PARTANGIANGAN BONA TAON Parhalado dohot Keluarga HKBP Kisaran Kota Jumat, 07 Januari 2022

 

Partangiangan Bona Taon

Parhalado dohot Keluarga HKBP Kisaran Kota

Jumat, 07 Januari 2022

===========================================================

1.      Marende BE. No. 70: 1 - 2 “Naung Salpu Taon Na Buruk i” BL. 129

Ø  Naung salpu taon na buruk i, Ho ma hupuji Tuhanki.

Ai diramoti Ho tongtong, tondingku dohot dagingkon.

Ai diramoti Ho tongtong, tondingku dohot dagingkon.

Ø  (Jongjong) O Jesus sai asi rohaM, paian denggan ni basaM,

Muse di taon na imbaru on, di nasa huriaM tongtong.

Muse di taon na imbaru on, di nasa huriaM tongtong.

2.      Votum (P=Paragenda, H=Huria)

P   : Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen! Angka langit do mamaritahon hamuliaon ni Debata, jala jadijadian ni tanganNa do pinaboa ni na ratarata ni langit.

H  : Masipaboaan do angka ari jala masilehonan parbinotoan do angka borngin.

P   : Pardengganbasa do Jahowa jala Parasiroha godang, lambat tarrimas, jala ndang dibaloshon tu hita hombar tu angka hajahatonta. Haleluya! Martangiang ma hita: Ale Tuhan Debata! Sian asi rohaM do umbahen sahat hami tu taon na imbaru on; Ho do na mangaramoti hami di bagasan taon na salpu i. Sai asi ma rohaM, sai unang tulak hami nuaeng, sai dongani ma hami di bagasan taon na imbaru on. Pasupasu hami ro di angka ulaon na denggan, na huula hami marhitehite GoarMu. Pasupau HataM na badia i tu bagasan rohanami, asa imbaru rohanami, asa tarpamasuk Ho hami tu banua ginjang di hasusuda ni bohalnami. Amen!                      (hundul)

3.      Manjaha Turpuk

P   : Panjahaan hata ni Debata di partangiangan bona taonta sadarion, tarsudat di Lukas 3:15-17, 21-22. Tajaha ma marsingkatsorin. Managamnagam do bangso i, dirimpu be di bagasan rohana taringot tu si Johannes, atik beha Kristus i ibana.

H  : Gabe dialusi si Johannes ma nasida saluhutna: Ahu do tutu mandidihon hamu dohot aek; alai na ro ma na gumogo sian ahu; na hurang tama do ahu mangkarhari tali ni sipatuna. Didihonon ni I do tu hamu Tondi Parbadia dohot api.

P   : Di tanganna do purpuran, paiasonna ma pardegeanna: Papunguonna do emena tu sopona, alai tutungonna do hurangkam i tu api na so ra mintop.

H  : Alai uju tardidi natorop i saluhutna, gabe dohot ma Jesus tardidi; jala di na martangiang Ibana, mungkap ma langit.

P   : Jala mijur ma Tondi Parbadia tu atasna marrupa songon darapati, jala masa ma soara sian ginjang, songon on: Ho do Anakku, haholongan i; lomo do rohangku di Ho! Ido sahat na. Martua do angka na tumangihon hata ni Debata jala naumpeopsa.

P+H : Amen

4.      Marende BE. No. 65 : 1 “Patimbul Be Ma Sangap” BL. 129

Ø  Majumpang taon na imbaru on, di au dibahen Jesus.

Dibaen rohaNa di au on, basaNa dipatulus.

Ibana do manogu au, saluhut jea dipadao, mambaen las ni rohangku.

5.      Refleksi Hamauliateon Bona Taon

P     :  Huria ni Tuhanta, tahamauliatehon do pandonganion ni Debata dinasa pardalanan ni ngolunta. Jala boi taripar nuaeng hita dibagasan hahipason dibagasan roha na marhasonangan. Ndang alani gogonta manang haboionta umbahen tarbolus hita taon 2021 jala mamasuhi di taon baru 2022 on.

