MARKUS 16: 9-18 . HUASO HAHEHEON NI JESUS

 

Renungan Paskah - Minggu, 04 April 2021

Turpuk: Markus 16, 9-18

 

Haporseai jala Hatindangkon!

Ndang ulaon na mura gabe sitindangi (saksi) ala ndang andap pintor porsea halak di na tahatindangkon i. I ma na masa tu si Maria Magdalena dohot dua halak sisean ni Tuhan Jesus. Nasida gabe sitindangi taringot tu haheheon ni Tuhan Jesus sian na mate ala dipataridahon Jesus dirina tu nasida na tolu (ay. 9, 12). Dung dibereng nasida naung hehe Jesus sian na mate hinorhon ni parjumpaan nasida dohot Tuhan Jesus ndang hohom boti nasida, alai pintor borhat do nasida laho mandapothon angka sisean na asing laho manghatindangkon (menyaksikan) barita na uli i tu angka sisean na tongon marhabot ni roha i (ay. 10, 13).

Alai aha ma na masa? Ndang porsea angka sisean na asing i di barita i (ay. 11, 13). Mura do i antusan ala marpardomuan tu posisi ni parompuan di kultur ni Jahudi hatiha i. Parompuan dirajumi tumoru sian baoa jala ndang tama gabe asal ni sadasada barita lumobi taringot tu haheheon ni Tuhan i. Marnida jugul ni angka sisean na so olo porsea di barita haheheon i, dipataridahon Jesus ma dirina tu angka sisean i huhut dipinsang haporseaonnasida (ay. 14).  Dung pe dipataridahon Jesus dirina gabe porsea ma nasida naung hehe Jesus i. Laos disi ma dipasahat Tuhan Jesus tonaNa (amanat agung) tu angka sisean i  laho marbarita na uli (memberitakan Injil) tu sandok portibi on (ay. 15-18) jala unduk do angka sisean i (ay. 20).

Tudos tu angka sisean i, songon haporseaonnasida na metmet i dope ra haporseaonta maradophon Jesus i. Hea do ra hita sahat tu partingkian manangsihon (meragukan) Ibana na gabe Debata di pardalanan ni ngolunta. Alai, ndang pasombuon ni Jesus i hita sangsi (ragu). Ra, ndang ro be Jesus i secara fisik songon tu angka sisean i di turpuk on, alai tahaporseai do paboa dipangke Jesus do marragam angka dalan di ngolunta on laho membuktikan paboa Debata na marhuaso do Ibana, Dia adalah Allah yang dapat diandalkan.

KebangkitanNya dari kematian menjadi bukti paling kuat bahwa maut pun mampu dikalahkan-Nya.  Karena itu, jangan meragukanNya. Pergilah, beritakan kabar keselamatan itu kepada semua orang! Amin.

Pdt Winner Sitorus. M.Min 

Praeses HKBP Distrik XIII Asahan Labuhan Batu

LUKAS 23:44-48 DISEAHON JESUS DO HOSAN JAMITA DI PARNINGOTAN HAMAMATE NI TUHAN JESUS

 

DISEAHON JESUS DO HOSANA

LUKAS 23:44-48

Mansai uli do ojahan ni turpuk on, na mandok: diseahon Jesus do hosaNa laho paluahon jolma pardosa. Alai, aha do na laho sidohononna tu hita di tingki on? Parmingguon di Parningotan ni ari hamamate ni Tuhan Jesus manogihon hita asa bongot tu bagasan pangarimangion  na mansai bagas taringot tu pangalehonon ni Jusus didiriNa asa gabe pardengganan di hita jolma pardosa maradophon Debata na badia. Ndung diseahon Jesus hosa-Na lam mananda ma hita tu Ibana. Ndung diseahon Jesus hosa-Na gabe tubu ma di bagasan rohanta parsitutuon manghatindanghon “ai Ibana do Anak ni Debata”. hamamate ni Tuhan Jesus pataridahon taringot tu hasangapon-Na marhite angka namasa na mambahen longang rohanta. Manaon Tuhanta Jesus di hinahansit ni na tarsilang i, pola joujou tu Debata AmaNa marhite soara na gogo. Tung mansai hansit do dihilala Tuhan Jesus

Tagamon do lam martamba angka na paubahon roha songon induk ni soldadu nang angka na torop i dung diida ibana angka halongangan i? Partording ni hamamate ni Jesus marhite na masa angka halongangan ndang songon halak na somal diparsilangkon, gabe mambahen induk ni soldadu i mamuji Debata, jala didok ibana: tutu do, halak na tigor roha do on. Pandohan ni induk ni soldadu i patuduhon na so marsala Tuhan Jesus. Boasa dipuji induk ni soldadui Debata?  Ala dibereng ibana angka halongangan na masa tu Tuhan Jesus. Suang songoni ma nang hita ingkon unduk do mamuji Debata. Dung i marluhut ma sude na torop i huhut mainondur, masitompuk andorana marnida na masa i laos mulak ma. Masitompuk andorana, na marlapatan do i patuduhon panolsolion. Manolsoli angka dosana suang songoni ma nang hita tatopoti ma angka hahurangan dohot angka dosanta   ala ni dosanta do umbahen na tarsilang Ibana.  Ingkon tiruonta do panolsolion sisongoni i huhut mangido hasesaan ni dosanta. Jala unang be taulahi mardosa dompak donganta jolma nang dompak Debata.

Alani i, taauhon ma panghophopon ni Jesus i di ngolunta.  Diseahon Jesus do hosa-Na  bahen pardenganan di hita jolma pardosa maradophon Debata . Tongtong ma hita Marpangunsandean tu Ama i Songon Jesus na marpangunsandean tu Amai  disandok haporsuhonNa .Marhite hamamate ni Tuhan Jesus, patubuhon panindangion mai di hita, na tutu do Ibana Anak ni Debata jala partigor jala songon naung nibaritahon ni angka panurirang. Gabe sada pangarimangion ma dihita  paboa na diseahonJesus hosa-Na humonghop hita angka pardosa,  jala taargahonma i songon parsitutuonta di nasa haporseaonta.

Haporseaon si songon i do na naeng pagabasonta di tingki parningotan di ari hamamate ni Tuhanta Jesuson .Di partingkian si songon on naeng ma tapasolhot dirinta tu toru ni silang ni Tuhanta i , pasahathon alualu manang anggunganggukta, alai naeng diuduti dohot disimpuli marhite pos ni roha di Debata na tuk palua hita sian parungkilon i. Pandohan ni Tuhan Jesus na mandok, tu bagasan tanganMu ma hupasahat tondingKu mamanghulingi hita dipartingkian ni pandemic covid-19 on.Asa tapasahat ngolunta tu Debata Ama Parasirohai,  Manaon do hita satongkin siala covid-19 on dohot siala ni na asing i di ngolu on, na mambahen hita ndang margogo mangadopisa. Dipartingkian si songon i dijouhon tu hita. Marsihohot so mubauba songon Tuhanta i Amen

 

 

MARKUS 16:9-18 KUASA KEBANGKITAN YESUS

 

Kuasa Kebangkitan Yesus

Markus 16:9-18

Saudara-i yang terkasih Dalam nama Tuhan Yesus, Paskah  kita peringati sebagai tanda Yesus menyatakan kuasaNya mengalahkan dosa dan memberikan jalan keselamatan bagi manusia yang percaya. Kebangkitan Yesus menjadi inti iman Kristen, Untuk memahami hal ini, kita harus mengandalkan pentingnya kerendahan hati. Yang menolong kita untuk mengerti bahwa Allah turut menyatakan kehendak dan kuasaNya dalam rangka keselamatan manusia.

