Epistel Jamita Partangiangan , Jesaya 50 : 4 – 9a

SERMON PARHALADO HKBP  RESSORT TIGALINGGA

“Pinasupasu ma na ro marhute hite Goar ni Tuhan i”

Epistel  Jamita Partangiangan , Jesaya 50 : 4 – 9a

Patujolo

Laho pamurahon pangantusionta di turpukhon, porlu do antusanta taringot tu pangantusiaon di bangso na adong di Timur Tengah di hatiha i. Ima molo marporang bangso i dohot bangso na asing parsidohot do Debata di parporangan i. Contohna molo marporang bangso Israel dohot bangso Babel jala monang halak Babel, dohot do gabe Debata nasida namonang di dok pangantusion nasida i. Songoni muse do pangantusion ni bangso Israel di na mian nasida di Babel. Dilapathon nasida do naung talu do Debata nasida, manang ndang margogo be Debata Jahowa di bangso na pinillitNa i.Dinamasa i ma manurirangi ma panurirang Jesaya tu bangso Israel.

Hatorangan ni Turpuk

1.     Relasi ni Debata dohot Naporsea songon Guru tu Sisean (4-5)

Adong do pigapiga gombaran ni hubungan ni bangso Israel dohot Debata, naparjolo songon hubungan suami-istri, Hubungan Bapa-Anak, songon hubungan Parmahan-Birubiru dohot hubungan Guru-Sisean. Hubungan antara Guru-sisean ima napatuduhon Sisean na ingkon si oloi ajar do na gabe Sisean na denggan, astuanna mananginangi do ianggo Sisean tu angka na ni dokni Guruna, onma songon namanggombarhon relasi ni Jesus Kristus dohot angka siseanNa. Diihuthon angka siseanNa do Ibana jala ditadingkon angka aktivitas siaparina na laho mangihuthon Jesus na laho marsiajar.

Di ayat 5, dipatorangdo muse ai “Debata do na mambuka Sipareon ni panurirang Jesaya” astuanna: Debata na gabe Guru dibagasan ngolu ni Siseanna i do namangalehon hatorangan manang pangajarion, ido namambungka roha nang pingkiran ni Sisean i laho mangulahon marhitehite hata tu angka bangsoNa i. Jala salahak sisean na marhasetiaon ima salahak na sisean na disiplin tu angka pangajarion ni Guruna. Molo nungnga dipillit Debata gabe siseanNa jolma i, dohot do muse dilehon ‘Dila Sisean’ lapatanna molo ndang malo hian mangkhatindangkon hata ni Debata gabe maloma nasida, songon si Jesaya na so pola malo gabe dipamalo Debata.

2.     Debata Pasabam Roha ni Na Loja (6-7)

Molo naneng marbarita na uli angka sisean ni Debata i, ndang pintor sude manjalo angka Barita na Uli i. Songon Ruas na umbege hata ni Debata sian jamita, godang do respon ni halak diangka Barita na uli i. Adong do na mangalehon reaksi positif jala adong muse do na bereaksi negatif adong muse do na radikal-ekstrim (songon panjalo ni namamparsilangkon Jesus i). Alai nang pe songoni, sai urupan ni Jahowa Debata do sisean i na laho mangadopi angka hamaolon i.

3.     Jonok do Debata (8-9a)

Aha na masa tu bangso Israel boi do masa i nang tu huria, jala aha namasa tu angka sisean i boi do masa tu angka parhaladona/pangkobasionna. Tantangan demi tantangan na niadopan ni angka parhalado i dipangke ma nian na laho pajonokhon diri tu adopan ni Debata (unang gabe mandao/maninggalhon ulaonna). Di ragam ni angka hamaolon i tongtong do Debata manosoi rohanta. Ro Debata paboahon tu hita na tongtong do marhasetiaon mandongani hita. Disarihon jala diparmudumudu do hita on, ima hita na gabe sisean ni Debata, jala dipangido do hita na laho mangihuthon Debata na Marhasetiaon i asa marhasetiaon hita mangulahon hinauli-hinadenggan hombar tu pangajarionna i. Unang mabiar hita na laho pamagohon pamingkirion na dao Deabata sian parngoluonta, alai tongtong ma tapatudu jonok ni Debata tu hita na laho mangajari jala manogu-nogu hita.