H    : Hupuji hami do Ho TUHAN di nasa denggan ni basaM dohot asi ni rohaM.

P     :  Panghobasion ni Huria pe nunga mardalan di bagasan taon pemberdayaan laos masuhanta ma taon hasadaon ni roha. Tung dibagasan hasadaon ni roha ma tarjalahi hita dame ni Kristus di tongatonga Huria marhite panghobasionta songon di hata ni Debata na mandok, “Haringgashon hamu ma mangaradoti hasadaon ni Tondi, pinadomu ni dame!”

H    : Asi ma rohaM di hami ale Tuhan, sai saut ma songon na hinalohomon ni rohaM.

P     :  Diadopan ni Debata tung so tama hita mangulahon nasa parsuruonNa i di hita songon Parhalado na manghobasi di HuriaNa dibagasan tohonanta i. Alai tung dibagasan roha sisean do hita mangulahonsa asa tarjalahi hita gogo na sian Debata laho mangulahon tohonan i.

H    : Tatap ma hami O Tuhan. Asi ma rohaM di hami ai Naposo na so hasea do hami; intap ulaon na patut do huula hami.

P     :  Taon 2022 gabe taon namampareahi hembang ni parbaritaon nauli ma hita marhite parbue ni haporseaonta dohot parsitutuan mangulahon parsuruonNa di hita. Asi roha ni Debata, manumpak ma Debata mamasumasu ruas ni Huria na sai tongtong tatangianghon ganup ari ganup borngin.

H    : Sai pasupasu ma Tuhan HuriaM nang hami on saluhutna.

P     :  Taon hasadaon ni roha ma di hita taon on. Songon hata ni Debata na mandok, “Molo tung adong apoapo marhitehite Kristus, dohot sosososo holong ni roha dohot parsaoran ni tondi, nang talup dohot asi ni roha, gohi hamu ma halalas ni rohangkon: Sada ma parrohahon hamu; sada ma haholonganmuna; saroha, sapingkiran ma hamu!

H    : Pinuji ma TUHAN Debata di nasaluhutna.

P     :  Hasangapon di Debata na di ginjang. Amen

6.      Marende BE. No. 64 : 1 - 2 “Naung Moru Do Muse Sataon” BL. 192

Ø  Naung moru do muse sataon, huhut lam suda bohalhi,

Beha do au na sailaon, ture do pangalahongki?

Lam ganda haporseaonku, nang holong ni rohangku pe.

Di Jesus dohot Debatangku, nang di donganku sasude?

Ø  Aut alusanku Debatangku, ra tung maila au disi,

Marningot salpu ni rohangku, ro di sude ulaonki.

Ai dosa do binaen ni tangan, gok dosa nang rohangku pe.

Nang pat, nang mata, nang pamatang, luhut marsala do hape.

7.      Jamita

8.      Marende BE. No. 67 : 2 “Debata Baen Donganmi” BL. 052

Ø  Debata baen donganmi! Molo Debata donganmu,

Ndang tarbahen ho be lilu, sai ture do langkami.

Debata baen donganmi, Debata baen donganmi.

9.      Tangiang Sian na ro

10.  Marende BE. No. 68 : 1-2 “Ihuthon Au Sude Hamu” BL. 093

Ø  Masilelean angka taon, ro di ujung na sogot.

O Jesus lehon parrohaon, na naeng tongtong marningot,

Di halalao ni aringki, huhut manimbang ujung ni.

Ø  Diudut Ho do hosangki, paidaida ahu,

Manang adong parbue ni na niulaM di ahu.

Hape jotjot tarhirim Ho, parbue i ndang olo ro.

11.  Tangiang sian na manjabui

12.  Marende BE. No. 69:1… “Ungkap Bahal Na Ummuli” BL. 084

(Papungu Pelean)

Ø  Jesus sai urupi hami, dohot di taon baru on;

Paimbaru gogonami, mangihuthon Ho tongtong

Pasupasu ma muse, na porsea sasude.

Ø  Pingkirangku, ulaonku, tau pasangap Ho ma i,

Dungo manang modom ahu, Ho tongtong di lambungki;

Nang lao ruar masuk pe, Ho ma donganki muse.

