Jamita Jakobus 2:1-13

JAKOBUS 2, 1 – 13

Oleh : Pdt STP Siahaan S.Th MBA

Hamu angka dongan!

Di na sahali ro do sahalak dolidoli mangaririt tu jabu ni sahalak anakboru. Tung sederhana do pamangkeon ni dolidoli on, pangkasna pendek jala panghataionna tung lambok. Disungkun inang ni si boru ma ibana manang aha karejona. Dialusi ma: Songon i ma nantulang, marhais martuduk dope, asal ma dapot mangan, ninna. Aha ma didok inang ni si boru i ? “Marpikir ma jolo ito, ai kebetulan nunga pinaorohon hian borunami on tu paribanna. Mulak balging ma si baeo.

Sabulan dungkon i, ro ma muse sahalak dolidoli laho mangaririt boruna i. Ianggo si baeoon antong tung parlente do, bajuna pe na arga jala uli, marsedan na uli, marjom tangan na arga, marcincin mas na balga, tar gumanjang obukna, markumis, tung uli jala tongam ma idaon. Disungkun inang ni si boru ma ibana, aha karejona. Dialusi ma: General Manager ni sada perusahaan ekspor impor. Jala dipaboa, ia natorasna nuaeng markalapa sawit ma hampir saribu hektar. Pintor minar ma bohi ni inanta i. Pintor ditamuei ma mansai denggan … pokoknya diservis habis-habisan ma. Dung i pintor disungkun ma: “Boha do rencanamu, andigan ma pasautonta bogasmu dohot borungkon?, ninna Alai dialusi si dolidoli ma: “Jolo husungkun ma jolo inongku, nantulang”, ninna.

Saminggunari, ro ma muse si dolidoli i. Bajubajuna, obukna, sipatuna pas songon si dolidoli pangaririt na parjolo i; alai cincinna, jom tanganna dohot sedan-na pas songon si pangaririt na paduahon i. Pintor diadu inang ni si boru ma ala diida sedan i, jala pintor disungkun: Ai boha do didok eda, andigan ma pasautonta?. Dialusi si dolidoli i ma: Sundat ma nantulang, ai nunga hape dipaorohon hamu itoan i tu paribanna. Dung i pe asa tarjolma inanta i, dipamanat ma, ai sidolidoli na parjolo i do hape. Jala tutu, i do si dolidoli pangaririt na parjolo i, laos i do na paduahon, ai na menyamar do ibana asa ditanda ibana parrohaon ni parboru i. Gabe sundat ma marhelahon na mora i ala siida bohi.

Hamu angka dongan! Songon i do nang na masa di huria hasahatan ni surat Jakobus on. Di angka parpunguan, sai masa do, molo ro na mora disambut ma mansai luar biasa, dilehon inganan terhormat, penuh kehormatan. Alai molo halak na pogos do na ro, dianggap sepi ma i, gariada tahe didok: di pathon ma ho hundul … lapatan ni i, jongjong ma ho disi! Ukuran napinake nasida laho menentukan sikap maradophon jolma ima ukuran na tarida, ukuran lahiriah. Angka ruas ni huria diukur nasida ndada songon jolma, alai diukur sian hamoraonna. I do ala didok si Jakobus tu huria i: “Unang ma siidaida bohi hamu” (ayat 1)

Dipaingot si Jakobus huria i, paboa songon ambasang do torop jolma; uli idaon di duru alai busuk dibagasanna. Songon i do di turpuk on. Halak na mora, na disambut dengan penuh kehormatan, justru angka i do na paporsukporsuk nasida, na mamboan nasida tu pamongkihi, na manarat nasida tu pengadilan (ayat 6-7). Ai ala adong hamoraonna, boi do nasida bertindak sewenang-wenang, marlomolomo tu angka na pogos; diporo nasida do hodok ni na pogos i; molo adong na mangalo, diboan ma i tu pengadilan; hape disi pe, tong do hepeng ni na mora i na pamonanghon na mora i. Ala ni i ma gomos didok si Jakobus: unang siidaida bohi hamu.

