Jamita Evangelium Minggu 06 Nopember 2022

 

Bahan Sermon HKBP Resort Kisaran

Minggu XXI Dung Trinitatis, 06 Nopember 2022 Evangelium: 2 Tesalonika 2:13-17

 

MARSIHOHOT DI BAGASAN PODA NI JESUS KRISTUS

 

Dongan na hinaholongan ni Tuhan Jesus!

            Najolo molo adong na so diantusi ruas tarigot tu Hata ni Debata manang taringot tu hakristenon, marpanungkun tu pangula ni huria do nasida, ima pandita, guru huria, bibelvrouw, diakones manang sintua. Alai molo saonari, nunga marhusor be; jumotjotan nama nasida manungkun tu "google." Ai molo browsing tu internet, pintor hatop jala godang do alus taringot tu na niluluan. Mansai denggan do nian godang informasi na boi dapoton ni ruas taringot tu Hata ni Debata nang hakristenon, alai ingkon manat ai godang doi na maralo tu poda na sintong. Ido na pinaingot ni Debata tu huria Tesalonik marhite apostel Paulus. Ndada holan di partingkianta na maju on godang poda haliluon; di huria bona pe nunga godang poda haliluon. Antong, tauhal ma turpuk Evangeliumta on asa dapot hita mutiha na arga sihangoluhononta di partingkian saonari.

 

Parjolo, marsitiopan ma hamu tu angka poda na huajarhon hami tu hamu (ayat 15)

            Adong na mangajarhon poda haliluon tu huria Tesalonik songon na tarsurat di ayat 2, ima: "nunga dapot ari ni Tuhan i." Panghorhon ni poda haliluon on, dang di haringkothon nasida be mangula ulaon si ganup ari, jala gabe diula nasida ma nasa lomo ni rohana. Boi tangkas tajaha di 3:11, "Ai tarbege do tu hami, adong do deba sian hamuna na so maradat parangena, angka na so mulaulaon, na so siulaon do tahe dijama." Mangalo poda haliluon on ma gabe diondolhon Apostel Paulus di 3:10, "Na so ra mangula, unang ma ibana mangan." Ima poda haliluon na masa di huria Tesalonika. Asa unang lam rarat haliluon on, ditongos Apostel Paulus ma suratna tu huria Tesalonik na mandok: marsitiopan ma hamu tu angka poda na huajarhon hami tu hamu (ayat 15). Molo tung pe sanga adong ruas ni huria Tesalonik na mangihuthon poda nang ngolu haliluon i, anggiat mulak nasida tu poda nang ngolu na sintong. Apostel Paulus mangajarhon asa unang mura nasida dilindak-lindak pangajarion na mamboan nasida dao sian hasintongan.

            Boha hita di partingkianta sisaonari? Songon na hudok di patujolo ni jamita on, tahalashon do godang ni pangajarion na boi dapot hita di internet alai ingkon manat do hita; ai adong do disi poda haliluon, isarana "Teologi Sukses" na mangajarhon: molo mangihuthon Tuhan Jesus, pasti sukses dalam arti mamora di arta, marpangkat timbo, dohot lan na asing. Sintong doi? Daong. Teologi na sintong, na niajarhon jala na hinangoluhon ni Tuhan Jesus ima Teologi Salib. Lapatanna, rade mangihuthon dalan ni Kristus mangulahon hasintongan. Ingkon tongtong satia mangihuthon Jesus manang aha pe na masa, las ni roha manang arsak. "Teologi Salib," dang marlapatan gabe so adong kesuksesan, dang marlapatan gabe so boi mamora dohot marpangkat; boi do sukses jala denggan do molo mamora, alai ndang kesuksesan gabe ukuran mutlak ni pasupasu; ndang boi kesuksesan di portibi gabe tujuan ni ngolu ni na porsea. Tontu, tumabo do umbege Teologi Sukses sian Teologi Salib. Di huria Tesalonik pe hatihai tumabo do umbege poda haliluon: "nunga ro Tuhani alani dang pola mangula ulaon, jala lomo niba ma niula." On do na tinulak ni Apostel Paulus di turpuktaon. Dang ala tabona begeon, dang ala hombar tu pingkiranta gabe ima poda na sintong. Tutu, ndada holan Teolog Sukses na gabe poda haliluon di partingkianta saonari; ragam nari isarana na ro ma Tuhanta tanggal, bulan, dohot taon tertentu, mambakar ulos ala hasipelebeguon do ulos, ingkon tardidi paduahalihon marhite pandidion selam asa malua, dohot lan na asing. Ragam pangajarion taringot haluaon, alai ingkon mulak do hita tu Hata ni Debata songon na tarsurat di Bibelta. Dia ma haluaon na binaritahon di Bibelta?

