1 JOHANNES 5:1-5 TANGIANG NI HALAK NA PORSEA

 

SERMON HKBP RESSORT KISARAN

JAMITA MINGGU ROGATE “Martangiang”,

TOPIK: TANGIANG NI HALAK NA PORSEA

 (DOA ORANG BERIMAN)

Jamita Minggu, 09 MEI 2021 EV: 1 JOHANNES 5:1-5

I.                  PATUJOLO

Surat 1 Johannes on disurathon si Johannes, ima sada sian sisean ni Jesus hirahira di taon 85-95 M. Diida si Johannes do mansai ringkot situtu panogunoguon manang parmahanion tu ganup halak Kristen hatiha i. Parsorion na masa ujui ima na lam tu raratna pangajarion ni angka panurirang pargapgap di tongatonga ni huria (1 Joh.4:1), na mandok dirina “AntiKristus” (1 Joh.2:18 dst.) manang Dosetisme. Dosetisme merupakan suatu paham/ajaran yang menekankan bahwa Yesus bukanlah Mesias atau Anak Allah, Tetapi Yesus hanya kelihatan sebagai Mesias atau Anak Allah (Dosetisme, berasal dari bahasa Yunani “Dokeo” yang artinya kelihatan/ seperti/ tidak sebenarnya). Alani do umbahen dipaingot si Johannes nasida asa tongtong marsihohot haporseaon nasida holan di Jesus Kristus, Ibana do Debata na gabe jolma jala Sipalua hita pardosa.

II.               HATORANGAN NI TURPUK

Di bagasan turpuk Jamita on dipapatar si Johannes do taringot tu haporseaon. Ima Naeng ma mangolu jala lam togu haporseaon ni halak Kristen ujui, atik pe tongon mangadopi angka parpoda hahiluon na naeng manait rohanasida sian Jesus Kristus. Asa marhite poda sipaingot di bagasan turpuk on, naeng ma manontong haporseaon ni halak Kristen ujui. Dipatorang marhite 3 Poin:

 

Na Parjolo, Tudos naung tubu sian Debata do angka na porsea di Jesus Kristus (ay.1)

       Dipatuduhon ma ngolu naimbaru di angka naung tinobus ni Debata sian uhuman ni dosa. Memang najolo hatoban ni dosa do hita, alai dung dipalua Debata hita sian uhuman ni dosa i, ndang gabe  hatoban ni dosa be hita, alai gabe anak hinaholongan ni Debata. Mangolu di bagasan haimbaruon (Hidup Baru) ma angka jolma pardosa i, jala naung tubu di bagasan Debata. Boi do Taingot songon dia sungkunsungkun ni si Nikodemus uju dijumpangi ibana Jesus tongon di borngin ni ari, didok ibana ma tu Jesus: “Songon dia ma tarbahen tubu muse halak, ia naung matua? Tung haulahansa ma mamasuhi siubeon ni inana, asa tubu?”(Joh.3:4). Dungi didok Jesus ma: Tung situtu do na hudok on tu ho: Ia so tubu jolma sian ginjang, ndang tarbahensa marnida harajaon ni Debata (Joh.3:3), jala didok Jesus muse: Tutu situtu do na Hudok on di ho: Anggo so tubu jolma sian aek dohot sian Tondi, ndang habongotansa harajaon ni Debata (Joh.3:5). Marhitehite on, botoonta ma paboa halak na porsea di Jesus Kristus, ingkon marhangoluan naimbaru. Nunga tanggal be ngolu na buruk na di bagasan dosa, nunga bongot ibana tu ngolu naimbaru di bagasan Jesus Kristus naung paluahon jolma pardosa i. Jala na gabe tanda ni halak na porsea manang naung mangolu di bagasan haimbaruon, ingkon mangulahon holong ni roha, ima holong maradophon Debata suang songon i holong maradophon dongan jolma doshon dirina sandiri (pat.Mat.22:37-39). (Vertikal dan Horizontal)

 