Tuhanta Jesus pe, diae do na songon i. Di Jesaya 53 didok do, ia Tuhanta i, ima naposo ni Debata, tung halak na lea do, rupana pe mansai roa, ndang adong na boi mambahen tertarik jolma tu Ibana, ala ni i ma gabe dipasiding halak Ibana. Anak ni tukang hau sian Nazareth do Ibana, kelas menengah, na so mararta. Na humansitna, uju dibahen Jesus angka tanda halongangan, tung sude do jolma paihutihut Ibana; alai dungkon disarat Ibana tu jolo ni panguhum, tung sude do natorop i muse mandok: parsilangkon ma Ibana. I ma angka halak siidaida bohi. Hape ala ni hapogosonNa i do gabe mamora hita, ala ni haleaonNa i do gabe marmulia hita.

Hamu angka dongan! Sai dijamothon Hata ni Debata do on tu hita, asa unang marnida bohi, na olo paleahon halak ala pogos alai pasangaphon halak ala mamora, na olo papeolhon uhum, na birong gabe bontar, na mambahen na sala gabe sintong ala na mora jala parhepeng, alai tu na pogos na sintong i gabe na sala. Di Rom 2, 11 didok do: Ai ndang siida rupa anggo Debata. Sarupa do uhuman tu na pogos dohot tu na mora, na lea dohot na sangap, rakyat jelata dohot penguasa, ai sada do ukuran bahenon ni Debata ima haporseaon. Tu halak Kristen pe didok si Paulus paboa ndang adong imbar ni Gorik dohot Jahudi, baoa dohot boruboru, na pogos dohot na mora. Dos do hita di jolo ni Debata.

Ala ni i, ukuran sipakeonta laho manontuhon sikap tu jolma ndada arta manang sangapna, alai hajolmaonna do. Manusia yang patut dihargai adalah manusia yang menghargai kemanusiaan sebagai mahluk ciptaan Tuhan. Manang na mora, manang na pogos, manang na sangap, manang na lea, molo diargahon ibana do donganna jolma songon na tinompa ni Debata, halak sisongon i do na patut sihormatanta. Alai sebaliknya, na so mangargahon donganna jolma songon jolma na tinompa ni Debata, manang na mora i, manang na sangap pe i, ndang patut i hormatanta, gariada sipaleaon do i.

Songon i do sikap ni Jesus tu jolma. Ndang hea dibedakan Jesus manang ise jolma i, na pogos manang na mora, na sangap manang na lea, na hipas dohot na marsahit, sude do dihobasi, sude do didongani. Gariada tahe sikap umum ni Debata dohot Jesus tu jolma ima berpihak kepada kaum lemah, kaum tertindas, kaum miskin. Jala ingkon i do sikap ni huria dohot angka na porsea.

Hamu angka dongan! Ra mansai ringkot peoponta nidok ni turpuk on, molo lomo do rohanta adong haimbaruon di angka hurianta. Ai na parpudi on, tarlobi dungkon taon 70-an, sanga do madabu hurianta tu pangalaho siida bohi. Uju i hehe ma pandaraman ni halak Batak na di pangarantoan. Diparlehon ma sumbanganna tu huria, gabe jongjong ma angka gareja na uli. Alai aha ma na masa? Gabe terpinggir ma, metungmetungon ma angka na pogos. Gabe tubu ma hata na mandok: Ai anggo garejanami on, gareja ni si adu i do i, na mora na sian Jakarta i, anak ni ompu si adui i. I do ala pola hea masa di sada huria, adong hundulan na khusus tu sada keluarga apala di hundulan parjolo di gareja i, na asing, na tandi sian hundulan ni halak na asing, jala ndang boi hundulan ni manang ise i ianggo so keluarga nasida. I ma ala gumodang sumbangan nasida pajongjong gareja i. Di na deba sai adong si parhata oloan, siguru dok; nang pe naung diputushon rapot ni parhalado, ingkon jolo sungkunon do amanta on; aha didok, ingkon i do na saut; molo ndang, dipaso sude bantuanna. Hea do masa muse, ala ro ma na mora mangalehon sumbangan, ingkon jongjong ma sude ruas ni huria, dung i pe asa dipasahat sumbanganna i. Hape nanilehon ni na pogos, ditingtingkon pe ndang, ala mansai otik. Hape di nasahali didok Jesus do: Dia do na gumodang na nilehon ni na mora i sian sisarimis na nilehon ni ina na mabalu i? Didok Jesus: Gumodang do nanilehon ni ina na mabalu i; ai ianggo na mora i, sian lobilobina do i dilehon alai ianggo ina namabalu i sian hahuranganna do, i do sandok ngoluna.