 

Paduahon, ala dipillit Debata hamu sian mulana, asa saut hamu malua (ayat 13)

            Di ayat 13 tarsurat do paboa nunga dipillit Debata hita sian mulana asa malua. Lapatanna, dang hita na mambahen dalan haluaon, dang adong jolma na boi palua dirina sandiri; Debata sandiri do na paluahon hita di bagasan Tuhan Jesus, alani nasa na porsea di Tuhan Jesus nunga dapotan haluaon sian dosa dohot hamatean. Haluaon na nidokna ndada holan ngolu di portibi on alai dohot do ngolu sogot songon na tarsurat di ayat 14b: "partohap hamu di hasangapon ni Tuhanta Jesus Kristus." Di ari parpudi, di haroro ni Tuhan Jesus, boanonNa ma angka na porsea tu hangoluan salelengnilelengna, tu hasangapon na di lambung ni Debata Ama raphon Tuhan Jesus Kristus. Ima jambar sihirimonta 'saleleng mangolu di portibí on! Unang adong sian hita na merasa na so dohot dapotan haluaon ai silehon-lehon ni Debata doi tu hita asal ma tajangkon di bagasan haporseaon, so marimbar na mora manang na pogos, na marpangkat manang na so marpangkat, na marjabu balga manang na manewa. Dang adong na boi mangunsati. Alani, so tung olo hita dilindak-lindak poda haliluon na mungkin tumabo begeon jala hira na ussuman tu pingkiranta. Di bagasan Teologi Salib," dapot hita jaminan ngolu di portibi on nang sogot. Ndada boban Teologi Salib/ Teologi Silang alai Barita na Uli do i.

 

Patoluhon, Tuhanta Jesus Kristus dohot Debata Amantama mangapuli jala pahothon rohamuna di bagasan nasa ulaon nang hata na denggan! (ayat 16-17)

            Ndada mura mangihuthon Teologi Salib, jala ndada mura manirang poda na sintong sian poda haliluon ala ni bahat, hatop, jala mura ni informasi di partingkianta saonari. Alai, ndang pola mabiar hita disi. Dilehon do jaminan tu hita di ayat 16-17: Debata sandiri na pahothon rohanta. Apala AnakNa Tuhan Jesus dilehon asa malua hita, gabe pasombuonna ma hita lilu? Loaşonna ma hita dilindak-lindak poritibi on? Tontu daong. Unang tapangasahon dirinta, unang tapatujolo pingkiranta, baliksa tapasahat sude ngolunta, rohanta, pingkiranta hibul holan tu Debata; Ibana sandiri na pahothon hita di poda na sintong, asa gabe tubu ma ulaon dohot hata na denggan. Na ringkot ima martangiang tu Tuhan i asa dilehon tu hita Tondi Parbadia laho mananda dia poda na sintong jala dia poda haliluon.

            Antong, marsihohot ma hita di bagasan poda ni Jesus Kristus songon na tarsurat di Bibelta jala marpanungkun ma hita tu pangula ni hurianta ai nunga dipalua hita sian mulanai. Amen.

 

JAMITA EVANGELIUM 2 TIMOTEUS 2:1-13

Bahan Sermon Parhalado HKBP Resort Kisaran

Minggu XIX Dung Trinitatis, 23 Oktober 2022

“MANAON NA PORSUK SONGON SIIHUTHON KRISTUS”

(2 Timoteus 2: 1-13)

 

Patujolo

Molo dihatai taringot tu sitaonon, tottu sude do naeng dao sian i, jala unang ma nian sahat i lumobi tu halak na porsea, boi dohonon sai hira sude do hita naeng pasidinghon sitaonon i, ala dang adong jolma na lomo rohana mangolu dihaliangi sitaonon, udut tusi na gabe sungkunsungkun di roha, na ingkon marsitaonon do ulaning naposo ni Debata? Songoni do panjouon na ro tu angka parbarita nauli? Ima naeng idaonta marhite surat ni si Paulus tu si Timoteus di turpukta on. Di bindu on dipasahat Apostel Paulus do angka poda nang pangajarion tu si Timoteus na marimpola nang tu angka na porsea. Dibuhai Apostel Paulus do poda nang pangajarionna marhite motivasi manang dorongan tu si Timoteus, asa di na marbarita nauli si Timoteus, nda holan asi ni roha ni Kristus Jesus do i. Diuduti mai dohot na diparade ibana penerusna laho marbarita nauli, asa unang mate di ibana ulaon i jala asa adong ma manguduti/manorushon.

 

Hatorangan

Paulus mendorong Timotius supaya teguh dan tekun dalam pekerjaannya, didok di ayat 1 “Margogo ma ho marhitehite asi ni roha ni Kristus Jesus”. Sian ayat on boi idaonta angka halak na marnampuna tohonan/ulaon tu Debata, ingkon motivasionna do dirina manang ingkon gogohononna do dirina laho mangulahon ulaon i. margogo marhitehite asi ni roha ni Kristus Jesus boi do dilapati nang kerja keras, dimana ada kebenaran kasih karunia, di situ harus ada kerja keras dengan kekuatan karena kasih karunia. Molo sai ro angka sitaonon manang molo lam martambatamba angka hamaolon, ringkot do hita gabe halak na tahan uji (tidak mudah goyah), marhite haporseaon na lam tang, tekad yang semakin kuat, holong marTuhan na lam balga. Jadi molo didok margogo marhite asi ni roha, lapatanna ndang mangasahon haboionniba sandiri, ndang mangasahon gogoniba sandiri, manang pingkiranniba sandiri, alai mangasahon asi ni roha ni Kristus Jesus i do.

