JAMITA PARTANGIANGAN 2 RAJARAJA 2;1-2

 

NAPOSO NI DEBATA NA SATIA

2 RAJARAJA 2:1-12

PATUJOLO

Tandaon do hau sian parbuena, tarida do imbo sian soarana, sipata di patuduhon goar i do parngoluon nang ulaon.  Elia dohot Elisa, i ma panurirang ni Debata. Goar Elia lapatanna “Jahowa do Debata.” Elisa lapatanna “Debata do na mangurupi.” Na rap marsaor do Elia rap dohot Elisa dibagas joro i, songon guru dohot sisean , laos Panurirang Elisa ma muse na manorushon ulaon hapanurirangon ni panurirang Elia, dung dialap Debata ibana tu banua ginjang. Rosu do parsaoran nasida pola dipatudos  lobi songon sahalak ama dohot ianakhonna paralealeon dohot parsaorannasidai  Tongon ma turpuk on, di na dialap Debata panurirang Elia  laho manangkok tu banua ginjang

HATORANGAN

Manuk ni pealangge hotek hotek laho marpira, sirang maraleale lobian matean ina, Tontu borat do parsirangan. Songon i do nang nahinilala ni panurang i. Di bagasan panogunoguon marmahani, dipasahat panurirang Elia ma; “Ua tinggal dison ma ho” pola sampe tolu hali (ay. 2, 4 dohot 6). Alai alus na marsihohot disoarahon Elisa, do; Songon sintongna mangolu Jahowa, mangolu dohot hosam, na so tupa tadingkononku ho! Ndang lomo rohana marsirang sian tuan nai , sai hot ma ibana nian tongtong dilambungna. Pola do sampe opat hali nasida manghatai  di inganan na marasing. Di pardalanan nasida di inganan na opat na marasing i, dipapatar do sada unok ni hananangkok ni si Elia tu banua ginjang, marhite pandohan;  Naeng alapon ni Jahowa si Elia tu banua ginjang (ay. 1)  Ai nunga disuru Jahowa ahu laho tu Betel (ay. 2) Ai nunga disuru Jahowa ahu tu Jeriko (ay. 4) Ai nunga disuru Jahowa ahu tu Jordan (ay. 6 Dung i, na dua panurirang i pe jongjong do di topi ni Jordan (ay. 7) Pandohanon marlapatan naeng alapon ni Jahowa dohot ai nunga disuru Jahowa, mangondolhon; ia hananangkok ni si Elia tu banua ginjang (nang saluhut jolma pe) HOLAN ALA HUASO NI DEBATA DO. Dang adong huaso manang usaho sian jolma. Boasa tung opat hali?  Sada ujian haporseaon do i di panurirang Elia. Laos dipataridahon ibana do haunduhon ni rohana tu Debata, Hasatiaonna tu Debata ndang manjua ibana, dung pe i asa nangkok ibana tu banua ginjang.

Dipardalanan nasida i, sai jumpang do nasida dohot sisean ni panurirang i di Betel dohot di Jeriko. Manangkasi ma nasida; Atehe diboto ho do na naeng boanon ni Jahowa tuanmu sadarion sian lambungmu? Dung i ninna ibana ma: Ahu pe nunga huboto, sip ma hamu! Boasa ingkon sip nasida huroa? Alai secara sederhana, marlapatan do i; martiti do sude, adong do tingkina manghatai, alai adong muse tingki hohom (Parjamita. 3:7), Jala on ma tingkina hohom so pola bahat marhata

 Somal do molo laho marsirang manang berpisah dohot sada dongan sai adong do angka pangidoan  songoni do nang Elisa.  Dipangido ibana si Elisa ma asa duahali lompit sian tondi ni si Elia. Ro tu Ibana Di ayat 9; Dung i ninna si Elisa ma: Ingkon silompit dua nian sian tondim songgop tu ahu!.Silompit dua nian sian tondim songgop tu ahu! Pandohan on dang na mandok asa sumurung ibana sian si Elia manang humebat .  Alus ni panurirang Elia; Na dokdok situtu do nian pinangidomi; alai molo diida ho ahu tarboan sian lambungmu, sai na songgop do songon i tu ho; alai molo so idaonmu, ndang songgop. Alai dung diida si Elisa songon i, Laos dibuat ma ulosna jala diribahi bola dua. Laos i ma hataridaan ni husao na jinalona i, Dua hali lompit ro tondi i tu ibana . Boasa didok na dokdok situtu? Na marlapatan do i, na marhahonaan doi tu huaso ni Debata.Molo so huaso ni Debata do na pasahathon dang ro i tu si Elisa, alani I ndang boi jolma mamaksa alai lomo ni Tuhani do na saut.   Tabona i atehe angka pasu pasu di angka na satia tu Debata.Sai dilehon Debata angka pangidoan ni Naposo na satiai. Diparbaga Debata tu namarsaroha da pasupasu na godang ima roha na sonang ninna endentai

