MANGARADOTI HASADAON NI TONDI

 

                                                  MANGARADOTI HASADAON NI TONDI

Boi do jolma mardame?

Sada sungkun-sungkun na maol mura do on, ate. Boi do jolma mardame? Ai boi do alusna mura ala ndang adong dope parsalisian dope manang ndang adong dope parbolatbolaton, alai molo nunga masa parsalisian dohot parbolatbolatton gabe mansai maol situtu do mambahen pardamean tarlumobi di hita halak Batak. Ndang holan na marasing-asing margana na maol padameon, na samudar (na markeluarga) pe boi do maol padameon molo nunga tubu parsalisian. Ido umbahen sai jongjong ma muse parpunguan naimbaru siala nunga haluar sian punguan na leleng.

Sai lohot dope roha na mangarajumi diri sumintong sian donganna. Sai jotjot do tabahen angka parasingan manang perbedaanna na adong di hita gabe patubuhon angka parsaolan, parbolatbolaton maradophon donganta. Sipata sai mardingkan do hita mardongan(marnida bohi),ala perbedaan latar belakang sosial, ekonomi, pendidikan dll. Sai tadok ummalo hita sian donganta, sai tarimpu nungga hebat hita, jala tarajumi nungga tung godang na tabahen. Pangalaho si songon ni mambahen hita madabu tu ginjangniroha. Parsoalan di huria Efesus i ma masalah halak Kristen Yahudi dohot Kristen na so sian Yahudi (marsunat dohot na so marsunat). Dirajumi halak Yahudi do nasida lebih layak sian halak na so Yahudi naung gabe Kristen. Sasintongna diadopan ni Tuhan ni dos do nasida sipelebegu hian, ndang parjambar di Kristus, ndang taruli di angka parpadanan bagabaga, alai marhite mudar ni Kristus nungga dipadame nasida dohot Debata. Boi do pangalaho na mangarajumi diri (merasa lebih baik, lebih layak sian donganna) masa di ngolunta, di hurianta, di tongatonga ni punguan, parmargaon/arisan, paradaton, parkarejoan, parsingkolaan, dll.

Maol do hita mardomu, mardame, molo holan mangasahon holong parmudaron, atik pe ndang tarsirang hita sian i, alai di huria ndang i ojahanna alai holong dibagasan Tuhan i do na mangarahut holongta i. Di Roma 12:3 didok “… Unang ma torbang rajumi hamu dirimu, lobi sian na patut; alai intap ni na tama ma parrohaonmuna …”Holong dibagasan Kristus ido mambahen asa lam serep rohanta, jala pasidinghon angka haginjangon ni roha. Sasintongna dia ma na ingkon sihaginjangon ni ngolunta, ai sude na adong di ngolunta silehonlehon ni Debata do i. Halak na sai patuduhon haginjangon ni roha ima halak naung dirajai sibolis ngoluna. Ai sibolis pe sai torus do marginjang ni roha diadopan ni Debata (Patudos Mat.4:1-11 ima di tingki diunjuni sibolis Jesus di halongangan). Jadi mangadopi angka halak si songon i ingkon marlambok ni roha ma hita, ai molo taalo mardongan muruk dohot rimas justru lam tambah ginjang nama roha nasida.

Saluhut halak Kristen ingkon tarjou do mangolu dibagasan hasadaon, siala nunga sada daging dohot sada tondi hita dibagasan Kristus. Ai namarhaha maranggi do hita diadopan ni Debata (Keluarga Allah). Mudar ni Kristus do na boi pasadahon hita ndada mudar parmargaon (margaisme). Marhite mudar ni kristus i do hita dipadomu, dipadame dohot Debata. Halak na porsea jala manjanghon Tuhan ni tontu di halungunhon do ngoluna asa mangolu dibagasan hasadaon dohot dame. Haringgasonta dohot kesetiaanta na marhuria, na marminggu, na markoor i, ingkon marojahan do i dibagasan holong ni Kristus, ndang kesetiaan ala ni dongan, ala ni kelompok, ala ni parmudaron sambing. On do na ingkon tasuan di angka punguan asa unang palobihu Fanatisme tu punguan, tu dongan sian Fanatisme tu Kristus. Denggan do marfanatisme (fanatik) alai molo na mambahen na denggan, ndada ala patuduhon haginjangon ni roha. Alai dumenggan do molo fanatisme tu Jesus Kristus. Ai molo nunga mangolu fanatisme tu Jesus Kristus pasti diharingkothon poda dohot pangajarion ni Kristus di ngolu on manang di punguan. Ganup do hita memiliki peran dohot fungsi (tangungjawab) di huria i (dilehon do tu hita ragam ni angka talenta), unang adong na mandok dirina sumurung sian naasing, unang adong na mandok tu na asing halak na ro doi, paisolat do i, panginsua do i.Mansai ringkot do hita “saling menghormati/masiargaan dohot masipasangapan. Sada do hita di huria i dongan saharajaon jala dongan sabagas ni Debata, sai olo ma hita gabe  joro na badia dibagasan Tuhan i, sai olo ma hita dipauliuli, gabe parmianan ni Debata dibagasan Tondi Porbadia, Amen.