Songon panosoion ni Apostel Paulus tu si Timoteus, songoni ma nang si Timoteus mamodahon tu angka na porsea i, asa gabe dongan manaon haporsuhon ma songon parangan na denggan di Kristus Jesus (ayat 3). Lapatanna Timoteus harus melatih orang lain untuk menjadi penerusnya dalam pelayanan injil, jala sadalan mai ingkon ajarhononna do tu nasida ganup na binegena sian Apostel i, ndang adong sipasahaton ni si Timoteus dungkon angka na binegena sian si Paulus dohot angka na jinalona sian Tuhan i. Jala angka na manjalo hatana i ima angka halak na tau haposan (setia), yang dapat dipercaya dan yang cakap mengajar orang lain (ayat 2).

Sude do halak Kristen lumobi angka naposo ni Debata gabe prajurit-prajurit (parporang) ni Jesus, na nilinggomanNa, ala Ibana do na mamboan hita tu haluaon i. Songon prajurit ni Jesus hita, ingkon pataridahononta do dirinta gabe prajurit na burju, tau haposan tu na manggomgomi ibana, hot di ulaonna molo pe ro hamaolon jala ndang mansadi berjuang laho patulushon ulaonna i. lapatanna diajari do hita marhite turpuk on asa manang ise pe na naeng gabe prajurit ni Jesus (naposo ni Debata), ingkon adopanna do hamaolon/sitaonon i, nunga ingkon taperkirahon manang taetong i hal na pasti di portibi on, jadi sahalak prajurit ni Jesus molo mangadopi hamaolon/sitaonon i, tung so jadi doi gabe pamagohon hatulusonta tu Debata manang gabe dang haposan be ibana di ulaonna.

Timotius tidak boleh memusingkan dirinya dengan urusan-urusan dunia ini (ayat 4), songoni ma nang hita molo nunga gabe prajurit ni Jesus, ingkon paluaonta do na di portibi on, asa molo las rohani komandan mida prajuritna, songoni ma nang las roha ni na marsuru hita molo taulahon ulaonta, ima Kristus Jesus i. dipodahon Apostel Paulus do tu si Timoteus nang tu hita asa taparrohahon angka aturan-aturan parporangan, didok di ayat 5 “Nang na marsiadu pe ndang dipartumpali, ia so tigor paraloonna i”. Lapatanna berjuang do hita asa monang maralohon hisaphisap ni dagingta dohot angka hajahaton i, alai ndang boi arophononta hadiah molo so taihuthon angka aturan i (seperti bertanding dalam olahraga tertentu, harus ada aturan mainnya). Jadi manungguli hita doi asa manat molo pe taulahon angka ulaonta, asa unang lipe ulaonta i manang gabe batu partuktuhan di angka dongan jolma.

Poda gambaran na parpudi dipodahon Apostel Paulus tu si Timoteus nang tu hita ima perlunya kesabaran menunggu imbalan, “Ingkon siula hauma i jumolo taruli di parbuena (ayat 6)”, lapatanna, jika kita mau menikmati buah, kita harus bekerja keras dengan rajin dan sabar, dengan kata lain, kita harus melakukan kehendak Allah sebelum menerima hal-hal yang dijanjikan itu (yang menjadi alasan kita perlu bersabar), ai lehonon ni Tuhan i do tu ho roha mangarti saluhutna i, ima angka panimbangion di angka poda na jinalo dohot manimbangi (mencerna) angka na ro sian Debata.

 

Panimpuli

Alani songon halak na porsea hita jala nampuna tohonan/ulaon tu Debata, margogo ma hita ala ni asi ni roha ni Kristus Jesus i molo pe ro hamaolon manang sitaonon di ngolunta, di panghobasionta, naeng ma taadopi i dibagasan gogo na sian Tuhan i, tuk do asi ni roha ni Debata tu ganup halak na mangasahon Ibana. Baliksa molo tarimpu boi gogonta laho mangadopi hamaolon/sitaonon i, ido na mambahen angka na porsea i gabe mandele, ido mambahen angka parbarita nauli i, gabe gale jala maheu, karena itu jadilah kuat karena kasih karunia dalam Kristus Yesus.

