SERMON HKBP RESSORT KISARAN;
JOHANNES 3:31-36
TOPIK: DISURU DEBATA DO ANAKNA JALA DIPASAORHON DO TONDINA
(ALLAH MENGUTUS PUTRANYA DAN MENGARUNIAKAN ROHNYA)
I.
PATUJOLO
Ia buku Johannes on ima sada sian Evangelium na sinurathon ni Johannes
sisean na hinaholongan ni Jesus hirahira taon 80-95 M. Na sipardohot do ibana
songon saksi di saluhut na masa tu Jesus, sahat ro di hananaekNa tu banua
ginjang. Dipapatar si Johanes do ianggo Jesus ima Hata ni Debata naung gabe
daging jala mangolu. Ibana do si Palua naung pinarbagabaga ni Debata di padan
na robi. Tujuan ni panuratan ni buku on ima:
a)
Asa
gabe porsea angka na so porsea hian di
Tuhan Jesus,
b)
Asa
marsihohot di haporseaonna ganup naung porsea di Jesus, ndang mura terpengaruh
di angka hinararat ni poda haliluon na pinasahat ni panurirang pargapgap hatiha
i.
II.
HATORANGAN NI
TURPUK
Ia Johannes bindu
3 on ima papatarhon taringot tu parjumpangan ni si Nikodemus dohot Jesus.
Nikodemus ima sahalak sian Parise jala sintua ni Jahudi do ibana. Na ro do
Ibana bornginborngin manopot Jesus ala naung binerengna tanda halongangan naung
pinatupa ni Jesus. Sian I, tubu ma sada pangantusion naimbaru di si Nikodemus
taringot tu ngolu na marhaimbaruon. Na ingkon tubu do jolma i sian ginjang, asa
idaonna harajaon ni Debata. Na marlapatan, ndada mulak muse jolma naung tubu i
tu siubeon ni inana asa tubu muse, alai naeng ma tubu ibana di bagasan
haimbaruon marhitehite haporseaonna di Jesus Kristus Sipalua i. Ido umbahen
didok Jesus taringot tu holong ni Debata di portibion marhitehite hataNa di Joh.3:16: Ai songon on do holong ni roha ni Debata di portibion, pola do AnakNa na sasadai
dilehon, asa unang mago ganup na porsea di Ibana, asa hangoluan na
salelenglelengna di ibana
Dung salpu turpuk
on, diuduti si Johannes Pandidi ma manghatindanghon hadirion ni Jesus dung masa
parsalisian di angka sisean ni si Johannes dohot halak Jahudi ujui alani
pandidion na pinatupa ni Jesus dohot angka siseanNa i di luat Judea. Ido
umbahen dihatindanghon si Johannes Pandidi ma ise do Jesus tu angka natorop
ujui. Jala dihatindanghon ibana do paboa Jesus patut ma lam ganda, alai ianggo
ibana lam moru ma (ay.30).
a. Jesus
Kristus ima na ro sian ginjang jala mangatasi saluhutna
Jesus Kristus ro sian banua ginjang,
ndada sian tano on. Ibana do Anak ni Debata na sinuruNa ro tu portibion
marrupahon daging/jolma manisia laho paluahon jolma sian uhuman ni dosa i. Rade
do Jesus manadinghon hasangaponNa i tuat tu banua tonga on marsaor dohot jolma
manisia, jala Ibana maneahon diriNa sahat tu na mate di hau pinarsilang dalan
paluahon hita jolma pardosa sian uhuman. HagogoonNa mangatasi saluhutna na
adong di portibion. Ndang tarpatudos hita huaso ni Debata di bagasan Jesus
Kristus maradophon huaso na adong di portibion. Asa somba tu goar ni Jesus nasa ulu ni tot, na di banua ginjang i dohot
na di tano, nang na di toru ni tano, jala asa nasa na marsoara marhatopothon:
Jesus Kristus do Tuhan, bahen hasangapon ni Debata Ama (Plp.2:10-11).
b. Jesus Kristus manghatindanghon na niidaNa dohot na
binegeNa
Aha do na niida dohot na binege ni
Tuhanta Jesus? Tontu harajaon banua ginjang, ai sian ido haroroNa ndada sian
portibion. Dipapatar Jesus do barita las ni roha, barita nauli taringot tu
haluaon na pinatupa ni Debata. Dijouhon Jesus do asa marhamubaon ni roha saluhut
jolma pardosa i asa tarjangkon nasida haluaon i. Ai hamubaon ni roha do dalanta
manjangkon haluaon dohot manghamauliatehon holong ni Debata mida hita pardosa
on. Dihatindanghon Jesus do Debata Sitompa saluhutna jala manghaholongi
portibion, umbahen na disuru Ibana laho manghophop portibion.
c. Jangkon ma na
hinatindanghon ni Jesus
Dihatindanghon Jesus do ise Debata,
Anak dohot Tondi Parbadia. Asa naeng porsea saluhut na umbegesa jala
manghangoluhon hata i di bagasan ngoluna siapari. Ai songon halak na porsea,
tarajumi do paboa hata ni Debata do mual ni hangoluan di hita. HataMi do sulusulu ni pathu, jala hatiuron
di dalanhu (Psalmen 119:105).
d. Dihaholongi Debata do AnakNa i, dipasahat do huaso tu tanganNa.
Di Joh.3:16 mansai tangkas do
dihatindanghon panurat buku on, paboa mansai balga situtu do holong ni Debata
mida portibion. Alai jumolo do dihaholongi Debata AnakNa na hinaholonganNa i
ima Tuhan Jesus Kristus. Tangkas doi di na manghuling soara sian ginjang uju
tardidi Jesus dididi si Johannes Pandidi na mandok: On do AnakHu, Haholongan i; halomoan ni rohangKu do Ibana (Mat.3:17).
e. Dipatupa Debata do hangoluan di angka na porsea,
alai na so porsea i jala naso mangoloi Anak i, ndang idaonna hangoluan.
Sangkap na dumenggan do disangkapi
Debata di portibion, dohot di nasa na tinompa, termasuk ma jolma manisia.
Sangkap hangoluan do disangkapi Debata, ndada sangkap hamagoan. Ido umbahen
ndang lomo roha ni Debata mida hamatean ni parjahat i, so ingkon mida hamumulak
ni parjahat i tumadinghon dalanna, asa mangolu ibana (Hes.33:11). Alani
holongNa na balga i, jala sangkap na dumenggan di ngolu ni jolma na tinompaNa
i, umbahen na disuru Debata AnakNa jala dipasaorhon TondiNa i tu angka na
porsea di Ibana, asa dapotan hangoluan na saleleng ni lelengna ma na porsea
jala na mangoloi hataNa i.
III.
PANIMPULI
Topik Minggu Trinitatis (na marlapatan: Hasitolusadaon ni Debata)
“Disuru Debata do AnakNa jala dipasaorhon do TondiNa”, naeng arahon ni hata ni
Debata ma ngolunta manghaporseai Debata Ama, Anak dohot Tondi Parbadia. Na sada
do tolunsa jala ndang tarsirang di bagasan ngolu ni halak na porsea i. Naeng
lam togu haporseaonta di hasitolusadaon ni Debata. Ai ido na mamasumasu
ngolunta jala manogu hita tu hangoluan na sasintongna marhitehite di bagasan
haunduhon mangulahon hataNa i. Amen.
Tidak ada komentar:
Posting Komentar