mandok mauliate di sude pambahenan ni Debata, marhite Jesus Kristus. Rade Jesus manaon na porsuk humonghop hita pardosa, asa dapotan haluaon hita. Ido unok ni las ni rohanta. Ndang tartiop hamatean Jesus, hehe do Ibana Ibana do dipahehe Debata, dung diharhari bernit ni hamatean, ai ndada na hatiopan hamatean i Ibana (ay. 24). Ndang tartiop hamatean i, tanoman i pe angka na porsea di Jesus Kristus i. On ma holongNa na so hadodoan i. Ndang diloas hita haholongan ni Debata, ditiop hamatean i, alai ingkon malua do nasa na porsea na manjou goarNa, ima Jesus i.

2. Jubilate : Las rohangku jala marolopolop soarangku ala tongtong huida Tuhanhi di jolongku. Dohot ma nang hita manghatindangkon, jamita ni Apostel Petrus naung gabe sitindangi (saksi Kristus, Kristen, pengikut Kristus) di Kristus naung hehe i, I do Tuhan, Debata ni saluhut bangso. Naeng dohot hita tongtong marlas ni roha, marolopolop tondinta, ai dibagasan linggom ni pandonganion ni Debata do hita marhite Jesus i. Ndada Tuhan na mate Ibana, songon na ni dok ni angka na so porsea, Tuhan na mangolu do Ibana. Nunga dihatindangkon i, sian na robi jala di pasingkop dibagasan Jesus. Ibana do Immanuel i, las ma rohanta, dongananna do hita rasirasa ro ajal ni hasiangan on. Ai marhahonaan tu Ibana do pandok ni si Daud ujui na mandok: Tongtong do huida Tuhanhi di jolongku, ai di siamunhu do Ibana, asa unang humordit ahu (ay. 25)

Hita angka na porsea di Jesus Kristus, di godang ni angka hamaolon na taadopi di partingkian na parpudi on di pardalanan ni ngolunta termasuk di godang ni angka na marukkil ala ni bencana alam, hatindanghononta ma huaso dohot pandonganion ni Debata marhite Jesus Kristus. Ndang tagamon humordit hita ala Jesus tongtong mandongani hita. I do pos ni rohanta, mangolu manang mate pe hita nunga di bagasan haluaon ni Kristus Jesus i ngolunta. Suka cita kita adalah Tuhan Yesus menjadi jaminan hidup kita kini dan hari yang akan datang. On ma ojahan na paduahon di na mar-Jubilate hita. Jubilate mandok: Sai pos do rohangki disi, raphon Jesus au.

3. Jubilate : Las rohangku jala marolopolop soarangku ala dagingku nang tondingku sonang do. Panindangion ni Apostel Petrus songon ni hatindakkon ni raja Daud ujui, songon ni nang tu hita di tingki on, mangolu manang mate pe hita nunga singkop di bagasan Kristus Jesus. Nang pe ingkon malangke, maradian dagingta, mulak tu tano pambuatanta hian, alai panghirimonta di holong dohot huaso ni Kristus i, pangoluonNa, paheheonNa do tondita muse songon Jesus Kristus naung hehe i. On ma ojahan na patoluhon di na mar-Jubilate hita: Las rohangku jala marolopolop soarangku, daginghu pe maradian huhut manghirim (ay.26). Ai ndang pasombuonMu diringku di banua toru jala ndang loasonMu na badiaMi marnida habusuhon (ay. 27). Marolopolop ma tondinta ai ndang diloas Debata marhite Jesus Kristus hita dihamatean salelengnai i. On ma tanda ni holongNa na so habilangan i sibaritahononta tu sandok houm nang bangso di sandok portibi on. Jesus Kristus na patupa hangoluan na salelenglelengna di angka na porsea.

4. Jubilate : Las rohangku jala marolopolop tondingku ala nunga huboto dalan tu hangoluan i. On ma ojahan na paopathon di las ni rohanta di na mar-Jubilate hita, ala naung taboto dalan tu haluaon i, ngolu na manontong i ima surgo i. Holan marhite Jesus do jumpang hita i. Tung tuani ma dipatupa Ibana dalan hangoluan i, jala dipabotohon Ibana tu hita Hangoluan salelengna i. Gok las ni roha hita sogot mamuji, pasangap Debata diadopanNa i. Amen !