Jesaya 56: 1 – 8 Radoti Uhum, Ulahon Hatigoran Taati Hukum Dan Tegakkan Keadilan

 

Minggu XI Dung Trinitatis, 16 Agustus 2026

Radoti Uhum, Ulahon Hatigoran Taati Hukum Dan Tegakkan Keadilan Jesaya 56: 1 – 8

 

1.   Patujolo

Yesaya 56: 1 - 8 ima pamuhai na manaruhon turpuk on ro di ujung ni angka bindu di buku Jesaya, na manaringoti ngolu ni bangso ni Debata dungkon habuangan. Di bindu 1 - 39 dipaboa do taringot tu panguhumon andorang so habuangan, jala bindu 40-55 taringot tu bagabaga haluaon, dungkon i ma dipungka si Jesaya ma sian bindu56 marhite sungkun-sungkun: songondia do ngolu ni bangso i dung sahat haluaon i tu nasida? Ala ni i, turpuk on ndada holan padan sambing, alai huhut do panjouon ni Debata laho paandarhon, gombaran ni ngolu na sintong di adopan ni Debata. Dipungka do turpuk on marhite lumbalumba laho mangaradoti uhum dohot mangulahon hatigoran, ai jonok nama asa ro hatuaon. Haluaon na pinaandar ni si Jesaya  ndada holan alani haporseaon  sambing manang ringkot tu hangoluan sogot, alai boha ma asa tarida ma i di ngolu siganup ari.  Isarana, pabadiahon ari Sabat, mangolu dibagasan hatigoran jala satia tu padan ni Debata, angka on ma na gabe tanda naung dipalua bangso i. Alani i, haluaon i do dasorta asa tongtong mangolu dibagasan pangoloion tu Debata.

 

2.   Hatorangan ni Turpuk

Turpuk on bagas patoranghon ia holong ni Debata dipalumehon tu ganup jolma so mardiaimbar, atik pe bangso i maringanan di duru ni padan ni Debata, isarana halak sileban dohot halak na pinangkias. Molo tasigati angka patik na robi, tutu ndada dipaloas halak sileban dohot halak na pinangkis gabe ruas ni Debata. Alai marhite on gabe ruas ni Debata do nasida molo olo marsihohot tu padanNa, ndada holan i, alai laos jaloonna ma goar na dumenggan (5), jala patolhasonNa tu dolok habadiaonNa i. Didok do, ia joro ni Debata i ma: "Joro partangiangan tu ganup bangso (7)", on ma na patuduhon ia haluaon ni Debata diparade lobi sian godang ni marga ni halak  Israel, ai sahat do tu angka bangso na asing, na paboahon holong ni Debata tu saluhut jolma (universal).

 Turpuk on ma gabe titi padan tu haluaon, songon impola na adong di holang-holang ni bindu 40-55 na pasahathon haimbaruon tu bangso i, asa gabe bangso na olo manjalo bangso na asing nasida gabe dongan sapunguan na mangolu dibagasan hatigoran ni Debata. Alai dungkon angka bindu i, disoarahon ma na andul marasing do gombaran ni ngolu dibagasan hatigoran ni Debata dohot ulaon hajahaton, isarana panggomgomi na so satia tu Debata jala angka parsombaon na so hombar tu lomo ni roha ni Debata. Ido umbahen, Jesaya 56:1-8 on ndada holan patujolo ni pangujungi ni buku Jesaya, alai huhut do paboahon bagabaga ni Debata tu bangso na radot tu uhum, satia jala inklusif manang na rade manjalo bangso na asing, jala gabe bangso na patuduhon haluaon ni Debata tu portibi on.

a.   Soara asa mangolu di bagasan Hatigoran (Ayat 1- 2)

Sian panuratan ni turpuk on, diparade do Jesaya 56:1-8 gabe pamungka laho paujunghon buku Jesaya on ro di bindu 66. Andorang turpuk on dipatorang do taringot tu haluaon dohot hamumulak nasida sian habuangan, nuaeng dipatorang ma alus ni nasida dungkon manjalo haluaon. Dipungka do turpuk on marhite seruan normatif manang lumbalumba asa mangaradoti nasa patik na sintong i, didok ma: "radoti hamu ma uhum, jala ulahon hamu hatigoran." Na marlapatan ndada holan manjalo haluaon sambing bangso i, alai dipangido do adong hamubaon dohot alus asa bertransformasi ngolu ni nasida. Alani i ari Sabat gabe tanda hasatiaon ni haporseaon ni nasida, ndada holan ruhutruhut ni parsombaon i sambing na ringkot, alai lobi sian i ingkon patuduhonon nasida do ngolu na ture, badia jala marsihohot holan tu Debata sambing. On ma na gabe dasor ni ngolu na radot di uhum ni Debata, i ma: bangso naung ditobus ingkon mangolu jala satia tu padan ni Debata jala na patuduhon uhum dohot hasintongNa.

b.  Ungkap manjalo bangso na asing (Ayat 3-5)

Dungkon dihatai mangulahon uhum dohot hatigoran di ayat 1-2, nuaeng dipanghulingi turpuk on ma angka jolma na sai jotjot dipasiding sian na torop marhite ayat 3-5 on, i ma: angka pinangkias. Molo di angka patik na robi, ndang parsidohot nasida di sude ulaon parsombaon, alai dung sahat bagabaga ni si Jesaya, gabe marbalik do sude na masa i dibahen Debata. Antong, manang ise pe sian angka na pinangkias   

i, na tongtong marsihohot marningot padan ni Debata, pos ma rohana   ndang mandele be nasida dibagasan parngoluanna, ai pasahaton  ni  Debata ma tu  nasida  goar na dumenggan  (Ayat  5). Alani i, marhite on lam bagas ma pangantusionta tu na ginoaran bangso ni Debata, ndada ala na samarga manang sabangso nasida, alai  angka  na  mangolu  dibagasan  hasatiaon  tu  Debata  do.  Gabe adong ma panghorhon ni haluaon na imbaru i, gabe dipauli Debata do hasangapon ni angka jolma na jotjot dipasiding sian punguanna, dung i  dipahombar  Debata  nasida  gabe  parjambar  di  padan  ni Debata.

