PARMINGGUON KELUARGA DIGANUP BAGAS NI RUAS HKBP DISTRIK VI DAIRI MINGGU, 05 APRIL 2020

PARMINGGUON KELUARGA

DIGANUP BAGAS NI RUAS

HKBP DISTRIK VI DAIRI

MINGGU, 05 APRIL 2020

=========================================================

“IDAMA NA RO DO RAJAMI”

I.      PARHOBASON:

1.       Partangiangan on ni uluhon ni Ama manang Ina. Diaturhon ma na mamboanhon tangiang pangondianan Diparade hian ma inganan ni pelean. Andorang so dipungka partangiangan on denggan ma jolo diparsiajari angka ende na di bagasan acara on. 

II.                  PARMINGGUON: (U = Uluan; K = Keluarga)

1.         Marende BE No. 6 : 2   “Puji Jahowa na sangap”  BL. 56

Puji Jahowa sigomgom sude parluhutan,  na manogihon ho songon niiring ni tangan

dohot hosam songon hombar tu roham sai diramoti ibana.

2.         VOTUM/ INTROITUS:

U:            Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia.  Amen.

K:            Disuru Debata do AnakNa gabe pardengganan taringot tu dosanta.

U:            Hamu ale angka dongan, molo songoni dihaholongi Debata hita, ingkon dohot do hita masihaholongan sama hita. Haleluya.

K :         (Mangendehon) Haleluya… Haleluya… Haleluya…

U:            Martangiang ma hita. Ale Debata pargogo na so hatudosan, Amanami na di banua ginjang! Mauliate ma rohanami tu Ho, ala dilehon Ho AnakMu na sasada i tu hami jala dipalua Ho hami sian gomgoman ni sibolis. Hupangido hami tu Ho: Sai ramoti hami di bagasan hataM, asa margogo hami, jumpa masa hasusaan dohot hagogotan. Sai sesa ma dosanami dohot pangalaosionnami di hataM na badia i. Sai parbadiai ma rohanami marhitehite TondiM, jala pamasuk hami tu hangoluan sogot, asa pujionnami Ho di si ro di saleleng ni lelengna, marhitehite Tuhan Jesus Kristus Tuhannami.

3.         Marende BE No. 712:1“Togu au ale Jahowa ”    BL   712

                   Ro ma Ho aek hangoluan na pahisar tondingki

Sai di jolo ma Ho Tuhan dohot tiang apiMi

Sipartogi na gumogo, Ho ma lombulombungki

Ho ma lombulombungki

4.                   Patik

U:           Patik di Bagasan Minggunta Sadarion ima sian Psalm 50 : 15 “ Jou ma au jumpa ari hagogotan, asa hapulua ho, asa dipuji ho Ahu Antong rap mangido gogo ma hita sian Tuhan Debata laho mangulahon nahombar tu PatikNai

K:            Ale Tuhan Debata sai pargogoi ma hami mangulahon na hombar tu PatikMi Amen

5.    Tangiang Mangido haluaon sian hamamasa ni parsahiton

     U =     Ale Jahowa unang uhumi hami portibion dibagasan rimasmu, jala unang ajari hami dibagasan parpiar ni murukmu

  K  =    Asi ma roham di hami ale Jahowa, Angka hitir jala biahaton do hami alani sahit namasa di partingkianon Virus Covid 19 manang Virus Corona, rohanami sai marlobuk do panghorhon ni namasai, sadia lelengon ale Tuhan ? palua hami jala pamalum hami 

    U =      Sai marpangulahi ma rohaM ale Jahowa, palua ma hosanami, urupi hami ala ni denggan ni basaM 

   K =    Sai olo ma Ho Ale Jahowa haporusan nami di tingki hagogotan, asa marhaposan tu Ho hami ale Jahowa angka na tumanda GoarMu

   U =        Hehe ma Ho Ale Jahowa, Patoltolma tanganMu ale Debata, sai unang halupahon hami, sai ponggolhon ma botohon ni angka pangago nang angka sahit nanaeng mangago hami , patinggilma pinggolMu manangihon hami

   K=     Ale TUHAN, pargogoi ma hami Jala paherbang tanganMu Mamasumasu hami, dulo ma hami  Tuhan

Sude = Mangendehon B.E No. 733 : 1 “Dulo ma au on o Tuhan”          BL. 733

Dulo ma au on o Tuhan  bege anggukkon, Ro do Ho tu angka dongan topot ma au on. Jesus  Tuhan bege anggukkon,  Ro do Ho tu angka dongan topot nang au on.