Ø  Taon parasinirohaon, baen di au sandok taon on,

Lam pahot ma hasesaan ni dosangku di au on.

Holan Ho do, Jesuski, tuk pasaehon dosangki.

Ø  Sai pagomos ma rohangku, manundalhon dosa i,

Lam paganda ma ringgashu, mangulahon patikMi.

Asa unang rohangkon, lalap di portibion.

Ø  Sai ramoti au Tuhanku, sipat taon naimbaru on!

Usung ahu di tanganMu, molo suda bohalhon.

Asa las rohangku lao, ia ro panjouM di au.

13.  Tangiang Panutup

14.  Acara Diaturkan Tersendiri

BAHAN SERMON HKBP DISTRIK XIII ASAHAN LABUHAN BATU Minggu 13 Pebruari 2022 JEREMIA 17:5-10 “Tarpasupasu do angka namarhaposan tu Jahowa”

 

                    BAHAN SERMON HKBP DISTRIK XIII ASAHAN LABUHAN BATU

Minggu 13 Pebruari 2022

JEREMIA 17:5-10

“Tarpasupasu do angka namarhaposan tu Jahowa”

I.     PATUJOLO

             Roha haginjangon ni jolma pajimput ibana, alai anggo partondi na serep dapotan hamuliaon, Keangkuhan merendahkan orang, tetapi orang yang rendah hati, menerima pujian.( Poda 29:23) Dohot hata na asing dohononta ma  Kesombongan merupakan awal kehancuran. On ma na nialaman ni bangso Juda dirimpu rohanasida do nunga sonang nasida molo mardongan dohot angka bangso na manomba debata gana gana an , hape baliksa do na romereka mengalami masa yang berat dengan dibuang ke Babel. Hukuman itu diberikan oleh Tuhan untuk menghancurkan kepercayaan diri bangsa Yehuda yang terlalu tinggi dan membuat mereka bertobat (29:11-13). Hidup susah di pembuangan menyadarkan mereka untuk kembali mengandalkan Tuhan, satu-satunya Allah yang berdaulat.Dung sun pesta Parlapelapean (hari raya Pondok Daun) na pinatupa ni halak Jahudi na adong di Jerusalem, disi do  Tuhan Jesus borhat tu bagas joro, diulahi Ibana muse marjamita tu halak Parise dohot sibotosurat na adong di pesta Parlapelapean i, ima taringot tu diriNa na patoranghon paboa “Ibana do Panondang di portibion, na so tupa mardalan di na holom na mangihuthon Ahu: di ibana do tahe panondang hangoluan” (Joh. 8:12). Dang dihaporseai halak Parise taringot tu jamitaNai gariada sai didok nasida do tu Ibana “ndang sintong panindangionMu ala diriM do na dihatindanghon Ibana”. Marhite on dipatorang Ibana ma muse tu nasida paboa na so sian portibion do Ibana alai sian ginjang, sian Ama i na marsuru Ibana tu portibon laho pasahathon natinonahon ni AmaNai (Joh 8:23). Jala nasa jolma na madabu tu dosa, marujung ma jolma i di hamatean. Ido jambar ni jolma naung madabu tu bagasan dosa, ala nunga diparhatoban dosa jolma i. Jala dang adong jolma na boi malua sian huaso ni dosa dohot hamatean i sian dirina sandiri, alani dilehon Ibana ma Anakna nasasadai paluahon jolma sian huaso ni dosa dohot hamatean. Diajari Jesus ma angka natorop i taringot tu harajaon ni Debata, laos godang dipatupa angka halongangan di tongatonga nasida. Hinorhon ni i, nunga lam torop jolma gabe porsea di Tuhan Jesus.

II.  Hatorangan

·      Mian di Hata ni Jesus (Ay. 31-32).