PARTORDING NIACARA KEBAKTIAN PESTA GOTILON HKBP KISARAN KOTA RESSORT KISARAN

 

ACARA  KEBAKTIAN PESTA GOTILON  

HKBP KISARAN KOTA RESSORT KISARAN

MINGGU XVII DUNG TRINITATIS

 

TOPIK MINGGU:

Haporseaon na paluahon

 

 

 

 

 

MINGGU, 09 OKTOBER 2022

 

A. PANGARADEON

1.  Sude parhobas ni parmingguon dohot panitia pesta gotilon  marpungu di  bilut parhobasan mangarade laho prosesi mamasuhi inganan parmingguon.

            2. Barisan Prosesi :  - Paragenda - Parjamita  - Salib; Sebagai Simbol Keselamatan  - Alkitab : Sebagai Firman Tuhan  – Buah : Sebagai Simbol Pesta Panen (Gotilon)  - Parhalado Barisan Prosesi Disambut oleh Penari Tortor singkola minggu

 3. Dung mangkuling giring-giring masuk ma barisan prosesi ni parhobas na    

               ( MC : Huria Na Hinaholongan di Bagasan Kristus Jesus. Asa Masuk ma hita tu parmingguon, asa tatomu-tomu ma barisan Prosesi. Rim ma hita Jongjong di Ingananta be ).

            

 

B. PARMINGGUON  ( L1,2,3 : Uluan; H: Huria; S: Sude     SL:SongLeader )

 

1. Joujou tu pangaradeon:

L1   :  Huria ni Tuhanta na hihaholongan dibagasan Jesus Kristus, hami saluhut  Parhalado, pasahathon tabe ma tu sude hamu ruas ni huria:  Asi ni roha ma di  hamu jala dame na sian Tuhanta,  na mangaramoti hamu saluhutna.  

L2  :  Tung so tarasam do balga ni holong ni roha ni Debata, dibagasan pardalan ni ngolunta, jala tung so hasuhatan do denggan ni basaNa. Nuaeng marpungu do hita dibagas joro on, patupahon Pesta Gotilon, manghalashon Pasu-pasu ni Debata na tajalo dibagasan ngolunta.

L3 : Ari on do na jinadihon niJahowa, sai marolopolop jala marlas ni roha ma          hita disi.

H :   Di parmudumudu, diramoti jala dipasupasu do ngolunta, ulaon dohot parsaoranta dibagasan na sataon bolon on. Gabe tarbahen hita marlas ni roha  manggotil angka parbue na denggan sian pangulaanta be

L1  :   Ai sian Ibana do saluhutna ro, marhitehite Ibana jala marhapatean tu Ibana   do sasudena i.

L2  :  Bagasna i antong hamoraon, hapistaran dohot parbinotoan ni Debata. Naso   hasigatan do angka uhumNa jala na so habogason do angka dalanNa!  

L3 :   Didok hata ni Debata: Puji hamu ma Ibana mardongan soara ni sarune, puji hamu ma Ibana mardongan arbab dohot sordam. Puji hamu ma Jahowa mardongan tali sayak dohot panontoron na marliat, puji hamu ma Ibana mardongan hasapi dohot tulila. Puji hamu ma Ibana mardongan ogung panggora, puji hamu ma Ibana mardongan ogung panonggahi (Psalm 150:3-5)!  Antong tapuji ma Tuhanta marhite ende “Somba ma Jahowa”

2. Marende BE.No. 585 :1-3  “ Somba ma Jahowa ”        BL.585

v  Somba ma Jahowa Debatanta Amen Haleluya
Sigomgom langit tano on ro di isina Amen Haleluya
Beta hita lao marsinggang tu joloNa, Amen Haleluya
Na songkal jala na badia do Jahowa, Amen Haleluya
Endehon Amen haleluya, Endehon Amen haleluya  } 2x
Endehon Amen haleluya, Endehon Amen haleluya

                                                                                                    ( jongjong )

v  Puji ma Jahowa Debatanta, Amen Haleluya
Parasi roha na sumurung do Ibana, Amen Haleluya
Taendehon ma goar ni Debatanta, Amen Haleluya
Alani denggan ni basaNa na tu hita, Amen Haleluya
Endehon Amen haleluya, Endehon Amen haleluya  } 2x
Endehon Amen haleluya, Endehon Amen haleluya

 

3. Votum/Introitus

L1  :    Marhitehite goar ni Debata Ama dohot Goar ni AnakNa Tuhan Jesus Kristus dohot Goar niTondi Porbadia na tumompa langit dohot tano on. Amen. Pos situtu do rohangku, manang hamatean, manang hangoluan, manang angka suru-suruan ni Debata.

L2  :   Manang harajaon, mamang hagogoon, manang angka na masa nuaeng, manang angka namasa sogot

L3  :       Ndang tarbahen i manirang hita sian haholongon ni roha ni Debata marhitehite Kristus Jesus Tuhanta i, Haleluya!

H         :(Mangendehon)  Haleluya……. Haleluya……. Haleluya…….

