(JOSUA 21:43-45) SAI SAUT DO NA PINARBAGA NI JAHOWA

 

SERMON PARHLADO HKBP RESORT AGAPE PANGKALAN KERINCI

EVANGELIUM MINGGU, 2 AGUSTUS 2026

IX DUNG TRINITATIS

SAI SAUT DO NA PINARBAGA NI JAHOWA

(JOSUA 21:43-45)

1.    Patujolo

Buku Josua marharoroan sian sada goar ni na manguluhon Israel na manggantihon si Musa (Jos.1:1-3). Dimulanai Hosea  do goarna na marlapatan “keselamatan/haluaon” (4 musa 13:16). Alai ditambahon si Musa ma tu goarna i “Yeho” sian hata “Yehova: Jahowa”, gabe jumpang ma sada goar na imbaru sian dua kata “Yeho+shua” (Yehoshua di hata Heber, Josua di hata Batak, Yosua di hata Indonesia na marlapatan “Tuhan adalah Penyelamat/Debata Na  paluahon”). Perobahan goar di Padan Na Robi mamboan makna teologis na signifikan. Sian Hosea “Haluaon” na so haru tangkas ise na malua jala ise  na paluahon, muba gabe tangkas jala torang Yehoshua “Debata Na Paluahon”. Jala na mangihut naing ondolhonon ni Musa marhite goar na imbaru i, paboa haluaon ni Israel sian Misir ndada alani hagogoon ni militer Israel manang hagogoon/kehebatan ni  manguluhon bangso i, alai ala hagogok ni huaso ni Debata na mangula di tonga ni Israel.  

Dung tangkas di hita latar belakang ni goar ni buku on, idaonta ma tu isi ni buku Josua on ima na marisihon taringot tu kelanjutan ni Debata na pasauthon bagabagaNa ima na mangalehon hamonangan tu bangso Israel uju na marporang nasida dompak pangisi ni Kanaan asa gabe Israel mangingani luat i hombar tu bagabagaNa “lehononna sada luat inganan ni bangso i songon sada bangso na merdeka”. Alani taida ma runutan ni sejarah Pambahenan/karya ni Debata pasauthon bagabagaNa i mamungka sian si Abraham (1 Musa 12:1-3,15:13-18,17:8), dungi diulahi Debata muse pabotohon padan i tu si Musa (2 Musa 3:7-8). Udut muse tu si Josua uju na dilehon Debata tano Kanaan. Asa marsundutsundut do keberlangsungan ni bagabaga ni Debata I, asa tong ma dituntut haundukon ni bangso I marsundutsundut maradophon Debata songon respon nasida tu bagabaga i.  

2.    Hatorangan

Dung tolhas bangso Israel tu tano Kanaan i, dipungka si Josua ma mansagihon luat i tu angka bangso Israel si sampuludua marga i. Molo taida di ayat 43 i, on ma songon puncak proklamasi paboa na tutu situtu saut na pinarbagahon ni Debata taringot tu inganan/luat parmianan ni Israel. Jala tangkas disi didok “jadi dilehon Jahowa tu halak Israel tano i”. Holan na mangelehon tano i do Debata? Tangkas taida muse udut ni pambahenan ni Debata  hataridaan ni hasisingkop ni bagabaga i di ayat 44 “Dipasonang Jahowa nasida humaliang/Allah mengaruniakan keamanan”. Asa naing tangkas botoonta Debata do na mangula jala na mangalehon tano i, laos Debata i sandiri do menjamin hasonangan nasida mangingani tano i. Jadi Allah menjamin kemanan mereka bukan hanya dari musuh tetapi juga keamanan pangan mereka dengan memberikan tanah yang begitu subur dan melimpah dengan madu dan susu. Asa ndada gogo manang hatauon ni bangso inon i.

Udut muse didok “Jala dang manahan musu nasida nanggo sada maradophon nasida, dipasahat do luhut tu tangannasida”. Dung maringan nasida di Kanaan, ndang na gabe mansohot angka bangso na humaliang manggugai nasida manang mencoba manguasai, alai ndang adong na manahan, jala tangkas didok “dipasahat do luhutna tu tangan nasida”. Sian pandohan “di pasahat” i ma antusanta lagi-lagi hinorhon ni gogo ni Jahowa do tunduk sude angka sipanggugai i. Ima hagogok ni pandohan na parjolo “Dipasonang Jahowa nasida humaliang/Allah mengaruniakan keamanan. Alani i boi dohonon nunga gabe bangso na hot/kokoh Israel i, ndang bangso parjalang manang bangso pardalandalan be nasida na muramura bungkas sian sada luat tu luat na asing uju ro bangso na asing mamorangi nasida, ndang bangso na diparhatoban be nasida alai nunga singkop merdeka.  