          Hananangkok ni panurirang Elia: ida ma, ro ma sada hureta api dohot angka hoda api manirang nasida na dua, manaek tu banua ginjang ma ia si Elia marhite sian habahaba. Laos dibuat ma ulosna jala diribahi bola dua.Dungi joujou ma ibana, O damang, damang! Hureta ni Israel dohot angka jolma parsihundulna do ho! Dung i ndang be diida ibana. Laos dibuat ma ulosna jala diribahi bola dua. Alai joujou ni si Elisa “Amang” marlapatan lobi songon  panghormation, ( Ido hape umbahen amang dohot inang di jouhon tu angka Parhalado atehe, ) dohot tu angka na tu mua . Hureta ni Israel dohot angka jolma parsihundulna, marlapatan do i, ia hureta i ma peralatan porang ni halak Israel na dumenggan, marhite i ma digombarhon nasida agoan sahalak uluan nabolon, hagogon di Israel ima si Elia, alai sai na suruon ni Debata do muse panggontina ima panurirang Elia marmahani bangsoi

SIPAHUSORON

Mata Guru roha sisean, di patuduhon turpukon do tu hita marhite Elia nang Elisa sada sitiruon ima roha na satia tu Debata nang tu indukna. Elia songon Guru gabe sitiruon ibana di pangajarion jala satia dohot unduk tu Debata. Elisa songon sisean na olo unduk di pangajarion jala satia tu Guruna. Songoni ma nang hita asa sai tongtong satia tu Tuhani jala unduk tu angka induk nang parmahan

 HOLAN ALA HUASO NI DEBATA DO, na manait jolma tu surgo hasonangan, i ma di angka na satia mangihuthon Jesus,

 Ndang jadi manjua, marungut ungut , holosoan hita mangihuthon Debata. Molo sai marsihohot hota di haporseaonta jala satia silompit dua do jaloonta angka pasupasu ni Debata . Songon sintongna mangolu Jahowa, mangolu dohot hosam, na so tupa tadingkononku ho! I ma panindangion Parsitutuon ni halak Kristen  Mangihuthon Jesus nang pe godang angka hamaolon, parungkilon Ingkon tongtong do hita SONGON NAPOSO NI DEBATA NA SATIA Dang golom riaria.

Di angka sundut naumposo sai ingkon tongtong do hita pasangaphon angka na tumua, Natua tua pangalapan hata nang pasu pasu, naposo pangalapan gogo, alani i ingkon sai tongtong do hormat angka sundut na umposo tu angka sundut na tumua asa sai tarpasu pasu ngolunta Di angka na satia mangihuthon Jesus, jaloonna hagogoon mandalani ngoluna, patulushon panjouon ni Debata di dirina, dungi parjambar ma di tohap surgo hasonangan i.

Girgir ma manangi nangi bangkol ma manghatahon   Di na mangihuthon Jesus; gumodang ma hohom, sian na manghatai. Di na gumodang hohom, gumodang ma tingki manangihon Jesus, dina gumodang manghatai, otik ma tingki manangihon Jesus. Nunga taboto panjouon ni Jesus tu hita  antong, IHUTHON MA JESUS! MARI BERKARYA NYATA BUKAN BERKARYA KATA   Amen

 

BARITA JUJUR TAON, STATISTIK, HKBP TIGALINGGA RESSORT TIGALINGGA 2020

 

BERICHT, STATISTIK,

DAN LAPORAN KEUANGAN

HKBP TIGALINGGA RESORT TIGALINGGA

Kamis, 31 Desember 2020

---

 

 

 

 

 

 