Panimpuli

Ndang tarpatupa jolma i agia aha pe, ianggo so sangkap ni Debata. Sangkap ni Debata do na mamillit angka siseanNa, ruasNa, HuriaNa dohot angka pangkobasiNa. Debata i sandiri do namangajari angka siseanNa i asa margogo na laho pararathon Barita Hasintongan i. Tapamago ma pamingkirion dohot roha na holang sian Debata, ala nungnga dipajonok Debata diriNa tu angka na pinilitNai marhitehite Tondi Porbadia na tongtong manogunogu hita di napatupahon lomo ni roha ni Jahowa i angka siseanNa. Jala unang be mabiar hita patupahon na denggan i, ai Debata nampunasa hangoluan i do dongan ni angka siseanNa ima na mangkilala jonok do Debata namangajari ibana. Amen..( Sumber dari Tulisan Pdt Venpri Lumban Gaol)

Jamita tu Partangiangan Minggu Judika 13 Maret 2016 Johannes 12:1-9

Foto : HKBP Batu Anggan Ressort Tigalingga 

SERMON PARHALADO HKBP TIGALINGGA SABTU 05 MARET 2016

Epistel Johannes 12 :1-9

MAMARITAHON HAMULIAON NI DEBATA

1.      Patujolo

Unok ni Pamaritahonon ni Sijohannes ima Silehonlehon, Hangoluan salelengnileleng na na pinasahat ni Debata marhitehite Jesus Kristus, Turpuk on ima udut ni Barita na manaringothon taringot tu na pianahehe ni Jesus si Lazarus di Betania, Betania lapatanna huta na pogos , alai laos di huta napogos i do di tamuei si Marta dohot si Maria Tuhan Jesus rap dohot angka Siseanna Dimiahi pat ni Jesus, alai adong na manghasogohon.( Markus 14:3-9). Haheheon ni si Lazarus sada gombaran doi tu Haheheon ni Tuhan Jesus, jala pamiahion ni parompuani tu pat ni Jesus marlapatan doi songon sada tudutudu tu na binuri ni Jesus pat ni angka sisean( Bindu 13:1-20). Sian turpuk on boi ma idaonta songon dia do sikap na hinalomohon ni Tuhan i sian hita ima roha na patudu parbue ni haporseaon ta .

2.      Pasahat ma na ummarga tu Jesus songon Parbue ni Haporseaon

Dung sahat Jesus tu Huta Betania  dipauli ma disi panganon ujuan, gabe di buat si Maria ma sahati miak nardus na so marsaor,( Murni, asli, terbaik  ) laos di miahi pat ni Jesus,doho obukna ( Obuk manang simanarup ima mahkota ni sada parompuan laos naummarga, manang mahkota i do dibahen si Maria mangalapu pat ni Jesus) mamiahi pat di patuduhon i do sikap haserepon ni roha ( kerendahan hati )  didok angka  pande bisuk mansai arga do miak nardus on ( Sahati 12 ons ) jala argana 300 hupang (Dinar) sa hupang dosmai dohot gaji ni sataon anak gajian hatihai. Alai haporseaon do na mangonjar roha ni si Maria patupahon i nang pe pogos ibana ndang tuk hapogosoni laho mangambati parbue ni haporseaonna. Nang pe mansai arga miahi alai ndang tartuhor haluaon songon na pinatupa ni Tuhan Jesus tu Ibotona si Lazarus naung hehe sian na mate.  Ndang haambatan sada halak marsilehon lehon tu Tuhani , molo ni onjar ni haporseaon nang pe pogos. Tindakan Pamiahoni dison marlapatan do paboa di tingki na hatop marsitaonon jala mate ma Tuhan Jesus humonghop dosa ni Portibion. Pambahenan ni si Maria gabe sorminan tu ngolu ni naporsea, ndang dihatahon marhite hata alai pambahenan dohot parange dohot parbue ni haporseaon

