Bahan Sermon HKBP Resort Kisaran Minggu Palmarum, 02 April 2023 Ev: Markus 11: 1-11 Topik Minggu: PINUJI MA NA RO DI BAGASAN TUHAN I

 

Bahan Sermon HKBP Resort Kisaran

Minggu Palmarum, 02 April 2023

Ev: Markus 11: 1-11

Topik Minggu: PINUJI MA NA RO DI BAGASAN TUHAN I

 

I.                   Patujolo

 

Jerusalem ima songon pusat keagamaan ni halak Jahudi, ala tangkas do disi di pajonjong bagas Joro na umbalga, jala disi ma inganan ni parpunguan ni angka sintua dohot malim ni halak Jahudi. Dibongoti Jesus huta Jerusalem rap dohot siseanna. Maksud ni Jesus bongot tu Jerusalem mandohoti pesta paias bagas Joro ( Perayaan penyucian  Bait Allah) naung somal di ulahon halak jahudi di ganup taon, marroan do sian desa nawalu ro tu pestai lao parsidohot di ulaoni. Di gombarhon panurat Markus on ma mamungka sian bindu 11 lam jotjot ma Jesus mangkobasi di jerusalem sahat tu bindu 16 di buku markus on.

 

II.                Hatorangan Ni Turpuk

Sian turpuk on dipatorang do taringot tu Kristus na masuk tu Jerusalem, ompat manang lima hari andorang hamamateNa. Tangkas do dipaboahon turpukon na ima Kristus na so mabiar patuduhon diriNa tu angka  na manghosomi Ibana di Jerusalem.

Andorang so masuk dope tu huta Jerusalem, di suruh Jesus dua halak siseanNa asa laho tu sosor na di jolo nasida i, laho mambuat anak ni halode na so hea dope di hunduli, didok jesus ma asa di hari hari nasida tali ni halode i, jala diboan tu Jesus. Di tonahon Jesus do tu nasida “ molo adong na mandok? Na marhua do hamu? Alusi hamu ma” na ringkot tu Tuhani do i”. Halode na so dung dope dihunduli i ma halode na ditonahon tu ulaon na martohonan jala na badia. Halode si songon on, ndang adong di sude inganan. Ingkon ni luluan do di inganan na jonok tu Jerusalem, ala disi do na jotjot adong ulaon na martohonan dohot na badia. Disangkapi jesus do sian dao dao ni ari asa ingkon bongot Ibana tu Jerusalem, jala ingkon boanon na do halode na naung di tonahon ibana hian asa dipapulik.

Haroro ni Jesus tu Jerusalem pataridahon paboa Jesus do: Mesiasi Anak ni si Daud na pinarbagabaga i. Jesus do Raja hadameon i, ulu balang na gogo jala na tigor, na pajongjonghon HarajaonNa di bagasan Holong dohot Hadameon. Hosianna lapatanna: “ sai palua ma hami”. Di endehon na toropi do ende Hosianna mangido tu Debata asa ro ma Debata paluahon nasida marhite haroro ni Raja Sipaluai, siboan dame dohot las ni roha i ma Mesias i. Di pasahat nasida do pujipujian tu Debata dohot pasupasu tu na toropi huhut didok: Di Pasupasu ma na ro dibagasan goar ni Tuhani, pinuji ma harajaon ni amanta Daud nanaeng ro.  Haroro ni Mesias i na ro Ibana laho monang maralohon hamatean jala pajongjonghon harajaon ni Debata ro di saleleng ni lelengna

 

III.             Panimpuli.

Sude hita na pinilit ni Debata ingkon boi do hita olo maniru ulaon ni Siseani na olo mangihuthon Jesus di bagasan unduk dohot serep ni roha jala marpangoloion di hata ni Debata. Ingkon pos do rohanta di patik dohot di hata ni Debata . molo denggan ta ula gabe pasu -pasu ma i di hita dohot di humaliang hita. Hombar tu topik ni minggu ta ima “Pinuji Ma Na Ro Di Bagasan Tuhan I”, na marlapatan ingkon do tapasahan sude angka na ponjot di rohanta jala holan mangasahon tu Debata ma hita di pardalanan ngolunta be, alana holan sian Debata do hita manjalo pangurupion. Sude ma hita pasahat pamujion dohot  mangolophon Debata. Amen