L1  :    Martangiang ma hita: Ale Tuhan Debata pargogo naso hatudosan, Amanami na dibanua ginjang. Mauliate ma rohanami tu Ho ala dilehon Ho AnakMu na sasada i tu hami jala dipalua Ho hami sian gomgoman ni sibolis.

L2  :     Hupangido hami tu Ho; sai ramoti hami dibagasan hataM, asa margogo hami jumpa masa hasusaan dohot hagogotan, sai sesama dosa nami dohot pangalaosion nami dihataM na badia i.

L3  :  Sai parroha i ma hami marhitehite TondiM jala pamasuk hami tu hangoluan sogot, asa pujionnami Ho disi rodi saleleng ni lelengna, marhitehite Tuhan Jesus Kristus Tuhan nami, Amen                             (Ruas Hundul)

 

4. Marende BE.No. 501 : 1 – 2 “ Sai ditogutogu Jesus ”              BL.341

v  Sai ditogutogu Jesus tondingki na gale i
Asa unang be au ganggu di panoguonNa i
Maradian do rohangku, molo huhaposi i
Nang sitaonon dipasonggop, sai jonok do Tuhanki
Nang sitaonon dipasonggop, sai jonok do Tuhanki

v  Sai diiringiring Jesus au na gale situtu
Ditungkoli do langkangku, diparmudu au burju
Molo loja au mardalan, nang maheu tondingki
LehononNa aek na tio sian batu mamak i
LehononNa aek na tio sian batu mamak i

 

5. Patik ni Debata

L1  :  Patik ni Debata di Pestanta sadarion ima Patik I dohot Lapatanna. Ahu do Jahowa DebataM, ninna Debatanta. Ndang jadi marangkup Ahu bahenonmu Debatam.

L2  :  Dia do lapatan ni i? On do: Ingkon umbiar rohanta jala humolong jala umpos mida Debata asa mida nasa na adong.

L3  : Ido sahatna! Antong rap mangido gogo ma hita sian Tuhan Debata laho mangulahon PatikNa i.

L+H  :  Ale Tuhan Debata, sai pargogoi ma hami mangulahon na hombar tu patikMi. Amen.

 

6. Marende BE.No. 684 : 1-2  “  Lea situtu  ”                       Bl :  684

v Lea situtu do au alani dosangki, Loja jala sorat au, ponjot pingkiranhi
 Debata parholong i umbege anggukhi, Ala ni holongNa i malua au
 HolongNa i, holongNa i, ala ni holongNa i malua au
 HolongNa i, holongNa i, ala ni holongNa i malua au

 

v Na so hatudosan do holong ni Tuhanhi, Parhatopotonhu do denggan basaNa i
Sai na radotanhu do pinatikhonNa I, Ala ni holongNa i malua au
HolongNa i, holongNa i, ala ni holongNa i malua au
HolongNa i, holongNa i, ala ni holongNa i malua au

 

7. Manopoti Dosa

L1  :    Tatopoti ma dosanta na godang i tu adopan ni Debata, martangiang ma hita: Ale Tuhan Debata, na badia jala na bonar, parasi jala partalup ni roha jala na basar do Ho! Sai marpangulahi ma rohaM mida hami, sai sesama sude dosa nami!.

H  :  ( Marende BE. No. 683: 1 “ DiadopanMu Jesus  satonga soara “)

v  Di adopanmu Jesus lea tutu do diringkon

      Dibaen godang ni dosangkon diadopanMu Jesus

L2 : Ndang adong na hupangasahon hami dungkon ni asi ni rohaM ; hatigoran na pinatupa ni AnakMu do na hupangasahon hami tu joloM.

H  :   ( Marende BE. No. 683:  2  “ DiadopanMu Jesus  satonga soara “)

v  Di adopanmu Jesus marsomba au huhut tungki

                  Lao manopoti dosangki diadopanMu Jesus

L3  : Dibahen i pasonang jala apuli ma hami angka na hinophop ni Tuhan Jesus Kristus Tuhan nami

SL  :   ( Mangendehon BE.No. 182:1 “Tu jolom o Debatangku” )

v  Tu jolom o Debatangku sai use do rohangkon

                  Sai  pasiat tangiangku dohot iluilungkon 

L1  :  Ale Debata parasiroha na sumurung, huhilala hami do angka denggan basaM naung hujalo hami di ngolu nami on. Dipasupasu Ho do angka na huula hami, gabe adong pangkeonnami di bohal ni pardangingonnamion, Tama do hami mandok mauliate tu adopanMu na sun badia i, marhite na pasahatton silua nami tu adopanMu di  pesta gotilon na hupatupa hami sadarion .

L2  :    Bagabaga ni Debata taringot tu  hasesaan ni dosanta ; Songonon do hata ni Tuhan Jahowa, Unang ho mabiar, ai Ahu siluluhon ho; nunga pola hujou goarmu, Ahu nampuna ho.

L3  :  Hasangapon ma di Debata na di ginjang.