Napaduahon, Targoar do angka na porsea songon anak ni Debata na ingkon manghaholongi Debata jala mangaradoti patikNai (ay.2-3)

       Targoar do hita anak ni Debata, ima angka na porsea di Debata. Sian dia do tarida na tutu tahaholongi Debata? Holong ndada holan di pamangan sambaing manang hata sambing, (holan H) ingkon tarida do I marhitehite parangen ta, pambahenan ta siganup ari. Didok di 1 Joh.3:18)). Hamu angka anaha, unang ma hatanta dohot dilanta manghaholongi; naeng ma marhitehite pambahenan dohot hasintongan.

       Asa tangkas taboto, ai marhitehite holong ni roha ido patuduhon parbue ni haporseaonta di Tuhan Debata. Haporseaon ipe songon ido: Anggo so adong pangulaonna, naung mate do hadirionna (Jak.2:17). Jala molo tahaholongi Debata dohot donganta jolma ido dalanta mangaradoti patik i. Molo tadok holong rohanta di Debata, tontu rade do hita di bagasan haunduhon mangaradoti nasa patikNa di bagasan ngolunta.

 

Na Patoluhon,  di ay.4-5Monang do haporseaon laho manaluhon portibion

       Na manompa portibion ro di nasa isina ima Debata, tontu Ibana do na gumogo jala na tumimbul sian saluhut na adong di portibion. Jala angka na porsea na targoar do tubu sian Debata, dilehon Debata do hagogoon laho manaluhon portibion. Boasa ingkon taluhononta portibion? Ala tung mansai godang do na masa di portibion, ima las ni roha, arsak ni roha, angka parsorion, nang pangelaela ni sibolis I pe boi do manait rohanta gabe lomos ma haporseaonta jala mandao sian Debata.

       Halak Kristen ingkon boi do gabe siparmonang  di bagasan ngoluna siapari. Monang disaluhut, manaluhon pangela ni sibolis. Hamonangan i boi do jumpangta  marhitehite haporseaonta di Jesus Kristus. Molo Rap dohot Tuhan i, boi do jumpanganta  hamonangan na manontong.

Nunga talu sibolis, nunga talu hamatean dohot uhuman ni dosa di baen Tuhanta i marhitehite haheheon ni Tuhan Jesus Kristus Sipalua i. Nunga jumolo dipataridahon Debata huasoNa di portibion marhitehite Jesus Kristus AnakNa i. Naung mate, jala hehe di ari patoluhon, manaek tu banua ginjang laho paradehon inganan naumuli di angka na porsea di Ibana. Jadi, di bagasan haporseaonta di Tuhan Jesus Kristus, dipamonang do hita. Ingkon monang do hita maralohon angka pangago i, sibolis dohot angka na naeng mangaliluhon haporseaonta songon na niadopan ni halak Kristen di huria na parjolo i.

III.           PANIMPULI

Nuaeng masuk ma hita tu Minggu Rogate, ma marlapatan tangiang dohot topik ni Minggu ta ima “Tangiang ni halak na porsea”, marhite turpuk on, diarahon do hita asa tongtong marsihohot haporseaonta songon halak Kristen. Tontu Ragam do na boi masa di bagasan ngolunta siganup ari na mambahen lomos haporseaonta, boi doi sian dirinta sandiri, keluarganta, nang sian humaliangta be. Alai songon halak na porsea hita di Tuhan i naso jadi gabe gale haporseaonta nang lilu panandaonta di Debata. Talup do hita mamolus saluhutna i molo porsea hita di Debata.

Aha do dalanta pagomoshon haporseaonta di Ibana?

Alusna: TANGIANG.   

Marhitehite tangiang do tapasahat saluhut na di bagasan rohanta tu Debata, hamauliateon ni roha, angka pangidoan dohot hasesaan ni dosanta i. Singkop do saluhut tangiangta di bagasan Jesus Kristus Sipalua i.

 CPdt Frans Julus Sianturi STh

 

Amen.