3.      Unang Marondingonding tu Napogos

Didok hata na Populer nuaeng “Buka dulu topengmu biar ku lihat wajahmu” nunga bahat jolma namarondinng onding laho manarihon halak na pogos hape dirina do nasinarihonna “ Songoni do si Judas Iskariot dibagasan turpuk on “ Marondingonding do Ibana sai songon na manarihon halak napogos , pola didok ibana “Boasa so ginadis miak i arga tolu ratus hupang, bahen silehonlehon nian di angka na pogos?” Holan topeng doi manang onding onding ndang sian rohanai, alai manarihon tu dirina sambing do, ai Haru Tuhan Jesus di Jehehon si Judas do argani 30 Keping perak, ido nanidokna di ayat 6, Ndada napogos sinarihonna umbahen na didok songoni; panangko do ibana tahe, diusung do asi asi ni halak , ai tu ibana di pasahat puroi, Mansai bahat pangalaho songon si Judas onmasa di tingkion, godang na marondingonding tu kepentingan ni angka na pogos, hape tu kepentingan na sandiri do, demi rakyat ninna hape demi dirina sandiri do. Dipatuduhon ungutungut ni si Judas do bangko ni hajolmaon si nuaeng na late rohana marnida ulaon na denggan. Godang do halak manghasogohon ulaon na denggan

4.      Rade mangauhon PanghophopNa

“Pasombu ma ibana, ai diparade i hira tu ari hatatanomhi” Pandohan ni Tuhan Jesus dison hira marlapatan doi dipasombu di si Maria mangulahon ulaon i asa gabe tudutudu  do on paboahon na naeng lam jonok nama sitaonon ni Jesus, hamateanNa dohot hatatanomsa. Jonok nama sangkap sangkap ni jolma na naeng mamunu Jesus. Alani do di dok di 5 Musa 15:1 Panurirarangon taringot tu Jesus ingkon ummarga doi sian namamparrohahon na pogos. “ Alai Tongtong do adong na pogos ditongatongamua, alai anggo ahu ndang tongtong di lambungmuna” Marhite pandohani naeng dohonon ni Jesus, “Gari hamu angka naung huajari, ndang ditanda hamu dope Ahu” .Nang pe naung leleng sisean i rap dohot Jesus, ndang porsea dope nasida di Jesus. Ala na so adong do haporseaon umbahen namarungutungut jala late rohanasida di pambahenan ni parompuani, alai ndang haambatan ni latei pasupasu ni Debata na sahat tu naporseai. Nuaeng Marsitaonon na ma Tuhan Jesus alani dosani jolmai, Bohado sikap ta? Sikap ni Halak na porsea ima:  ingkon rade mangauhon panghophopNai, Rade Mamaritahon hamuliaon ni Debata.  Gabe sitindangi di Barita Nauli.

5.      Hahonaan na tu ngolu siap ari

1.      Tatiru ma  pangalaho songon si Maria, na olo mangalehon/Pasahathon  na ummarga tu Tuhan i , martoruk jala marserep ni roha ma pasahathon pelean na uli tu Debata parbue ni haporseaonna, songoni ma hita Halak Kristen mangalehon na ummarga tu Debata, tapelehon ma na ummarga i tu Debata sian ias ni rohanta mardongan haserepon

2.      Tapadao ma sikap songon si Judas namaronding onding tu angka napogos, hape manarihon dirina sandiri, alai bulus ma marroha . Unang Terjebak hita menampilkan topeng rohani, idaon songon na badia hape angka hajahaton do dibagasan rohana, Topeng kemurahan hati, sai songon na marasiroha tu na pogos hape mangahut tu dirina sandiri.

3.      Unang holan dirinta ta haholongi, alai tahaholongi ma Jesus naung manghophop hita, tahatindanghon ma goarNa, ta auhon panghophopNai jala Tabaritahon ma Hamuliaaon ni Debata .  Amen

Pdt Budianto Sianturi

hkbpressorttigalingga.blogspot.com

ACARA : PABORHATHON St SAHALA SIANTURI MAMONGOTI MASA PANGSIUN Di HKBP PANDAN II Ressort Tigalingga, Minggu 06 Maret 2016

ACARA :

PABORHATHON St SAHALA SIANTURI

MAMONGOTI  MASA PANGSIUN

Di HKBP PANDAN II Ressort Tigalingga, Minggu 06 Maret 2016

============================================================================================

DUNG SIMPUL PAPUNGU PELEAN II

I.            PABORHATHON SINTUA MAMONGOTI MASA PANGSIUN:

01.   Marende No. 15 : 1         “Aut na saribu hali ganda”           (ro ma na pensiun tu jolo rap dohot keluarga)

Ø  Aut na saribu hali ganda saringar ni soarangki, naeng nasa gogo bahenonku mamuji Debatantai. Paboa las ni rohangki hinorhon ni pambaenNa i.