S          : Amen………………                                                       (Hundul )

 

8. Koor           :  KOOR GABUNGAN HKBP KISARAN KOTA

9. Refleksi pesta Gotilon

L1   :  Taruhon hamu ma sintong parsampuluan i tu bagas parpeopan, asa adong bohal di bagasan jabungku, jala unjuni hamu ahu taringot tusi, ninna Jahowa Zebaot, manang so ungkaponku di hamu angka pandiloan ni langit, jala mangusehon tu hamu gabe maradu marlobilobi.

L2 :  Molo marparange hamu di bagasan angka aturanku jala diradoti hamu angka tonangku dohot patupahon angka i, jadi lehononku ma tu hamu udan di tingki halehetanna, jala lehonon ni tano i ma gogona, hau di ladang pe lehononna ma parbuena.

L3 :  Unang jua mambahen na denggan tu na hurangan, molo tung tuk gogo ni tanganmu patupahon. Unang dok tu donganmu: Datdati tusi marlaho ro; marsogot pe hulehon, hape naung dipeop ho nian nuaeng.

H  :   Unang hamu lilu; ndang olo Debata leaan! Ai ia i disabur halak, i do gotilonna!
 Ai na manabur tu dagingna, manggotil do sian dagingna hamagoan; alai na manabur tu tondi, manggotil do sian tondi i hangoluan salelenglelengna!
Alai unang marnaloja hita mambahen na denggan, ai na manggotil do hita muse di tingkina i, anggo so pargale hita nuaeng.

L1  :  Ingot ma: Na manaburhon otik, otik do gotilonna; jala na manaburhon managam pasupasu, mangalap pasupasu di na manggotil. Ganup ma nionjar ni rohana, unang ma sian muruk manang sian na so tarjua; ai dihaholongi Debata do na las roha mangalehon!

L2  : Alai marhuaso do Debata, mangusehon saluhut asiasi tu hamu, asa sandok tuk situtu di hamu jala marlobilobi hamu, laho patupahon saluhut ulaon na denggan; hombar tu na tarsurat: "Na manaburi ibana, mangalehon tu angka na pogos; hot do hatigoranna i ro di salelenglelengna."

L3   :  Pasangap ma Jahowa marhite sian hamoraonmu dohot marhite sian patumonaan ni sandok pangomoanmu. Jadi marsipinjot ma angka sopom, jala sirnip tuak anggur angka pangilanganmu.

10. Marende BE.No. 14:1-3  “Puji hamu Jahowa tutu”    BL.57

v  Puji hami Jahowa tutu pardenggan basa

Parasi roha salelengna I pardenggan basa I parasi roha i

v  Ingot tongtong ale tondingkon sude na denggan

          Na pinasonggop Debata tu ho denggan basaNa do na pangoluhon ho

 

11. Epistel

L1 :     Epistel di minggunta sadarion ima sian 2 Rajaraja 5 : 1 – 14, tajaha ma secara responsoria; Ia si Naaman, partogi ni parangan ni raja sian Ram, jolma na sangap do ibana di adopan ni tuanna jala marmulia situtu; ai marhite sian ibana ditumpakkon Jahowa hamonangan tu halak Ram, jala ulubalang na tarbarita do ibana, alai puruon.

H :  Dung i borhat sahali halak Ram marrongkanrongkan marbajoi gabe diboan nasida ma sian tano Israel sada boruboru na metmet, dibahen ma i gabe sisuruon ni jolma ni si Naaman.

L2 :  Dung i ro ma hatana tu soranganna: Aut ni di adopan ni panurirang na di Samaria tuanki, sai na paluaonna do ibana sian puruna i.

H :    Dung i ro ma si Naaman pabotohon barita i tu tuanna, ninna ma: Songon on, songon on hata ni boruboru na sian tano Israel i.

L3 :  Jadi ninna raja sian Ram ma: Antong borhat ma ho, hutongos pe sada surat tu raja sian Israel. Dung i borhat ma ibana diboan huhut sampulu talenta perak dohot onom ribu sekkel sere dohot sampulu salinan pangkean na marhadohoan.

H :  Dung i dipasahat ma surat i tu raja sian Israel, songon on do hatana: Molo sahat suraton tu ho, ida ma, naung husuru do manopot ho naposongku si Naaman, asa paluaonmu ibana sian puruna.

L1 :  Jadi dung dijaha raja sian Israel surat i, diribahi ma pangkeanna huhut didok: Tung Debata ma ahu, tarbahen ahu mambunu dohot pangoluhon jolma, umbahen marsuru rajai tu ahu paluahon baoa i sian puruna? Dibahen i ua tanda jala ida hamu ma, na masisindir do ibana tu ahu.

H :  Alai dung dibege si Elisa, halak ni Debata, naung diribahi raja sian Israel pangkeanna, disuru ma suruanna tu rajai mandok tu ibana: Boasa tung pola ribahanmu pangkeanmu? Ua ro nian ibana tu ahu, asa tung diboto, na adong do sada panurirang di Israel.

