Tangiang Marjamita
Dame ni
Debata, na sumurung sian saluhut roha, i ma na mangaramoti ateatemuna dohot
rohamuna marhitehite Tuhan Jesus Kristus. Amen.
Tangiang Pelean:
Ale Debata, Amanami na di
banua ginjang, Ho do haroroan ni saluhut silehonlehon na denggan dohot nasa
ulibasa na mauliutus.Hupasahat hami ma sian na nilehonMi tu hami, peleannami tu
Ho. Sai jalo ma i gabe uap na hushus di joloM. Pasupasu ma i jala ramoti asa
huparhaseang hami pelean on, patimbulhon harajaonMu di tongatonga ni HuriaM dohot
di portibi on. Buhai ma rohanami marhitehite TondiM, asa lam hutanda hami
godang ni silehonlehonMi tu hami, asa lam girgir hami mandak mauliate tu Ho,
marhitehite Jesus Kristus Tuhannami. A m e n .
Tangiang Pandidion:
Ale si Anu !
Hudidi ma ho tu bagasan Goar ni Debata Ama dohot tu bagasan (Goar ni AnakNa
Tuhan Jesus Kristus, dohot tu bagasan Goar ni Tondi Parbadia. A m e n .
(Diampehon
Pandita i ma tanganna tu ulunasida huhut ma didok): Sai diramoti Debata ma ho di habobongotmon
tu bagasan Harajaon ni Debata ro di saleleng ni lelengna.
Tangiang
tu na Manghatindanghon Haporseaon
Jalo hamu ma pasupasu ni Tuhan
Debata Amanta i dohot AnakNa Tuhan Jesus Kristus dohot Tondi Parbadia. Sai
didongani ma hamu maralohon nasa na jat, jala dipargogoi ma hamu patupahon nasa
na denggan. Amen.
Hamu
angka na pinarhamaol ni Debata, nunga gabe dongan sahuria jala dongan
sapanganan hamu manganhon parpadanan na badia i. Na arga situtu do hamu
ditobus, unang oloi hamu be dosa dohot sibolis. Ramotan ni Debata do hamu
maralohon pangago i, asal ma tongtong rohamuna tu Ibana jala togihononNa do
hamu masuk tu harajaon banua ginjang i.
Marbagas
Antong masilehonan tangan siamun ma hamu paboa hot ni
padanmuna: Naposo ni Debata do ahu, na mamboan HataNa tu hamu. Marhitehite Goar
ni Debata Ama, Anak dohot Tondi Parbadia do ahu mandok: Na pinadomu ni Debata
ndang jadi sirangon ni jolma.
Tangiang
Pasupasu
Dipasupasu
jala diramoti Tuhan Debata ma ho (hita) ! Disondangkon Tuhan Debata ma bohiNa
tu ho (hita) jula asi ma rohaNa mida ho (hita)! Didompakhon Tuhan Debata ma
bohiNa tu ho (hita) jala dipasaorhon ma dameNa tu tondim (tondinta be). A m e n
.
Asi ni roha ni tuhan Jesus Kristus, dohot holong ni roha
ni Debata Ama dohot parsaoran ni Tondi Parbadia i ma mandongani hamu! Amen.
Tangiang
Parpadanan na Badia
Didok
Tuhanta Jesus Kristus: Jalo hamu ma on jala pangan ma ! DagingKu do i, na
nilehon tu hamatean
humophop hamu. I ma mangaramoti jala pahothon rohamuna manghaporseai Ibana, asa
di hamu hangoluan na so ra suda. Amen.
Didok Tuhan
Jesus Kristus: Jalo hamu ma on jala inum hamu sian i. MudarHu do i, na niusehon
humophop hamu bahen hasesaan ni dosamuna. I ma mangaramoti jala pahothon
rohamuna manghaporseai Ibana asa di hamu hangoluan na so ra suda. Amen. Mulak
ma hamu di bagasan dame !
Tangiang
Mananom na Monding
Dipasupasu Tuhan Debata ma ho laho
ruar dohot laho bongot olat ni on ro di saleleng ni lelengna ! Amen.
Ale si
Anu, sian tano do parmulaan ni dagingmu, mulak ma i gabe tano; alai Tuhan
Debata na manompa ho, dohot Tuhan Jesus Kristus, na paluahon ho sian dosa,
dohot Tondi Parbadia, na manjou ho tu hangoluan na so ra suda, i ma mangaramoti
orbuk ni bangkem, paima ro ari parpudi ! Amen !
Tidak ada komentar:
Posting Komentar