Jamita Passion

Jamita Passion

Lukas 14:26-27

Lukas 14:26 “Jikalau seorang datang kepada-Ku dan ia tidak membenci bapanya, ibunya, isterinya, anak-anaknya, saudara-saudaranya laki-laki atau perempuan, bahkan nyawanya sendiri, ia tidak dapat menjadi murid-Ku.
14:27 Barangsiapa tidak memikul salibnya dan mengikut Aku, ia tidak dapat menjadi murid-Ku.

14:26 Ganup halak na ro tu Ahu, ndang tarbahen gabe siseanku, ia so dihasogohon ibana amana, inana, na niolina, anakkonna, hahaanggina dohot angka ibotona, ro di hosana sandiri.

14:27 Ndang tarbahen gabe siseanku halak, na so manuhuk silang na tu ibana, laho mangihuthon Ahu!

Sambolus begeonta hira na koras do pandohan ni Tuhan Jesus on! Hira na so parholong ni roha Tuhan Jesus. Hira na so diharingkothon Tuhan Jesus ngolu kekeluargaan, kekerabatan dohot ngolu parrumatanggaon. Apalagi molo itapahombar tu angka jamita ni Jesus na mandok ingkon parholong roha do angka na porsea, bahkan, didok Tuhan Jesus do, na manghasogohon hita pe ingkon haholongon do.

Alai, sasintongna molo mulahulak tajaha turpuk on, na ni ondolhon ni Tuhan Jesus ima:
– Parsitutuon mangihuthon ibana
– Bulus ni roha gabe siseanNa
– Dohot roha na barani mambuat haputusan mangihuthon Jesus dohot di sude angka resikona.

Lapatanna, syarat gabe sisean ni Tuhan Jesus:

– Ingkon barani mansoadahon diriNa molo maralo hagiot ni dagingna tu lomo ni roha ni Jesus.

– Ingkon rade do mananggalhon dohot maninggalhon saluhutna molo gabe pangambati i laho mandapothon Jesus dohot mangulahon lomo ni roha ni TJ.
– Molo pinangke pandohan ni Tuhan Jesus nangkin: Ingkon barani do hita songon sisean ni Tuhan Jesus mangadopi kondisi dihasogohon keluarga. Dohot mangkasogohon pangalaho, sikap, pangkataion dohot pingkiran ni keluarga, angka sisolhot molo gabe maralo i tu hata ni Debata.

– Na umposi dope, ingkon soadahononhon do hosa (ngolu) molo naeng gabe sisean ni Tuhan Jesus na tutu.

Di ayat 27, on ma gabe inti dan syarat utama molo naeng gabe sisean ni Tuhan Jesus: ima manuhuk silang na tu ibana (memikul salibnya).
– Silang do i molo dihasogohon dongan, keluarga hita ala mangihuthon Jesus, molo mangulahon lomo ni rohaNa.

– Silang do i, molo gabe intopanta hagiot ni dagingta, mangoloi hataNa.
– Silang do i, molo hansit pangkilalaanta manadinghon keluarganta mangoloi Tuhanta.
Didok Tuhan Jesus, angka on ma situhukonta songon sisean ni Tuhan Jesus hita.

Hamu angka dongan! Di passion on, disungguli jala diparata do hasiseanonta di jolo ni Tuhan Jesus. Ndada gabe holan hasonangan na taadopi molo gabe sisean ni Tuhan Jesus hita, alai gok haporsuhon do jala gok paraloan portibi. Ndada gabe so berjuang hita di portibi on, dung gabe sisean ni Tuhan Jesus hita. Alai, marhite passion on, dipaingot do hita, di godang ni paraloan na ni adopan ni Tuhan Jesus uju di ngoluNa. Ndada holan sian portibi on dohot sian halak na so mangkalomohon hadirionNa, alai na jumorbut ima paraloan na ro sian siseanNa sandiri, na jonok di lambungNa, na mandok manghaholongi Ibana, hape panjeheon do dibahen tu Tuhan Jesus.

On ma tona na parjolo tu hita. Ndang mintop parungkilon dohot pangunjunan di ngolunta. Ndang mansohot paraloan i, alani i, ndang boi mintop perjuangan sian ngolunta. Ingkon berjuang do hita, ingkon benget do hita, jala ingkon bisuk do hita marnida angka na masa, boi do paraloan i sian tongatonga ni keluarga, sian tonga ni huria, dohot sian na humaliang pe.

Tona na paduahon: Marusaho ma hita padimundimun keluarganta, rumah tangganta asa rap udur hita mangoloi Tuhan Jesus. Sian pardagingon na hansit do molo dihasogohon keluarga iba, na dangol do molo ala ni na mangihuthon Jesus ingkon tinggalhononhon keluarga, ingkon tinggalhononhon punguan, jala tung mansai lungun do roha molo ingkon tadingkononhon anakhon, suami, istri, natoras dohot angka na hinaholongan, ala na so unduk na sida mangoloi hata ni Debata. Jala ndang adong sian hita na manghalomohon sirang sian keluarga ala ni idealismenta mangoloi Debata.

Alani i, ingkon rap marsitutu do hita sakeluarga mangoloi Tuhan i, asa unang adong na tading nanggo sada. Ingkon berjuang do hita manogu haporseaon ni anggota keluarganta, asa unduk jala olo mangihuthon dohot mangulahon lomo ni roha ni Debata. Naeng ma nian rap udur hita tu dolok tu toruan mangoloi Tuhanta Jesus. Asa songon na nidok ni naposoNa si Josua: Ahu dohot donganku sabagas ingkon Jahowa do oloannami.