Jamita : 1 TESSALONIK 3: 1-13 SATIA MANGIHUTHON DOHOT MANGHOBASI TUHAN I

 

Minggu II Dung Trinitatis

29 Juni 2025

1.      Marende BE. 14:1+4

2.      Invocatio : A.XV.A.2 – D.XIII.42

3.      Epistel : 1 Rajaraja 19: 15-21

4.      Marende BE. No. 672:1-2

5.      Jamita : 1 TESSALONIK 3: 1-13

 

SATIA MANGIHUTHON DOHOT MANGHOBASI TUHAN I

 

            Huria Tessalonik i ma huria na adong di propinsi Makedonia (1:1,7) na nidapothon Apostel Paulus dung sidung marbarita nauli sian Pilippi; jala dijangkon sahalak na margoar si Jason do Apostel Paulus dohot si Silas di Tessalonik. Tolu ari Sabbat padodot ma lelengna dibaritahon Apostel Paulus barita na uli di parguruan ni Jahudi. Gabe adong deba sian halak Jahudi songon i nang halak Junani padodot angka parompuan na mangoloi hata na tinariashon Apostel Paulus. Alai adong do deba halak Jahudi na mangiburu mangida Apostel Paulus, laos diarahon nasida do jolma na jahat mambahen haguguntur di huta i, laos ditahopi nasida do bagas ni si Jason. Alani i, dipaborhat angka dongan na burju roha ma Apostel Paulus dohot si Silas tu Berea laho manguduti panghobasion marbarita na uli (Ul.Ap 17: 1-9). Di Berea pe ndang diloas Apostel Paulus mamaritahon Kristus, alani lao Ap.Paulus tu Athena manaburhon barita na uli i.

            Alai masa do 2 parungkilon teologi bolon di huria i: i ma taringot tu etika ni huria (parsaoran ni baoa dohot boruboru) nang taringot tu poda parousia (haroroni Tuhan Jesus na paduahalihon). Deba nasida gabe sumurut haringgason nang hapadotanna mangulahon joujou ni haporseaonna siala na so marnasaut tulus ari parousia i. Ai ditagam rohanasida do hamamasa ni parousia i di ngolu nasida. Di ombas ngoluna sinuaeng do hasasaut ni parousia i. Asa sangkap ni surat tongosan ni apostel Paulus tu huria Tessalonik laho patoguhon panghaporseaion ni huria di hasasaut ni ari parousia marhite na tongtong satia mangihuthon dohot manghobasi Tuhan i.

Nunga masihol Apostel Paulus naeng mangebati huria Tessalonik alai ndang dapot dope tingki na lehet, alani disuru ibana ma si Timoteus mangebati nasida (ay.2) Mansai las do roha ni Apostel Paulus mambege barita taringot tu Partondion ni ruas di Tessalonik on. Marhite barita panangkasion na binoan ni si Timoteus taringot tu ruas i, mansai denggan do haporseaon, holong ni roha dohot haburjun ni ruas i; pola tarbarita hinadenggan ni ruas i laos gabe sitiruon di saluhut angka na porsea diluat Makedonia dohot Akaya. Marsihohot do huria Tessalonik  manghaporseai Jesus Kristus nang pe mangae pangaleleon nasida. Parangena pe gok holong maradophon donganna, songon i nang maradophon na paburuburu nasida. Ditongos Apostel Paulus ma surat tu huria Tessalonik on paboahon las ni rohana marnida haporseaon ni huria i jala patoguhon roha nasida asa satia mangihuthon dohot manghobasi Tuhan i.

Nang pe mandok mauliate apostel Paulus taringot tu huria Tessalonik jala nang pe las rohana marnida nasida togtong do ditangiangkon apostel Paulus nasida arian dohot borngin. Dipangidohon apostel Paulus tu Debata asa adong nian tingki di nasida masipaidaan bohi asa boi dipatingkos apostel i atik tung adong na hurang di haporseaon nasida. Ditangianghon apostel i do asa ditambai haholongan di huria Tessalonik nang pe nunga dipuji ibana holong ni roha nasida. Sada do tujuan ni tangiangna i: asa marhabadiaon nasida di jolo ni Debata (ay.13).