L2 :    Jadi ro ma si Naaman mardongan hodana dohot huretana, laos mangulon di jolo pintu ni jabu ni si Elisa.

H :  Dung i disuru si Elisa ma suruanna mandok tu ibana: Laho ma ho maridi pitu hali di bagasan Jordan, gabe sumuang ma sibukmu hian tu ho, jala ias.

L3 :  Jadi tarrimas situtu ma si Naaman mangaruntus mardalan huhut didok: Ida ma, na hurimpu do ruar ibana mandapothon ahu jala jongjong huhut manjoujou Goar ni Jahowa, Debatana, huhut jamahononna tanganna tu sahit i laho paluahon ahu sian puru i.

H :  Nda dumenggan do sunge Abana dohot Parpar, angka na di Damaskus sian saluhut aek di Israel? Ndang tarbahen ahu huroha maridi disi asa malum hilalaonku? Jadi marsiulak ma ibana mangaruntus mardalan piripirion situtu.

L1 :   Dung i ro ma jumonok angka naposona, didok ma mandok ibana: Ale amang, tung sura hata na dokdok didokkon panurirang i patupaonmu, nda patupaonmu do i? Lam nuaeng ma dung didok tu ho: Maridi ma ho, asa ias

L2 :  Jadi tuat ma ibana jala mangungkor di bagasan Jordan pitu hali, hombar tu hata ni halak ni Debata, jadi sumuang ma sibukna, songon sibuk ni sada dakdanak, gabe ias ma.Alai ndang pola suraton tu hamu hamu ale angka dongan taringot tu tingkina dohot sadiharina. Ai diboto hamu do tangkas na songon panangko borngin do haroro ni ari ni Tuhan i

L3 :     Ido sahatna. Martua ma angka na tumangihon hata ni Debata jala na umpeopsa.

L+H    :Amen.

 

12. Mangendehon BE.No.693: 1+3  “ Jesus do Tuhanku ”

v  Jesus do Tuhanku Sihophop au on, Ibana do haposanki
TanganNa na gogo manogu au on, Patogu au di langkangki
Tuhanku tongtong sumarihon au on, Martua sonang tondingkon
Holong ni rohaNa pahisar au on, Mardame tongtong rohangkon
Mardame tongtong rohangkon                                                ( jongjong )

 

 

v  Jesus do Tuhan Siramoti au on, na margogoihon diringkon
Nang gok parungkilon, godang na tinaon, sabam do dibaen rohangkon
Tuhanku tongtong sumarihon au on, martua sonang tondingkon
Holong ni rohaNa pahisar au on, mardame tongtong rohangkon
Mardame tongtong rohangkon

 

13. Manghatindanghon Haporseaon:

L1 :  Dibagasan sada ni panindangion dohot donganta sahaporseaon di sandok portibi on tahatindanghon ma haporseaonta I, rap ma hita mandok:

S :        Ahu porsea…………………………………………………   (hundul)

 

14. Tingting

 

15. Tangiang Pangondianon

16. Koor : Paduan Suara Marturia-Seksi Musik HKBP Kisaran Kota

 

17. Marende BE.No. 743: 1..“O Tuhan togu-togu ma “ ( P.pelean IA, IB )

v  Tuhan togu-togu ma au, tu dalan lomo ni rohaMi,

          Raphon Ho sonang mardalan au, nang rahis maol sidalananki,

                  TondiMi baen manggohi au on, margogoihon au naposoMon,

                  Pasangap Ho dingolungkon, paima sahat tu surgo au on.

                        

                                         --------Musik-------------

v  Panghulingi ma au O Tuhan, na rade tumangihon hataM,

          Sai tumpahi ruasMu Tuhan, na uasan nuaeng di hataM,

                  Sai patau ma au on naposoM, manjou halak na dao sian Ho,

                  Ro di na so tumanda Ho, muba gabe pangoloi di Ho.

               

                                         --------Musik-------------

 

18. Jamita       :  Lukas 17 : 11 - 19

 

19. Mangendehon BE.No.443 : 1 …“ Dung Tuhan Jesus”  

         (Pasahat Pelean II tu STT HKBP dohot tu singkola pandita HKBP )

v  Dung Tuhan Jesus nampuna au, songgop dameNa, biarhu lao
Taripar gogo ngoluNa i, nasa dosangku naung sae do i
Tabaritahon holongNa i, didia Tuhan tudoshon i?
Tuk manumpahi, tarlobi da, sasada Jesus pinuji ma

                             --------Musik-------------

 

v  Di Ho ngolungku, las rohangki, jumolo Jesus siluaMi
PangiringonMu, tolongMu i, mangalo dosa nang rohangki
Tabaritahon holongNa i, didia Tuhan, tudoshon i?
Tuk manumpahi, tarlobi da, sasada Jesus pinuji ma