 

 

 

 

 

 

 

 

 

 

REPOSISI PEKABARAN INJIL

PROGRAM, ANGGARAN, LAPORAN KEUANGAN

TAHUN 2020

BARITA JUJUR TAON

HKBP TIGALINGGA RESSORT TIGALINGGA

31 Desember 2020

 

1.       PATUJOLO

Puji pujian dohot hamauliateon dipasahat rohanta tu Debata parasiroha godang i, marhite anakNa Tuhan Jesus Kristus Raja ni Huria, ala dipangaramotionNa dohot pasupasuNa namandongani huriaNa, dilehon do tu hita hahipason, margogo do saluhutna parhalado nang angka ruas ni huria siganup ari tung pe sipata tabolus hamaolon, na mambahen mago las ni rohanta tarlumobi ma ala ni sorimago Covid-19 na masa di portibi on, di bangsonta, suang songon i nang tu hurianta,  alai dipargogoi Tuhanta do hita mamolus hamaolon i. Hasangapon jala hamuliaon ma di Jesus Raja ni Huria naung mangaramoti dohot mamasumasu hita.

 

2.       PARNGOLUON NI HURIA

Tarjou do huria tu laho mangulahon ulaon naung pinasahat ni Tuhanta tu huriaNa ima ulaon Koinonia (Parsaoran di hata ni Debata), Marturia (Ulaon Panindangion di hata ni Debata), dohot  Diakonia (Ulaon parasinirohaon ni Huria marhite hata ni Debata).

 

3.       ULAON UMUM

 

3.1.  PARMINGGUON

Di bagasan na sataon on, ala ni hamaolon panghorhon ni sorimago Covid – 19, adong do hamaolon di parmingguon, jala tapatupa do piga-piga alternatif parmingguon hombar tu angka na masa

a.       Sikola Minggu

Mauliate do dohonon tu Debata Pardenggan basa i naung umpasupasuhon angka na uli na denggan tu angka ianakhonta sekolah minggu, nasida ma sipasuang hosa loja/generasi penerus di hita angka natoras nang di hurianta, las do roha marnida haringgason nasida laho mandohoti parsikola mingguon si ganup ari minggu. Mauliate do nang dohonon di angka Guru Sekolah minggu naung mangalehon rohana nang tingkina laho mangajari angka ianakhonta sekolah minggu ima: St. R.Sibarani, N. Br Manullang, Nd. Sila br taringan.

Mauliate ma nang diharadeon ni natoras nasai ringgas mandasdasi angka ianakhonta tu parsikkola mingguan  sahat tu na manaruhon dohot mangalap muse sian gareja, sai lam tamba ma haringgason ni ianakhonta i tu joloan ni ari on, tarlumobi tu taon nanaeng ro on, laho marsingkola minggu, marsiajar mangulahon hata ni Debata, asa adong bohal ni partondionna di ari hagodanganna.

Sahat ro di tanggal 15 Maret 2020,denggan do mardalan ulaon tu parmingguon Sekolah Minggu di si ganup ari minggu, dohot di hari hari besar masuk ma nasida Pukul 07.30.WIB. Alai mamungka sian tanggal 22 Maret 2020, ndang dipatupa hurianta be parmingguon Sikola  Minggu di gareja. Di ganup bagas na be nama marminggu hombar tu parsuruon ni pamarenta. Alai tapatupa do muse parmingguon Sikola Minggu di gareja holan tu kalas III – VI di bulan September 2020, alai mansohot do muse ala ni angka na masa di luat Tigalingga marhitehite harararat ni Covid-19.

b.       Minggu Bahasa Indonesia

Minggu Bahasa Indonesia mardalan do dohot denggan sahat tu tanggal 15 Maret 2020. Alai, mamungka sian 22 Maret 2020 ndang dipatupa huria be parmingguon di gareja sahat ro di akhir bulan Juni 2020. Mamungka bulan Juli 2020 tapatupa do parmingguon di gareja alai 3 shift ma dipatupa huria mardua-dua sektor, jala Parmingguon Hata Batak nama dipatupa. Mauliate ma diharadeon ni angka ama/ina nami parhalado ni Huriata nasai ringgas manghobasi di tongatonga ni parmingguon i, nang pe sipata tarhipuhipu hita di tingki alai ndang gabe pangambati i di hita laho patupahon parmingguon i. Suang songoni do nang di ruas ni hurianta tongtong do dohonon mauliate ala talehon do rohanta laho mandohoti ibadah si ganup ari minggu.