Haporsuhon na masa tu Huria Tessalonik dohot tu apostel Paulus ndang mambahen mansohot haporseaon nasida; ndang gabe ditadinghon nasida Tuhan Jesus. Tangkas diauhon jala dihaporseai nasida paboa naung parjolo Tuhan Jesus manaon na porsuk holan laho manghophop hajolmaon. Alani i songon siihuthon Jesus hita, ingkon rade ma hita manaon na porsuk; ndang jadi ragam ni haporsuhon na masa di portibi on mambahen sumurut haporseaonta, baliksa ingkon lam patoguhon doi. Boha angka dongan, togu do haporseaonta manang mura munggilunggil? So tung do marhaporseaon hita holan di tingki godang pasupasu dohot las ni roha. Manongtong ma mangihuthon dohot manghobasi Tuhan i!

Parsihohotan manghaporseai Tuhan Jesus Kristus ingkon tarida do di parange na denggan. Haporseaon na togu ndang boi holan di hata, ndang boi holan di roha, ndang boi holan di parbinotan alai ingkon tarida do sian ngolu siganup ari. Dia ma i? I ma mangolu dibagasan holong. Dihamauliatehon apostel Paulus do holong ni roha ni huria Tessalonik jala dihatindanghon apostel Paulus do nang holong ni rohana maradophon huria i (12). Sitaonon na niadopan nasida pahehehon roha na masihaholongan. Masihaholongan do huria i dohot apostel Paulus. Boha hurianta on? Marsihaholongan do parhalado dohot ruasna? Masihaholongan do ruas tu ruas nang parhalado tu parhalado? Tapadao ma angka hosom, pangiburuon, parbadabadaan, bangko holan naeng maruntung, monang jala mora sandiri.

Jamita partangiangan on manungguli rohanta di hinaringkot ni hasatiaon mangihuthon dohot manghobasi Tuhan i, lumobi uju masa haporsuhon di ngolunta. Asa masipatoguan mangadopi tantangan ni jaman jala masitangiangan hita sesama halak Kristen asa lam magodang di holong ni roha tu dongan huhut mangaradoti habadiaon diadopan ni Debata. Amen.

 

6.     Marende            BE. No. 443:1+3

7.     Tangiang Sian Na ro

8.     Marende            BE. No. 253:1-2

9.     Tangiang Sian Na Manjabui

10.Papungu Pelean huhut marende BE. No. 318:1…

11.Tangiang panutup

Jamita : Psalmen 42 : 1 – 12 DITALUHON JESUS TONDI NA JAHAT

 

Minggu I Dung Trinitatis

22 Juni 2025

 

1.      Marende BE. No. 648:1+4

2.      Votum : A.XV.13 – D.XIII.48

3.      Manjaha Epistel : Lukas 8 : 26 – 39

4.      Marende BE. No. 463:1+3

5.      Jamita : Psalmen 42 : 1 – 12

                                                                          

DITALUHON JESUS TONDI NA JAHAT

 

Na boi masa do ragam ni hamaolon na boi siadopanta di hasiangan on. Marganti sorin do las ni roha dohot arsak ni roha. Ngolo partondion pe tong do mengalami dinamika naik turun. Sipata mansai togu do haporseaon dohot pos ni rohanta mida Debata Jahowa; alai di sada partingkian boi do mansai gale  ngolu partondionta. Molo songoni pangalahona, hal na somal ( wajar ) do i. Holan i do, manang songon diape na masa na taadopi unang sumurut nian hita sian parsaoranta dohot Debata. Gariada tahe molo tahilala songon na lam dokdok parungkilon i manosak ngolunta ingkon lam mauas jala masihol tondinta naeng pajumpang dohot Debata. Ingkon lam taparsirangguthon parungkilon dohot nasa na pasorat hita rap dohot Debata.

Dibonai do Psalmen 42 on marhite hatorangan : “Ende Sipodaon sian angka anak ni si Kora”. Ise do angka anak ni si Koran na nidokna dison ?. Molo tajaha Bibel na ummotikna adong tolu ( 3 ) na digoari si Kora. Parjolo, si Korah anak ni si Esau ( 1 Musa 36 : 5; 1 Kron.1: 35 ). Paduahon, Si Korah anak ni si Hebron pinompar ni si Kaleb ( 1 Kron. 2. 43). Patoluhon. Korah anak ni si Iseber (sahalak Lepi ) rap dohot dua ratus lima pulu baoa sian halak Israel mambingkasi bada ( memberontak tu si Musa dohot si Aron ( 4 Musa 16 : 19 ). Hinorhon pemberontakan ni si Kora diuhum Debata do ibana rap dohot angka donganna panggunturi i, dipangangang tano i babana jala dibondut nasida, ro di jabunasida dohot sude jolma, angka na paihut si Korah ( 4 Musa 16 : 20 – 35 ).