Pdt: Hamu dongan sahuria na pungu di bagas joro on, nuaeng jongjong do ditongatonganta ima Amanta  St. Sahala Sianturi. Nunga digohi tingki pangulaon nasida di hurianta. Na mansohot ma nasida nuaeng sian haparhaladoon di huria i. Alani i tama do pasahatonta hamauliateon ni rohanta tu Tuhanta na mandongani jala  margogoihon, huhut napatauhon nasida salelengon mangulahon haparhaladoon i. Angkup ni une do pasahatonta mauliate nang tu nasida naung manghalojahon, jala mangharonsothon mangulahon ulaon di hurianta. Alani i paborhatonta ma nasida nuaeng laho pensiun.

         Hamu dongan nami St. Sahala Sianturi.  hombar tu Aturan dohot Peraturan ni HKBP, nunga digohi hamu panjouon na sahat tu hamu marhobas di huria i. Na mandok mauliate do huria on tu Tuhanta na patauhon hamu marhobas hombar tu tohonan na sahat tu hamu. Nunga digohi hamu pangoloionmuna marhite panghobasion tohonan Sintua. Dipasahat hamu do napinangido ni hata ni Tuhanta na mandok:”Saat ula Tohonanmi”.

         Na tama do hamauliatehonon ni hurianta siala  pangulaonmuna na saleleng on di Tuhanta, anggiat parbue ni na hinobasanmuna na saleleng on di jolo ni Tuhanta gabe pelean na hushus jala mamboan pasu-pasu tu hagaganda ni na porsea dohot hatotogu ni haporseaon di angka  na hinobasanmuna .

         Alani i; jongjong ma hita sahuriaon martangiang tu Tuhanta (Jongjong ruas): Ale Debatanami, na gok asi dohot holong ni roha, ro do hami tu adopanMu laho pasahathon hamauliateon ni rohanami siala pangurupionMu di naposoM on saleleng diparar Ho manghobasi huriaM. Nunga sahat diula ulaon ha-Sintuaon na pinasahatMi: Sai baen ma ramos parbue ni panghobasion nasida di  ruas ni HuriaM tu hangoluan salelengna. Nang naposoM pe sai asi ma rohaM ramoti ma nasida, lam ramoti ma nasida dung mamungka pensiun sian panghobasionna songon sahalak Sintua. Molo tung dijalo pensiun sian ha-Sintuaon, sai ramoti jala patogu ma pos ni rohanasida  tu Ho. Palas  ma roha nasida tongtong, pahipas ma pamatangna laho mandai hinauli ni tingki pensiun songon jolma na marpanghilalaan, marroha jala na martondi hombar  tu lomo ni rohaM.  Togutogu jala ramoti ma nasida di angka  ariari ni hatuatuaonna asa tongtong manaili tu Ho, ai sian Ho do haroroan ni hadameon, las dohot sonang  ni roha di bagasan Tondi Parbadia. Pasupasu ma nang keluarga dohot sisolhot nasida,  asa rap mangolophon jala manghamauliatehon pasupasu najinalo  nasida sian Ho. Angkup ni i marpamuati ma rohaM di nasa hagaleon dohot hahurangan ni dongannami on di nasa pangulaon dohot panghobasionna na sailaon, sesai ma i ala ni  holong ni rohaM. Pinuji ma Ho  ale  Tuhan Jesus  ro  di saleleng ni lelengna. Amen.

02.Manjaha SK Praeses Distrik VI Dairii Taringot tu  Sintua Pensiun   (Parhalado Ressort)

03.Paborhathon na pensiun (dijalang Pdt ma Sintua na pensiun):

               Ale naposo ni Debata, St. St. Sahala Sianturi., mardongan pos ni roha di Debata Ama dohot AnakNa Tuhan Jesus Kristus dohot Tondi Porbadia, hupaborhat hami ma hamu laho pensiun sian Sintua.

               Dipasu pasu Tuhanta Jesus Raja Ni Huria ima panghobasionmuna na saleleng on, jala diramoti ma hamu di angka ari-ari di ngolumuna jala diparrohai hamu mandai hinauli ni tingki pensiun di angka ariari sidalananmuna dope tu tingki na ro on. Amen.

