Ev :Mateus 28: 16 – 20 Gabe Sitindangi Debata Sitolusada/Menjadi Saksi Allah Tritunggal

Sermon Jamita HKBP Ress. Agape Pkl.Kerinci

Minggu Trinitatis, 31 Mei 2026

Gabe Sitindangi Debata Sitolusada/Menjadi Saksi Allah Tritunggal

Ev :Mateus 28: 16 – 20

Patujolo

Buku Evangelium Mateus dibahen do di bona ni Padan na Imbaru ala i do na menjembatani Padan na Robi dohot Padan na Imbaru. Adong do hampir 400 taon jurang partingkian ni Buku Maleaki (songon buku na parpudi di Padan na Robi) dohot Buku Evangelium Mateus (buku na parjolo di Padan na Imbaru). Hira na gabe kelanjutan ni buku Maleaki do buku Evangelium Mateus on, ala adong hasintongan na uli na mardomu tu dua buku on, aha na dibagabagahon di buku Maleakhi digohi do i di bukku Evangelium Mateus. Dibagabagahon panurirang Maleaki do haroro ni “Surusuruan Parpadanan” (Maleaki 3:1) dohot “SuruanNa, na parade dalan”, bukku Mateus pataridahon hagogok ni baga-baga i marhitehite haroro ni Tuhan Jesus Kristus dohot na parade dalan di Ibana, i ma si Johannes Pandidi. Evangelium Mateus mamuha peralihan sian panurirangon di Padan na Robi tu panggohionna di Padan na Imbaru, sian Patik tu Asi ni roha, sian si Musa tu Kristus.

Ia na manurat buku on, ima sisean ni Tuhan Jesus na margoar Mateus, digoari do nang ibana “Levi anak ni si Alfeus”(bdk Markus 2:14). Disurathon ibana bukku na on dikisaran tahun 50 – 90 M. Sijalobeo do ibana dimulana, na karejo tu halak Rom (Mateus 10:3). “Mateus” lapatanna “Silehonlehon ni Debata”. Dimulana, ditujuhon ibana do buku on, tu angka Halak Jahudi nang tu Halak Kristen na marharoroan sian Jahudi, ima angka naung tangkas mananda angka barita panurirangon taringot tu Mesias na adong di Padan na Robi. Ala hadirion ni Jesus songon Mesias Sipalua naung pinarbagabaga i do na gabe penekanan ni bukku evangelium on.Turpukta Mateus 28:16-20 on, jotjot do digoari “Parsuruan na Balga” (Amanat Agung) ni Tuhan Jesus tu angka siseanNa, ima parsuruon (tona) parpudi na pinasahat ni Tuhan Jesus andorang so manaek Ibana tu Banua Ginjang. Parsuruan (Tona) on ndada holan relevan jala ditujuhon tu angka sisean-Na hatiha i sambing, alai dohot do nang tu hita di tingki on jala tu saluhut na porsea angka siihuthon Jesus di sandok partingkian.

 

 

 

Hatorangan Ni Turpuk

Ayat 16, di ayat 16 on dipatorang apostel Mateus do, ia inganan parpunguan nasida rap dohot Tuhan i andorang so manaek i Tuhan Jesus tu banua ginjang ima di sada dolok na adong di luat Galilea, sian i ma Ibana hinsat manaek tu banua Ginjang. Taringot tu goar ni dolok i, adong do perbedaan pendapat. Di Kisah Para Rasul 1: 11 –12 dohot di Lukas 24: 50 – 52 goar ni dolok ingananan hahihinsat ni Tuhan ima dolok Zaitun, sada dolok na jonok tu Yerusalem jala jonok tu Betania . Hape di bukku Mateus on inganan hananaek ni Jesus ima dolok na adong di daerah Galilea. Di daerah Galilea adong piga-piga dolok ima Dolok Tabor (inganan transfigurasi Jesus), Dolok Beatitudes (inganan ni Jesus patupa Jamita Dolok), Dolok Meron, Dolok Arbel, dlna. Ra, diingot si Mateus dope ragam ni parjumpangan ni Jesus dohot angka sisean-Na di luat Galilea dung hehe Ibana sian na mate, songon naung pinaboa-Na hian, jala na pinasahat ni angka parompuan-parompuan na ro tu tanoman i. Alai adong do deba ahli na mandok, na naeng ondolhonon ni Apostel Mateus dison ima: didolok na di Galilea i do dipungka Jesus jamita-Na (Matius 5 – 7), laos didolok i do nang patupaon-Na jamita-Na na parpudi.

 

Ayat 17, dung diida nasida Ibana, disomba ma ibana, alai na ganggu do.

Sian ayat on tangkas do taida proses ni panandaion ni sisean i tu Jesus ndang marhadosdosan. Adong do deba sian nasida naung porsea, na Jesus i, Tuhan jala sipalua na pinarbagabaga i, alani do gabe disomba nasida Ibana. Alai deba nari ganggu dope roha nasida (distazo,  boi  dilapatani:  ragu-ragu  {doubted}  atau  bingung{hesitated}) taringot tu hadirion ni Jesus i. Alani ma di ayat 18 dipapatar Jesus ma hadirion-Na. Di ayat 17 on tangkas do taida, ndang na ditulak Jesus panombaon na tu Ibana i, lobi sian i tahe lam dipapatar Ibana do hasurungan-Na tu angka na ganggu roha i, asa porsea nasida tu Ibana.