Sian hatorangan na di ginjang i lumobi poin patoluhon boi ma tarimpun ia angka anak ni si Korah nidokna di Psalmen 42 i ma angka na manguluhon parende dohot parhinaloan di bagas joro ni Debata. Diendehon nasida ma parsorion ni bangso i naung holang sian Jerusalem dohot bagas joro ni Debata.

Ayat 2 – 6. Mansai dokdok do panghilalaan ni parpsalmen hatiha manggurithon turpuk on. Malungun situtu rohana di Debata. Bagas dihalungunhon rohana Debata tudos songon panghalungunhon ni ursa di angka guluan. Ursa na tongon mardalan di angka dolok naung mosok angka duhutna di ari logo, naung mauas situtu ala marsik sude angka guluan ( kubangan ) na somal gabe inganan panginumanna. Holan sada do na dihalungunhon rohana di partingkian i, i ma asa jumpangan guluan na marisihon aek nian laho pasombuhon uasna. Tudos tusi ma panghalungunhon ni parpsalmen di Debata, ai holan Debata do na tuk pasombu panghilalanna na maheu i. pasabam rohana na marsak i, jala na tuk gabe paradianan ni tondina na loja i.

Tongon tartaban do parpsalmen di partingkian ni turpuk on, dao do ibana sian Jerusalem hutana i, sian bagas ni Debata na gabe ingananna marlas ni roha nasailaon on. Disosak angka natorop i dope ibana marhite sungkunsungkun na mangarehei “ Di dia do Debatam ?”. Ai masa do pangantusion hatiha i paboa hinatalu ni debata na sinomba ni sada bangso do molo talu bangso i di parporangan . Dirajumi na torop i ma na so margogo hape Debata na sinomba ni bangso Israel ai tartaban do bangso i. On do na naeng nisoarahonni bangso sileban i marhite sungkunsungkun na i: “Ndang adong gogo ni debata na sinombami, ai ndang tarpaluana ho siantangannami”, Hira na sintong do antong na nidok ni bangso sileban i, ai ndang manigor dipatuduhon Debata huasoNa laho paluahon bangsoNa i. Punjung do dihilala parpsalmen. Tumatangis ibana arian dohot borngin, maradu madabu do iluiluna tu angka sipanganon na pinanganna.

Parir situtu do ditaon parpsalmen di na masa i. Sada do na mangapuli rohana i ma molo dipaingotingot ibana parsaoran nasida uju rap dohot angka donganna sahaporseaon di bagas ni Debata. Parsaoran di bagas joro na padamehon jala pasonang roha huhut parsaoran pangalapan gogo laho manguduti pardalanan ni ngolu. Sai dihasiholi rohana asa boi nian muse mulak ibana tu hutana i, marpungu rap dohot angka donganna sahaporseaon, marlas ni roha marsaor dohot Debata nang donganna sahaporseaon di bagas ni Debata.

Ayat 6 – 12. Marhite ayat on tangkas ma tarida pos ni roha ni parpsalmen di Debata. Nang pe sai direhei na torop i ibana na mansoadahon huaso ni Debata, ndang sumurut anggo haporseaonna di huaso ni Debata. Nang pe sai hira na tutu na nidok ni angka na torop i, na so margogo hape Debata paluahon nasida sian sitaononna i, ndang olo ibana manundalhon Debata, laho mangalului pangurupion sian debata na asing. Pos situtu do rohana, lehonon ni Debata do pangurupionNa di tingki na binuhulNa. Ido umbahen, ndang diloas ibana tondina sai tungki jala rusak di bagasan dirina.