Markus 16:9-18 merupakan bagian yang menceritakan peristiwa penting pasca kematian Yesus. Seperti apa yang telah dinubuatkan, bahwa Yesus dibangkitkan tiga hari setelah kematianNya. Pada waktu itu tiba, pertama sekali Yesus menampakkan diriNya kepada perempuan-perempuan yang datang ke kubur dan berpesan, agar mereka menyampaikan hal ini kepada murid lainnya. Ke Galilea mereka harus pergi, karena di sana Yesus akan menemui mereka . Beberapa kali Yesus juga menampakkan diri kepada para murid agar menjadi kesaksian pemberitaan bagi banyak orang. Yesus meneguhkan hati mereka yang saat itu dirudung ketakutan dan gentar.

Menjadi saksi tentunya bukan perkara mudah. Karena seorang saksi haruslah mampu meyakinkan orang lain atas apa yang dilihatnya, didengar atau dirasakannya. Menyampaikan bahwa pesan itu benar adanya. Tentunya dalam posisi ini, Maria Magdalena, murid perempuan lainnya yang ikut datang ke kubur Yesus, dua murid dalam perjalanan ke Emaus yang menyaksikan kebangkitan Yesus, mengalami dilema yang sama. Ditengah perkabungan dan duka atas kematian Yesus yang baru beberapa hari, mereka dikagetkan dengan apa yang dilihatnya (Bdk Yoh 20:1-10).

Lalu apa yang menjadi pergumulan orang percaya saat ini dalam mengingat kembali peristiwa kebangkitan Yesus? Tentunya tidak mau memiliki kedegilan hati. Dimana kehidupan kita tidak mau melihat dan merasakan kuasa Tuhan yang sesungguhnya. Banyak orang mengaku percaya, hidup dekat dengan Tuhan, melayani Tuhan, bercakap-cakap tentang Tuhan, malahan memiliki hati yang keras dan tertutup tanpa mengalami kuasa Tuhan, seperti para murid. Agak sulit diterima mengapa malah para murid yang dekat dan selalu turut pelayanan Yesus menerima celaan atas ketidak percayaan. Oleh sebab itu dalam paskah ini, kita yang mengaku percaya haruslah benar-benar mengalami kuasa Tuhan, diawali pengertian bahwa :

1. Kuasa kebangkitan Yesus mengubahkan hati

Kuasa Roh Kudus menolong kita mengerti arti kebangkitanNya. Seperti apa yang dialami para murid Yesus, mungkin iman kita pun kadang goyah atau terlalu dangkal untuk melihat kemahakuasaan Allah dalam karya keselamatan Yesus. Kuasa inilah yang akan membukakan kedegilan hati yang awalnya tidak percaya, takut, ragu menjalani hidup menjadi semakin mengalami (merasakan kehadiran) Tuhan itu sendiri.

Kuasa ini diterima sebagai pemberian Tuhan saat kita mau mendengar, mempelajari dan merenungkan Firman Tuhan dengan sungguh. Setiap orang yang mau, baginya akan diberikan ‘hati yang baru’. Ada pengertian, sukacita, kedamaian walaupun saat ini kita masih menantikan janji Tuhan dinyatakan, dalam penantian itu tidak ada lagi kecemasan, ragu, takut dan bimbang dalam menjalani kehidupan. Berikanlah hati kita untuk menyaksikan sendiri, bagaimana Tuhan membuktikan Dia Allah yang berkuasa diatas segalanya, termasuk untuk mengubah hati manusia. Tidak perlu repot-repot selalu menilai keberadaan hati orang lain, namun mulailah dulu dari diri sendiri. Merasakan bahwa pengenalan akan Tuhan memberi energi baru dalam pertumbuhan iman.

2. Kuasa kebangkitan Yesus membuatku turut bersaksi

Tidak mudah memberitakan sesuatu tanpa mengalami atau menyaksikannya sendiri. Namun berbicara tentang berita kebangkitan Yesus, seorang menjadi percaya, tidak selalu harus melihat langsung (seperti kesempatan spesial yang dimiliki para murid). Saat ini kuasaNya masih dapat kita rasakan karena tidak terbatas zaman. Kuasa Yesus pun memberikan pengertian untuk tahu apa yang dilakukan dalam memberitakannya sekalipun tidak melihatnya. Karena kuasa Allah  memiliki otoritas dalam hidup manusia yang bukan sekedar memberi perintah tapi juga membekali kita untuk bertindak dan melakukan.

Kita Harus bersaksi tentang kebangkitan Yesus . Kesaksian yang paling menyentuh, Adalah saat orang lain dapat merasakan kebenaran melalui sikap hidup kita hari lepas hari. Mulai dari hal sederhana sekalipun.

Kesaksian akan kuasa Yesus intinya adalah menyatakan kebenaran Firman Tuhan dalam setiap kemampuan dan kesempatan hidup masing-masing. Cara bersaksi tidak harus selalu sama bagi setiap orang. Juga bukan berbicara tentang penilaian atas bagus atau tidaknya. Melainkan banyak tanda yang dapat disampaikan sesuai dengan panggilan masing-masing yang Tuhan berikan bagi kita. Berilah diri untuk selalu dipakai Tuhan dalam pelayanan yang mengubahkan, dimulai dari diri kita.  Setelah peristiwa Kebangkitan Yesus, kuasaNya tidak mengubah situasi yang ada tapi menjadi suatu kesempatan dan cara Tuhan mengubah diri kita

KebangkitanNya dari kematian menjadi bukti paling kuat bahwa maut pun mampu dikalahkan-Nya.  Karena itu, jangan meragukanNya. Pergilah, beritakan kabar keselamatan itu kepada semua orang! Amin.

 

 

 

 

DISEAHON JESUS DO HOSANA LUKAS 23:44-48

 

BAHAN SERMON HKBP RESSORT KISARAN

Jumat, 26 Maret 2021

 

DISEAHON JESUS DO HOSANA

Ev. Lukas 23:44-48

I.                   Patujolo

Parmingguon di Parningotan ni ari hamamate ni Tuhan Jesus manogihon hita asa bongot tu bagasan penghayatan jala perenungan na mansai bagas taringot tu pangalehonon diriNa asa gabe pardengganan hita jolma pardosa maradophon Debata na badia. Ingkon do boluson ni Tuhan Jesus angka haporsuhon i asa gabe panesaan ni dosanta maradophon Debata na badia. Angkup nii, gabe perenungan ma dihita topik minggu na mandok diseahon Jesus do hosa-Na. Ndung diseahon Jesus hosa-Na lam mananda ma hita tu Ibana. Ndung diseahon Jesus hosa-Na gabe tubu ma di bagasan rohanta parsitutuonta manghatindanghon “ai Ibana do Anak ni Debata”. Di na parjolo i, ditulak portibion do Ibana di nasa hata dohot panindangion-Na taringot Anak na sian Debata. Ndung diseahon Jesus hosa-Na, tung i ma balga ni panolsolion ni roha ni jolma i na marsitutuhon, Ibana do Anak ni Debata.

