Jamita : Mateus 6 : 9 – 13 TANGIANG MANGIDO HALUAON

 

MINGGU, 27 JULI 2025

VI DUNG TRINITATIS

       Bersama Koor Ama Exaudi HKBP Sipahutar 

 

 

1.    Marende    : BE No. 811 : 1 + 4  “ DI AHU MA HO TUHAN”

2.    Votum        : A. XV. A.6– D. XIII. 41

3.    Epistel        : 1 Musa 18 : 22 – 23

4.    Marende    : BE No. 814 : 1 + 3  “ SAI AJARI AHU TUHANKU”

5.    Jamita        : Mateus 6 : 9 – 13

TANGIANG MANGIDO HALUAON

Tangiang Ale Amanami, i ma tangiang na sai dipatubegehon di ganup parpunguan ni halak Kristen, isarana parmingguon, partangiangan, nang angka ulaon napinatupa ni Huria. Tangiang ndada holan hatahata sambing, alai isi ni roha do na pinasahat tu adopan ni Tuhanta i. Jala naeng tangkas antusanta taringot tu na martangiang, dipaingot do hita di bona ni turpuk on di ayat 7-8 asa uju martangiang unang marnoninoni songon binahen ni sipelebegu, ai dang ala ni hatanta i umbahen na dialusi Tuhanta i tangiangta. Antong ala ni aha do? Ai diboto Amanta Tuhan Debata do na ringkot di hita andorang so mangido dope hita. Dibagasan tangiangta tahatindanghon ma Tuhanta i marhuaso mangarajai ngolunta hombar tu lomo ni rohaNa. Di tangiang Ale Amanami diajari Tuhanta Jesus do songon dia hita martangiang (terstruktur dohot denggan).

Ale Amanami na di banua ginjang, pandohan on pataridahon parsaoran na rosu di angka na porsea raphon Tuhan i. Jala pandohanon mangajari hita paboa ingkon tangkas do tujuan ni tangiangta, i ma Ama na di banua ginjang i. Pasahathon diri dohot singkop, unang mardua roha. Ai angka na sinangkapan ni Jahowa sipasahaton-Na tu angka na hinongkop-Na na tau pangoluhon do. Diuduti muse dohot pandohan: sai pinarbadia ma goarMu, lapatanna unang neang/ langgus hita di tingki martangiang. Di tingki na martangiang i hita, tangkas ma taboto rap dohot ise do hita mangkatai. Amanta Tuhan Jahowa na badia i do donganta mangkatai, dibahen i marsitutu ma hita dibagasan haunduhon dohot serep ni roha.         

Di na martangiang hita molo tadok: Sai ro ma harajaonMu. Sait saut ma lomo ni rohaM di banua tonga on songon na di banua ginjang, lapatanna na tapangido tu Tuhanta i laho mangarajai ngolunta mangolu di portibi on hombar tu lomo ni roha ni Tuhanta i. Dang boi gait uju na martangiang hita, jala botoonta ndang hombar tu lomo ni rohanta na ingkon saut, alai saguru tu lomo ni roha ni Tuhanta i do. Nang pe di portibion dope hita, alai unang gabe marnalemba hita naeng marlomolomo hombar tu pingkiranta manang lomo ni rohanta. Aha naung disangkapi Tuhanta i di banua ginjang laos i do nang pasautonNa di banua tonga on (portibion), ndang gabe songon hadirion ni na deba (asing di roha alai asing dihatahon). Anggo Tuhanta i dia na dibagasan rohaNa, ido pasauton ni Tuhanta i. 

Lehon ma di hami sadari on hangoluan siap ari. Udut tu ayat 8 i do, diboto Amanta na di banua ginjang i do na ringkot di hita. Sude do rade diadopan ni Tuhanta i, jala sarihononNa do ngolunta, ndang pasombuonNa hita anturaparon. Hombar tu pangidoanta di tangiang Ale Amanami, hata Lehon ma di hami sadarion hangoluan siap ari anggo praktekna lobi sian na ringkot di ngolu sadari i do natahirim ganup ari. Umbahen i do sai adong jumpang hita sipata di na sada nunga suksuk alai di na sadanari ndang adong dapotna. Molo tahangoluhon do tangiang on, nda molo suksuk di hita dilehon Tuhanta i berengonta ma angka na dangol i gabe hita ma parhitean ni Tuhanta i sumarihon asa dapotan ngolu siap ari (berilah kami pada hari ini makanan kami yang secukupnya) nang angka donganta i. Unang nian sipanganonta marlobilobi (marbolongan), hape godang dongan na mangharingkothon i unang paula so ida.

Sesa ma dosa nami songon panesanami di dosa ni angka na mardosa tu hami. Angka naung manjalo asi ni roha ni Debata Amanta marhite hamamate ni Tuhanta Jesus Kristus di hau pinorsilang laho manesa dosanta, rade ma mangorom rimasna. Nunga tung tangkas sahat asi ni roha ni Tuhanta i hita, unang be mulakulak hita mardosa. Keterbukaan untuk mengampuni orang lain, merupakan buah dari pengampunan Yesus Kristus dalam hidup kita. Ai naung jumolo do Tuhanta i manesa dosanta, alani angka siihuthon Kristus na mananda asi ni roha ni Tuhanta i ndang tagamon so ungkap rohana manesa dosa ni donganna (mengampuni).

Unang hami togihon tu pangunjunan. Palua ma hami sian na jahat. Ai Ho do nampuna harajaon dohot hagogoon dohot hasangapon ro di salelenglelengna. Amen. Tapangido do gogo sian Tuhanta i unang madabu hita tu pangunjunan, asa sai diramoti jala dipatau hita mangolu dibagasan hatigoran nang pe mangadopi angka parjahat. Marhuaso do Tuhanta i paluahon angka na porsea i sian pangago, tahi ni parjahat. Dibahen i tapelehon ma ngolunta on hibul tu Tuhanta i. Di sude angka pambahenan ni Tuhanta i di ngolu ni angka nahinongkopNa i tahatindanghon ma: Tuhanta i do nampuna harajaon dohot hagogoon dohot hasangapon ro di saleleng ni lelengna, jala ndang adong na tuk mangambati i. Amen

Diskusi:

1.      Boha do hasomalanta martangiang, sai na tapangido i do tahirim patuluson ni Tuhanta i manang nunga rade hita manjalo nasinangkapan ni Tuhan i tu hita? Ai sangkap na ummuli do disangkapi Tuhanta i pasahatonNa tu hita.

6.    Marende   : BE No. 813: 1 – 2 “ PANGIDO HAMU MA”

7.    Tangiang  : Sian ruas na ro

8.    Marende   : BE No. 217 : 6 + 7 “JAHOWA DO DONGANKU”

9.    Tangiang  : Sian na manjabui

10.  Marende   : BE No.789 : 1…“LULUI HAMU…”                           (Pelean)

11.  Tangiang Ale Amanami – Pasupasu.

Pdt. Agus Tampubolon, M.Div.

(Pendeta HKBP Resort Labuhanruku)