Ayat 7 – 11. Parpsalmen dison manggombarhon borat ni sitaononna i tudos songon na dihuphupi ombak dohot galumbang sian sude arah. Mogap do ibana pola naeng suda hosanna, jala ndang jumpang dalan di ibana laho haruar sian panghuphupi ni galumbang i. Tung rura hamatean do tahe na tongon binolusna i. Alai halak na bonar do ibana. Dihaposi rohana do sasada Debata do na tuk paluahon ibana sian rura hamatean i.

Nang pe nian sai marhusari do rohana manungkun Debata, “ Boasa tung dihalupahon Ho ahu ? Tung marharoroan do sungkunsungkun on sian sihol ni rohana asa jonok tu Debata, ai di tingki jonok tu Debata do tarbahen ni jolma i marhasonangan jala marhagogo on. Tutu maol do antusan ni rohana na masa i, boi masa do tutu gabe ragu ibana di huaso ni Debata ai nunga leleng dipaima ndang ro pangurupion i. Alai dipadirgak ibana do simajujungna manatap tu ginjang, tu Debata do dialuhon na so dapot niantusan ni rohana i “ Boasa ingkon sai martujungtujung ahu mardalan dibahen pangarsahi ni musu i?.?

Huria ni Tuhanta nahinaholongan di bagasan Kristus Jesus. Bangkona do ingkon mangadopi ragam ni sitaonon nasa jolma na dihasiangan on. Ndang mardia imbar parsonggop ni sitaonon i, songgop do i tu angka na pogos alai songgop do i nang tu angka na mora songgop tu angka jolma na so marhasohotan dope, alai songgop do tong tu angka naung marrumatangga, songgop do i tu angka na marsingkola, alai songgop do tong tu angka jolma naung timbo parsingkolaanna; songgop do i tu halak na so porsea, alai songop do tong tu halak na porsea.

Rap mangadopi sitaonon do angka jolma na di hasiangan on, alai marhasurungan do pangalaho ni angka na porsea mangadopi sitaonon i. Taruli gogo dohot bisuk do nasida sian Debata na gabe haporusanna. Na so tupa boanon ni sitaonon i angka na porsea i tu pandelean dohot dosa, gariada tahe pabagashon panandaion nasida do i di huaso dohot holong ni roha ni Debata.

Torop do halak na mandele uju mangadopi sitaonon, ndang saotik tong na madabu tu dosa, mamurai Debata huhut mangalului pangurupion sian angka na marhagogoon di portibi on. Boi masa do i antong ala ndang Debata dibahen gabe haporusanna. Sai lalap ibana dibagasan biar dohot rimas ni roha mangadopi angka sitaononna i, dung i suda ma gogona laos mandele ma. Alai marasing do anggo halak na porsea, pos do rohana di pangaramotion ni Debata di ganup partingkian, di angka partingkian nang di partingkian na maol gumodang do dilehon ibana rohana mamingkiri jala manghaposi huaso dohot holong ni roha ni Debata sian ragam ni sitaonona i. Nang pe maol diantusi rohana parro ni sitaonon i, tu Debata do i dialuhon di bagasan tangiangna.

Marhite turpuk jamita on tasulingkiti ma dirohanta nunga songon dia sihol ni rohanta laho marsaor dohot Debata. Tahasiholi dope Debata disaluhut panggulmiton ni ngolunta, manang talehon dope tingkinta marsaor dohot Debata. Sada ciri ni halak na porsea sai dihalungunhon do marsaor tu Debata ala marhite parsaoran i do jumpang hita hagoon dohot las ni roha sian Debata. Laos songoni do parPsalmen dipatuduhon do parsaoranna dohot Debata rap dohot angka donganna sahaporseaon. Tung parsaoran na uli jala na dame do tutu na digombarhon di turpuk Jamita on. Antong asa sude ma hita mangharingkothon parsaoranta tu Debata asa taruli pasupasu hita dohot hagogoon na sian Debata. Amen.

Bahan diskusi :

1)      Boha do tutu molo ro tu hita sitaonon na mansai dokdok tu ise do hita mangalualu tu Debata do manang tu portibi on ?

2)      Aha do mambahen roha ni jolma di partingkian on lam sumurut manghasiholi parsaoranna dohot Debata ?