Ra nian, adong do on tadingtadingan ni habatahonta dalam hal on. Ai di halak Batak adong pandohan: matanggak mida bohi. Di angka adat, didok si Jurtul do, molo Siahaan parmotor i, sipaimaon do nang pe naung male; alai molo Siahaan parbeca i do na so ro dope, tole ma, mangan ma hita, mandapoti ma i. Molo di pesta pe, sai gumodang do tumpakta tu parpesta na mora; ianggo tu parpesta na pogos i, leas do tumpak i jotjot tabahen; hape satingkosna, i do siurupan. I do gabe didok hata i : ditambai …. ni manuk do …… ni horbo.

Sikap na songon i ingkon humatop ambolongkononta, ai na mangaleai hajolmaon do sikap na songon i. Tanpa melupakan orang-orang kaya, gereja harus senantiasa berpihak kepada kaum lemah, orang yang kurang beruntung, yang tertindas dan yang miskin. I do hakekat ni Barita Nauli. Tajaha di Lukas 4, 18 – 19, na patuduhon keberpihakan ni Jesus tu angka na pogos, na tarhurung, na marsahit. I do hakekeat ni asi ni roha, dohot holong ni roha. Asi ni roha ni Debata ima di na olo Debata marsaor, bersolidaritas tu hita halak na lea, na pogos dohot pardosa on dibagasan Jesus Kristus. I ma solidaritas ni Debata. Jala ingkon sikap na songon i ma sipatuduon ni huria tu sude jolma. Unang be adong na mora na mandegedegei na pogos marhite na mangalehon upah na patoruhu, manang parhepeng na pabungahon hepengna marhite bunga ni hepeng na patorbanghu. Penghinaan tu angka na pogos dohot tu orang lemah do i. Alai urupi na gale, urupi na pogos, ido sikap na denggan.

Hamu angka dongan! Tarlobi di angka huria na di negara-negara na berkembang songon hita on, mansai ringkot on peoponta. Ai di negara na berkembang songon hita on, perbedaan ni na mora tu na pogos lam nalnal; hak-hak azasi ndang pola ringkot; keadilan jotjot dipapeol; angka na lea, na pogos, na lemah jotjot tertindas. Disi ma huria ingkon marsoara, jala marpambahenan laho mangondihon, membela angka na pogos, memperjuangkan keadilan bagi orang-orang tertindas. Molo sanga huria sai berpihak tu penguasa dohot tu na mora dohot na gogo, ima awal kehancuran ni huria, ai gabe huria penyiksa ma huria na songon i, i ma huria siidaida bohi. Alai huria na missioner, huria na injili, ima huria na berpihak, mangurupi dohot membela hak-hak ni angka na pogos, na lea, dohot na so mardihadiha.

Ala ni i, unang ma siidaida bohi hita. Alai taurupi ma na pogos, na tertindas, na lea. Bereng jala perlakukan ma donganmi songon jolma na tinompa ni Debata. Unang bereng ibana sian sudut materi manang hasangapon. I do hakekat ni Barita nauli dohot huria na missioner.

Amen.