c.       Minggu Bahasa Batak

Parmingguon Bahasa Batak songon na somal mardalan sahat ro di tanggal 15 Maret 2020. Alai, mamungka 22 maret 2020, marminggu di ganup bagas do hita saluhutna hombar tu anjuran ni pamarenta. Alai, mamungka bulan Juni 2020 tapatupa do muse parmingguon di gareja alai 3 shift ma tapatupa, asa boi taihuthon Protokol Kesehatan laho mamutus mata rantai penyebaran Covid-19. Jala marhata Batak do natolu shift parmingguon i. Mardalan do dohot denggan parmingguon ganup minggu nang pe 3 shift tapatupa. Martartamba halojaon ni sude parhalado ala gabe tolu parmingguon sihobasan ganup minggu. Mauliate ma di Tuhan dipargogoi do sude parhalado laho manghobasi i parmingguon i. Anggiat ma dipasupasu Tuhanta saluhut parhalado dohot ruas ni huria, jala marsangap ma Tuhanta marhitehite Jesus Kristus.

4. Marminggu di Bagas

Hombar tu arahan ni pamarenta, mamungka sian 22 Desember 2020 marminggu di ganup bagas ma sude ruas ni huria. Sada hasomalan na imbaru do on di ruas ni huria. Alai gabe pasolhothon ngolu parrumatanggaon dohot ngolu partangiangon on do Parmingguon di ganup bagas on. Ala hasomalan na imbaru do on, adong do pigapiga hali parmingguon di bagas diuluhon sintua Sektor manang pangula na gok tingki. Jala mardalan do dohot denggan. Anggiat marhitehite i, lam rimpa saluhut pangisi ni ganup bagas mamuji, marsomba, jala martangiang tu Debata di bagasan Jesus Kristus.

 

3.2.   IBADAH MINGGU DI HARI BESAR TAHUN GEREJAWI/PESTA TAHUN GEREJAWI

Dipatupa huriata do Ibadah Minggu di harihari besar tahun Gerejawi ima: Minggu Pesta Tahun baru 01 Januari, minggu Jumat Agung, buha buha Ijuk, Minggu Pesta Paskah I & II, Minggu Hananaek ni Tuhan Jesus, Minggu Pesta Pentakosta I & II, Minggu Pesta Natal I & II dohot Parpunguan Borngin Ujung Taon. Mardalan do dohot denggan sude ulaon i di bagasan na sataon on. Mamungka Jumat Agung sahat ro di Minggu Pentakosta di ganup bagas nama dipatupa parmingguon.

 

3.3.   IBADAH KHUSUS

Dipatupa huriata do pelayanan Ibadah Khusus jala mardalan do i dohot denggan di bagasan nasataon on ima

a.       Pandidion Nabadia dohot Manghatindanghon Haporseaon

Dipatupa hurianta do Pandidion Nabadia dohot Manghatindanghon haporseaon tu ruas ni hurianta. Paparjolo dipatupa di ari Jumat, 25 Desember 2020, Na tardidi godangna 13 halak (7 baoa, 5 boru). Manghatindanghon Haporseaon dipatupa dua hali. Na parjolo di Minggu, 05 Juli 2020 godangna 8 halak (5 baoa, 3 boru). Na paduahon dipatupa di ari Jumat, 25 Desember 2020 godangna 23 halak ( 10 baoa, 13 boru)

b.       Ulaon na Badia

Dipatupa hurianta do ulaon nabadia tu sude ruas ni huria naung tuk mandohoti ulaon nabadia di gareja nang di bagas ni ruas ni huria ima angka ruas ni huria na marpangidoan. Ulaon nabadia nadipatupa di Gareja di bagasan na sataon on dipatupa ma i di ari Minggu 05 Juli 2020, dohot di ari Jumat, 25 Desember 2020.

c.       Pamasumasuon dohot partumpolon

Denggan do mardalan angka ulaon ni huriata dibagasan nasataon on di Ibadah Pamasumasuon nang Partumpolon na nihobasan ni Pandita, Calon Pandita, nang Sintua. Torop ni napatupahon partumpolon di bagasan nasataon on godang na: 6 partumpolon,  jala na manjalo pamasumasuon godang na:  3 pamasumasuon