 

1.     Marende BE. No. 847:1+3

2.     Tangiang Sian Na ro

3.     Marende BE. No. 116:4

4.     Tangiang Sian Na Manjabui

5.     Papungu Pelean huhut marende BE. No. 316:1-2

6.     Tangiang 1anutup

 

 

Pdt. Luhut Marpaung, M.Th

Pendeta HKBP Resort Aek Loba

Jamita : ROM 5 : 1 - 5 Maningtinghon Taon Parasinirohaon Sian Jahowa

 

MINGGU TRINITATIS

15 JUNI 2025

1.      Marende BE. No. 561:1-2

2.      Votum : A.XIV.A - D.XII.35

3.      Epistle :  JESAYA 61 : 1 - 9

4.      Marende BE. No. 113:3-4

5.      Jamita : ROM 5 : 1 - 5

 

Maningtinghon Taon Parasinirohaon Sian Jahowa

 

Huria ni Tuhanta na hinaholongan di bagasan Jesus Kristus!

Mansai tangkas do disungguli turpuk on hita, paboa ndada ala ni pambahenanta umbahen na malua hita, alai ala asi ni roha ni Debata. Ndada ala ni hatigoranta umbahen na dipasintong hita, sandok ala ni haporseaonta do, naung binasabasahonNa tu hita. Hinorhon ni, ndang tarbahen hita mangasahon gogo dohot pingkiran laho pasintonghon jala paluahon dirinta. Dipatorang do andorang so turpuk on (Bindu 3) paboa halak pardosa do sude hita, ndang adong na tigor nanggo sada (Rom 3:10).

Sada sian godang na mambahen las rohanta dipambahenan ni Debata dibagasan Jesus Kristus, ima dipintori (Bah. Indo. Dibenarkan) hita. Pamintorion ni Debata on patubu hadameon di hita na manjalosa. Ingkon tangkas ma mian dibagasan rohanta, pamintorion ni Debata di hita pardosa on, ndada ala ni na kompromi Ibana maradophon angka dosanta. Ndang adong hadirion ni Debata na songon i, baliksa sai muruk do Debata marnida dosa. Alai marhite panghophoponNa i do pamintorion i, I ma hamamateNa di hau pinarsilang gabe malua hita sian dosanta. On do apala las ni roha ni Apostel Paulus dibagasan turpuk on, nang las ni rohanta na gabe manghorhon dame ni roha, pingkiran nang ngolunta (bnd. Kondisi orang yang telah dibebaskan, ditebus, dibayar hutangnya, maka demikianlah suasana batin penuh rasa syukur, sukacita dan damai). Diuduti Apostel Paulus do muse mandok di las ni roha na dipintori Debata taruli muse hita di asi ni rohaNa.

Aha do parbue ni pamintorionna tu haporseaon i? Parbue ni pamintorion i (pembenaran karena iman) ima mardame dohot Debata (hidup dalam damai sejahtera dengan Allah). Asa unang torop halak paburnangburnang dirina paboa angka na niulana. Alai marhite na tarsilang Kristus i, dilehon do di hita haluaon; dipintori jala dipadame hita dohot Debata. Dijou do hita mangolu dibagasan dame na sumurung i; ndang be mangolu mabiar mida rimas ni Debata alai gok dibagasan las ni roha na manongtong. Ngolu na mardame dohot Debata, ndada sada kondisi ni ngolu statis, baliksa sada ngolu na tongtong mengalami haimbaruon (pat. Gal.2:20 “Ndada ahu be na mangolu i nuaeng, Kristus do mangolu di bagasan ahu. . .). Halak naung mardame dohot Debata, I ma halak na matoras (bertumbuh) dibagasan habadiaon ni Debata. Halak naung mardame dohot Debata taruli hagogoon dibagasan dirina laho paimbaru diri. Ndang tarbahen hita mardame manang mian dame molo so jolo mardame hita dohot Debata. Laos i ma sibaritahononta tu humaliangta.

Sada na mansai balga dapot hita sian pamintorion ni Debata, ima manompa hita gabe halak na marpanghirimon. Hidup berpengharapan menghantar kita untuk tidak melihat segala sesuatu dari sesuatu dan mampu melihat sesuatu dari segala sesuatu. “Jala dihorhon habengeton ni roha i do hatauon, jala hatauon i do manghorhon panghirimon” (ay. 4). hata ‘dihorhon’ na dipangke Apostel Paulus mangajari hita marnida sesuatu ndang secara sempit, jala taida i, secara sudut pandang ni Debata, na umboto saluhut dohot na pargogo na so hatudosan. Panghirimon na sahat tu hita, na marharoroan sian pamintorion ni Debata di ngolunta, ima panghirimon na marojahan di asi ni roha ni Debata. Jala ndang murak hita (kita tidak akan kecewa) binahen ni panghirimon I ala nunga diusehon Debata dibagasn hita holong ni rohaNa, ima Tondi Parbadia, naung nilehonNa i tu hita.

