Jamita : Pangungkapon 22 : 12 – 21 Jahowa Do Raja

                                                                     

                                                             MINGGU  EXAUDI

01 Juni 2025

1.      Marende BE No. 15:4+5

2.      Votum :   A.XII.B – D.X.32

3.      Epistel :   Psalmen 97 : 1 – 12

4.      Marende BE. No. 9:3

5.      Jamita :   Pangungkapon 22 : 12 – 21

 

Jahowa Do Raja

 

Godang do ruas ni huria na so apala olo manjaha buku Pangungkapon on, adong ma i alani maol antusan ala mamakke angka simbol-simbol, nomor, jala dietong do molo dijaha buku Pangungkapon on mamintor hatop nama ujung ni ngolu ni jolma dohot portibi on. Hape, buku Pangungkapon on parnidaan ni si Johannes do uju tarbuang di pulo Patmos, ima mangungkap angka na naeng masa sogot do, ima panguhuman ni Debata tu angka siulahon hajahaton jala hamomonang ni Kristus dohot bangsoNa.

Ido umbahen asa ganup angka na porsea ingkon manongtong mangulahon hata ni Debata, nang pe martimburak angka parjahat di portibi on, ingkon pos do rohanta, hamonangan do ujungna pasahaton ni Debata tu hita.

Dibagasan turpuk on dilumbahon do tu hita asa dungo managam haroror ni Tuhan i, ima haroroNa paduahalihon ala dang adong na umbotosa manang sadihari tingki haroroNa ai guru di Ibana do saluhutna. Jala dijouhon do tu hita asa marsihohot manghaporseai Ibana ditingki las ni roha nang manang ditingki arsak ni roha nang mamolus angka sitaonon parungkilon tahe (BE No. 149 : 1,3). Si Paulus pe ido didok ibana tu angka na porsea i : “Marlas ni roha ma di haporsuhon! Jugulhon hamu ma tangiang” (Rom 12:12).

Jesus pe nunga dilumbahon Ibana taringot tu haroroNa di Mateus 25 : 31-46, paboa na ro do Ibana pasahathon hatuaon tu angka na porsea (ay.14). Ima angka na marsihohot manghaporseai Ibana agan pe manaon na hansit dohot na porsuk. Molo tajaha di 2 Korint 5 : 10 didok  ditingki haroro ni Tuhan i tarbagi dua do hajolmaon i sogot. Na satia dapotan tua sian Debata, jala na so satia hona uhum do. Alani i do tarjou do huria i asa paubahon roha jala marsihohot hombar tu hata ni Debata nang pe mangadopi angka sitaonon, ai di angka sisongoni do hatuaon sogot sihirimon i. On do nang sosososo tu na pitu huria (Epesus, Smirna, Pergamus, Tiatira, Sardes, Philadelpia, Laodokia) na di buku Pangungkapon on, asa manongtong manangihon hata ni Debata. Molo tajaha sude buku Pangungkapon on, ido umbahen sai diujungi hata tu ganup huria na pitu i : “Ditangihon na marpinggol ma na nidok ni Tondi i tu angka huria”. Ingkon sada do ganup roha ni sandok huria i laho manangihon hata ni Debata di ngoluna be (Rom 10:17, Luk 11:28), molo mauas di haluaon na naeng patupaon ni Tuhan i. Ganup na masihol di haluaon dipaloas Jesus do ro tu Ibana, ai Ibana do hangoluan i, holan haporseaon tu Jesus dohot mangolu dirajai Tondi i, ido dipangido sian hita asa dapot hita silehonlehon i. Ima patuduhon habalgaon ni holong ni Debata tu hita jolma.

Jesus do na manguhumi portibi on, alai laos Ibana na paluahonsa, marhuaso do Ibana disaluhutna. Songon panguhum, na ro ma Jesus i padirihon hasintongan huhut pajongjong uhum na tigor. Alai songon Sipalua, dilehon Jesus do dalan asa malua sian uhuman i marhite asi ni rohaNa. Dibahen i, nag pe mardosa jolma i jala ingkon hona uhum, dibasabasahon do hasesaan ni dosa dohot haluaon tu angka na porsea di Ibana. Dibahen i tu angka na sai mian dibagasan dosa, panguhumon do dapotsa di na ro Jesus i. Alai na olo paubahon roha jala manjanghon asi ni rohaNa, dapotan haluaon ma nasida.

Minggutta ima minggu Exaudi ima minggu panongai di ari hananaek Jesus dohot hasasaor ni Tondi Parbadia. Hata Exaudi marastuan ma i “sai tangihon ma” (Psalmen 27:7). Songon angka sisean na maimaimahon hasasaor ni Tondi Parbadia dung manaek Tuhan Jesus, songon i ma nian nang hita angka na porsea maimaimahon haroro ni Jesus paduahalihon di minggu on. Godang angka arsak, sitaonon, parungkilon nang hajahaton masa ditongatonga ni ngolunta, alani tapangidohon ma tu Debata: “sai tangihon ma soarangku ale Jahowa”, alusan ni Debata ma hita “Olo, na ro ma Ahu”. Marlas ni roha ma hita paimahon haroro ni Jesus, taulahon ma hata ni Debata, jala tapasiding ma hajahaton. Amen

 

Bahan Diskusi :

1)      Somalna bosan do hita ditingki na paimahon. Aha do umbahen na mura hita bosan di na paimahon?.

2)      Menurut hita, aha do umbahen maol hita mangulahon hata ni Debata dohot marhamubaon sian hajahaton?.

 

6.      Marende BE No. 185:5

7.      Tangiang Sian Na Ro

8.      Marende BE No. 736:2

9.      Tangian Sian Namanjabui

10.  Papungu Pelean huhut marende BE No. 573:1+3

Tangiang panutup