PSALMEN 31:8-16 MAROLOP OLOP ALA ASI NI ROHA NI DEBATA

 

SERMON HKBP RESSORT KISARAN

JAMITA MINGGU PALMARUM, 28 MARET 2021

TOPIK: MAROLOPOLOP ALA ASI NI ROHA NI DEBATA

(BERSORAKLAH AKAN KASIH SETIA TUHAN)

(PSALMEN 31:8-16)

I.             PATUJOLO

Psalmen 31 ima ende na marisihon tangiang mangido haluaon sian musu na pinasahat ni si David tu adopan ni Debata. Adong ma tolu bagian ni Psalmen 31 on, ima ay.2-9 marisihon tangiang haporseaon, ay.10-19 ima tangiang anggukangguk dohot pangidoan, ay.20-25 ima tangiang hamauliateon ni roha. Marhitehite isi ni Psalmen 31 on boi ma idaonta sada tangiang na marisihon alualu ni parpsalmen tu adopan ni Debata ala tongon mangadopi musuh (ay.5-9), sahat tu na marsahit ibana (ay.10-11) jala ditadinghon angka donganna ibana (ay.12-14). Songon ima parsorion na tongon songgop di ngolu ni parpsalmen manang si David ujui umbahen pola ro ibana tu adopan ni Debata pasahathon saluhut pangidoanna i.

II.           HATORANGAN

Songon jolma na mangolu di portibion, tontu ragam do na boi masa di bagasan ngolunta siganup ari. Las ni roha nang jut ni roha tontu marganti pasorin do boi ro di ngolunta. Boi doi ro sian dirinta sandiri, sisolhotta nang angka jolma na di humaliangta be. Boi do na denggan taula, alai gabe sisogo hita, jala di hasogohon angka jolma. Boi do jumpang pangalaho na so denggan sian humaliangta maradophon hita, hape na denggan do nataula. Ima na ginoaran ni angka musu. Molo di hasogohon angka na denggan na sintong na niula ni donganna, targoar musuh ma ibana disi. Ragam do parsorion na jumpang di ngolu ni David, sahat tu na bangkit ibana gabe raja gumomgom Israel. Sai sogo do roha ni si Saul, raja na ginantihonna i. Sai disangkapi si Saul do mangalele ibana sahat tu sumangkapi naeng mambuat hosana. Alai, saluhutna i dipasahat si David do tu Debata di bagasan tangiangna. Ndang na so boi baloshononna angka na jat na niula ni musuhna maradophon ibana, ala sahalak raja do ibana. Alai ndang diulahon ibana angka i. Debata do pangalualuanna jala haporusanna di tongatonga ni parsorion ni ngoluna. Marhitehite pengalaman ni raja David, ditogihon ma hita halak Kristen asa tongtong marhaporusan tu Debata, jala marolopolop manghatindanghon asi ni rohaNa i di bagasan ngolunta siganup ari.

a.  Asi ni roha ni Debata do na paluahon hita sian tangan ni musuh (ay.8-9)

Dihatindanghon parpsalmen do las ni rohana marhitehite na marolopolop ibana ala asi ni roha ni Debata naung paluahon ibana sian pardangolan, hagogotan dohot huaso ni musuna. Ndang tarpatudos hita huaso ni Debata tu huaso ni jolma di portibion. Ai Debata do nampuna harajaon, hagogoon ro di hasangapon ro di saleleng ni lelengna. Songon dia pe usaha dibaen jolma laho menandingi huaso ni Debata, ndang tuk ibana mangulahon i. Ditatap Debata do angka naposoNa, angka na marhaporusan tu ibana. Asi do roha ni Debata mida jolma na so mangulaho hasalaan manang dosa. Tuhan membela hak orang percaya dan orang benar. Tangkas doi dihatindanghon parpsalmen di bagasan tangiangna on. Songon dia pe godang ni musu ro manahopi ibana, na so talu ibana molo Debata do donganna. Molo Debata donganta ise ma alonta? Onpe, aha ma dohononta disi? Molo Debata donganta, ise ma alonta? (Rom 8:31). Jahowa do marporang humophop hamu, asal hohom hamu (2 Musa 14:14). Na marlapatan, sai di jolonta do Debata manghohop hita sian angka musunta na naeng mangago hita.

b. Asi ni roha ni Debata do na paluahon hita sian parsahiton (ay.10-11)

          Adong do pandohan na mandok: molo parsahiton, ima dongan ni nasa jolma na mangolu do i saleleng di portibion. Na marlapatan, sai olo do jumpang parsahiton di sasahalak jolma di sada tingki di ngoluna. Na patuduhon, jolma na gale do hita di pamatangta on. Ragam cara dipatupa jolma laho manjagahon hahipasonna, alai olo do songgop parsahiton di sada tingki. Di bagasan turpuk on, pola gabe marsahit, manang gale pamatang ni parpsalmen ala na mamingkiri na masa di bagasan ngoluna. Pola maras roha nang dagingna, jala gale nang holiholina. Olo do tutu jumpang parsahiton di hita, ala ni godang sipingkiran, hamaolon, parsorion di hita. Alai naeng ma songon si David hita di bagasan turpuk on, na pasahathon saluhut holso ni rohana nang parsahitonna tu Debata. Asa Debata sambing ma na paluahon hita sian ragam ni parsahiton na songgop di pamatangta on.

c.  Asi ni roha ni Debata do na mandongani hita. Mandao pe angka dongan, Tuhan i tongtong donganta (ay.12-14).

          Digombarhon parpsalmen do situasi na masa tu dirina. Pola do dipasiding ibana sian parpunguan dongan hombar hundulna, nunga pola diambolongkon ibana jala dihusiphusip torop halak naeng mambuat hosana. Songon ima borat ni parsoriton na niadopanna. Pola disangkapi jolma naeng mambuat hosana. Boi do tapatudos turpuk on tu situasi ni Jesus na mangadopi sitaonon na borat andorang so diparsilanghon Ibana. Sude do jolma mandao, dohot do nang angka siseanNa manadingkhon Ibana. Doshon dorbia naeng potongon ma Jesus diboan tu jolo ni si Pilatus, asa diparsilanghon Ibana. Alai margogo do Ibana mangadopi saluhutna i. Alani haunduhon dohot pangoloionNa di Ama i. Songon ima gombaran di ngoluon. Molo jumpang hit alas ni roha, manjonok do sude angka dongan. Alai molo taadopi ragam ni parsorion di bagasan ngolunta, olo do mandao angka donganta. Jadi, ise do alealenta na so olo muba i? Aleale na sumurung ima Tuhan Jesus i… (BE. 219). Holan Ibana do na so olo manadinghon hita, sasada hita mangadopi angka sitaonon di bagasan ngolunta on.

d. Marhaposan tu Jahowa ma hita, ai Ibana do Debatanta (ay.15-16)

Dijouhon do hita asa marhaposan tu Debata, unang tu pingkiran dohot gogonta sandiri manang dongan jolma. Parsatongkinan do ia hagogoon di portibion. Alai molo hagogoon ni Debata ro di saleleng ni lelengna do. Ibana do na tuk paluahon hita sian parsorionta. Sian pardangolanta ala ni dosanta. Nunga tajalo be haluaon i, holan ala asi ni rohaNa. Naeng ma tahamauliatehon marhitehite haporseaon dohot hamubaon ni rohanta di pangalahonta siapari. Marolopolop ma hita tongtong mamuji asi ni rohaNa naung binasabasahonNa i tu hita. Amen.                   

Cal Pdt Frans Julu Sianturi STh

HKBP SENTANG