Apostel Paulus manosoi ruas ni huria Rom asa margogo maradophon angka panosak ni na masa binahen ni panggomgomi dohot di huria (ada tekanan - penganiayaan). sian panggomgomi ima : na porsea di Tuhan asing ni Kaisar ingkon diuhum sahat tu na mate. Di situasi on ma Apostel Paulus mangapuli huhut margogoihon nasida, jala pabotohon tu saluhut na mangadopi hamaolon i, ingkon boi marlas ni roha ndang gabe putus asa manang kecewa, mandele. Ala marhite pandonganion ni Debata, dampak ni haporsuhon adong do nilai na denggan siputihon ima habengeton (ketekunan : semangat yang muncul terus-menerus untuk tidak mau kalah dengan kondisi hidup yang dialami). jala panghorhon ni habengeton i ma hatauon (tahan uji : lebih kuat atau labih baik. Jotjot dipangke laho menggombarhon kondisi ni logam naung diuji dohot api asa tarida logam na berkualitas na murni).

Marhite tema ni minggu Trinitatis on “Maningtinghon Taon Parasinirohaon Sian Jahowa” jumolo ma hita mangalapati partingkian dohot pambahenan ni Debata naung sahat tu hita ganup marsadasada asa sahat hita marnampunahon ngolu na mardame dohot Debata dohot ngolu na marpanghirimon i asa tuk hita maningtinghon  taon parasinirohaon sian Jahowa. Amen.

 

Bahan Diskusi :

1)      Torop dope halak na paburnangburnang diri paboa angka na niulana do umbahen dipintori Debata ibana.  Boha ianggo hita?

2)      Haporsuhon jotjot mambahen jolma i gale jala mandele. Boasa ingkon jumpang haporsuhon di ngolu ni halak na porsea?

 

6.     Marende            BE. No. 174:4

7.     Tangiang Sian Na ro

8.     Marende            BE. No. 112:2

9.     Tangiang Sian Na Manjabui

10.Papungu Pelean huhut marende BE. No. 16:1+6

11.Tangiang panutup

 

Jamita : Joel 3:1-5 ULAON NI TONDI PARBADIA DI NGOLU NI NA PORSEA

 

MINGGU PENTAKOSTA

8 JUNI 2025

1.     Marende BE No. 102:1-2

2.     Votum A.XIII.A – D.XII.33

3.     Epistel : Johannes 14: 15-26

4.     Marende BE No. 105:1-2

5.     Jamita            : Joel 3:1-5

 

ULAON NI TONDI PARBADIA DI NGOLU NI NA PORSEA

                       

            Disurirangkon si Joel do sada ari na margoar Ari ni Jahowa. Molo diusehon Debata TondiNa tu "manang ise na manjou goar ni Jahowa".  Dung i masa ma haimbaruon, pemulihan bahkan halongangan. Adong do silehonlehon tu angka doli doli, borua, natoras, na poso nang angka natuatua pe. Dipatupa Debata do tanda halongangan di banua ginjang dohot di tano on marhite ragam ni angka na masa di alam: adong mudar dohot api dohot timus na marsigorgor. Muba ma mata ni ari gabe holom jala bulan gabe mudar.

            Ari ni Jahowa di panurirangon ni si Joel martudutudu tu ari di na “campur tangan” Debata di ngolu ni bangso i, laho patuduhon balga ni huasoNa. Ditingki bangso Israel lam tangkang, tangkang jala mangalo Debata, Debata “campur tangan” marhite na patupahon uhuman, sada tanda alam na luar biasa na marujung tu pemulihan dohot haimbaruon laho mamboan bangso i mulak tu Debata.