II.                Hatorangan Ni Turpuk

Ay. 44-45, hamamate ni Tuhan Jesus pataridahon taringot tu hamuliaon-Na marhite angka kejadian na mambahen longang roha. Tanda na parjolo mambahen longang roha ima songgop ma na holom di sandok tano on. Adong tafsiran na mandok ia haholomon na songgop i ma songon gerhana mata ni ari. Masa do anggo i topet di parsitongaan ari sahat ro di pungkul tolu, jala mangholom ma hajanghajang na di hunghupi awan mendung. Na paduahon ima maribak hirehire na di bagas joro i, bola dua. Ndada holan dompak ginjang hita marnida ia angka langit pe paboahon hasangapon ni Kristus, alai parsidohot do joro ni Debata. Dua inganan on gabe symbol parmianan hasangapon ni Jahowa, ala nii dung dipaporsukporsuk Anak ni Debata tung parsidohot do dua inganan i paboahon haporsuhon-Na i. Maribak hirehire bagas joro paboahon naso adong be batas panirang halak Jahudi dohot halak na so Jahudi, dohot nasa na so hatamaanta diadopan ni Debata. Marhite ribak ni hirehire joro ni Debata paboahon tu hita, marhite diseahon Tuhan Jesus hosa-Na, na boi do hita ru tu Jahowa di bagasan asi ni roha-Na marhitehite hamauliateon dohot olopolop.

Ay. 46, hamamate ni Tuhan Jesus tabege do disuarahon barita na uli marhite hata-Na na mandok,” Amang! Tu bagasan tanganMu ma hupasahat tondingKu! Jadi dung didok i, tos ma hosaNa” (ay. 46). Dibuat Tuhan Jesus do pandohan on sian ompu-Na (leluhur), si David (Psalmen 31:6). Marhite on mandok, panindangion ompuNa i, ima panindangion taringot tu tondi ni Kristus do. Ai hata ni badia i do na ruar sian pamangan-Na di parujung ni ngolu ni Jesus. Dijou Tuhan Jesus do AmaNa songon Amang ala parsorion-Na songon na ditadinghon. Alai nang marhite panjouon i naeng paboahon na naeng marujung nama haporsuhon na nihilala ni Jesus alana dijou Debata songon Amang. Marhite pandohan ni Tuhan Jesus di na sumeahon hosa-Na i paboahon tu hita na Ibana do Parhitean. Nunga dilehon Ibana hosa-Na bahen pelean pardengganan/panobusion di Debata (Jes. 53:10) jala mangalehon hosa-Na bahen tobus ni torop jolma (Mat. 20:28) laos dipelehon do diri-Na na so marlindang i tu Debata, marhitehite Tondi na manongtong i (Heb. 9:14). Nunga digarar nasa utang ni dosanta marhitehite mudar-Na na rade Jesus sumeahon diriNa bahen haluaon di hita. Marhite pandohan ni Tuhan Jesus taida boha do Jesus marpangunsandean tu Ama i na pangoluhon Ibana sian hamatean i.

Ay. 47-48, Ndung diseahon Jesus hosa-Na, tung torop do angka jolma longang mangida Ibana jala ro di roha ni jolma panindangion na imbaru taringot tu Jesus. Pola didok nasida, “dipuji ma Debata, ninna ma: Tutu do, halak na tigor roha do On! (ay. 47) ima songon panindangion ni letnan i. Nang natorop i  pe marsitutuhon angka na masa i. Taida do i marhite pandohan, jadi sude natorop i, na marluhut mainondur, masitompuk andorana, marnida na masa i, laos mulak ma. (ay. 48). On ma pambahenan ni Debata na patuduhon hamuliaonNa laho pasangaphon Anak i paboahon na so marsala do Jesus di nasa pambahenan nasida i. Di ayat on, tung mansai menyesal do nasida di hamatean ni Tuhan Jesus. Tutu na so marsala do Ibana. Halak na tigor do na niuhuman nasida.      Penyaksian mereka penuh dengan penyesalan dan penyesalan itu membuahkan sikap baru dan kesaksian baru tentang Dia.

III.             Hahonaan Tu Jamita

1.      Diseahon Jesus do hosa-Na asa bahen pardenganan hita jolma pardosa maradophon Debata na badia

2.      Marpangunsandean tu Ama i do Jesus disandok haporsuhonNa

3.      Marhite hamamate ni Tuhan Jesus, patubuhon panindangion, na tutu do Ibana Anak ni Debata jala partigor jala songon naung nibaritahon barita angka panurirang.

4.      Gabe sada penghayatan ma na disumeahon Jesus hosa-Na humonghop hita angka pardosa jala mangargahon i songon parsitutuonta di nasa haporseaonta.

PdPdt Albert J P Pasaribu STh

p

PSALMEN 31:8-16 MAROLOP OLOP ALA ASI NI ROHA NI DEBATA

 

SERMON HKBP RESSORT KISARAN

JAMITA MINGGU PALMARUM, 28 MARET 2021

TOPIK: MAROLOPOLOP ALA ASI NI ROHA NI DEBATA

(BERSORAKLAH AKAN KASIH SETIA TUHAN)

(PSALMEN 31:8-16)

I.             PATUJOLO

Psalmen 31 ima ende na marisihon tangiang mangido haluaon sian musu na pinasahat ni si David tu adopan ni Debata. Adong ma tolu bagian ni Psalmen 31 on, ima ay.2-9 marisihon tangiang haporseaon, ay.10-19 ima tangiang anggukangguk dohot pangidoan, ay.20-25 ima tangiang hamauliateon ni roha. Marhitehite isi ni Psalmen 31 on boi ma idaonta sada tangiang na marisihon alualu ni parpsalmen tu adopan ni Debata ala tongon mangadopi musuh (ay.5-9), sahat tu na marsahit ibana (ay.10-11) jala ditadinghon angka donganna ibana (ay.12-14). Songon ima parsorion na tongon songgop di ngolu ni parpsalmen manang si David ujui umbahen pola ro ibana tu adopan ni Debata pasahathon saluhut pangidoanna i.

II.           HATORANGAN

Songon jolma na mangolu di portibion, tontu ragam do na boi masa di bagasan ngolunta siganup ari. Las ni roha nang jut ni roha tontu marganti pasorin do boi ro di ngolunta. Boi doi ro sian dirinta sandiri, sisolhotta nang angka jolma na di humaliangta be. Boi do na denggan taula, alai gabe sisogo hita, jala di hasogohon angka jolma. Boi do jumpang pangalaho na so denggan sian humaliangta maradophon hita, hape na denggan do nataula. Ima na ginoaran ni angka musu. Molo di hasogohon angka na denggan na sintong na niula ni donganna, targoar musuh ma ibana disi. Ragam do parsorion na jumpang di ngolu ni David, sahat tu na bangkit ibana gabe raja gumomgom Israel. Sai sogo do roha ni si Saul, raja na ginantihonna i. Sai disangkapi si Saul do mangalele ibana sahat tu sumangkapi naeng mambuat hosana. Alai, saluhutna i dipasahat si David do tu Debata di bagasan tangiangna. Ndang na so boi baloshononna angka na jat na niula ni musuhna maradophon ibana, ala sahalak raja do ibana. Alai ndang diulahon ibana angka i. Debata do pangalualuanna jala haporusanna di tongatonga ni parsorion ni ngoluna. Marhitehite pengalaman ni raja David, ditogihon ma hita halak Kristen asa tongtong marhaporusan tu Debata, jala marolopolop manghatindanghon asi ni rohaNa i di bagasan ngolunta siganup ari.

a.  Asi ni roha ni Debata do na paluahon hita sian tangan ni musuh (ay.8-9)

