MANGARADOTI HASADAON NI TONDI
EPESUS 4:1-7
Taradoti ma
hasadaon ni Tondi, pinadomu ni dame"
Songon halak
Kristen naung tarjou hita, tahangoluhon ma panjouon naung sahat tu
hita..marhite panjouon i, ingkon mamboan ngolunta tu haimbaruon...
Hataridaan ni
ngolu naung tarjou marhite parange na tama:
Martoruk ni
roha: Maol do martoruk ni roha molo so jolo tatanda dirinta dohot hagaleonta. Dibahen
i, asa tuk hita martoruk ni roha, ingkon tuk hita jumolo mananda dirinta dohot
hagaleonta diadopan ni Tuhan i. Halak na mangolu dibagasan toruk ni roha dao ma
sian ibana bada dohot parbolaton...
Hasadaon
mangihuthon Hata ni Debata, dang ingkon rap sapingkiran, sahata. unang tapaksa
donganta asa sapingkiran jala sahata dohot hita...alai unang gabe paholang
parsaoran molo pe marasing na dirohanta dohot na diroha ni dongan...na di
pingkiranta dohot di pingkiran ni dongan..hasadaon, ingkon tuk manjalo di angka
perbedaan dohot hahurangan..
Boha
do hita mardame?
Tingko bulung ni Jior tumingkoan do bulung
nibane bane, tingkos nidok ni hata tigor tumingkos on do nidok ni hata Dame Sada sungkun-sungkun na
maol mura do on, ate. Boi do jolma mardame? Ai boi do alusna mura ala ndang
adong dope parsalisian manang
parbolatbolaton, alai molo nunga masa parsalisian dohot parbolatbolaton gabe
mansai maol situtu do mambahen pardamean tarlumobi di hita halak Batak. Ndang
holan na marasing-asing margana na maol padameon, na samudar (na markeluarga)
pe boi do maol padameon molo nunga tubu parsalisian. Ido umbahen sai jongjong
ma muse parpunguan naimbaru siala nunga haluar sian punguan na leleng.
Sai lohot dope roha na
mangarajumi diri sumintong sian donganna. Simbora
gukguk pincur otik mamora hita luhut sumurung au otik Sai jotjot do tabahen
angka parasingan manang perbedaanna na adong di hita gabe patubuhon angka
parsaolan, parbolatbolaton maradophon donganta. Sipata sai mardingkan do hita
mardongan(marnida bohi),ala perbedaan latar belakang sosial, ekonomi,
pendidikan dna. Sai tadok ummalo hita sian donganta, sai tarimpu nungga hebat
hita, jala tarajumi nungga tung godang na tabahen. Pangalaho si songon ni
mambahen hita madabu tu ginjangniroha. Parsoalan di huria Epesus i ma masalah
halak Kristen Jahudi dohot Kristen na so sian jahudi (marsunat dohot na so
marsunat). Dirajumi halak Jahudi do nasida lebih layak sian halak na so jahudi
naung gabe Kristen. Sasintongna diadopan ni Tuhan ni dos do nasida sipelebegu
hian, ndang parjambar di Kristus, ndang taruli di angka parpadanan bagabaga,
alai marhite mudar ni Kristus nungga dipadame nasida dohot Debata. Boi do
pangalaho na mangarajumi diri (merasa lebih baik, lebih layak sian donganna)
masa di ngolunta, di hurianta, di tongatonga ni punguan, parmargaon/arisan,
paradaton, parkarejoan, parsingkolaan, dna
Maol do hita mardomu,
mardame, molo holan mangasahon holong parmudaron, atik pe ndang tarsirang hita
sian i, alai di huria ndang i ojahanna alai holong dibagasan Tuhan i do na mangarahut
holongta i. Di Roma 12:3 didok “… Unang ma torbang rajumi hamu dirimu,
lobi sian na patut; alai intap ni na tama ma parrohaonmuna …”Holong
dibagasan Kristus ido mambahen asa lam serep rohanta, jala pasidinghon
angka haginjangon ni roha. Sasintongna dia ma na ingkon sihaginjangon ni
ngolunta, ai sude na adong di ngolunta silehonlehon ni Debata do i. Halak na
sai patuduhon haginjangon ni roha ima halak naung dirajai sibolis ngoluna. Ai
sibolis pe sai torus do marginjang ni roha diadopan ni Debata (Patudos
Mat.4:1-11 ima di tingki diunjuni sibolis Jesus di halongangan). Jadi mangadopi
angka halak si songon i ingkon marlambok ni roha ma hita, ai molo taalo
mardongan muruk dohot rimas justru lam tambah ginjang nama roha nasida.
Boha do hita Marsada?