             Dibahen i do umbahen na diajari Jesus  nasida mandok “Molo mian hamu di bagasan hatangKu, sintong ma hamu sisesanHu, dung i tandaonmuna ma na sintong i, jala paluaon ni na sintong i ma hamu”. Hata “Mian” ima na marlapatan maringanan jala mangolu/manggulmit ngolu na hombar tu hataNa. Molo mian hamu dibagasan HataNa gabe sintong ma hamu siseanHu. Sisean ima na mangihuthon jala manghangoluhon ngolu ni Jesus, asa ngolu ni sisean i jumpang songon ngolu ni guruna. Jala sisean ima halak na rade manangihon hataNa di sude partingkian, sude na masa, rade mangido panuturion dohot poda sian Jesus, rade marsiajar sian Jesus asa botoonna lomo ni rohaNa. Jala marhite haringgason na marsiajar i gabe ditanda/diantusi ma hasintongan i, ima Jesus sandiri do i. “na mananda Jesus, na mananda Ama i do. Jesus dibagasan Ama i, Ama i dibagasan Jesus (Joh 14:7-9). Jala ro Ibana tu portibi on laho paluahon portibi on. Jesus do paluahon jolma i sian dosa dohot hamatean. Gabe ngolu naimbaru ma di jolma i, ngolu na so dibagasan parhatobanon ni dosa be. Alani i, ingkon mangolu ma hita mian dibagasan hataNa na sintong i, ima ngolu na pataridahon siihuton Kristus manang siseanNa hita di portibion, marhite gulmit ni ngolunta, taulahon ma hombar tu hataNa.

 

·      Hatoban ni dosa do ganup na mangula dosa (Ay. 33-34).

             Ndang tarjalo Jahudi pandohan ni Jesus taringot haluaon na di Ay.32 i. Ala dirajumi nasida halak na bebas, na malua do nasida, na so hea diparhatoban manang ise pe (nang pe hea nasida hatoban di Babel), jala diboto nasida songon bangso na pinalua ni Debata sian parhatobanan Misir. Nunga bangso na malua nasida. Ndang tarjalo nasida di pandohan ni Tuhan Jesus na mandok : “paluaon ni na sintong i ma hamu”. Mangihuthoni dang hatoban nasida, ala diparhatutu nasida do pomparan ni si Abraham nasida, dirajumi dirina anak ni raja, ndada hatoban di manang ise. Hape parulaonna andul dao do sian parulaon ni si Abraham na sai unduk tu Jahowa. Alai ndang ringkot be di nasida pangajarion dohot paluaon sian parhatobanan ni manang ise. Terbatas do pangantusion ni halak Jahudi taringot tu haluaon ima holan di pardagingon sambing, haluaon i marpardomuan tu parhatobanan ni jolma tu jolma do i. Alani ma didok Jesus : Hatoban ni dosa do ganup na mangulahon dosa. Nanidokna, hatoban do nasida ala diula sogo ni roha ni Debata, alani ringkot nasida paluaon ni Jesus sian parhatobanan ni dosa. Jala holan na “Sintong i” ima Jesus ido na tuk paluahon jolma i sian parhatobanan ni dosa. Dalan mandapot haluaon i ima marhite na mian di Hata ni Jesus.

·      Molo dipalua Anak i hamu, malua situtu ma hamu (Ay.35-36)

             Dilehon Jesus Kristus do hatorangan, marhite pandohanna : ndada tongtong hot di bagas anggo hatoban, Anak i do disi tongtong (Ay.35) Lapatanna, ndang tuk hagogon ni jolma na sian parhatobanon ni dosa, laho paluahon dirina sian dosa i. Holan Damang na di banua ginjang i do na boi paluahon jolma sian dosa. Anak i do na mian di bagas ni Damang, Ibana ma na disuru Damang paluahon jolma pardosa i, asa molo dipalua Anak i hamu, na malua situtu ma hamu. Dipalua ma hamu sian hamatean jala bongot tu hangoluan. Ganup na dipalua Jesus i, na malua situtu do i. Ndang adong halak na boi malua sian dosa alani dirina sandiri. Debata sandiri dibagasan Jesus Kristus do paluahon jolma sian parhatobanan ni dosa asa unang mangulahon dosa  be jolma i.