Dihatindanghon parpsalmen do las ni rohana marhitehite na marolopolop ibana ala asi ni roha ni Debata naung paluahon ibana sian pardangolan, hagogotan dohot huaso ni musuna. Ndang tarpatudos hita huaso ni Debata tu huaso ni jolma di portibion. Ai Debata do nampuna harajaon, hagogoon ro di hasangapon ro di saleleng ni lelengna. Songon dia pe usaha dibaen jolma laho menandingi huaso ni Debata, ndang tuk ibana mangulahon i. Ditatap Debata do angka naposoNa, angka na marhaporusan tu ibana. Asi do roha ni Debata mida jolma na so mangulaho hasalaan manang dosa. Tuhan membela hak orang percaya dan orang benar. Tangkas doi dihatindanghon parpsalmen di bagasan tangiangna on. Songon dia pe godang ni musu ro manahopi ibana, na so talu ibana molo Debata do donganna. Molo Debata donganta ise ma alonta? Onpe, aha ma dohononta disi? Molo Debata donganta, ise ma alonta? (Rom 8:31). Jahowa do marporang humophop hamu, asal hohom hamu (2 Musa 14:14). Na marlapatan, sai di jolonta do Debata manghohop hita sian angka musunta na naeng mangago hita.

b. Asi ni roha ni Debata do na paluahon hita sian parsahiton (ay.10-11)

          Adong do pandohan na mandok: molo parsahiton, ima dongan ni nasa jolma na mangolu do i saleleng di portibion. Na marlapatan, sai olo do jumpang parsahiton di sasahalak jolma di sada tingki di ngoluna. Na patuduhon, jolma na gale do hita di pamatangta on. Ragam cara dipatupa jolma laho manjagahon hahipasonna, alai olo do songgop parsahiton di sada tingki. Di bagasan turpuk on, pola gabe marsahit, manang gale pamatang ni parpsalmen ala na mamingkiri na masa di bagasan ngoluna. Pola maras roha nang dagingna, jala gale nang holiholina. Olo do tutu jumpang parsahiton di hita, ala ni godang sipingkiran, hamaolon, parsorion di hita. Alai naeng ma songon si David hita di bagasan turpuk on, na pasahathon saluhut holso ni rohana nang parsahitonna tu Debata. Asa Debata sambing ma na paluahon hita sian ragam ni parsahiton na songgop di pamatangta on.

c.  Asi ni roha ni Debata do na mandongani hita. Mandao pe angka dongan, Tuhan i tongtong donganta (ay.12-14).

          Digombarhon parpsalmen do situasi na masa tu dirina. Pola do dipasiding ibana sian parpunguan dongan hombar hundulna, nunga pola diambolongkon ibana jala dihusiphusip torop halak naeng mambuat hosana. Songon ima borat ni parsoriton na niadopanna. Pola disangkapi jolma naeng mambuat hosana. Boi do tapatudos turpuk on tu situasi ni Jesus na mangadopi sitaonon na borat andorang so diparsilanghon Ibana. Sude do jolma mandao, dohot do nang angka siseanNa manadingkhon Ibana. Doshon dorbia naeng potongon ma Jesus diboan tu jolo ni si Pilatus, asa diparsilanghon Ibana. Alai margogo do Ibana mangadopi saluhutna i. Alani haunduhon dohot pangoloionNa di Ama i. Songon ima gombaran di ngoluon. Molo jumpang hit alas ni roha, manjonok do sude angka dongan. Alai molo taadopi ragam ni parsorion di bagasan ngolunta, olo do mandao angka donganta. Jadi, ise do alealenta na so olo muba i? Aleale na sumurung ima Tuhan Jesus i… (BE. 219). Holan Ibana do na so olo manadinghon hita, sasada hita mangadopi angka sitaonon di bagasan ngolunta on.

d. Marhaposan tu Jahowa ma hita, ai Ibana do Debatanta (ay.15-16)

Dijouhon do hita asa marhaposan tu Debata, unang tu pingkiran dohot gogonta sandiri manang dongan jolma. Parsatongkinan do ia hagogoon di portibion. Alai molo hagogoon ni Debata ro di saleleng ni lelengna do. Ibana do na tuk paluahon hita sian parsorionta. Sian pardangolanta ala ni dosanta. Nunga tajalo be haluaon i, holan ala asi ni rohaNa. Naeng ma tahamauliatehon marhitehite haporseaon dohot hamubaon ni rohanta di pangalahonta siapari. Marolopolop ma hita tongtong mamuji asi ni rohaNa naung binasabasahonNa i tu hita. Amen.                   

Cal Pdt Frans Julu Sianturi STh

HKBP SENTANG

MARKUS 16:9-18 HUASO HAHEHEON NI JESUS ( PASKAH I )

 

BAHAN SERMON       :         MARKUS 16:9-18

MINGGU                 :    PASKAH   I

TOPIK                     :    HUASO HAHEHEON NI JESUS

 

 

Patujolo

Marhite panghatindangion ni angka Bapak Gereja na parjolo, dipaboa do ia na manurat Evanggelium Markus ima si Markus , naposo ni apostel Petrus (patudos Ulaon Apostel 12:12, 25; 15:37-39). Tongon dibagasan hamaolon do huria na parjolo i di toru ni panggomgomion ni Kaisar Nero. Godang do na marsiak bagi sahat tu na mate martir. Alani i do tarjou panurat Evangelium Markus laho menurathon taringot tu Jesus naung tinandana i. Disurat si Markus evanggelium on songon antisipasi jala alus ni parmahanion ditingki hamaolon i asa tongtong togu haporseaon ni angka na porsea di Kristus. Marhite evangelium on dipatandahon si Markus do Jesus songon Anak ni Debata jala Mesias, jala naposo ni Debata na mangadopi angka hamaolon dohot siak ni bagi , dibolonghon angka sintua dohot malim dohot sibotosurat, pusaonna sahat tu na mate tarsilang, dungi mulak mangolu do di ari patoluhon (8:31). 

Di bindu 16 dibaritahon do tingki parpudi ngolu ni Jesus di portibi on, I ma barita taringot tu hamamate dohot haheheon ni Jesus nang hahihinsatNa tu banua ginjang.

 

Hatorangan ni Turpuk

 

Adong dua bagian na dibaritahon di bindu 16 on, ima : haroro ni angka boruboru tu tanoman ni Jesus dung salpu ari Sabbat jala barita taringot tu haheheon ni Jesus (16:1-8);  dipataridahon Jesus diriNa tu angka boruboru dohot angka siseanNya dungi manaek tu surgo (16:9-20).

 

Di ayat 9-14, taida do dipajojor panurat Markus secara singkat barita na dipataridahon Jesus diriNa , parjolo maiI tu angka parompuan na tongtong  paihutihut Jesus di tingki mangadopi angka sitaononNa sahat tu na mate Ibana. Maria Magdalena, tu ibana do parjolo sahali Jesus pataridahon diriNa dung hehe Ibana sian na mate. Sipata ro do sungkunsungkun tu hita boasa ma si Maria Magdalena na dilehon Debata prioritas gabe tu ibana Jesus pataridahon diriNa na parjolo sahali. Di ayat 9b di dok : sian i do dipabali na jolo pitu sibolis (Luk 8:2). Pandohan on ndang naeng patandahon si Maria be, alai lobi sian i, sian pandohan i naeng pataridahon sada tanda paboa na marhuaso do Jesus maradophon angka sibolis. Marhite haheheon ni Jesus lam tarida ma na so margogo huaso ni sibolis laho manundati angka sangkap ni Jahowa. Jala di tongatonga angka si ihuthon Jesus hadirion ni si Maria Magdalena boi gabe tanda hamonangan ni Jesus maralohon angka sibolis. Si Maria do na dipaborhat Jesus gabe sitindangi na parjolo taringot tu haheheon ni Jesus.