 

3.4.  PARTANGIANGAN

a.       Partangiangan Sektor

Partangiangan di hurianta dipungka tanggal 09 Pebruari 2020 sahat ro di tanggal 22 Maret 2020 mulai ma sian sektor I sahat tu Sektor VI, Senin borngin sahali dua minggu di Sektor VI, Selasa borngin di Sektor I – V. Alai mamungka sian 29 Maret 2020 mansohot ma partangiangan di sude sektor. Tatangianghon ma asa di taon na ro boi muse hita patupahon partangiangan sektor. Asa taruli hita di hata ni Debata nang marpasaoran dohot donganta na sa sektor.

 

b.       Partangiangan Passion

Partangiangan Passion I-III dang tapatupa be di gareja. Alai tongtong do tapatupa i di ganup bagasta. Nang pe songon dang pola mangorui habadiaon ni ulaon nang pe tapatupa i di ganup bagasta be.

c.       Partangiangan Buhabuha Ijuk

Di bagasan taon on, ala ni hararat ni Covid-19 ndang tapatupa be Partangiangan Buhabuha Ijuk. Anggiat ma di taon na naeng ro boi tapatupa Partangiangan Buhabuha Ijuk di bagas garejata.

d.       Partangiangan Khusus (di Huta)

Di bagasan na sataon on mardalan do dohot denggan angka partangiangan na boi masa diganup sektorta be/bagasta be hompar tu pangidoan ni ruas ni huria isarana: Partangiangan Peletakan Batu Pertama ni bagas, Partangiangan mamasuhi bagas, partangiangan sulang sulang pahompu, partangiangan pasahat sipanganon na tabo, partangiangan merayakan Ulang tahun dohot angka na asing dope.

Mauliate ma disude ruas ni huria na patujolohon ulaon huria laho mamungka angka ulaonta na denggan di tongatonga ni bagasta be,  sai anggiat ma lam ta haringkothon di taon nanaeng ro patupahon angka partagiangan songon patujolo ni angka ulaonta na denggan di bagas ta be.

 

3.5.  ULAON HURIA KHUSUS

1. Ulos Hatuaon

Di bagasan taon on, ndang tapatupa Pasahat Ulos Hatuaon.

 

2. Hadiah Siswa Berprestasi

Ganup Taon, tapatupa do mangalehon hadiah tu angka ianakkonta Parsikkola na berprestasi. Di taon on, talehon do hadiah tu na mandapot rengking I – VI ( sian TK sahat tu SMA/sederajat). Tapatupa do i di ari Minggu, 19 Juli 2020. Marhitehite pemberian hadiah on, asa lam ditingkathon angka ianakkon ma prestasi di parsikkolaan bahen sangap di Tuhanta.

 

3.6    ULAON KOINONIA

Di tongatonga ni hurianta mardalan do ulaon kategorial/Seksi ima: Seksi Sekolah Minggu, Seksi Remaja, Seksi Ina, Seksi Ama, Seksi Lansia

a.       Seksi Sekolah Minggu

Di bagasan na sataon bulan Januari sahat ro di Maret do dipatupa Parmingguon Sekolah Minggu. ima tu ianakhonta mulai sian na so sikkola dope sahat ro di kelas 6 SD. Dipatupa do PA Sikola Minggu di bagas ni angka ianakhonta Sikola Minggu, jala mardalan do dohot denggan mulai sian sektor I sahat ro di sektor VI. Alai mamungka bulan Maret 2020 ndang tapatupa be Parmingguon dohot PA ni Sikola Minggu songon na somal ala hararat ni sorimago Covid – 19. Tatangianghon ma asa di taon na naeng ro boi muse tapatupa Parmingguon dohot PA ni Sikola Minggu.