 

·      SIPAHUSORHUSORON

1.  Ndang sude halak Kristen na porsea tu Debata na mangolu “Mian dibagasan hataNa”. Alani i, molo nunga mangolu hita mian dibagasan hataNa, ingkon tarida ma i di panghataion nang di pambahenanta. Mago do biar molo tatangihon HataNa, ai ro Jesus tu portibion laho mandongani jolma asa unang mabiar. Immanuel “donganta ma Debata”

2.  Hombar tu topik Mingguta, ima “Debata na Paluahon” ndada ruhut parbangsoon, status sosial dohot hatauon na gabe jaminan di haluaon i, alai Jesus Kristus i do na paluahon. Kemerdekaan yang sesungguhnya hanya di dalam Tuhan Yesus

3.  Ndang gabe hatoban be halak Kristen, ala naung dapotan haluaon hita. Sian i ma boi halak Kristen patuduhon sikap laho mangadopi angka ragam ni parungkilon di ngoluna. Halak naung dapotan haluaon partondion, tontu halak naung boi mangadopi ragam ni parungkilon do i dibagasan benget ni roha dohot panghirimon na mangolu di bagasan Ibana (Rom 12:12). Amen

 

Pdt. Budianto Sianturi

Pendeta HKBP Ressort Kisaran

 

 

 

ACARA PARTANGIANGAN PAMUHAI HKBP KISARAN KOTA RESORT KISARAN

 

1.      Pangaradeoan (U=Uluan, H=Huria)

U    :  Huria ni Tuhanta, tama do tahalashon denggan basa ni Debata di nasa saluhutna godang pambahenan di Debata di hita nang tu HuriaNa. Jala boi hita pajumpang laho mamuhai partangianganta di bagasan taon 2022 on.

H    : Pinuji ma Debata na mamasumasu HuriaNa

U    :  Ragam do angka na masa naung tabolus di nasa pardalanan ni ngolunta alai tongtong do satia Debata gabe Sipangurupi di hita. Dipargogoi do hita jala ndang dipasombu hita mardalan sasada hita.

H    : Jahowa do Siparmahan ahu, ndang tagamon hurangan ahu. Ibana mandongani ahu.

U    :  Puji ma Jahowa, jala nasa roha di bagasan mamuji goarna na badia i. Ingkon baritahonon do pujipujian di Jahowa, jala nasa sibuk mamuji goarna na badia i ro di salelenglelengna. Tapuji ma Jahowa di bagasan partangiangan : di jabu, gareja, inganan partangiangan sektor, punguan koor, patanakhon hata ni Debata. Borngin on ma tutu partangiangan pamuhai ni saluhutna rumang ni nasa partangiangan di hurianta on. Alani i taparade ma rohanta, martangiang ma hita di bagasan rohanta be!.........Amen….

2.      Marende BE. No. 4:1-2 “SAI PUJI DEBATA”

Ø  Sai puji Debata dibaen asi rohaNa. Huhut tongtong basa di nasa tinompaNa. Ria ma hita be mamuji Debata. Ai sesa do nuaeng dosanta i dibaen

Ø  (jongjong) Disuru Debata AnakNa Jesus Kristus. Jadi mansai arga do hita on ditobus. Diporsan Jesus i dosanta sasude. Asa mudarNa i paias hita be.

3.      Votum

U    : Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, na tumompa langit dohot tano on. Amen. Sai paeleng ma pinggolMu tu ahu, hapogani paluahon ahu. Sai Ho ma gabe dolok batu partanobatoan di ahu, gabe huta na gonting laho pangoluhon ahu.

H    :  Ai Ho do partanobatoanku hian dohot pangondinganku, jala ala ni goarMu sai iringiringonMu jala toguonmu ahu. Tu Ho do, ale Jahowa, ahu marhaposan, sai unang ma paurak ahu saleleng ni lelengna.