 

Ay. 10-11, Dipaboaboahon si Maria ma i tu angka na mandongani Jesus na jolo. Tingki na dibagasan arsak ni roha jala tumatangis nasida. Boi do on songon tanda ni lungun ni roha nasida ala tung mansai balga holong ni roha nasida tu Jesus. Tung marhabot ni roha nasida di hamamate ni Jesus. Alai tingki dipaboa si Maria Magdalena naung hehe Jesus jala nunga diida ibana, ndang porsea nasida. Holong do roha nasida di Jesus jala tung mansa bagas do arsak ni roha nasida, alai ndang porsea nasida di haheheon ni Jesus. 

 

Ay. 12-13, Dungi dipataridahon Jesus muse diriNa tu dua halak sian nasida. Dua halak on sai dipatudos do tu halak na laho marhuta sada tu Emaus, na dipataridahon Jesus diriNa marrupahon rupa na asing (Luk 24:13-35). Marrupahon rupa na asing dison ndang incognito, ndang gabe ganti rupa ni Jesus disi, alai ala na marsillam jala gok hamuliaon bohi ni Jesus, gabe ndang ditanda nasida (pat. 9:2-4), jala di Luk 24:16 didok ala pagalelaon matanasida. Alai dung dibuha Jesus matanasida ditanda ma Jesus naung hehe i. las ma roha nasida .Dung mulak nasida dohot ma nasida mamaritahon haheheon ni Jesus, alai ndang porsea angka sisean i .  Memang di sada sisi molo pintor hatop do nasida porsea, boi do gabe ndang arga barita i di angka na asing, alani i ingkon yakin situtu do nasida asa dijalo jala dibaritahon naung hehe Jesus.

 

Ay. 14. Songon dia do respon ni angka sisean ni Jesus dung dibege nasida barita haheheon ni Jesus ? Ndang persea angka sisean I dibarita na pinaboa si Maria Magdalena dohot dua halak sisean i, gabe dipataridahon Jesus ma diriNa tu angka sisean na sampulu sada i. Jala dipinsang Jesus ma ganggu  dohot jogal ni roha angka sisean i. Tontu pangalaho sisongon on ndang holan masa I di angka sisean na parjolo I, sahat tu hita saonari pe sai jotjot do roha ganggu dohot jogal adong di hita. Godang do halak na maol  manghaporseai Jesus ala hurang angka objek manang bukti na boi diida ni parnidaan (mata), ganggu roha jala dipajogal rohana gabe ndang dihaporseai angka na dipatupa Jesus i.  Sasintong na molo marnida hubungan ni angka sisean dohot Jesus na tung mansai jonok  mustahil do ndang persea nasida di barita haheheon ni Jesus, ala nunga dipaboa Jesus tu angka sisean i.  Jadi jogal dohot ganggu ni roha na adong ditongatonga ni angka sisean adong ala persepsi taringot tu model mesias na dipaimaima nasida, i ma mesias na marhuaso secara politk jala mampu manaluhon angka musumusu Israel secara politik jala pajongjonghon sada bangso na makmur jala dame. On ma na so diantusi angka sisean i, alai antusan nasida ma muse.

 

Ay. 15-16, Dung tangkas dipataridahon Jesus diriNa tu angka siseanNa, nunga tingkina dipasahatma Jesus ma parsuruan i tu nasida, laho manjamitahon Barita Nauli tu nasa na tinompa. Ingkon dibege portibi on (nasa na tinompa) barita taringot tu haroro ni Jesus, hamateanNa, jala haheheonNa. Ingkon sude portibi (kosmos) jala sude na tinompa mambege Barita Nauli i.  Jala dilehon do tu nasida huaso laho patupahon angka tanda halongangan. Saonari boha do angka siihuthon Kristus mangalapati na so holan tu jolma manisia dijamitahon Barita Nauli I, alai tu sude na tinompa. Molo taida saonari, ekploitasi alam/lingkungan secara tidak bertanggungjawab, pembakaran hutan, pembuangan limbah beracun dohot angka na asing , sasintongna sude na i pataridahon tu hita na so sahat hape Barita Nauli i tu sude angka na tinompa, ndang singkop dope parsuruan ni Jesus i taulahon. Na porsea jala tardidi dapotan haluan; alai na so porsea hona uhum do. Pilihan adong di jolma i do, porsea (sian roha dohot pamangan, gabe olo dididi) manang ndang porsea, haluaon manang uhum. 

 

Ay. 17-18, Ingkon marhite haporseaon do angka sisean laho paboahon Barita Nauli i , ai holan tu halak na porsea do mangihut angka tanda : pabalihon sibolis marhite goar ni Jesus, manghatahon hata naimbaru, manjomput ulok, ndang mahua nang pe naung diinum rasun hamatean, mangampehon tangan tu angka na marsahit gabe malum dihilala. Pandokhan hata ‘mangihut’ na marlapatan songon halak na di tongatonga pardalanan (menyertai) laho mambaritahon Barita Nauli i. jadi na naeng dohononna di sini ingkon adong pergerakan, adong tindakan , ndang so. Molo adong tindakan, bergerak torus laho mambaritahon Barita Nauli i, disi ma mengihut angka tanda naung dipajojor i. Haporseaon do na manubuhon angka tanda i, holan tu angka halak na porsea do dilehon Jesus huaso laho patupahon angka tanda i.

Ay. 19-20 , dison ditaringoti taringot tu hahihinsat ni Jesus tu banua ginjang. Tontu ndang torus Jesus holan pataridahon diriNa tu angka jolma, ingkon manaik do Ibana tu banua ginjang, jala mulak Ibana laho hundul tu siamun ni Amana. Dung dipasahat Jesus angka na porlu dipasahat tu angka sisean tarhinsat ma Ibana diholipi angka ombun. (Ul. 1:9) di bagasan hamuliaonNa.  Molo diida sian ulaon ni Jesus di portibi on, dung manaek Ibana tu banua ginjang jala hundul di siamun ni Amana marlapatan nunga sun be ulaonNa di portibi on. Alai molo taida tu angka sisean, hahinsat ni Jesus, paboahon na baru dimulai dope ulaon ni angka sisean laho mambaritahon Barita Nauli. Jala ulaon i do na ditorushon angka na porsea (gereja) sahat tu ajal ni tano on jala mangula do Jesus rap dohot angka na porsea i marhite tondiNa sahat tu ujung ni tano on.