2. Seksi Remaja/Naposo

Di bagasan na sataon on adong do halangan di Ulaon ni Seksi Remaja, ima na nidohotan ni angka ianakhon ta Remaja mulai sian Kelas 7 sahat tu Kelas 12. Mulana i dipatupa do ibadah/PA setiap hari Sabtu malam di Gareja, alai mamungka bulan Maret 2020 mansohot do ulaon ni Seksi Remaja/Naposo. Mamungka bulan September 2020, diuduti do muse ulaon ni Seksi Remaja/Naposo marhitehite PA.

c.       Seksi Ina

Di bagasan nasataon on mardalan do dohot denggan Kategorial/ Seksi Ina. Molo dihuria ta adong dua punguan ina ima: Punguan ina Selasa dohot Punguan Ina Ester.

1.       Punguan ina Selasa

Ina selasa ima punguan ina Huria na patupahon PHD  ganup ari selasa, masuk ma Pukul 16.00 WIB. Jala laos di PHD ido nasida marsiajar KOOR nanaeng dipatubegehon di ari mingguna. Dung masa covid -19, mansohot ma parguruan dohot PHD ni Punguan Ina Selasa.

2.       Punguan Ina Ester

Ina Ester ima punguan ina Huria na patupahon PHD ganup ari Sabtu masuk Pukul 17.00 WIB, jala laos di PHD i do nasida marsiajar KOOR nanaeng dipatubegon diganup ari minggu. Ia anggota aktip Punguan ina Ester godang na :  15 halak, jala torop na namandohoti PHD Siganup minggi dibagasan nasataon on 5 – 10 halak. Dung masa covid -19, mansohot ma parguruan dohot PHD ni Punguan Ina Selasa.

d.       Seksi Ama

Mardalan do dohot denggan dibagasan na sataonon Ketegorial/Seksi ama. Adong do punguan ama di tongatonga ni Huria ta ima punguan Ama Agave, anggota punguan ama Agave godang na: 14 Halak anggota aktip. Dipatupa do PHD siganup ari Jumat. Disi ma nasida marsiajar KOOR nanaeng dipatubegehon ganup Minggu. Dung masa covid -19, mansohot ma parguruan dohot PHD ni Punguan Ina Selasa.

e.       Seksi Lansia

Mardalan do dohot denggan seksi Lansia dibagasan nasataon on, dibentuk do di huria ta punguan Lansia di ari Rabu 01 Maret 2017. Ta ingot ma 01 Maret 2017 ima hari hatutubu ni Punguan Lansia ditongatonga ni Huria ta. Di taon on, dipatupa do Perayaan Ulang Tahun ke-2 Lansia HKBP Tigalingga di ari Minggu, 31 Maret 2019

PHD Lansia dipatupa ma i ganup ari Rabu masuk pukul : 16 WIB, dipatupa dua hali saminggu, anggota lansia aktip godang na: 15 halak. Namandohoti punguan siganup ari rabu torop na 25 – 35 halak. Dung masa covid -19, mansohot ma parguruan dohot PHD ni Punguan Ina Selasa.

 

 

3.7   ULAON MARTURIA

1. Seksi Musik

Mardalan do dohot denggan panghobasion ni huriata dibagasan na sataon on ima diulaon ni Seksi Musik. Adong dua alat musik na tapangke laho mengiringi Ibadah Minggu siganup ari minggu dohot ulaon Ibadah Khusus di huria ta. Ima musik Organ na binuathon ni St. J. Sinurat, dohot musik Box  nabinuathon ni N. Dion br Nainggolan, musik na dua on ma na paganti sorin siganup ari minggu na mambahen lam denggan parmingguan ta. Sai lam margogo ma ama/inanami laho melayani ditonga ni huria ta marhite musik organ nang musik boks, jala lam tudenggan na ma panghobasionta tu taon nanaeng ro.

2. Song Leader

Song Leader ima na mamemimpin lagu/ende siganup minggu nasida ma namanguluhon hita laho mangendehon Ende siganup minggu, uli jala tio do soara ni angka inanami mauliatema di nasida na tongtong mangalehon roha na laho manghobasi ulaon Songleader. Siganup minggu adong ma dua halak songleader na manguluhon hita , ima; Kelompok A: N. Valentin br Sitohang, Nd. Sila br Tarigan, N. Teo br Sihombing; Kelompok B: N. Dion br Nainggolan, N.Marisa br Sianturi, N. Desi br Sianturi; Kelompok C: N. Martin br Silalahi, N. Frengky br Hasibuan, N. Leo br Sinaga. Ringkot dope dilehon Seksi Musik dohot Song Leader tingki laho marguru, asa denggan panghobasion nasida di ganup minggu. Ala nii, diatur Pemusik dohot Song Leader ma tingki laho marguru ganup minggu.