  K    = Ale Tuhan, hupangido hami ma tu Ho: Lehon di hami hagogogon, hahipason  nang haporseaon na togu , Lehon di hami udan pamornohi, mamornohi suansuanan nami ,  manang aha pe na masa tioponku Ho Nabasa na marholong rohai

   U  = Taingot ma hata ni Tuhanta na mandok “Pasahat ma dalanmu Tu Jahowa, Jala haposi Ibana asa Ibana Paturehon Antong holong na sian Debata margogoihon angka na porseai . Hatauon na sian Debata ma manjagai angka naposoNa sian angka parmaraan. Amen  Laos tatopoti ma dosanta na godangi tu Tuhan Debata

6.    Manopoti Dosa dohot Bagabaga Hasesaan Ni Dosa  

U :              Ale Debata Amanami na badia jala na gok asi ni roha, manang na piga hali hami ro tu adopanMu, huparhatopot hami do sude angka dosanami na godang i. Tung mansai jotjot do hami manimbil sian dalanMu, ndang mangulahon lomo ni roham. Nuaeng ro hami tu joloM mangido asi ni rohaM: Sai sesa ma sude dosanami jala unang paingotingot sude dosanami na godang i.

K :              Ale Tuhan, asi ma rohaM di hami halak pardosa on! Palua hami

Sude          (mangendehon BE.No. 683“DiadopanMu Jesus”)

   Di adopanMu Jesus, lea tutu do diringkon

   Dibaen godang ni dosangkon, diadopanMu Jesus.

U :              Huria ni Debata naung manopoti dosa, nuaeng tabege ma hata baga-baga ni Debata, taringot tu hasesaan ni dosanta: Songon on do hata ni Tuhan Jahowa: Nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu do sipalua ho. Hasangapon ma di Debata na di ginjang!

K=            Amen !

7.                   Marende BE No. 806 : 1”Aha pe masa di ngolumon”   BL. 806

                            Aha pe masa di ngolumon, Tuhan manjaga ho

HolongNa do mangondihon ho, Tuhan manjaga ho

Tuhan manjaga ho, las pe roham, marsak pe ho

Sai di ramoti ho, Tuhan manjaga ho

8.         Epistel:  jesaya 52:7-12

U:      Epistel dibagasan Minggunta sadarion ima na tarsurat di Jesaya 52:7-12 Tajaha ma marganti sorin, Tangihon Ahu, hamu ale sitanda hatigoran, ho ale bangso naumpeop patikHu dibagasan rohana! Unang tung habiari hamu pangeleson ni jolma na galei, jala unang tung tahutan hamu mida panginsahion nasidai.

K:    Ai ingkon sude nasida panganon ni ngitngit songon ulos, jala ingkon panganon ni gulokgulok nasida songon imbulu ni birubiru; alai anggo hatigoranHu hot do rodi salelengnilelengna, jala hatauonKu marsundutsundut

U:    Ngot ma ho, ngot ma ho! Solukhon ma hagogogon, ho ale tangan ni Jahowa. Ngot ma ho songon di angka ari na robi, di angka sundut mulamula. Nda Ho doi na patunduk Rahab, naung manullang buea

K:   Nda Ho doi namangarsik laut i pasurathon angka pusat godang? Na mambahen angka tondolan ni laut gabe dalan, asa taripar sian I angka na pinaluaM

U:     Suang songoni ma mulak angka na tinobus ni Jahowa asa sahat tu Sion mardongan olopolop dohot las ni roha salelenglelengna di atas ulunasida. Jumpangan hahinsaon jala hahilason nasida, alai maporus ma anggo arsakarsak dohot hoihoi

K:    Ahu, Ahu sandiri tutu na mangapuli hamu. Tung ise ma ho, pola habiaranmu jolma na olo mate, manang anak ni jolma na tudoshon duhutduhut?

U:  Ima sahatna. Martua ma angka na tumangihon Hata ni Debata jala na umpeopsa.Amen.

9.         Marende BE No. 707 : 1 Hagogoon dohot Apulapul” BL. 707

     Hagogoon dohot apul-apul  do dilehon Tuhan I tu au,

Ganup ari au ditogu-togu  ganup tingki diondingi au.Ai hombar tu lomo ni rohaNa do dilehon Tuhan I tu au Ro marsorin arsak las ni roha haporseaon hu di patau

 17.  Manghatindanghon Haporseaon:

      U:      Tahatindanghon ma haporseaonta i, songon na hinatadinghon ni           donganta sahaporseaon di sandok portibi on. Rap ma hita mandok:

      H:        Ahu porsea ….. du. Amen !   (HUNDUL )

10.  TANGIANG PANGONDIANON:

11.   Marende BE No. 785: 1“Alo pangunjunan” BL. 785

           Alo pangunjunan sai benget ma ho Ai molo dung monang, lam togu ma ho

Angka hajahaton, sai patunduk ma Jesus pangasahon ingkon monang ho

Jalo pangurupion sian Tuhanta Jesus Dapot ho hagogoon mandopang musu i

12.   RENUNGAN:

“IDA MA NA RO MA RAJAM ”

(Johannes 12:12-19)

Di ari minggu sadari on sahat ma hita tu minggu Palmarum, laos marningot barita ni Tuhan Jesus na mamangoti huta Jerusalem. Marsuraksurak do pangisi ni Jerusalem manomunomu haroroNa. Dipambuat nasida angka maremare huhut dijoujouhon “Hosianna, Pinasupasu ma na ro marhitehite goar ni Tuhan i, Raja ni Israel.” Mansai uli do panomunomu nasida di Tuhan Jesus diharoroNa i, hape di tingki na diuhum Jesus, laos nasida do muse namarsurak, marsoara nagogo mandok “parsilangkon Ibana.”