 

Impola tu Jamita

1.        Porsea di haheheon ni Jesus. Godang do halak na so porsea di barita haheheon ni Jesus. Ndang holan ditingkinta sisaonari, alai di angka sisean na parjolo i pe masa do i. Sanga do gagal angka sisean i mananda Jesus naung hehe I, siala ganggu dohot jogal ni rohanasida mampartahanhon angka prinsip-prinsip pribadi, gabe ndang diingot  bahkan ndang porsea di sude angka hata ondeng naung pinaboahon Jesus tu nasida andong so mate dope Jesus. Ganggu ni roha nasida nungnga songop dung diida nasida Jesus diboan angka sordadu jala dipasiaksiak manaon angka na bernit i. Piga hali disurat si Markus ‘ndang porsea’ angka sisean i di Barita haheheon ni Jesus. Tutu maol do manghaporseai angka na so tuk pikirannta. Alai persoalannya adong do na mampu manghaporseai i. si Maria Magdalena, disi dipataridahon Jesus diriNa tu ibana, pintor didompakkon do manjou “Ale Guru” (Joh. 21:16). Porsea di haheheon ni Jesus sasintong na i do inti ni sude haporseaon ni Kristen ( premisse), dasor ni sude haporseaon ni halak Kristen. Apostel Paulus mandok : “Alai anggo so hehe Kristus sian angka na mate , rumar ma jamitanami laos rumar ma nang haporseaonmuna” (1 Kor 15:14). Ndang adong lapatanna tajaha Bibelta i, jala ndang adong lapatannya marhaporseaon hita molo ndang hehe Kristus. Asa haheheon ni Jesus sada peristiwa na tung mansai bolon do i, mangolu do Debata na tahaporseai jala diuluhon do nang ngolunta sahat tu sadarion marhite Tondi Porbadia.

2.        Huaso Haheheon na mamboan hamubaon. Dimula na i ndang ditanda jala ndang dihaporseai angka sisean naung hehe Jesus. Ndang dihaporsea barita na diboan si Maria Magdalena dohot sisean na dua i, alar o ma Jesus dipataridahon ma diriNa, jala maminsang jogal ni rohanasida jala pahothon rohanasida muse marhite na pasahathon ulaon parbarita nauli, jala ditiop nasida do bagabaga/janji naung dilehon Jesus tu nasida, na donganan ni Jesus do angka sisean i, sahat ro di salelenglelengna (Mat 28:19-20). Ndang mabiar jala tahutan be angka sisean i laho paboahon barita nauli i sahat tu ujung ni portibi on. Antong boha do hita ditingkinta saonari laho mamboan barita haheheon ni Kristus asa marhamubaon ni roha angka jolma gabe ro manghaporsea Jesus na mangolu jala na hehe i. Alai ndada holan i, boha do barita taringot tu huaso haheheon ni Jesus boi mangalehon sada panghirimon na mangolu di angka dongan na dibagasan pandelean. Jala boha do huaso haheheon ni Jesus na tataringoti saonari boi mangurupi hita angka na porsea laho mangalapati angka na masa di tingkinta sisaonari, terlumobi ma situasi pandemic on. Asa unang tapajongal be rohanta, alai asa tapangasahon ma huaso haheheon n Jesus laho paheheon haporseaonta jala haporseaon ni angka dongata asa boi hita bertahan disituasi na maol apala ditingki on.

3.        Huaso haheheon ni Kristus pahehehon semangat zending nang di hita angka na porsea. Ditingkinya sisaonari nunga lam moru angka halak na olo laho mambaritahon Barita Nauli tu ujung ni portibion. Gari ada tahe lam sumurut do perkembangan hakritenon nang di angka negara-negara na lam tu majuna. Lam moru do angka na porsea tu Kristus. Alani  boha ma marhite haheheon ni Kristus na tapestahon saonari lam paheheon angka semangat zending laho mamboan mulak muse angka naung maninggalhon Kristus. Mungkin do i taulahon jala olo do hita mangulahon i? Gabe perenungan ma i di hita dina tapestahon hari Paskah di tingki on. Tuhanta ma na mamargogoihon hita. Amin

 

 

 

Diakones Leo Ester Sihombing

JAMITA MINGGU PALMARUM 28 MARET 2021 PSALMEN 31:8-16

                          MAROLOP OLOP ALA ASI NI ROHA NI DEBATA

Psalmen 31:8-16

Dibagasan hasosahon do si Daud mansoarahon nasa parungkilon na tu Debata, gok parsorionna sungkot ni na hansit, na bernit jala siak ni bagi, alai las dibagasan ni i ido dapot ibana haluaon sian ni na hinaporseaanna jala marolop olop ibana ala asi ni roha ni Debata.  Tongon dibagasan na tarsosak ibana alai haporseaonna mandok ingkon sai tongtong marhaposan tu Jahowa ibana, diparhatopot parpesalmeni do paboa asi ni roha ni Debata do na tuk paluahon ibana sian hasosahan i. Debata paluahon, Debata manatap Debata do nammboto saluhut angka namasa di ngoluna.

Diparhotopot si Daud do paboa ndang loason ni Debata angka musuna laho mangagohon hosanna, alani ndang lomos rohana ido umbahen na didok “Alai anggo ahu, tu Ho do ahu marhaposan, ale Jahowa ningku do * Ho do Debatangku” pandohanon patuduhon sada panindangion na luar biasa paboa holan Debata do haposanna, holan Debata do pangalualuanna. Diparhatutu si Daud do ia ngoluna saguru di Debata do “Marguru tu tanganmu do parsoriongki” Debata do mangurupi ibana di sude angka parsorionna.

Pangalaho na pinatuduhon ni Parpesalmen on paingothon hita asa tongtong pasahathon dirinta tu Debata, ndang adong na boi tarpangasahon hita di ngoluntaon so dungkon asi ni roha ni Debata. Di tingki hita mangadopi godang angka parungkilon sitaonon dohot angka pergumulan, parsahiton dingolunta na boi mambahen hita gale jala mandate. Boi do dipasiding angka dongan hita , mandao sude sian hita, alai anggo Debata dibagasan holong ni rohaNa na mamolini, di dulo, di parmudu do hita jala di tongos do asi ni roahaNa laho paluahon hita.

Mamongoti Minggu Palmarum ( Maremare ) Manungguli rohanta di habobongot ni Jesus tu Jerusalem na marolopolop nasida mansoarahon “Hosianna”,. Taida ma tangkas  na marsitaonon do Jesus holan laho paluahon hita sian hadosaon. Nunga di Dulo Tuhan  hita, olo do Ibana marsitaonon di hau pinarsilang laho manobus hita. Nunga ro Tuhan i laho manuhuk sude angka dosa, sitaononta gabe sada olop olop na mansi tangkas mai di hita, holan marhite asi ni rohaNai marolop olop hita. Asa marhite Psalmen 31 di Minggu Palmarum on di arahon do hita laho mangarimangi parsihohoton haporseaon ni parpesalmen i. na patuduhon di sude angka sitaonon ni parpeslamen i tongtong do Debata mangula, manatap sitaonon ni parpeslmeni. Laos songoni ma nang hita, aha pe namasa di tongatonga ni ngoluntaon tongtong do disarihon, diramoti jala di parmudu Debata hita “ Songon nidok ni Endenta “ Manang aha pe namasa las ni roha arsak pe tioponku Ho na basa na marholong rohai” . Dipardalanan ni ngolunta on sai tongtong ma taparatopot jala taokuhon holong dohot denggan basa ni Debata marhite Mandok “ Marolopolop do ngolu dohot tondingku ganup ari, ala Asi ni roha ni Debata” Amen

ACARA IBADAH RAPAT HURIA HKBP KISARAN KOTA

 

Ibadah Pamuhai Rapot  Huria HKBP Kisaran Kota

Jumat, 26 Februari 2021

========================================================

Niuluhon ni                             : Pdt Albert J Pasaribu STh

Tangiang Pangondianon        : Diak M Br Hutagaol, M.Pd

 

     1. Prelidum: Martangiang  na hohom dibagasan roha

     2. Jaoujou tu Parsaoran

U: Horas ma di hita saluhutna dibagasan tingki on!

