“J a h o w a M a n j a g a” sebuah Perenungan sian Pesalmen 121:1-8

            Psalm 121: 1-8=> “J a h o w a   M a n j a g a”

      Hamu dongan na marlas ni roha! Nunga taripar hita tingkion  marhite hagogoon ni Debata. Ndang na habilangan asi ni rohaNa  diramoti ngolunta mamolus las ni roha jala dipargogoi uju mangadopi parungkilon. di Hamamasa dohot di hararat ni Corona Covid 19 0n namansai jorbut situtu na pola mambahen hita biahaton jala agoan hosa torop jolma di portibion Na umbalga sian i, disesa Ibana dosanta asa talup hita manjalo asi ni rohaNa na godang i. Alani i, tama situtu pasahatonta mauliate ni rohanta tu Ibana jala tadok ma:

        Puji ma Jahowa, ale tondingku, jala nasa rohangku di bagasan mamuji goarna na badia i. Puji ma Jahowa, ale tondingku, jala unang tung halupahon denggan ni basana sudena.

         Marudut ari, marganti bulan jala pasingkat sorin nang angka bulan ndang mansohot dope pangontak ni hararat ni Covid 19 on. Ngolunta pe sai busisaon andigan do salpu angka mara on, alai torus do mardalan. Tudos tu parau na mamolus laut na bidang manalpui galumbang paima sahat tu labuan. Nuaeng tubu ma sungkun sungkun di rohanta, mardongan biar dohot lomos ni roha andigan ma salpu namasaon . Songon dia ulaning masa depan nami, masa depan ni parngoluon Ekonomi dohot masa depan ni Parugamoon? Pangalaho na umum do i di hajolmaon. Ai molo tubu biar, gabe adong do roha mangalului parondingondingan na tau mangaramoti diri. Alai molo so adong be biar ni jolma taringot tu na naeng masa di ngoluna, naung dirina nama dipangasahon, soadohononna ma Tuhanna. Hape talpe do ganup jolma tu parmaraan nang tu hamatean di ganup tingki dohot di sude inganan. Didok par-Psalmen i= Songon duhutduhut do ariari ni jolma na gale i, marbunga ibana songon bunga di ladang. Ai dibolus alogo ibana, jadi ndang disi be, jala ndang tartanda be ingananna i (Psalm 103: 15-16).

I do nang pergumulan ni par-Psalmen di turpuk on. Mangaranap ibana dao tu jolo di dalan sidalananna. Diranap nang dolok dohot rura. Gok mara dalan sibolusonna i. Hape ingkon bolusanna do i. Tubu ma sungkunsungkun huhut mardongan biar: Sian dia do ulaning ro pangurupion tu ahu? Alai ro ma alus sian ginjang mandok: Sian Jahowa Sitompa langit dohot tano on sambing ro pangurupion. Lapatanna, ndang sian jolma ro pangurupion i, alai sian Debata do. Tung sura songon halongonan humaliang hita, jala hira na so adong na tau mangurupi, alai anggo Debata sai tongtong do mian di sude inganan. Lam dipagomos do pandonganionNa asa tung pos rohanta borhat mandalani taon on, didok Ibana: Ndang tagamon loasonna tarsulandit patmu, ndang tagamon nok mata ni Sijaga ho. Sada sifat ni parjaga na so muba sian na jolo sahat ro di nuaeng, i ma: Ndang jadi nok. Ingkon torang roha dohot pingkiran arian manang borngin pe. Aut nok mata ni parjaga, masuk ma panokko manursahi ugasan ni tuanna. Asa parjaga ingkon tongtong do siaga. Songon i ma Tuhanta i, ndang olo nok manjahon langkanta unang marmara hita. Alani i do umbahen pos roha ni si Daud mandok: Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu tungkotmu dohot batahim mangapuli ahu.

Antong pos ma rohanta laho mandalani taon na imbaru on. Sai olo ma hita pasahathon dirinta tu gomgoman ni Debata Parmahan na denggan roha i. Jala masitabian ma hita nuaeng dohot sogot rap dohot angka donganta, huhut ma tadok:

     Sai jagaon ni Jahowa do ho, jala jagaon ni Jahowa do tondim sian nasa parmaraan, ai ndang tagamon nok mata ni Sijaga ho. Antong posma rohanta di sandok angka hamaolon alani Covid 19 on ai adong do Tuhanta Manjaga hita di sude parungkilonon, Manang aha pe namasa tiponhu ho Nabasa na marholong roha i Amen