JAMITA EPISTEL HESEKIEL 2:1-5

 

Minggu V Trinitatis

Hesekiel 2:1-5

Borhat Ma Ho Jala Baritahon Ma Hata Ni Tuhan I

 

Huria ni Tuhanta na hinaholongan di bagasan Kristus Jesus, sada ulaon ni panuriang ima pasahathon jala mamaritahon hata ni Debata tu bangso Israel. Panurirangon i somal na marisihon taringot tu lumbalumba jala hamubaon ni roha nang pangalaho. Umbahen i di “pandohan borhat ma ho” gabe sada tugas panggilan laho mangulahon parsuruon ni Debata asa pasauthon sangkapNa marhite lumbalumba. Jala boi do on gabe hatontuon di parsuruon ni Debata na so boi jua on. Rade manang so rade di parsuruon ni Debata hita alai ingkon do borhat jala unduk hita mangulahon parsuruon i. Hata “baritahon ma hata ni Tuhan i" gabe ulaon naung dipasahat Debata songon gabe panurirangion. Ndang hata ni panurirang i na naeng pasahatonna alai tung hata ni Tuhan i do.

Panjouan ni Debata taida do i gabe inisiatif ni Debata sandiri do. Hesekiel ima sahalak panurirang na dijou jala dipillit Debata hira marumur 30 taon ibana. Tarjou do ibana gabe panurirang dung 5 taon di habuangan Babel (Hes. 1:1). Tarjou do ibana gabe panurirang hatiha halak Israel dibagasan habuangan Babel alani dosa dohot hajahaton nasida di adopan ni Debata. Nang dibagasan kondisi di habuangan Babel bangso i, tongtong do di patuduhon Debata holong ni rohaNa di bangso i asa mangolu nasida di hamumuba ni parrohaon nang pangalaho nasida tu hasintongan i. Umbahen i dipabangkit Debata do panurirangNa si Hesekiel laho manurirangi bangso asa mangolu nasida ala hamumuba ni pangalaho nasida jala asa tongtong nasida marsomba tu Tuhan i.

Digoari Debata do si Hesekiel songon anak ni jolma. Paboahon dison hadirion nang hagaleonna songon panurirang ibana jala paingothon ibana tung holan marpangusandean to huaso ni Tondi i do ibana laho mangulahon panurangion i. Panggoari ni Debata tu si Hesekiel na mandok anak ni jolma taida do songon hahotan ni Debata tu ibana asa gabe panurirang ibana jala manurirangi ibana tu halak Israel jala paboahon na ingkon marhaunduhon do ibana tu Debata naung manodo jala na marsuru ibana (Hes. 2:3). Nang pe di panjouan ni Debata manggoari ibana anak ni jolma, naeng do pinatandap ni Debata ai dibagasan panggoari i do naeng patuduhon ni Debata ai di Ibana do hasangapon dohot hamuliaon, jala si Hesekiel songon anak ni jolma ingkon dipatuduhon ibana haunduhonna tu Debata na marsuru ibana. Alani i ma nasa ulaon nang pambahenan na naeng diulahon si Hesekiel ndada ro sian diri nang haboionna alai sian Debata sambing do haroro ni gogo ni pangulaonna i.

Debata sandiri do patotophon parsuruon i asa borhat jala mamaritahon hata ni Tuhan i. Dipatupa Debata do parjumpangan dohot si Hesekiel jala didok hataNa tu si Hesekiel paboa na disuru Debata ibana tu tongatonga halak Israel. Naeng ma asa lam togu hadirion ni si Hesekiel laho mangulahon parsuruon ni Debata di ibana na ingkon borhat ibana tu tongatonga halak Israel. Tung mansai dokdok do ulaon na pinasahat tu si Hesekiel mangida bangko (karakter) halak Israel (Hes. 2:3-5) alai tung neang do anggo i saluhutna ala dipajongjong do ibana asa mananginangi. Na marsuru do Debata tu si Hesekiel asa mulak roha halak Israel marhaunduhon tu Debata.

Borhat jala baritahon ma hata ni Tuhan i. Boi ma dohonon taringot pandohan on gabe parsuruon na mardongan huaso dohot otoritas ni Debata di bagasan si Hesekiel asa paingothon halak Israel asa marhamubaon. Di na borhat ibana laho mamaritahon hata ni Tuhan i, nirajaan ni Tondi i do ibana jala on ma gogo di ibana jala na patoguhon rohana laho mangulahon parsuruon i. Borhat jala mamaritahon hata ni Tuhan i gabe sada ketentuan do on paboa na holong do roha ni Debata di bangso i asa unang mago nasida ala ni dosa nasida alai tung asa malua jala mangolu ma bangso i ala adong sipaingot. Ndang dipasombu Debata sambing nasida marhamagoan ala ni dosa nasida alai dipabangkit do panurirang di tongatonga halak Israel asa tung ingot nasida di nahinalomohon ni Debata di nasida taringot tu hamubaon ni roha nasida i.