H: Horas ma tutu di hita saluhutna

U: Mauliate ma tadok tu Debata Pardenggan Basa i, ala denggan ni basaNa sambing do na pataruhon hita tu inganan on, tu Rapot Huria HKBP Kisaran Kota di tingki on. Antong, Dibagasan serep dohot unduk ni roha tu Debata tahalashon ma parsaoranta di tongatonga ni punguanta.

H: Hupuji hami ma Ho Tuhan, ai denggan ni basaM sambing do na padomuhon hami, umbahen na boi hami marsaor di tingki on.

U: Dijou Debata do hita asa manghobasi di tongatonga ni huriaNa i. Antong, taparade ma ngolunta manjalo gogo dohot habisuhon sian Debata. Tapuji jala tapasangap ma Ibana, marende hita.

      3.  Marende  BE. No. 14:1+2            ”Puji hamu”

Ø Puji hamu Jahowa tutu pardenggan basa, parasiroha salelenglelengna i. Pardenggan basa i, parasiroha i.              (jongjong)       

Ø Ingot tongtong ale tondingkon sudena denggan na pinasonggop Debata tu ho denggan basaNa do, na pangoluhon ho.

 

     4.  Votum Introitus/Invocatio

U:  Marhitehite Goar Ni Debata Ama, dohot Goar ni Anakna Tuhan Jesus Kristus, dohot goar ni Tondi Parbadia na tumompa langit dohot tano on.

H:  Amen

U:  “ Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue!” ninna Tuhan Jesus Kristus. Alani borhat ma hamu mamaritahon Hata i.

H:   Mauliate ma Tuhan, dipamillitonMi di hami. Dison do ahu, suru ma ahu!

U:   Di jolo ni angka ari on, pagomos hamu ma tanganmuna. Ai bahenonKu ma hamu gabe pasupasu tu saluhut bangso, asa gabe bangsongKu nasida, jala Ahu gabe Debata nasida. Songon hamu dibagasan Ahu, songoni ma nang nasida dibagasan Ahu.

H:   Mauliate ma Tuhan, dipamillitonMi di hami. Dison do ahu, suru ma ahu!

U:   Puji hamu ma Jahowa, baritahon hamu ma Goarna i, pabotohon hamu ma di tongatonga ni angka bangso angka pambahenanNa i!

       Haleluya.Martangiang ma hita! Ale Tuhan Debata, Ama na marasiroha! Hudok hami mauliate tu Ho, sian nasa rohanami, ala dijou hami sian haholomon tu hatiuron, marhitehite AnakMu Tuhan Jesus Kristus. Sai dirajai tondiM na badia i ma hami, asa lam ganda haporseaonnami, jala asa lam badia parangenami, unang marlindang binahen ni portibi on. Nunga dipapungu Ho hami sian ganup Lunggu panghobasion nami di HKBP Kisaran Kota on, laho patupahon Rapot Huria manghatai Program dohot anggaran ni huriaM tu taon 2021 on. Antong sai dongani jala parbisuhi ma hami, asa margogo hami laho pahembangkon panghobasionnami. Pos do rohanami, lehononMu dame dohot holong ni roha di parrapotonnami, asa marlas ni roha saluhutna mamuji pasangaphon Ho jala marsangap ma goarMu na badia i. Ale Tuhan pasaut ma bagabagaMi, tangihon ma pangidoannami, marhitehite AnakMu, Tuhan Jesus Kristus, Tuhannami.  Amen.   (hundul)   

5. Marende: BE No. 727 : 1  “Hupillit Asa Marparbue”

Ø Songon on didok Tuhanta Jesus: Ahu do na mamillit hamu, asa lao hamuna marparbue, jala mian parbuemuna i. Hupadiri asa lao marparbue, jala mian parbuemuna i. Hita na pinillit ni Tuhanta, ingot ma hata ni Tuhan i, parbuehon ma nasa na denggan, na hombar tu patik ni Tuhan i. Na tarjou do hita paimbaru diri, dibagasan Kristus Tuhanta i. Tasolsoli ma nasa dosanta, tapauba ma rohanta, tapelehon ma nasa dirinta, baen pelean na mangolu, na badia di Tuhanta, na hinalomohon ni Debata. Amen.

6. Manjaha Hata ni Debata ayat sijahaon manogot : Heber 2 : 14 - 18

U:  Asa songon dakdanak partohap di mudar dohot sibuk, gabe suman do dohot Ibana partohap disi, asa marhitehite hamatean i dipasohot Ibana sibolis i, na marhuaso mambahen mate.

H:   Asa dipalua sasude na pinarhatoban ni biar ni roha managam hamatean, saleleng mangolu.

U:   Ai apala angka surusuruan disarihon, pomparan ni Abraham i do.

H:   Ala ni i, ingkon gabe dos situtu Ibana tu angka anggiNa asa gabe parasiroha Ibana jala Sintua ni Malim haposan maradophon Debata, laho pasaehon angka dosa ni bangso i.

U:   Ai intap ni naung marrsitaonon Ibana di na tarunjun i, haurupan Ibana do angka na tarunjun i. Ima sahatna. Martua do angka na tumangihon hata ni Debata jala na umpeopsa. Amen.

 

     7. Marende BE. No. 504 : 1               Ditogu Tuhan Jesus Au 

Ø Ditogu Tuhan Jesus au, i do na mangapuli au. Di ganup dalan nang tung maol tanganNa do tongtong huhaol. Di togutogu Jesus au, tanganNa sai maniop au. tongtong ma siseanNa au, paima boi tu surgo lao.

     8. Tangiang Pangondianon   :

      9. Marende BE. No. 30 : 1                Jesus Lehon Hatorangan

Ø  Jesus lehon hatorangan, hapistaran mangantusi hataMi. Lehon mata na marnida dohot roha na umboto dalanMi. Asa tongtong maradophon bohiMi mardalan hami. Asa digomgomi TondiMi ma hami.

    10. Jamita :

    11. Marende BE. No. 512 : 1, 4          Di Dalani Jesus           (P. Pelean)

Ø  Didalani Jesus tano dohot laut Tahi holong ni rohaNa dipasaut. Na mura luhut dibaen TondiNa i, dung disesa utang ni dosanta i. Hahaanggi, rohamu sude, taarahon ma donganta be. Hahaanggi, dao nang jonok be! Hara tu jolo Na donganmu sude.

Ø  Ganggu roha mida pangunjunan i, moru pe gogonta lao marungkil i. Sai tabereng dompak Jesus Tuhan i, ganda hiras ni rohanta baenon nii. Hahaanggi,……

Ø  12. Laporan Panitia

     Sian asi dohot holong ni Tuhanta, nunga sahat hita tu inganan on. Hombar tu Aturan dohot Paraturan Huria Kristen Batak Protestan , tahirim do torop ni peserta Huria on ima:...........Halak. naung ro:.....Halak, jala na parmisi.....halak, na so ro:......halak. Torop ni peserta naung ro dohot na parmisi ima:.....halak (.....%), sian jumlah peserta naung ro, nunga manggohi quorum.

 

     13. Marende BE. No. 309 : 1             Raphon Tuhan Jesus i

Ø  Raphon Tuhan Jesus i pungka ulaonmu. Ingkon tu Ibana i parguruhononmu. Baen Ibana donganmi, hehe dohot modom. Dege ma bogasNa i. Rohami pahohom.