Muba do parange nasida maradophon Tuhan Jesus. Sian na manjangkon gabe manulak. Sian na mamuji gabe manjehehon. Sian namanghalashon gabe manorui. Boasa masa songon i? Uju i dihaporseai halak Jahudi do na ro ma mesias nagogo jala na marhuaso, na tuk mangulahon ragam ni halongangan, jala na boi paluahon nasia sian penjajahan ni pamarenta ni Romawi. Dibege nasida do barita ni Jesus naung mangula ragam ni halongangan ni angka huta na marragam, laos ala ni i do, umbahen na ditomu nasida Ibana Hape sahat ma tu ari panguhuman ni Jesus, na so diula Jesus manang aha laho mangampini diriNa manang paluahon diriNa asa unang saut diparsilangkon. Dungi muba ma roha nasida, ai dang margogo hape Jesus i. Ndang sian haporseaon nasida manomunomu Jesus dihabobongotNa i tu Jerusalem, alai tung sian angka halongangan na binahenNa i do.

Di minggu Palmarum on, disulingkit do haporseaonta ganup. Na mura do tutu manghaporseai jala manjangkon Jesus uju denggan pardalan ni ngolu, alai na maol do i uju mangadopi ragam ni sitaonon hita. Sungkunsungkun ma rohanta “didia do Jesus i?”, “Na so margogo do Ibana paluahon ahu?” Lumobi ma di partingkian naborat na taadopi nuaeng on, dihamamasa ni pandemi virus corona (covid-19) na mengancam ngolu ni ganup jolma di liat portibi on. Pola marpanghorhon  godang bidang ni parngoluonta: kesehatan, ekonomi, relasi sosial, politik, dna. Gariada lumobi marpanghorhon tu peribadahanta, pola gabe itapapinda parmingguon sian bagas joro tu bagasta be. Ra sungkunsungkun do rohanta “Didia do ho Tuhan i?” na so tarpamalumNa do portibi namarsahit on?”

Alai unang ma songon pangisi ni Jerusalem hita, na gabe muba maradophon Jesus. Tahaposi ma, di partingkian natonggi manang napaet, hot do gogo dohot huasoNa, lumobi hot do holong dohot asi ni rohaNa mida portibi on. Ndada na ditadingkon hita. Ditatap do pardangolanta. Gariada tahe, marhite na masa on sulingkitonta ma haporseaonta tu Ibana, jamothononta ma parsaoranta tu Ibana, haunduhonta dihataNa, nang pangulahononta di holong na niajarhonNa i.

Lam tapasolhot ma ngolunta tu Ibana, tagogo mangido huhut mangelek asa tumibu salpu virus corona na jorbut on sian liat portibi on. Di Minggu Palmarum on ro Yesus ro Yesus mamongoti dirinta,pingkiranta asa mian Ibana di hita.Yesus na ro i mandok tu hita asa unang mabiar hita. Jangkon ma Ibana na ro i. Ibana do Raja na boi paluajon hita.

Amen.

Tabe sian Praeses HKBP Distrik VI Dairi,

13.     Marende BE No. 770:1  “Tu Debata mi                  BL 770:1-    (Pelean)

                  Tu Debatami na sun gogo i Sai maporus ma ho ganup ari

Di tanganNa doho molo musu ro Tung na sonang di ampuanNa ho,

Di tanganNa doho molo musu ro Tung na sonang di ampuanNa ho ho.

U    :  Tatangianghon ma peleanta: Ale Tuhan Debata Amanami, haroroan ni saluhut pasupasu na mauliutus, godang do hujalo hami sian asi ni rohaM. Mauliate ma di Ho, hupasahat hami ma nuaeng peleannami tu Ho, sai jalo ma i gabe pelean na hushus di di joloM. Pasupasu ma na niula ni tangannami jala ajari ma hami manghamuliatehon saluhutna i marhite parange nang pambahenannami. Ungkap rohanami asa sai ringgas hami pasahat pelean tu Ho hombar tu asi ni rohaM naung hujalo hami, marhite Kristus Jesus Tuhan nami. AMEN

K   :  (Rap Mandok): Tangiang Ale Amanami – Amen, Amen, Amen.

======================================================

Pelean  Parmingguon Keluarga, tu Huria :

Sian  Hami Keluarga           : ..........................................................................

Godang na                              : ..........................................................................

II Kor 9:7b “Ai dihaholongi Debata do na las roha mangalehon!”