Jamita Evangelium Minggu Letare, 19 Maret 2023 “Las ni roha di angka naung jumpangan Jesus” (Johannes 9: 35-41)

 

Jamita Evangelium
Minggu Letare, 19 Maret 2023

“Las ni roha di angka naung jumpangan Jesus”

(Johannes 9: 35-41)

Ginurithon di Pdt. Dr. Robinson Butarbutar, Ephorus HKBP

 

 

Hamu angka Dongan hinaholongan,

 

Di Minggu Letare sadarion, di na ditogihon hita asa tongtong marlas ni roha, atik pe dung minggunta on masuk ma hita minggu-minggu parningotan di pananonon ni Tuhanta Jesus, dienet jamita sian las ni roha na so apalang ni sada halak naung pinaungkap ni Jesus mapitung sian hatutubuna, laho manogihon hita asa parsidohot marlas ni roha.

 

Barita nauli na gabe jamita di hita, na tarsurat di Evangelium Johannes 9: 35-41, i ma sian sada bagian ni puncak barita nauli na ganjang di bindu 9 ayat 1-41, ndang holan taringot tu hamamasa ni na diungkap Jesus mata ni na mapitung mamungka dung tubu, alai dohot do taringot tu songon dia naung pinaungkap ni Jesus matana i mangalusi sungkun-sungkun taringot tu nauli na pinamasa ni Jesus tu ngoluna. Sada sungkunsungkun i, i ma na tarsurat di ayat 14-34, marharoroan sian angka na so olo marhatopothon na Kristus do Jesus i, baliksa na pabali manang ise na mamparhatopothon na Kristus do Jesus i (ay 22, 34), gariada na mandok pardosa do Jesus ala patupa ulaonNa mangungkap mata ni na mapitung i di ari Sabat (ay 24). Alai sadanari, i ma na tarsurat di ayat 35-41 marharoroan sian Jesus i sandiri naung mangungkap simalolongna. Molo tapamanat rumang ni sungkunsungkun na ingkon alusanna sian bona ni ayat 14 sahat tu ayat 41 i (disi adong lima sungkunsungkun ni halak Parise/Jahudi nang alus ni naung niungkap ni Jesus matana i), boi dohonon hira martirket do, sian na manangkasi songon dia parmasa ni pangungkapon ni simalolongna i, sahat tu na umbagas, i ma taringot tu panandaan ni naung niungkap ni Jesus matana i tu ise na mangungkapsa, i ma Jesus i. Alus tu sungkunsungkun marharoroan sian na so olo mamparhatopot na Kristus do Jesus, i ma halak Parise (sipata digoari halak Jahudi), ndang marujung di masitomuan, baliksa maralo do. Konflik do na masa disi. Ndang jumpang pangantusion na dos (ida ayat 15, 17, 25, 27, 30-31). Asing do panandaan ni halak Parise/Jahudi di Jesus sian panandaan ni naung diungkap simalolongna i. Alai alus tu sungkunsungkun na marharoroan sian Jesus naung maungkap mata ni Jesus i masitomuan do.

 

Tahamauliatehon do na ia jamita na dienet gabe jamitanta ndang apala sungkunsungkun nang alus na parjolo i, i ma na so masitomuan i(ayat 14-34). Alai sian sungkunsungkun nang alus na masitomuan i do, i ma ayat 35-41. Mansai ringkot do i di hita di partingkianta nuaeng, i ma sada partingkian na patuduhon na baha angka usaha laho mamparalohon angka na so manjangkon Jesus dohot na manjangkonsa, ala molo na parjolo i do na gabe jamitanta, olo hita na manghaporseai na Jesus do Kristus i gabe manghasogohon angka na so mamaparhatopothon na Kristus do Jesus i, i ma: Uju di partingkian ni Jesus halak Parise/halak Jahudi i. I do umbahen na pola do sanga adong pande bisuk taringot tu evangelium ni si Johannes on na manghasogohon evangelium Johannes on, pola mandok hasalaan do pamasukhon evangelium Johannes on tu Bibelta Padan Naimbaru i, ala dipatorang di evangelium on panulahion ni halak Jahudi di Jesus. Jala di partingkianta nuaeng, gabe sogo roha ni siihuthon Jesus tu angka na so mangihuthon Ibana. Di partingkianta nuaeng na jotjot haruason di ugamo gabe sibonsiri ni partongtangan ni hajolmaon, sipajamotonta do asa unang paraloon ni halak Parise/Jahudi dohot Jesus gabe tabahen manghasogoi halak Jahudi nuaeng di portibion. Jala sipajamotonta do asa hita pe ndang tahasogohon angka na so mamparhatopothon na Kristus do Jesus i. Denggan do tapeop gomos na ia Jesus i Kristus do di hita. Alai na so jadi tahasogohon angka na so mamparhatopothon na Ibana do Kristus i.