            Molo dung diusehon Tondi Parbadia, ganup jolma ndang mardia imbar umur (na matua manang na poso), jenis kelamin (baoa manang borua), status sosial (tuan manang naposo) manghilalahon hagogok ni Tondi i jala mangulahon lomo ni roha ni Debata. Sude do jolma boi marsaor langsung dohot Debata. Dibagasan Tondi ni Debata, manang ise na manjou Debata dapotan haluaon. Joujou tu Debata marlapatan adong ibadah na sintong, adong joujou sian roha, adong hamubaon ni roha. Gabe mara manang pasupasu do Ari ni Tuhan i? Tergantung do i tu responta tu campur tangan ni Debata. Angka na manjou Debata dapotan haluaon. Alai angka na lam koras tanggurungna, hamagoan do dapot nasida.

            Digohi do panurirangon ni panurirang Joel i di peristiwa Pentakosta di Jerusalem (Ulaon 2), sampulu ari dung manaek Kristus tu Banua Ginjang. Diusehon do Tondi Parbadia tu angka sisean dohot tu angka na porsea. Tondi Parbadia do na memperlengkapi Huria i papatarhon sangkap ni Debata tu portibi on. Ditogihon Tondi Porbadia do hita mangulahon lomo ni roha ni Debata. Ngolu parsaoranta gabe dinamis ala adong Tondi ni Debata.

            Nunga diusehon Tondi Parbadia asa ganup hita manghilalahon hamalumon. Nang pe masa angka ragam ni mara, bencana bahkan krisis na mangonai tu portibi on, jolma na manjou goar ni Debata pasti do manghilalahon haluaon di hangoluan nang di hamatean. Molo ditogihon Tondi Parbadia do ngolunta, tubu ma hatauon na imbaru marsomba dibagasan Tondi dohot hasintongan, adong huaso gabe sitindangi ni Debata jala adong huaso manghaholongi dohot manghobasi dongan jolma.

            Tondi Parbadia naung diusehon i do na memperlengkapi hita asa porsea jala gabe sitindangi ni Kristus. Huaso ni Tondi Porbadia i do na patauhon hita manaluhon biar, holso dohot pandelean. Hagogoon ni Tondi Parbadia i do na mambahen hita tongtong marpanghirimon tu Debata. Huaso ni Tondi Parbadia i do na manogunogu hita manghatai dohot marpangalaho hombar tu parbue ni Tondi i. Hagogoon ni Tondi Porbadia i do na patauhon hita torus mangula hombar tu silehonlehon na pinasahat tu ganup jolma, na matua manang na poso, na balga manang na metmet, manang ise pe. Di tongatonga ni ragam ni situasi dohot di ragam ni parasingan i, dipasada Tondi Parbadia do hita asa rap mardalan, rap marporang, rap mangula bahkan rap mangulahon diakonia/holong. Ala ni i, ingkon torus do hita masitungkol-tungkolan, masitangiangan, masipahembangan (saling membangun), saling memperlengkapi, jala laos masihaholongan.

            Diganup situasi na masa, sai taungkap ma rohanta asa mangula Tondi Parbadia asa adong hamubaon ni roha dohot haimbaruon sian Debata. Na pasti jala na jorbut do ari ni Tuhan i. Molo ari ni Tuhan i di bagabaga ni Tondi Parbadia nunga saut, ba lehon ma ngolum asa ditogihon Tondi i huhut paimahon ari ni Tuhan i di ari sogot, di na patupaon ni Debata haimbaruon dohot pemulihan na sun denggan marhite langit dohot tano na imbaru. Hangoluhon ma ngolu on hombar tu lomo ni roha ni Debata, asa molo dung jumpang tingkiNa tarmasuk ma hita tu angka na tarjou manghilalahon haluaon i jala unang tardapot hita songon angka na mangalami hamagoan saleleng ni lelengna. Amen.

 

Bahan Diskusi

1)      Aha do parbue na boi tapatuduhon naung digohi tondi Porbadia hita?

 

6.     Marende            BE. No. 680:1

7.     Tangiang Sian Na ro

8.     Marende            BE. No. 641b:1-2

9.     Tangiang Sian Na Manjabui

10.Papungu Pelean huhut marende BE. No. 461:1-2

11.Tangiang panutup

 

Pdt. Pancasona Simbolon, M.Div., M.Pd.K

Pendeta HKBP Ressort MUTIARA