3. Seksi Koor

Mardalan do dohot denggan seksi Koor dibagasan nasataon on, adong sampulu dua  punguan koor na adong di huria ta ima: punguan koor Sektor I – VI, Koor Remaja, Koor Ina Ester, Koor Ina Selasa, Koor Ama Agave, Koor Lansia, dohot Koor Gabungan. Setiap hari minggu dipatubegehon punguan Koor do koor nasida, di ibadah minggu pagi na patubegehon Koor ima : Koor Remaja, di minggu Bahasa Batak : Koor Ina Selasa, Ama Agave, Ina Ester. Koor Lansia dipatupa sahali dua minggu, Koor Gabungan dipatupa sahali dua minggu; Koor Sektor I,III,V dipatupa duahali saminggu suang songoni ma nang Koor Sektor II,IV.VI.

Alai dung mansohot parmingguon di gareja ala ni sorimago covid-19 mansohot ma Koor di gareja. Nang pe nunga marminggu di gareja na dipatupa 3 shift, dang tapatupa be Koor di gareja mangihuthon Protokol Kesehatan memutus mata rantai Covid-19.

 

3.8   ULAON DIAKONIA

a.       Sosial Huria

Mardalan do dohot denggan Sosial ni huriata dibagasan nasataon on, sahat do sosial ni huria tu ruas ni huria na marsahit nang na monding balgana Rp 250.000 (dua ratus lima pulu ribu rupiah) tu na marsahit,  Rp 5000.000 (lima ratus ribu rupiah) tu keluarga ni na monding. Jala marhite sosial Huria dipatupa huriata do mandulo namarsahit, nang pangapulion tu keluarga na moding na adong dihuria ta. Diganupi huria ta do sosial ni Huria tu sude ruas ni huria olat ni na sahat angka boa boa sian Sintua Sektor nang ruas ni Huria, molo tung pe didok rohata ama/inanami hurang sigop huriata marhite sosial nihuria laho, mandulo manang mangapuli roha ta tung unang ma nian intor mandele manang manarita hita, masianjuan ma hita , jala marsiurupan ma hita laho mangalehon angka informasi tu huria ta.

b.       Peduli Kasih HKBP Tigalingga

Di ari Jumat, 17 April 2020, dipatupa hurianta do Gerakan Peduli  Kasih HKBP Tigalingga. Dipasahat do bantuan Sembako ima: Boras 10kg, Minyak 1 Kg, Telor 1 Papan. Paket na dipasahat godangna 60 paket tu 60 KK ruas ni huria.

 

3.9               TIM-TIM PELAYANAN

Hombar tu angka Bidang Panghobasion ni Huria, ima Koinonia, Marturia, dohot Diakonia, nunga dibentuk Tim-Tim Pelayanan Khusus: Tim Pastoral, Tim Doa, dohot Tim Diakonia. Alai ndang haru tarida dope panghobasion ni ganup Tim hombar tu angka uraian tugas. Ala ni i, marhitehite barita jujur taon on, tu taon na naeng ro asa denggan ma dihobas angka TIM ulaonna, hombar tu uraian tugas naung ditontuhon.

 

3.10                        PESTA – PESTA HURIA

Di bagasan na sataon bolon on, tapatupa do angka pesta di hurianta:

a.       Pesta Gotilon/Syukuran

Dalan laho mandok mauliate tu Debata, ala nunga tajalo pasupasu sian Ibana marhite sinur na pinahan dohot gabe na niula, tapatupa do pesta gotilon di tanggal 1 Maret 2020.

b.       Pesta Lilin

Na laho manomunomu hatutubu ni Jesus Sipalua i, tapatupa do Pesta Lilin. Domu ala ni hararat ni sorimago Covid-19 ndang apa tapatupa be Perayaan Natal-Natal di hurianta. Jala mamereng perkembangan ni Pembangunan/Renovasi ni garejanta mansai ringkot dope dana tu pembangunan i. Umbahen do direncanahon patupahon Pesta Lilin laho manumpahi biaya pembangunan. Alai, ala ni angka na masa di hurianta ndang tapatupa be Pesta Lilin tu Pembangunan. Amplop Pesta Lilin tu Pembangunan ma tapatupa singkat ni Pesta Lilin.