04.Mandok Hata:

                                                   1. Na Pangsiun/Keluarga

                                                   2. Sian ruas

                                                   3. Parhalado Huria & Ressort

05.Pasahat Cinderamata           1. Sian Huria

                                                   2. Sian Ressort

06.Marende BE. No. 190 : 3      “Las rohangku situtu”                    (laos jongjong ma saluhutna)

Ø      Las rohangku situtu, ai parjambar au tutu. Di na denggan sasudena, pinarbaga ni Debata. Di sude na burju i mangihuthon Jesus i.

07.Tangiang Pelean – Ale Amanami – Panutup/Pasupasu

08.Amen – Amen – Amen

EV: Pilippi 3:17-4:1 MARSIHOHOT DIBAGASAN TUHAN I

BAHAN SERMON  PANGULA NA GOK TINGKI  HKBP DISTRIK VI DAIRI

TU MINGGU REMINISCERE

21 FEBRUARI 2016

EV: Pilippi 3:17-4:1

MARSIHOHOT DIBAGASAN TUHAN I

I.                   Patujolo

Huria pilippi i ma huria na tung mansai dihaholongi Apostel Paulus sian sude huria nahinobasan na. Ala adong halobianna, Halobian i ma  ala tung diparsitutuhon nasida do mangalehon rohana mangurupi Apostel Paulus, na marpardomuan tu angka na ringkot di si Paulus, dohot sangkap asa tulus ulaon pamaritahonon di barita nauli (1:3-5,4:10-20).

Ditongos Apostel Paulus do suratna na tu huria Pilippi on sian hurungan (1:7). Tarhurung ibana, ala didok mambahen hagaoron marhitehite barita nauli napinasahatna, gabe diuhumi panggomgomi ni harajaon Rom. Nang pe tarhurung Apostel Paulus, ndada na gabe mansohot anggo ulaon panghobasionna di Ulaon pamaritahonon di Barita Na Uli i. Lumobi ma muse ala huria Pilipi huria na tung di halomohon roha na. Tung dilehon ibana do ianggo rohana  laho paihut ihut angka haimbaruon namasa di huria i. Marhite si Epaproditus, ima sahalak na porsea na gabe parhitean ni huria Pilippi lao pasahatton tongosan nasida tu Apostel Paulus. Tontu laos sahat do nang informasi angka barita na masa di huria i tu ibana`  Alani di tongos Apostel Paulus surat on laho patoguhon haporseaon nasida asa marsihohot dibagasan Kristus, gabe tiruan na denggan di angka dongan, martoruk ni roha maniru Tuhan i

1.      Apostel Paulus dohot Huria Pilippi

Marragam do angka masalah naniadopan ni huria Pilippi, lumobi ma muse dung na so rap be nasida dohot Apsotel i, dung ditangkup jala tarhurung si Paulus. Deba sian masalah na di parungkilhon nasida ima ala poda ni angka panurirang pargapgap 1:17. Adong muse ogaoga (ancaman) sian pihak panggomgomi (1:27-28), elaela sian horong ni sundut na geduk jala na marbalik sian barita nauli (2:15) asa mulak songon jolma sipelebegu, jala masa do nang parungkilon di nasida ala pangantusion na sala taringot tu pangulahonon di ruhut parsunaton songon naung hinasomalhon ni halak Jahudi (3:1-21). Tontu panghorhon ni saluhut masalah na niadopan ni Huria i, dihilala Apostel i do hinaringkot ni pangapoion tu nasida, asa anggiat manahan nasida jala hot dibagasan Tuhan i. Songon Apostel i na hot tongtong dibagasan Tuhan i, nang dibagasan namangadopi parungkilon ibana. Hasatiaon ni Apostel Paulus tangkas doi marhite pandohan “Ai Kristus do hangoluan di ahu jala laba nang hamatean” ( Pil 1:21. Sada hal na luar biasa do panindangion i. Molo tauji mandodo habaranionna i tu ganup halak kristen di partingkianta si saonari tung ambal situtu do tahe sian gogo ni panindangionta. Alai na gabe tiruan do i dihita , asa naeng songon ibana na tongtong martoruk ni roha maniru Tuhanta i (2:1-11). Tangkas do taboto Apostel Paulus pargogo hian laho mamusa halak kristen ,alai gabe pargale dung di bagasan Tuhan i, jala na sangap hian alai gabe lea diroha ni jolma ,ai pola ibana tarhurung alani barita na uli i.

