EV: JEREMIA 15:15-21 “HATAMI DO LAS NI ROHANGKU”

 

BAHAN SERMON PARHALADO HKBP RESORT AGAPE PANGKALAN KERINCI

MINGGU, 30 AGUSTUS 2026

EV: JEREMIA 15:15-21                                                                        EP: 2 TIMOTEUS 4:6-8

“HATAMI DO LAS NI ROHANGKU”

I.                Patujolo

Koor AMA MADUMA HKBP MADUMA PANGKALAN KERINCI

Panurirang Jeremia i ma sahalak anak ni malim, sorang jala magodang di Anatot di tingki panggonggomion ni raja Manasye. Songon sahalak panurirang, Jeremia manghobasi tu harajaon Israel Selatan (Jehuda). Di ida ibana do Israel ditaluhon, ditaban bangso Babel, dohot bagas joro di Jerusalem dirongsohon. Buku panurirang Jeremia patuduhon songon dia dokdok ni ulaon panurirangon i, mamboan tona na mansai borat, alai si Jeremia tongtong marroha na lambok huhut magopu (Jer. 8: 21 – 9: 1). Songon sahalak parroha na lambok alai gabe magopu ma ala barita na binoanna i ditulak jala dialo angka panurirang pargapgap, malim, raja dohot torop sian bangso i. Nang pe songoni pangalaho ni bangso i tongtong do dihobasi ibana, hansit do alai ditaon ibana, borat do alai dituhuk ibana, sihabiaran do alai barani do ibana, mangandung/tumatangis do ibana alai tonggor do matani haporseaonna tu Debata, jala lungun do alai satia do ibana mangalangkahon ulaon i. Sai jotjot panurirang Jeremia didok songon “The weeping Prophet” atau Nabi yang menangis (bdk. Jer 9: 1). Di saluhut angka na masa dibagasan pardalanan ni panghobasion ni si Jeremia, sahat ma hita di turpuk ta Bindu 15 on, manang na jotjot didok “Confessions of Jeremiah” manang Panghatidanghonon sian Jeremia marhite naeng dipataridahon tu hita ima saluhut alualu ni si Jeremia tu Jahowa Debata di bagasan panghobasionna manurirangi angka pangisi ni Bangso Jehuda i.

II.     Hatorangan ni Turpuk

Ayat 15

Diboto jala dihaporseai panurirang Jeremia do, paboa saluhut diboto jala diantusi Debata aha na niadopanna. Alai nang pe songoni tongtong do dipatolhas ibana alualuna dohot lungun ni rohana tu Debata. Di alualuna i, mangelek do panurirang Jeremia asa sai diingot jala diluluhon Debata ibana, asa unang salpu ngoluna sian panatapan dohot panarihononNa. Mangelek ibana asa Debata patupahon partubolan maradophon angka na mangelele ibana. Ndang dirajumi panurirang Jeremia asa ibana ma na mambaloshon hajahaton ni angka na manghasogohon ibana, alai tu Debata do dipatolhas, asa Debata ma napatupahon uhumNa

Ayat 16

Di dokdok ni parsorion na ni adopanna i, Hata ni Debata do na gabe las ni roha ni panurirang Jeremia. Ndang adong ojahan na asing nda holan Hata ni Debata sambing do. Las ni rohana ndang disuhat marhite sinadongan, marhite arta, manang hasangapon. Ojahan ni las ni rohana holan ala jumpang dohot Hata ni Debata. Boasa? Ai Hata ni Debata do gogo mangadopi hasosahan i, Hata ni Debata do bisuk mangadopi angka panurirang pargapgap dohot panggonggomi i.

Ayat 17

Dipabotohon panurirang Jeremia do paboa na ndang hea ibana rap hundul dohot halak pangarehe asa las rohana, asa mengkel ibana. Mamulik ibana ala tung tangkas diboto ia Hata ni Debata ingkon patolhason marhite ulaon na marsitutu. Dipillit ibana do punjung sian angka pangarehe asa unang marlaok tona manang Hata ni Debata, alai asa tongtong polin jala badia. Tarida do parsitutuon ni ibana mamehon ngolu tu hapeahan na sintong.

Ayat 18

Diulahi panurirang Jeremia muse patolhashon ponjot ni rohana tu Debata. Hira na tubu do pandelean ala hira so maralus alualu dohot elehelek na i. Ndang adong dope masa songon na nihirimna i.

Ayat 19 – 21

Ditangihon jala dialusi Debata do hape alualu dohot elehelek ni panurirang Jeremia, ndang salpu boti manang dipasombu ibana. Debata do na padirihon naposoNa si Jeremia songon parik haksa na gogo. Songon dia pe gogo dohot godang ni musu na ro manahop ngoluna, Debata do na mangalinggomi dohot mangondihonsa. Debata na manjaga sian tangan ni angka parjahat dohot angka pangarupa. Pangodihonon ni Debata mangalehon hamonangan maradophon angka naposoNa. Molo Debata donganta, ise ma alonta? On ma sitiopan na gomos di panurirang Jeremia mangulahon ulaon parsuruon na dokdok i.

III.   Sipahusorhusoron

a. Panurirang Jeremia marhobas di tongatonga ni partingkian na mansai maol. Mamungka sian haposoonna nunga disuru Debata ibana laho manurirangi maradophon bangso na tangkang roha. Borhat do ibana nang pe dokdok, ala diboto jala dihaporseai ibana do na marsuru i ima Debata Jahowa. Debata do na marsuru gabe arga ma parsuruon i. Hita pe angka na sinuru ni Debata Jahowa di tongatonga ni portibi on. Songon halak na porsea, songon parhalado, songon angka naposoNa naeng ma arga di rohanta parsuruon naung sahat tu hita ai sian Debata do i.

b. Ndada holan ulaon i na dokdok, alai halak na niadopanna pe maol do, ima angka panurirang pargapgap dohot panggonggomi na jogal roha. Magopu do rohana jala melengleng ateate hinorhon ni panosak ni na masa i, alai ndang sumurut ibana. Hot do ibana jongjong songon sahalak panurirang. Boi do masa tu hita angka na dokdok jala maol nang di partingkian on. Mangadopi i, godang do na sumurut, mabiar, lomos rohana manang gabe manundalhon Debata. Gabe tiruan na arga ma tutu pambahenan ni panurirang Jeremia, ndang adong sidalian laho sumurut sian parsuruon ni Debata.

c. Ndang ragam dihasiholi ibana laho mambahen las rohana, alai molo nunga tolhas Hata ni Debata tu ibana singkop ma dihilala panurirang Jeremia. Ojahan na arga situtu do on. Marhobas songon sahalak parbarita nauli ndang mardangkai hagiot ni rohana. Tulus jala bulus do rohana marhobas, pos rohana na sarihonon ni Debata do ngoluna jala apulanNa molo masa parsorion.

d. Debata do na mangondihon jala mangaramoti. Molo marsihohot mangasahon dohot manghaposi Debata idaon ni angka naporsea i ma tanda hadirion ni Debata di ngoluna. Songon tema tahun Transformasi: Pengajaran Iman di Tengah Keluarga, naeng ma tangkas ganup keluarga/rumatangga marhaporseaon jala manghangoluhon parbue ni haporseaon. Hata ni Debata naeng tongtong marsaringar di tongatonga ni bagasta ganup, asa sude mardame sonang jala mangulahon lomoNa di bagasan las ni roha. Amen