Huria ni Tuhanta na hinaholongan di bagasan Kristus Jesus, tangkas do dipatupa Debata holong ni rohaNa di hita. Nang pe di nasa hata, roha, pambahenanta sipata mandao sian Ibana. Di nasa hagaleonta manang haleaonta alani dosanta, alai umbalga do holong ni rohaNa di hita. Angkup nii do ndang lomo roha ni Debata sada sian hita marhamagoan ala ni dosa nang pambahenanta na hurang i diadopan ni Debata. Dipabangkit Debata do pangapoion na laho paingothon hita asa marhamubaon di roha manang di pambahenanta. Ima parbaritaan nauli angka hata na mangapoi, mamodai, paingothon, mangapuli, jala maminsang hombar tu angka na masa.

Dipabangkit Debata do pangapoion di hita marhite hataNa. Hata ni Tuhan Debata ma gogo ni angka na porsea. Didok Tuhan Jesus, tangihon ma hataNa jala ulahon sipatudoson ma ibana songon halak na marroha na paulihon bagasna di atas batu. Ima tangkas ni panandaionta tu Debata marhite hataNa di bagasan haporseaonta. Tatangihon ma Ibana na manghatai tu hita dibagasan hataNa i. Taulahon ma sangkap ni rohaNa di nasa naung pinasahatNa tu hita dibagasan hataNa. Ido na boi patambahon haporseaon jala patoguhon panghirimonta di Ibana.

Dipaborhat ma hita laho mamaritahon hataNa. Dijou do hita di bagasan haporseaon nang dipanindangionta laho mangulahon parsuruon i. Hata ondeng, nunga tangkas tajalo, taauhon parsuruon ni Debata di hita naung pinalumbahon Debata di bagasan hataNa. Ima na ingkon laho hita tu portibion laho mamaritahon hataNa. Molo tasulingkiti di bagasan hadirionta tung godang do na mambahen gale hita molo dipasahat parsuruon laho mamaritahon hataNa i tu tongatonga ni portibion. Sai olo do ra sipata tubu dibagasan rohanta, tung dibege jala ditangihon do tahe manang ndang? Tung dipauba do roha nasida manang ndang? Olo do ra tubu di bagasan roha nang pamingkirionta taringot tu na songon i. Alai, pangulaon ni parsuruon na songon on ma na nidok missi keluar. Ndada holan sipanangi hita di hata ni Tuhan Debata alai na ingkon do hita parsidohot borhat laho mamaritahon hata ni Tuhan Debata.

Borhat ma ho jala baritahon ma hata ni Tuhan i. Gabe sada komitmen ma on di hita songon angka na porsea asa berperan aktif jala bersikap proaktif laho mamaritahon hata ni Tuhan i. Dipasahat Debata do parsuruon i asa borhat hita mangulahon parsuruon mamaritahon hata ni Debata, songon tanda holong ni rohaNa do di hita dohot di angka donganta jolma. Ndang lomo roha ni Debata di hamagoan nasida ala so adong sipaingot di nasida. Taulahon parsuruon ni Debata asa borhat jala mamaritahon hata ni Tuhan gabe tanggungjawab di hita na marhaunduhon di nasa parsuruon ni Debata. Ndang na gabe haputusan ni rohanta sundat borhat laho mamaritahon hata ni Debata ala tapingkiri ndang ditangihon nasida hataNa alai na ingkon do sahat lumbalumba i di nasida jala Tondi Parbadia do na pubahon roha nasida. Ulaonta ima, borhat jala mamaritahon hata ni Tuhanta. Amen

 

Sungkunsungkun :

1)      Tatangihon do hataNa jala tapahusorhusor di bagasan rohanta. Manghatai do Debata tu hita marhite hataNa. Nunga dipasahat Debata marhite turpuk jamita asa borhat hita laho mamaritahon hataNa. Boha do haradeon ni rohanta laho mangulahon parsuruon ni Tuhan i?

2)      Tapasahat do tutu lumbalumba i tu saluhut angka dongan asa ingot nasida di Tuhan Debata, di haporseaonna, di ngolu partondionna, asa marhite i tung tongtong mardalan ibana di ngolu di dalan hatigoran ni Debata. Tung dia ma na boi ulahononta, ai disuru do hita tu tongatonga halak na pir rohana manjalo lumbalumba i?