2.      Gabe Tiruan di Halak na Porsea, Jala Marsihohot dibagasan Tuhan i

Diturpuk Jamita (Pilippi 3:17-4:1) on, taida do disi songon parbue ni hagogoon ni panindangion ni Apostel Paulus. I ma paboa naung dibagasan Kristus i ngoluna.Hata pandohan ni Apostel i mandok; ”Rap sitiru ahu ma hamu ale angka dongan,(17).Ido songon bukti paboa na hot ibana dibagasan Tuhan i.

Pandohan i, i ma sada hata panindangion na luar biasa, ai ndang dung adong dapot hita bentuk pernyataan na songon i sian angka panurirang di Padan na Robi, nang sian angka sisean ni Tuhan Jesus sandiri .Tuhan Jesus na parjolo sahali na manghatingdakon pandohan i,i ma di nanidok-Na;’’Ihuthon hamu ma Ahu’’,(Mat 4:19),dohot di Joh 10:11;Parmahan na denggan do ahu. Hasadaon ni Tuhan Jesus maradophon Debata, i do na gabe sorminan di hasadaon ni Apostel Paulus di bagasan Tuhan i. Gabe mampu ibana mandok’’Rap sitiru ahu ma hamu’’, jala laos margogo ibana marpanindangion dinanidokna;’’Saluhut do tarpatupa ahu dibagasan Ibana namargogoihon ahu (Pil 4:13).

Hata pangidoan do i na martujuan asa naeng marhasadahon huria i, ai hasadaon i do na gabe songon sada mual ni gogo di nasida laho mangadopi parungkilon ni adopan nasida. Asa songon Apostel Paulus na sada dohot Jesus i ,naeng gabe songon i nasida sada dohot Apostel i marhite paniruonna. Molo olo nasida maniru Apostel i,mampu ma muse nasida laho pamanathon huhut mamillit angka namarparangehon na denggan na gabe sitiruon nasida. Ditongatonga ni parungkilon Apostel Paulus manosohon parsihohoton manghaposi Kristus, nang pe dipalelele jala dihurungkon , parsihohoton manghaposi Kristus ido nanidokna “Rap sitiru ahu ma hamu” Ikutilah teladanku” ndanda holan manjamitahon ibana alai diparangehon do Jamitanai.

3.      Dibanua ginjang do sambulon ta

“Alai anggo holan di tano on do hita manghirim di Kristus i, jolma na dumangol do hita sian saluhutna” 1 Kor 15:19. Torop halak na sai mamingkiri portibion ido umbahen na didok si Paulus ”Torop do marpangalaho gabe musu ni silang ni Kristus, hamagoan do ujung nasida , butuha nasida do di pardebata, sihailahononna dihasangaphon, angka na di tano on do di parrohahon.  Digoari Paulus do nasida parjambar dihamagoan, ala na so Kristus be marsangap dingolu nasida. Dilehon ma penegasan asa ndada namanongtong ngolu di tano on alai banuaginjang do sambulon ni Tondinta , sian i do tapaimaima Sipangolu hita ima Tuhan Jesus Kristus. Paubaon na do dagingta na lea on gabe doshon dagingna na sangap i, hombar tu hagogoon nai, ai tarpatunduksa do saluhutna tu Ibana

II.                Aplikasi

1.      Minggu Reminiscere Marlapatan “Sai ingot ma Ale Jahowa angka denggan ni basaM, asi ni roha ni Debata do na marmuduhon hita alani Halak na porsea ingkon tongtong do marhaposan jala marsigantung tu asi dohot holong ni roha ni Debata

2.      Gabe tiruan na denggan ma hita tu ganup na humaliang hita, dihuta, dibalian nang di Huria

3.      Unang ma na di tano on sai taharingkoti, jala taparrohahon ai banua ginjang do sambulo ni tondinta

4.      Marsihohot ma hita tongtong dibagasan Tuhan i, Manang aha pe na masa arsak las ni roha pe, ai dihaholongi Debata do ganup naporsea di Ibana  Amen

Pdt Budianto Sianturi

HKBP Ressort Tigalingga