Ayat 18, jadi didapothon Jesus ma…, hata on ditujuhon tu angka sisean i, lumobi ma tu angka na ganggu roha (εδιστασαν = Edistasan) dope taringot tu hadirion ni Jesus. Nunga jumpang tingkina pasinghophon ni Jesus partingkian-Na di portibion. Nunga nania lelengna nasida rap dohot Ibana, jala nunga diida, dibege nasida saluhut pangajarion-Na dohot angka halonganan naung binahen-Na, suang songoni nang sitaononon, hamamate dohot haheheon-Na. Nunga ingkon singkop nian partinandaon nasida tu Ibana, alai ternyata adong dope sian nasida na ganggu roha. Alani ma dipapatar Jesus muse hadirion dohot hasurungan-Na. “Nunga sahat tu Ibana nasa huaso na di banua ginjang, dohot na di tano on”, on ma pengakuan na umbalga na pinatupa ni Jesus, na patuduhon hasurungan-Na, hamulianonNa jala hasangaponNa sian angka natinompa i. Hata on patuduhon huaso-Na mangatasi saluhut na, patuduhon haDebataon-Na, Debata do Ibana di mulana, Debata do nang nueang jala Debata do Ibana ro di saleleng ni lelengna. Alani layak do Ibana manjalo panombaon dohot pamujion sian saluhut angka na tinompa

Ayat 19 – 20a, Laho ma hamu, podai hamu ma…didi hamu ma…laos ajari hamu ma…

Hata on, ima hata parsuruon na umbalga tu angka sisean i nang tu angka na porsea di sepanjang jaman. Ndung tangkas di nasida taringot tu hadirion ni Jesus, nuaeng dipangido Jesus ma tu nasida asa: parjolo, Laho ma hamu,asa laho ma nasida borhat mamaritahon barita nauli i tu saluhut bangso. Barita nauli naung binege nasida jala naung jinalo huhut nihaporsean nasida i ingkon do baritahononna tu sauhut bangso nang tu saluhut na tinompa i. Alani ingkon borhat do nasida (hita) manghatindanghon i, na so jadi i so holan dinasida (dihita) sambing, alai ingkon do “mengalir jala menyebar” tu saluhut bangso nang houm. Ala ndang marrimbar angka bangso i di adopan ni Debata, saluhutna do diasii Jahowa jala saluhutna do ingkon gabe hasahatan ni haluaon dohot hangoluan na binoan ni Jahowa i.

Paduahon, didi hamu ma, ulaon on marpardomuan do i tu pemateraian (kedudukan hukum – legal standing) ni halak na porsea, simbol ni sasahalak masuk tu komunitas keluarga ni Debata – siihuthon Kristus, tanda hamubaon ni roha dohot ngolu na imbaru dibagasan Kristus. Jala na patoluhon, ajari hamu ma, on ma muse ulahon na ingkon tapatupa dung tapasahat barita nauli i, ingkon ajaranta do nasida naung mambege barita nauli i, asa gabe sisean ni Tuhan i nang nasida, matoras di bagasan Tuhan i. Proses pemuridan on ingkon patupaon ni angka sisean I do asa masa ma proses pemuridan yang berkesinambungan (estafet).

Ayat 20b, Ai ida ma, sai na dongananku do hamu…

Laho mangapuli angka sisean i di na mangulahon ulaon na balga i, dijanjihon Kristus do pandonganion-Na tu angka sisean-Na i. Molo tajaha di pamuhai ni evangelium on ima Mateus 1: 23, dipatandahon apostel i do tu hita taringot tu hadirion ni Kristus, ai digoari do Ibana “Immanuel”, na marlapatan “Debata mandongani hita”. Songon I do nang di ujung ni panghobasion-Na, dijanjihon Tuhan i muse pandonganion-Na. Na rap jala donganan-Na do angka sisean i ro di salelengnilelengna. Angkup ni i, tongtong do Kristus rap dohot angka siseanNa i paima sidung ulaonnasida, “rasirasa ro ajal ni hasiangan on”. Bagabaga on do na merangkum Parsuruon Bolon i dohot Barita na Uli ni si Mateus.

 

Refleksi/Harimpunan

*Mateus 28:16-20 ima sada joujou tu ganup halak Kristen asa unang holan manangihon pangajarion alai nunga tingkina hita rap dohot sude angka parbarita nauli i, laho mandalanhon parsuruon ni Kristus Tuhan i – gabe sitindangi Debata. Unang ma hita lemba jala sai marsidalian.

 *Sai unang ma hita terjebak di zona rutinitas dohot zona nyaman sambing, alai barani ma hita mambahen haputusan dohot tindakan konkrit laho paboahon haporseaonta tu angka dongan. Di ganup pardalanan ni ngolunta tahatindanghon marhuaso do Ibana mandongani hita, mangalehon gogo, habisuhon dohot pangaramotion.

*Minggu 31 Mei digoari do Minggu Trinitas na marlapatan Hasitolusadaon ni Debata. Hasitolusadaon ni Debata, ido inti jala hakekat ni haporseaonta na ingkon tahatindanghon jala tabaritahon tu humaliang hita, asa boi antusan nasida jala haporseaanna. Unang ma mabiar hita laho manghatindanghon i.