 

Di turpuk jamitanta taringot tu sungkunsungkun ni Jesus nang alus ni na manjalo sungkunsungkun i tu Ibana, i ma sungkunsungkun nang alus na martomu i ia panghataion nunga masuk tu na panghataion na umbagas, i ma ndang be holan taringot tu songon dia hamamasa ni ungkap ni mata ni simalolong ni na mapitung i dohot ise ma diida ibana Jesus, i ma, na tumimbo ‘panurirang,’ na manghabiari Debata, jala na mangulahon lomo ni rohaNa (ayat 30), alai nunga sahat tu tirket haporseaon ni naung diungkap Jesus simalolongna i: “Na porsea do ho di Anak ni Jolma i”, na - dung ditangkasi ise nidok ni Jesus ia Anak ni Jolma i, i ma Jesus i sandiri - maralus na martomu, i ma: “Na porsea do ahu, ale Tuhan,” laos disomba ma Ibana” (ayat 35, 38). Laos dipatogu Jesus ma parnidaan ni na mapitung i tu na umbidang di sangkap ni haroroNa tu portibion, i ma “asa marnida angka na so marnida hian, jala asa gabe mapitung angka na marnida” (ayat 39). Na mapitung nidokna dohot do na mapitung alai na mandok ndang mardosa nasida (ayat 40-41).

 

Asa, na gabe jamita sihalashononta di rohanta i ma parsahat di na niungkap ni Jesus simalolongna i tu parnidaan na umbagas taringot tu ise Jesus i, i ma ia Jesus i Anak ni Jolma i do i, i ma sisombaon i. Asa, ndang holan siungkap simalolong ni na mapitung sambing ia Jesus i, alai Anak ni Jolma sisombaon i do. Manang, umbahen na tarbahen Jesus mangungkap simalolong ni na mapitung sian tubu i siala “Anak ni Jolma i’ do Ibana, i ma sada panjouon na mandok na tinongos ni Debata laho palua jolma i sian dosa dohot hamatean i do ia Jesus i, na marhagogoon situtu.

 

Asa, jamitanta mangondolhon, ia sihalashononta di hamamasa ni na gabe boi marnida na mapitung i, i ma ndang holan hatauonna marnida dung songon i leleng mapitung mamungka dung tubu ibana, alai dohot do jala na umbagas i ma na gabe boi ibana marnida, mananda dohot porsea huhut manomba na ia Jesus i Anak ni Jolma i do. Songon jolma, mansai las do roha ni na mapitung i gabe boi marnida. Alai las do tong, jala umlasan do roha ni Jesus na gabe ditanda, dihaporseai dohot disomba ibana Jesus na mambahen ibana marnida i. Saurdot do i tu sangkap panuratan ni evangelium Johannes on di bonana nang sahat tu nuaeng pe songon i do ingkon idaonta, i ma na dipatogu di Johannes 20: 31,

“Godang dope tanda angka na asing na pinatupa ni Jesus di jolo ni angka siseanNa, angka na so sinurat di buku on. Alai umbahen na sinurat angka on, asa porsea hamu, Jesus do Kristus, Anak ni Debatal jala asa hamu angka na porsea i dapotan hangoluan marhitehite goarNa”.

 

Asa, dipangke panurat Evangelium on do, si Johannes, manurat barita na pinatupa ni Jesus tu sahalak na mapitung i dalan laho manogihon na jumahasa asa tong dohot mananda, manghaporseai dohot manomba Jesus i atik pe ndang dohot nasida na simalolong pardagingonna ndang diungkap Jesus, alai dohot do nasida na mapitung hian, na so marnida, na so mananda na Jesus i Anak ni Jolma i gabe na mananda, porsea dohot manombasa.

 

Ala ni i, mansai ringkot do hita mandok tu dirinta asa marlas ni roha hita, ala nunga parsidohot hita angka siihuthon Jesus, angka ruas nang naposo dohot parhalado ni Huria Kristen Batak Protestan di bagasan tingkion marlas ni roha. Tutu mangula dope Jesus Kristus Tuhanta i patupa angka tanda halongangan na marragam i di ngolunta marsadasada, alai ingkon sahat do hita tu na marlas ni roha, mar-Letare, ala nunga angka naung dapotan asi ni roha ni Debata hita, i ma nunga dipalumehon tu hita haporseaon di AnakNa Jesus Kristus i, Anak ni Jolma i, Anak ni Debata, na patigor hita di joloNa, na manghophop hita di hau pinorsilang i.

 

Mansai ringkot do on di hita di partingkianta nuaeng, asa unang holan holan tu manang siala hinaadong ni angka halongangan pinatupa ni Jesus Kristus i di ngolunta hita mangalehon roha dohot marlas ni roha/marletare di ngolunta, alai ingkon sahat do tu na tong mansai arga, ia so na umbarga, i ma tu na marnida basabasa ni Debata tu hita na palumehon panandaion, panghaporseaonon, dohot panombaan tu Jesus i songon siala ni marlas ni roha hita. Boasa? Ala parpudi on, nang pe nunga tung leleng situtu barita taringot tu ise Jesus di ngolu ni hajolmaon dibaritahon di sandok portibion, bahat dope na so porsea di Ibana songon Anak ni Jolma i/Anak ni Debata; bahat dope na so marnida dohot manghaporseai Ibana songon i. Alai las ma rohanta angka ruas nang pangula ni HKBP naung mananda ise Jesus i, manghaporseai Ibana dohot manomba Ibana. Las ma rohanta siala ni i di pardalanan ni ngolunta. Las ma rohanta ala naung jumpangan Jesus hita. Amen.