 

 

 

 

 

 

4.       PARHALADO HURIA HKBP TIGALINGGA

 

NO	PARHALADO	HAOTRANGAN
1	Pdt. B.Sianturi	Pandita Ressort/Uluan
2	Cal. Pdt. H. Sirait	Calon Pandita/Sekrearis
3	St. M.Sihombing	Ketua Parartaon
4	St. S. Pasaribu	Parartaon
5	St. B. Sihite	Paraataon
6	St. J. Sinurat	Bendahara
7	St. Y. br. Simanjuntak	Koinonia
8	St. B. br. Purba	Marturia
9	St. H. br Ambarita	Diakonia
10	St. H. Pasaribu	Badan Audit
11	St. R.Sinaga	Badan Audit
12	St. S R Gurning
13	St. R. br. Sibarani
14	St. R. Tinambunan
15	St. R. br. Siringo
16	St. A Lumbanbatu	Seksi Ama
17	St. S. br. Butarbutar	Seksi Sikola Minggu
18	St. E. Lumbantobing	Seksi Remaja/Naposo
19	C.St. I. Br. Malau

 

 

5.       HARUASON

Di bagasan na sataon on, adong do parhusoran ni jumlah statistik huria ala ni angka na masa di huria. Ima angka dakdanak na sorang, Na manghatindanghon Haporseaon, Na Marhasohotan, ruas na tamba, ruas na moru, na hona RPP, dohot angka na monding.

 

a.       Dakdanak na Sorang

Godang ni dakdanak na sorang sian ruasta  di bagasan na sataon ima 11 halak ( 7 baoa, 4 boru)

b.       Ruas na Tamba

Godang ni Ruas ni hurianta na tamba ima 4 KK dohot ianakkon nasida ( 3 ama, 4 ina, 3 dakdanak baoa, 1 dakdanak boru, 2 naposo boru, 3 naposo baoa)

 

d.       Ruas na Marbagas godangna: 11 halak sian ruas (4 baoa, 7 boru)

e.       Ruas Na Hona RPP godangna: 2 naposo

f.        Ruas na Monding

Di bagasan na sataon bolon on, ruas ni hurianta na monding godangna 13 halak. ( 4 ama, 6 ina, 2 naposo baoa, 1 naposo boru)

 

 

6.       STATISTIK

 

a.       Statistik Ruas ni Huria

SEKTOR	KK	AMA	INA	N.BAOA	N.BORU	D. BAOA	D. BORU	Jumlah
1	52	33	47	19	26	20	22	167
2	62	44	59	26	31	35	36	231
3	62	44	62	29	32	41	35	243
4	38	31	35	14	18	25	21	144
5	23	13	22	6	7	12	13	73
6	23	15	22	13	16	17	17	100
Total	260	180	247	107	130	150	144	958

 

7.       PENUTUP

Songoni ma barita jujur taon/bericth di tongatonga ni Huria ta di bagasan na sataon on. Sai anggiat ma lam tu tang na haporseon ta ditingki nanaeng ro. Anggiat ma dipasupasu Tuhanta angka na taula dilehon dihita gogo nang pos ni roha laho mangadopi angka na masa di ngolunta, jala tumibu ma salpu sorimago Covid-19 sian portibi on, sai lam tu dengganna ma panghobasion ta saluhut na parhalado nang ruas ni huria di tongatonga ni huria tu tingki nanaeng ro, Tuhanta ma na mamasumasu hita saluhutna.

 

                                                                              Selasa, 31 Desember 2020

Uluan HKBP Tigalingga

 

 

 

 

 

Pdt. Budianto Sianturi

 

 

 

 

 

 

 

 

 

Tigalingga, 31 Desember 2020

 

 

Bendahara			Ketua Parataon			Anggota Parartaon			Anggota Parartaon
St. J. Sinurat			St. M. Sihombing			St. B. Sihite			St. S. Pasaribu
Pandita Resort/Uluan			Sekretaris                              Badan  Audit
Pdt. B. Sianturi			C.Pdt. H. Sirait			St. R. Sinaga			St. H. Pasaribu