--------Musik-------------

v  Hibul ma au, Jesus di Ho, sonang rohangku, tarapul do
Mian di au ma baen hataMi, paima das au tu lambungMi
Tabaritahon holongNa i, didia Tuhan tudoshon i?
Tuk manumpahi, tarlobi da, sasada Jesus pinuji ma

 

19. ACARA PESTA GOTILON

Pdt   :Hamu ruas ni huria na hinaholongan ni Tuhanta Jesus Kristus! Nuaeng sahat ma hita tu acara Pesta Gotilon ni Huria, laho manghalashon dohot manghamauliatehon denggan basa ni Jahowa. Antong dibagasan roha mauliate tu Debata, tapuji ma Ibana, taendehon ma  “mangula hita jolma”.

 

H     :(mangendehon BE.No.373:1)

Mangula hita jolma manabur boni i, alai anggo jadina di Debata do i

Dilehon las ni ari, nang nambur udan pe tongtong di panumpakNa marguru sasude. Nasa uli basa ro sian Debata, i pe Ibana puji ma huhut haposi da

Pdt   :Hamu dongan sahuria! Nunga itajalo denggan basa dohot asi ni roha sian Jahowa.Taokuhon do saluhut silehonlehon na denggan nasa ulibasa na mauliutus, ima na ro sian ginjang. Dilehon do di hita parbue ni tano, parbue ni suansuanan dohot parbueni angka ulaonta. Saluhutna i nunga tajalo sian Jahowa. Antong nda tama ma hita mandok mauliate tu Debata?

H     :Mauliate ma di Ho Tuhan  naung mangalehon parbue di angka na huula hami. Hupasat hami ma i bahen  pelean na hushus di joloM.

Pdt : Didok hata ni Debata: Ingkon buatonmu ma sian patumonaan ni sandok parbue ni tano i, na dapot ho sian tanomi, naung nilehon ni Jahowa, Debatam tu ho, jala pamasuhonmu do i tu bagasan ampang, jala boanonmu do i tu inganan sipilliton ni Jahowa, Debatam bahen inganan di Goarna. Ingkon burju do lehononmu parpuluan sian nasa gogo ni tano, boni sinaburhonmi, sian saluhut na tubu di tanomi ganup taon. (5Musa 26:2).

H :  Mauliate ma di Ho Tuhan, naung mangalehon parbue ni angka ulaonnami. Hupasahat hami ma i bahen pelean na hushus di joloM.  

Pdt : Antong taruhon hamu ma sintong parsampuluan I tu bagas parpeopan, asa adong bohal dibagasan jabungKu, jala unjuni hamu Ahu taringot tusi ninna Jahowa Zebaot manang so ungkaponku di hamu angka pandiloan ni langit jala mangusehon tu hamu gabe maradu marlobilobi. (Maleakhi 3:10)

 

20. Marende  BE no. 848 “ Dison adong huboan Tuhan ( Pasahat angka silua, ampop parolopolopon tu jolo )

v  Dison adong huboan Tuhan parbue ni ngolungku naso tardok nian

Sadia ma argana Tuhan molo sai ni rajuman sude denggan basaM

Jalo ma Tuhan sail as ma roham

 

v  Huingot do hataM da Tuhan ingkon sarihononton anggiMm na metemetan

Ampehon ma tangaMu sangkan itak na otik I unang suda nian

Jalo ma Tuhan sail as ma rohaM

                ------------musik --------------------

v  Dison adong huboan Tuhan parbue arta sinamothon so sadia nian

Parbadiai ma I tung singkop asa ture sintong lao pauli huriaM

Jalo ma Tuhan sail as ma rohaM

 

v  Huingot do tonaM da Tuhan ingkon taruhononku parsampuluan i

Ai ungkaponMu do da Tuhan pandiloanMi mangusehon basaM

pasupasuMi usehonma godang                                             ( jongjong )

 

21. Tangiang Panghamauliatehonon

U :   :Nunga tapasahat Peleanta songon i dohot parbue nit aula naung tapasahat tu huria ni Tuhanta. Antong! Tangihon hamu ma hata ni Debata na mandok: alai marhuaso do Debata, mangusehon saluhut asiasi tu hamu, asa sandok tuk situtu di hamu jala marlobilobi hamu, laho patupahon saluhut ulaon na denggan. Antong taharinggashon ma manghobasi huriaNa dibagasan dame, sada ni roha dohot holong ni roha.

H :  (Mangendehon BE.No.723: 1    “Tu joloM o Tuhan”

Tu jolom o Tuhan sahat ma diringkon pangke ma au hombar tu lomoM

Molo ndang ho Tuhan maringanan di au diringkon ndang mararga be i

Tung pogos pe dison manang sonang tahe marsigantung tu Ho sasude

Holan Ho huihuthon ndang be diringkon togutogu ma tu na ture

 

22. Tangiang Pelean – Ale Amanami – Pasupasu - Amen