    14. Pembukaan Rapot Ressort

Pandita Ressort:

Marojahan tu Aturan dohot Paraturan Huria Kristen Batak Protestan, domu tu harentaon Rapot Huria di Huria Kristen Batak Protestan, jala hombar tu laporan ni Panitia  , torop ni na ro nunga be manggohi quorum jala sah mambuat angka haputusan. Antong, ahu Uluan HKBP Kisaran Kota dibagasan roha na mandok mauliate tu Debata, hubungka ma Rapot Program Kerja Dan Anggara HKBP Kisaran Kota on, dibagasan Goar ni Debata Ama, AnakNa Tuhan Jesus Kristus dohot Goar ni Tondi Parbadia. (Ketuk palu 3 x). Didongani jala sai dipasupasu Tuhanta ma Rapot  on, gabe hamuliaon dohot hasangapon di Debata jala las ni roha dohot pasupasu tu sude ruas ni HuriaNa. Amen.

1)      Marende BE. No. 12 : 1                     Dipuji Rohangkon Do Ho

ü  Dipuji rohangkon do Ho, Jahowa Tuhanhi. Huhut hubaritahon do sude pambaenanMi.

 Tangiang Pujipujian + Panutup (Agenda).

 

 

IBADAH PANGUJUNGI

RAPOT HURIA HKBP KISARAN KOTA

Jumat  26 Februari 2021

---------------------------------------------------------------------------------------------------

Na Manguluhon/Jamita          : Biv : R Br Silalahi

Tangiang Pangondianon        : St T Lumban Gaol

1.Pangaradeon  Diri (Martangiang na hohom dibagasan roha)

2.Marende BE. No. 581 : 1 – 2                      Sangap do Jahowa

ü Sangap di Jahowa na sun timbul i. Balga ni holongNa ndang tarasam i.  Dilehon AnakNa na sasada i, manobus hita jolma pardosa i. Puji ma Debata ale manisia, las roham, las roham, somba ma Debata. Dapothon Jahowa na sun timbul i, marhite AnakNa Tuhan Jesus i.   (jongjong)

ü Tung so hasuhatan do basaNa i, marhite AnakNa ni lehonNa i. MudarNa durus do di hau silang i, rara pe dosanta ias di baen i. Puji ma…

 

3.Votum – Introitus – Tangiang

U: Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on.

H:  Amen

U: Parasi roha jala pardenggan basa do Jahowa, lambat tarrimas jala parasi roha godang.

H: Ndang tongtong Ibana manorui, jala ndang gotos rohana saleleng ni lelengna.

U: Ala ni unang ma hamu gabe sarombang dohot portibion; alai gabe imbaru ma hamu, ala i do na pinangido ni Debata.

H:  Paimbaru ma dirinami di bagasan TondiMi ale Tuhan, jala di bagasan hatigoran dohot hapolinonMi ma hami mangula ulaonMu.

U: Antong, masiapulan ma hamu marhite Hata ni Debata, ala tu habadiaon do dijou Debata hita. Haleluya, martangiang ma hita:  Ale Tuhan Debata parasiroha jala pardenggan basa, mauliate ma Tuhan ala nunga dipungka Ho ulaonnami di bagasan sadarion di bagasan holong ni rohaM jala marujung ma dibagasan tingki on. Ramoti jala pasupasu ma hami laho patulushon saluhutna i. Lehon ma roha biar mida Jahowa di hami asa marsitutu hami mamangke tingki na nilehonMi di hami. Urasi  ma rohanami marhite HataM na badia i, asa tama hami mamuji dohot pasangaphon goarMu. Di bagasan goar ni AnakMu Tuhan Jesus Kristus martangiang hami tu Ho. Amen.                                   (hundul)

 

4.Marende BE. No. 723 : 1                Tu joloM O Tuhan

ü Tu joloM o Tuhan sahat ma diringkon pangke ma au hombar tu lomoM. Molo ndang Ho Tuhan maringanan di au, diringkon ndang mararga be i. Tung pogos pe dison manang sonang tahe marsigantung tu Ho sasude. Holan Ho huihuthon ndang be diringkon togutogu ma tu na ture.

5.      Manjaha Johannes 15 : 10 – 17   (Taringot tu na masihaholongan)

U:    Radoti hamu ma angka patikku; i ma dalanna, asa mian hamu di bagasan holong ni rohangku: Songon Ahu pe na mangaradoti angka patik ni Damang, gabe mian di bagasan holong ni rohana.

H:    Umbahen na huhatahon i tu hamu, asa di bagasan hamu halalas ni rohangki, jala asa gok halalas ni rohamuna.

U:    On ma patikku: Naeng ma masihaholongan hamu, songon Ahu na mangkaholongi hamu.

H:    Na sumeahon hosana humongkop angka alealena, i do parholong ni roha na so halompoan.

U:    Alealengku ma hamuna, molo diula hamu na hupatikkon i tu hamu.

H:    Ndang hugoar be hamu anak somang, ai ndang diboto anak somang na niula ni indukna; aleale do hamu hudok, ai nunga hupabotohon tu hamu saluhutna na hubege sian Damang.

U:    Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i; asa dilehon tu hamu nasa sipangidoonmuna sian Ama i marhitehite Goarhu.

H:    On ma hupatikkon tu hamu. Masihaholongan ma hamu!

U:    Ima sahatna, martua do angka na tumangihon hata ni Debata jala na umpeopsa. Amen.

6.Marende BE. No. 481 : 3                Godang Dope

ü Tatiru holong ni rohaNa i, pinatuduhon ni Tuhanta i. Tahaholongi ma donganta i, ai ruas ni Tuhanta do nang i. Mardame ma, masijalangan ma. Tatuju ma solhot tu Debata.

7.      MANUTUP RAPOT HURIA

Uluan Huria

Mulak ma hita dibagasan dame dohot las ni roha mamaritahon barita nauli i. Angka haputusan naung tatotophon dibagasan rapot on sai dipargogoi Tuhanta ma hita pasauthon i.

Peserta:

Taeahi ma na tau pauliulihon dohot pasadahon, tongtong ma tatiop hata ni Tuhanta na mandok: Gohi hamu ma halalas ni rohangkon, Sada ma parrohahon hamu, sada ma haholongan muna, saroha sapingkiran ma hamu.

Uluan:

Nuaeng pe tapaujung ma Rapot Huria on dibagasan las ni roha huhut mandok mauliate tu Debata. Dibagasan goar ni Debata Ama, AnakNa Tuhan Jesus Kristus dohot Tondi Parbadia. Amen.(Ketuk Palu 3x).  

8.Marende BE. No. 672 : 1                Tung Godang situtu

ü Tung godang situtu ulaonmu antong dipasahat Tuhanta tu ho. Ndang adong be tingkim marnalemba tahe, ngolumi bahen tiruan tongtong. Sai patupa mai alani Tuhan i, so mangkirim balosNa tu ho. Debata do marnida na ni ulami. Manang na adong parbue ni i.

9.              Tangiang Pangondianon

10.          Marende BE. No. 743 : 1                   O Tuhan Togutogu Ma

ü O Tuhan togutogu ma au, tu dalan lomo ni rohaMi. Raphon Ho sonang mardalan au, nang rahis maol sidalanki. TondiMi baen manggohi au on, margogoihon au naposomon. Pasangap Ho di ngolungkon, paima sahat tu surgo au on.

11.  Tangiang Panutup.

12.  Marende BE. 435 : 1..Marolopolop Tondingki

ü  Marolopolop tondingki ai  naung  di  tobus Jesus i. Hamu sude, bege ma i, sai las rohangku  mandok i. Sonang ni tingki i, dung jumpang Jesus Tuhanki !  Tondi Na mangajari au,  tarbaen marlas ni roha au.  Sonang ni tingki i, dung jumpang Jesus Tuhanki.