U    :  Sai palua ma ahu marhitehite hatigoran Mu! Haleluya. Martangiang ma hita : Ale Tuhan Debata, Pardenggan basa jala Parasi roha na pataruhon hami boi mamongoti taon 2022 on. Nueng hupatupa hami do partangiangan pamuhai di tongatonga ni HuriaM. Asi ma rohaM, anggiat tung boi mardalan denggan sude angka ragam parpunguan, parsaoran, manang partangiangan di nasa pardalanan ni HuriaM. Pasupasu ma hami di sude angka panghobasion dohot ulaonnami, asa tongtong marlas ni roha hami mandalani ariari ni ngolunami. Jala songon halak naung manjalo pasupasu sian Ho, sai paingot ma hami asa gabe pasupasu hami nang tu angka na humaliang hami. Ale Tuhan Debata, Amanami na di banua ginjang! Asi ma rohaM di hami halak na gale on. Diida Ho, na gogo do musunami, sai talu do hami dibahen ala ni hagaleonnami. Dibahen i hupangido hami tu Ho : Sai pargogoi jala pamonang ma hami maralohon musu i marhitehite panaonon ni Anak haholongan ni rohaM, Tuhan Jesus Kristus. Amen.

4.      Marende BE. No. 187:1+4 “DENGGAN DO PANOGUM”

Ø  Denggan do panoguM ale Jahowa, Di angka na pinarmahananMi. Tagamon baheononMu ma na roa. So tarbunihon Ho do burjuMi? Jotjot suhar do pambahenanMi, di roha ni na so tumanda Ho. Alai marhite sian i do ro, tu hatiuron na tinoguMi.

Ø  O Tuhan sai pinuji ma goarMu. Ai dipangolu Ho do hami on. Tandaonnami ma pambahenanMu. Dung dipatiur Ho do mata on. O Debata lomo do rohaMi, manogu hami di na rodop on. Holong do rohaMi di hami on, naeng sahat tu lambungMu baenonMi.

5.      Pahusorhusor Denggan Basa Ni Debata

U    :  Puji ma Jahowa, ale tondingku, jala unang tung halupahon denggan ni basaNa sudena. Jala nasa rohangku di bagasan mamuji goarna na badia i.

H    : Sai baritahononku do angka denggan basa ni Jahowa, angka pujipujian ni Jahowa, ai ido na tama marningot sude na binahen ni Jahowa tu hita.

U    :  Tahatindanghon do pambahenan ni Jahowa dihita. Diramoti do hita jala dilehon do ragam hinadenggan dibagasan ngolunta umbahen tarbahen hita mandok mauliate tu Jahowa. Di tongatonga ni keluarga, parianakhon, angka dongan nang angka tondong, tung tangkas do pambahenan ni Debata dibagasan pangaramotionna tu hita.

H    : Sai pujionku do angka pambahenan ni Jahowa, ai sai ingotonku do halongangan angka na binahenna i sian na robi.

U    :  Dilehon Ibana do di hita angka na ringkot i di ngolunta, ganup ari ganup tingki. Dilehon do di hita gogo, pos ni roha dohot panghirimon laho mangalului ngolungolu, nang pe sipata ingkon taae do halojaon, ganggu ni roha alai ndang dipaloas Ibana hita ianggo tu bagasan pandelean.

H    : Tung na balga do asi ni rohaMi Tuhan, alani i tongtong ma pujionnami Ho di tongatonga ni ngolunami.

U    :  Di taon 2022 on; boi masa do angka parungkilon na marragam boluson ni nasa hajolmaon. Taida do hamamasa ni banjir bandang, suhul dohot aek magodang. Asing dope taringot hadameon ni ganup hadamaeon dipotibion di ancaman parporangan. Laos tahilalahon do pangontak pandemic covid na sai mangerbang di ragamna na sipata mambahen ganggu rohanta jala patubuhon roha biar mandalani parngoluon on. Nuaeng dia ma sidohononta tu Debata?

H    : Ale Tuhan, sai asi ma roham di hami. Ho ma dongannami. Urupi ma hami.

U    :  Di taon 2022 on dipamasa Hurianta do HKBP taon hasadaon ni roha. Nihirim do sada ni roha nang pingkiran di na laho pasadahon tahi dohot sangkap laho saurdut mangulahon holong ni roha nang pangurupion marhite ulaon di tongatonga ni Huria di nasa pardalananna. Songon hata ni Tuhan na mandok :

H    : Gohi hamu ma halalas ni rohangkon: Sada ma parrohahon hamu; sada ma haholonganmuna; saroha, sapingkiran ma hamu!