Saluhut halak Kristen
ingkon tarjou do mangolu dibagasan hasadaon, siala nunga sada daging dohot sada
tondi hita dibagasan Kristus. Ai namarhaha maranggi do hita diadopan ni Debata
(Keluarga Allah). Mudar ni Kristus do na boi pasadahon hita ndada mudar parmargaon
(margaisme). Marhite mudar ni kristus i do hita dipadomu, dipadame dohot
Debata. Halak na porsea jala manjanghon Tuhan ni tontu di halungunhon do
ngoluna asa mangolu dibagasan hasadaon dohot dame. Haringgasonta ma
hasatiaonta, na mar Tuhan i, marojahan dibagasan holong ni Kristus, an. Ganup
do hita memiliki peran dohot fungsi (tangungjawab) di huria i (dilehon do tu
hita ragam ni angka talenta), unang adong na mandok dirina sumurung sian
naasing, unang adong na mandok tu na asing halak na ro doi, paisolat do i,
panginsua do i.Mansai ringkot do hita “saling
menghormati/masiargaan dohot masipasangapan. Sada do hita di huria i dongan
saharajaon jala dongan sabagas ni Debata, sai olo ma hita gabe joro na
badia dibagasan Tuhan i, sai olo ma hita dipauliuli, gabe parmianan ni Debata dibagasan
Tondi Porbadia.
Tudosan taringot tu Hasadaoni
Di sada borngin, na marrapot do angka
alat-alat tukang dung sidung nasida karejo. Na tubu do angka persoalan di
nasida, pola naeng masipecatan. Dung i jongjong ma si Meter, mandok: Na olo do
ahu dipecat, alai jumolo ma si Gergaji an. Ai baeon pe so niantusan on, sai
holan na manirang do diula on. nabinoto sipadomu na sirang do adong alai ianggo on, angka na domu do dipasirang,
dipotong disan, disirang dison. Ingkon pecaton do tong baeon”. Umbege i hehe ma
si Gergaji, huhut didok: OK, olo do au disi, alai si Martil an ma parjolo
dipecat. Ai holan na manggaori do ulaon ni baeon, diantuk disan, gaor sude, so
boi iba modom dibaen. Ingkon dipecat”. Ro ma muse si Martil: OK, tarjalo au do
i, alai ingkon jumolo ma si Tuhil an. Ai baeon pe, holan na manggali lubang do
ulaonna, sude jolma terperosok, madabu tu lubang binahenna i. Ibana pe ingkon
pecaton do. Hehe ma si Tuhil: OK, sadar do au disi, alai ndada holan au. Si
Paku an pe ingkon dohot do. Boasa ? Ai baeon holan na manusuhi ulaonna. Hatana
sai manusuhi panghilalaan, mambahen hansit roha. Molo ditarik ibana pe hatana
i, alai nunga sanga marbokas di rohaniba, sai hansit do roha dibahen. “Bah,
gabe dohot au ate, ninna si Paku. OK! Alai ho pe Meter, memang tung so
haampinan do ho. Ai ho do mamulai on sude. Ai sai mangasangi do ho, holan na
mangasta. Diukur ho tusan, diukur ho tuson, sai hira ho nama natumingkos. Ho do
parjolo pecaton”, ninna si Paku ……. Songon i ma nasida marsoal torus, laos so
modom, torus sahat tu manogot, sahat tu na ro tokena, si Tukang i. Dung ro
Tungkangi Dibuat ma angka alat alat
tukang i ima Meter, Gargaji, Tuhil, Tongkok ( Martil ) dohot pakku jala dipake
ma sadasada marguru tu ringkotna be, jala sidung ma dibahen nasida sada
langgatan, ai tongon martukang di gareja do nasida uju i. Gabe boi do sidung
ulaon ala marasing be nasida di fungsi, ala olo marsada ni roha di bagasan na
masipatutoru dirina be pakeon ni si tukang i.
Naeng ma songon i hita. Di angka
keperbedaan-ta i, rap ringkot jala rap denggan doi, molo sude hita olo marsada
ni roha dibagasan pangoloion huhut patutoru diri pakeon ni Raja na sumurung i,
ima Debatanta. PakeonNa ma hita sude marguru tu talenta nanilehonNa i di hita.
Ima mangarahut hita di hasadaon.
Antong, taeahi ma hasadaon, di rumahtangga,
di huta, di masyarakat tarlobi di huria.
Angka perbedaan unang ma mambahen hita
marsirang alai tapake ma i laho masiurupan, masipasingkopan, untuk saling
membutuh- kan.
Tapadao ma ginjang ni roha dohot roha na
egois na holan mangharingkothon na di dirina.
Alai sude ma hita paserephon roha,
merendahkan diri maniru Kristus. Molo dapot na songon i, lam togu ma hasadaon
i. Sian i ma tandaon ni halak, na tutu situtu do hita siihuthon Kristus. (
Filipi 2 : 2 ) Amen
Tidak ada komentar:
Posting Komentar