Alani diujungi ma di ayat 45 “nunga singkop ndang adong tartading naggo sada hata na denggan, tung saluhutna do ro!”. On ma puncak ni saluhut buku Josua on, hombar tu goarna naung pinaandar di patujolo nangkin “Debata Na Paluahon”.

3.    Refleksi & Panutup

1.    Tongon hita di minggu Trinitatis na manogihon hita lam mananda Debata sitolusada i. Asa jumpang hita do marhite turpuk on hadirion ni Debata na satia di bagabagaNa na tu bangsoNa Israel. Na so mararga hian ala status hatoban muba gabe sada bangso na merdeka jala maringanan na hot di tano Kanaan. Alai ndang mansohot intap ni Israel manang holan intap ni Padan Na Robi, mangudut do muse bagabaga i nang tu zaman ni Padan Na Imbaru nang tu partingkian saonari marhite hasasaut ni haluaon na pinatupa ni Tuhan Jesus. Na so mararga hian hita alani dosa i, gabe saut malua hinorhon ni mudar ni Tuhan Jesus i pola tahe gabe parjambar di hangoluan sogot i. Laos manongtong ma i marhite Tondi Parbadia na marmuduhon, manuturi dohot patauhon hita mameop bagabaga i sahat tu ujungna.

2.    Integritas ni Debata mansai tangkas dipataridahon di bagasan pardalanan ni bangsoNa i. Asa jumpang hita ma partinandaan taringot tu hadirion ni Jahowa na satia di hata na niuarihonNa pola marsundutsundut, mamungka sian si Abraham sahat tu na bolas diingani nasida tano parpadanan i. Tutu marsitaonon do bangso i marratus taon di Misir, marungkil do nasida uju na mardalan di halongonan, sanga do lomos roha ni nasida uju na diboto nasida angka jolma na bolon pangisi ni Kanaan, pola didok songon sihapor nama nasida martimbangkon halak Kanaan i. Alai ndang gabe marlapatan na sundat, manang batal hape sangkap nang bagabaga ni Debata, hot do Ibana di hata naung niuarihonNa. Alani hita pe angka na manjalo bagabaga i gabe perenungan ma di hita marhite turpuk on, di ragam ni angka tantangan dohot perubahan ni zaman na so martontu boi do marungkil rohanta, boha do mangadopi na masa i? boha do pasingkophon na ringkot di ngolu on? dln. Alai fakta ni ngolu i sandiri ma taida sai nene do asi ni roha ni Jahowa pasingkophon saluhutna. Margantisorin ro parsorion i, alai laos marsorinsorin do ro pangurupion ni Debata i, sai mubauba pe partingkian dohot angka parungkilon na boi masa di bagasan, hot do anggo Debata di asi ni rohaNa umbahen na mangolu hita sahat tu saonari. Songoni ma kesempurnaan ni padan ni Debata di bagasan holong dohot huasoNa. Nuaeng sungkunonta ma dirinta, boha ma hita di angka padan na tapadanhon tu dongan jolma suang songoni nang tu Debata?. Songon natoras maradophon ianakon dohot pangisi ni bagas, parhalado maradophon panghobasion, ianakon maradophon natoras, parkarejo maradophon ulaonna?.

3.    Songoni ma godang ni pambahenan ni Debata tu Israel, asa sada na ingkon tangkas peopon ni nasida songon respon tu Debata ima parsitutuon unduk laho marsomba tu Ibana. On do ondolan na utama jala na sai mulakulak dipasahat tu bangso i di pardalanan menuju hasisingkop ni padan i. Marutang hasatiaon do bangso i tu Debata dung diparsaulihon nasida singkop ni hasasaut ni padan ni Debata i. Nuaeng di hita, nunga singkop nang haluaon i taparsaulihon di na mate Kristus humongkop hita. Antong marutang hasatiaon dohot haundukon do nang hita tu Debata Sipalua i. Sepakat do hita bahwa hutang harus dibayar. Antong tagarari ma i di tingki parasian on. Boha ma dalanna? Salah satuna, ala tongon  tema orientasi HKBP 2026 “Pengajaran iman di tengah Keluarga”, marsitutu ma hita pasauthon pangajarion dohot panandaon taringot tu Debata i mamungka sian  tonga ni bagasnta, unang adong na tartading .  

 

Pdt. Titus A.Gultom S.Th