U+H : Sai na donganan ni Debata do hita ganup ari, rasi rasa ro ajal ni hasiangan on laho pangulahon lomoNa i. Amen

6.      Marende BE. No. 185:5 “HOLAN SADA DEBATANTA”

Ø  Sai na sintong do hataNa, na tinonahonNa i

Atik pe asi rohaNa, ndang paubaonNa i

Sai oloi ma i sude, asa sonang ho muse.

7.      Epistel

U    :  Tajaha ma hata ni Debata di partangianganta borngin on na tarsurat di Jeremia 17:5-10. Songon on do hata ni Jahowa: Marjea ma baoa na marhaposan tu jolma, manang tu bolon ni botohonna, gabe dipasurut rohana sian Jahowa.

H    : Songon halak parbahudung di tano na mahiang do ibana, ndang tagamon idaonna ro na denggan i, jala maringan ibana di tano bangkalbangkal di halongonan, di tano na ansim na so hinundulan ni halak.

U    :  Alai martua ma baoa na marhaposan tu Jahowa, jala Jahowa haporusanna dibahen.

H    : Tudos do ibana tu hau na sinuan di topi ni batang aek, jala manjarar uratna di lambung batang aek, jala ndang mabiar ibana molo ro hamohopon, jala tongtong rata bulungna, jala ndang holsoan ibana di taon haraharon, jala ndang mansohot marparbue.

U    :  Tung na angkal situtu do roha ni jolma, jala na ganggu, tung ise ma na tuk mandodoisa?

H    : Ahu Jahowa do Sidodo roha, siuji piapia jala mangalehon tu ganup jolma hombar tu dalanna, hombar tu parbue ni pambahenanna.

U    :  Ido sahatna. Martua do angka na tumangihon hata ni Debata jala na umpeopsa.

U+H : Amen

8.      Marende BE. No. 28:1+6 “HATA NI JAHOWA”

Ø  Hata ni Jahowa sipadame jolma hangoluan i

Halalas ni roha siapuli roha ni na marsak i

Gogo ni Debatangki paluahon na porsea sian nasa jea.

Ø  I do haojahan na tongtong manahan salelengna i

I hajongjonganhu i do haposanhu hangoluanhi

Gogongki tongtong ma i mangihuthon tu hataMa, lao mambaen lomoNa.

9.      Jamita : Mateus 4:23-25

10.  Marende BE. No. 288:4 “NA MARGURU DO LUHUTNA”

Ø  Pangkirimon do pasonang, roha ni na marhaposan

Tu Jahowa Debata, ai tu asi ni rohaNa

Hupasahat do sudena, sai dibaen do na tama.

11.  Tangiang : Mewakili Ruas

12.  Marende BE. No. 281:1 “MARTUA DO NA MARHAPOSAN”

Ø  Martua do na marhaposan, tu Debata Amanta i.

Ai i do dapot pangapulan, di nasa parsorion i.

Ndang rihit haojahan ni, na mangkaposi Tuhan i.

13.  Tangiang : Mewakili Sintua

14.  Marende BE. No. 695:1,2,4 “JESUS TUHANKU DI HO MA AU ON”

(Papungu Pelean)

Ø  Jesus Tuhanku di Ho ma au on. Asa mangihut tu Ho au tongtong. Gohi rohangku ingani au on. Sonang di Ho tongtong. O Tuhan togu ma au. O Tuhan togu togu ma au. Gohi rohangku ingani au on. Sonang di Ho tongtong.

Ø  Mansai godang do pardangolanki. Tagan so Jesus dope tohaphi. Disesa Jesus sude dosangki, gok dame rohangki. Asi rohaNa di au Tongtong asi rohaNa di au. Disesa Jesus sude dosangki, gok dame rohangki.

…Musik…

Ø  Na marhaposan tu Jesus tahe, sai na martua ibana muse. Sonang ibana di portibion, nang di surgo inon. Jolma na bonar burju, Jolma na bonar huhut burju. Sonang ibana di portibion, nang di surgo inon.

