JESUS KRISTUS SIBOAN HALUAON SALELENGLELENGNA, HEBER 5:7-10

 

Bahan Sermon HKBP Resort Kisaran

 

PARNINGOTAN ARI HAMAMATE NI TUHAN JESUS

 

Heber 5:7-10

JESUS KRISTUS SIBOAN HALUAON SALELENGLELENGNA

(Yesus Pokok Keselamatan Yang Abadi)

 

I.                   Patujolo

Surat Heber on ditujuhon do tu na porsea Kristen Jahudi na di bagasan dohot na di duru ni Palestina. Surat Heber on gumodang do paandarhon taringot tu haporseaon dibagasan pangantusion na umum jala ndang paimbarhon Jahudi manang na so Jahudi. Tematis pannindangion ni surat Heber ima taringot Tuhan Jesus Kristus, umbalga jala tumimbo do Ibana sian angka surusuruan, jala dipasahat Debata do tu Kristus Goar na tumimbo sian nasa goar, ai angka sururuan digoari do naposoNa jala Kristus do Anak. Jesus Kristus siboan haluaon salelenglelengna. Marhite Ibana do patupahon pardengganan tu ganup jolma na mardosa.

 

II.                Hatorangan Ni Turpuk

Di ayat 7, naung gabe jolma do Kristus mangolu songon ngolu dibagasan sibuk ni hajolmaon (sebagai manusia fana). Marhite i dipatudohon do ngolu hajolmaon ni jolma dibagasan sada sitiruon marningot ariari ni ngolu on. Molo songon Ibana do hita marningot ariari ni ngolunta tung tu ringgasna do hita manghangoluhon partondionta dohot ulaonta dihasiangan on hombar tu tiruan di haporseaon dohot ngolu partangaiangon. Kristus di ngoluNa unduk do Ibana mangadolpi hamatean. Di huasoNa, sai na boi do Ibana paluahon diriNa sian hamatean i, alai dison diboto Kristus do laho padalanhon sangkap ni Ama i naung pinasahatNa tu Jesus. Molo taringot tu hadosaon ni jolma i, patut do mangae di porsuk ala ni dosa i maradophon Debata alai tung holong do Debata tu saluhut jolma i asa unang mago jala dilehon do AnakNa asa gabe pardengganan ni jolma dohot Debata.

Tagan jolma Ibana, dipasahat Jesus di tangiang (pangidoan) di na laho mangadopi hamateanNa (Mat. 26:39; 27:46) jala tangiang (pangidoan) manangianghon angka siseanNa dohot saluhut angka na porsea di bagasan goarNa. Mardongan iluilu do Ibana pasahathon pangidoanNa. Tangiang songon na binahen ni Jesus borhat sian roha na marsitutu umbahen i, naeng togihonon do hita martangiang songon Ibana na martangiang di bagasan roha na marsitutu jala pola do dipelehon  pangidoanNa dohot elekelek mardongan angguk bolon dohot iluilu.

Ayat 8, Digoar do Kristus songon Anak. Status na songon on na boi do di roha hajolmaonta ndang boluson ni Kristus angka na paet jala ndang ingkon mangae na hansit Ibana, alai ndang na songon i sangkap ni Debata. Nang pe songon i, dibagasan haunduhon do Kristus mamolus angka na hansit i. Songon Anak i Ibana, diguruhon do pangoloion marhite sian na tinaonna i. Melalui Ketaatan pasif mengubah menjadi ketaatan aktif. Artinya Kristus menunjukkan bahwa Dia tetap baik-baik saja walaupun segala kepahitan dan kesakitan dihadapiNya hingga kematianNya tetapi Dia tetap setia dan rendah hari melalui segalaNya dihadapan Bapa.

Ayat 9, Marhite panaonon ni Jesus, rimpas do Ibana gabe sihorhon haluaon. Diparbadiai do Ibana marhite mudarNa na badia jala marhite Ibana do haluaon salelenglelengna di sude na mangoloi Ibana. Marhite panaononNa i diulahon do “jabatanNa” di portibion. Kristus do patupahon pardengganan sian hadosaonta maradophon Debata. Marhite Ibana do hita jalo hasisinghop panesaan ni dosa dohot pardenggananta na mambahen hita tama diadopan ni Debata. Alani i do tarjou do Kristus gabe sipalua tu ganup angka na mardosa. Dibagasan Kristus nunga gabe tobus dihita on jala nunga dipaimbaru hita gabe jolma naimbaru ala ni panobusionNa dibagasan hamateanNa.

Ayat 10, Songon hatontuan do on na pinasahat ni Debata di Kristus. Hatontuoan na badia jala nab alga. Digoari Debata do Kristus sintua ni malim. Songon Anak do Ibana mangulahon ulaon na balga. Ibana do malim sian nasa malim di panandaiaon ni halak. Jala mangihuthon horong ni si Melkisedek do na manggoari Kristus songon sintua ni Malim. Horong ni si Melkisedek lapatanna Malim ni Debata na manongtong (ida bindu 7) jala tinanda songon Raja dohot Malim di Padan na Robi (Psalmen 110:4). Melkisedekh dalam Bahasa Ibrani menerangkan raja adalah [Dewa] Sedek atau [Dewa] Melek itu adil.

 

III.             Hahonaan Tu Jamita

1.      Parsitutuon ditangiang mardongan serep dohot unduk ni roha

Jesus Kristus do sitiruan dipartangiangan. Diajarhon Jesus do boha hita martangiangan dohot marpangidoan tu Debata Ama. Laos dibagasan ido hita gomos marpangidoan dibagasan serep dohot unduk ni roha mangihuthon Kristus Jesus.

2.      Jesus Kristus do haluaonta

Dipatupa Debata do pardengganan tu hita jolma pardosa marhite Kristus jala rimpas gabe sihorhon haluaon salelenglelengna. On ma panindangionta jala ditogihon ma hita tu pos ni roha di haporseaonta di Kristus Jesus Tuhanta i.

3.      Pos ni roha di Kristus gabe Sipalua

Ndang adong huaso natumimbo sian Ibana. Nunga dipasahat Debata huaso tu Ibana jala pola didok sintua ni malim. Haluaonta dipatupa Kristus, pos ni rohanta do anggo tu Ibana. Ala ni Kristus  gabe Sipalua dihita, ndang adong huaso na asing paposhon rohanta.

4.      Mamuji Debata ala asi ni rohaNa patupahon pardengganan tu hita jolma pardosa.

Pardengganan na pinatupa Debata patut do gabe pujipujian di hita marhite AnakNa Tuhan Jesus Kristus. Tapuji Debata ala asi ni rohaNa tu hita jolma pardosa. Marhitehite Kristus Jesus tama pasahatonta pamujion tu Debata.

Pdt Albert JP Pasariibu STh ( Fungsional HKBP Kisaran Kota )