15.  Ulaon Na Badia

1.      Marende BE. No. 152:1, “Jesus na mamorsan”

Jesus na mamorsan dosa ni portibi on, pangolu hami.

Jesus na marmosan dosa ni portibi on, pangolu hami.

Jesus na mamorsan dosa ni portibi on, sai pasonang hami, Amen, Amen, Amen.

2.      Agenda.

3.      Marende BE, No. 153:1, “O Jesus naung sineat”

O Jesus naung sineat, di hau na pinarsilang.

RohaM tongtong daulat, nang uju Ho tarhilang.

Marutang hosa hami, ditaon Ho dosanami, Asi rohaM o Jesus.

4.      Agenda padirihon parpadanan na badia.

5.      Manganhon parpadanan na badia, huhut marende huria, BE. No. 155:1….,”Tuson ma ho ale tondingku”

1. Tuson ma ho ale tondingku, di na mauas, male ho

Manjalo basa ni Tuhanmu pinaradeNa i di ho.

Dilehon Jesus do dagingNa, marhitehite roti on,

Dilehon dohot do mudarNa, marhitehite anggur on.

2. Ai nang tongtong pe ganup ari, mudarNa mangurasi au.

Huhut Ibana so mansadi manogu tu lambungNa au.

Sai naeng au mangan parpadanan ni Jesus Kristus, Tuhanki.

Na padamehon parbadaan, na pasonangkon rohangki.

~~~~~Musik~~~~~

3. Asi rohaM di au o Jesus, tumpahi au sadari on.

Ai hataMi do hupatulus, manganhon parpadanan on.

Antong patiur ma rohangku, marningot denggan ni basaM.

I ma na tinaonMi dosangku, binaen ni holong ni rohaM.

4. Patogu haporseaonku, di hasasae ni dosangki.

Marsitiopan baen rohangku, di mudarMi na durus i.

Sai ro ma Ho ale Tuhanku, marhite parpadanan on.

JoroM ma baen nuaeng rohangku. Ho ma nampuna au tongtong.

 

6.      Agenda: Tangiang pujipujian.

 

7.      Marende, BE. No. 9:1, “Hupuji holong ni rohamu”         

………..jongjong…….

Hupuji holong ni rohaMu O Tuhan Jesus Rajangki

Tu Ho hulehon ma tondingku Ai i do pinangidoMi

Huhalupahon ma diringku Mamingkir holong ni rohaMu

16.  Parsuruon

U    :  Hamu angka dongan na hinaholongan! Dihara do hita asa marpos ni roha di Debata jala auhononta do, martua ma na marhaposan tu Jahowa, jala Jahowa haporusanna dibahen.

H    : Sai Ho ma pamalum ahu, ale Jahowa, asa tung malum huhilala; sai ho ma mangurupi ahu, asa tung dapotan pangurupion ahu, ai ho do pujipujionku.

U    : Tung mansai herbang do parrohaon ni jolma di hadirionna laos gabe mago angka hinauli di bagasan ngoluna. Ido umbahen didok : Tung na angkal situtu do roha ni jolma, jala na ganggu, tung ise ma na tuk mandodoisa? Ahu Jahowa do Sidodo roha, siuji piapia jala mangalehon tu ganup jolma hombar tu dalanna, hombar tu parbue ni pambahenanna.

H    : Asi ma rohaM, Ale Tuhan. Sai urupi ma hami Tuhan patupahon na hombar tu lomo ni rohaM.

U    :  Ido pos ni rohanta. Donganon ni Debata do hita  tongtong ganup ari ganup tingki. Antong taharinggashon ma ngolu partangiangon di hurianta on lumobi ma i manipat taon 2022 on jala ingot ma: “Ai ndang adong na so tarpatupa Debata.”

U+H : Ale Tuhan, naposoM do hami; sai saut ma tu hami songon na hinalomohon ni rohaM. Amen

U    :  Tatangianghon ma Peleanta Tu Debata, martangiang ma hita:....

 

17. Tangiang Panutup.