 

c.   Haluaon tu Saluhut Bangso (Ayat 6-8)

Lam timbo bilangan ni turpuk on tajaha lam lambas dipatorang haluaon na pinasahat ni Debata tu saluhut bangso. Angka jolma di duru ni bangso Israel na manghaholongi jala marsihohot tu padan ni Debata, dibagabagahon do dolok na badia jala parsidohot nasida di angka parsombaon.  Ummbagas muse dipatorang, ia joro ni Debata didok ma i "bagas joro partangiangan tu saluhut bangso." Jala on do na pinatangkas ni buku Jesaya, ia haluaon ni Debata tu saluhut portibion. Di bindu 56 on gabe jumpangta identitas bangso ni Debata na imbaru:  bangso ni Debata ndada ala partalian ni mudar manang ala sabangso nasida, alai gabe sada punguan ni angka na porsea sian saluhut bangso.  Parsombaon na tutu ndada ala huta hatubuanna, alai ala hasatiaonna do tu Debata. Dung i, jumpangta ma di ayat 8 impola sian saluhut turpuk. Dungkon dipapungu Debata bangso Israel, papunguonna ma muse "halak na asing" tu nasida. Holong ni Debata dipungka sian bangso Israel sahat ro  di  saluhut  bangso.  Na  marlapatan,  ndada  on  dope  ujungna dungkon dipauli Debata bangso i, gariada on do bonana gabe dalan ni Debata patuduhon holongna tu saluhut portibion.

3.   Panimpuli

Di tanggal 17 Agustus patupaonta ma pesta parningotan ari Kemerdekaan Indonesia.  Taingot  ma ndada holan ari  na somal  sambing ari  17Agustus  na  tapestahon  ganup  taon, alai  gabe joujou  do  i  tu  hita songon bangso ni Debata asa mangolu dibagasan hatigoran. Jesaya 56:1 dipatorang do, dung jonok haluaon i, didok do: asa radot nasida di uhum dohot hatigoran. Alani, nunga sahat kemerdekaan i tu bangsotta, ndada holan ala naung malua sian kolonialisme na manggomgomi bangsotta uju i, alai on do dalanta laho pahehehon bangso Indonesia asa radot tu uhum, ture, jala gabe bangso na sangap. Jadi, molo taradoti uhum ndada holan ala na targoar hita bangso Indonesia, alai na parsidohot do hita manjamothon kemerdekaan  naung sahat tu hita be. Ai bangso na so mangaradoti uhum, angka i do na mamungka dalan laho manegai kemerdekanna sandiri,   alai   bangso   na   mangaradoti   uhum,   angka   i   do   na manjamothon pasupasu kemerdekaan naung pinasahat ni Debata tu nasida.

 

Jesaya 56:7 mandok ia joro ni Debata, i ma bagas partangiangan tu saluhut bangso, na patuduhon holong tu saluhut bangso so mardiaimbar.   Laos   songon   i   do   negaranta   Indonesia   na   gok hamoraon, marragam jumpangta budaya, suku nang ugamo. Molo songon on toropna pasupasu ni Debata tu bangsotta, tontu ingkon radot ma hita di uhum dohot hatigoran, bahen dalanta manjagahon hasadaon ni bangsonta nang pe marragam adat ni pangisina. Suang songon i do nang di tonga ni keluarganta be, ndang tagamon jumpang angka ragam ni hasomalan, hasoloan ni roha dohot na so hinalomohon ni rohanta be. Boi do ala ni ragam ni hasomalan gabe tubu ulaula na jahat, laos mago holong ni angka na saripe. Dos na mangan do nian, molo rap mangan na sakeluarga dohot na mangan marsasahalak, alai ndada dos panghorhon ni i. Molo rap hundul angka na saripe, namarhamaranggi mariboto, dung i dipungka martangiang laho mangan tung uli ma tarida hasadaon dohot holong ni Debata di nasaripe i, dibahen nasida do bagas nasida gabe bagas partangiangan.  Laos   songon   i   do   nang   angka   natoras   na manjamothon ngolu ni angka ianakkona asa mangolu dibagasan

hatigoran dohot uhum na sintong. Ingkon jamot do angka natoras pasahathon   angka   Handphone   dohot   hamoraon   ni Teknologi sinuaeng. Ndang denggan molo migor dipasahat so jolo dapot tingkina, jala dumenggan do jumolo do diajari, asa unang dipangke tu angka ulaon na manegai hagogodang ni dakdanak i. Denggan do dibahen angka natoras uhum siradotan nasida. Ima dalan ni nasida mangantusi, molo dilehon kemerdekaan laos dohot do nasida manjagahon i jala patuduhon tanggungjawabna. Ala ni i, topik ni minggunta na mandok "Radoti Uhum jala Ulahon Hatigoran," gabe panjouon tu hita saluhutna, asa parjolo ma i marurat sian dirinta be laho patupahon pangaradotion i. Kemerdekaan na sintong   ndada   holan   marhite   politik, alai   huhut   do   mangolu dibagasan hatigoran, radot di uhum jala gabe jolma na bertanggungjawab. Ai molo naung taradoti uhum, gabe bangso na merdeka ma hita, naung mandai pasupasu ni Debata tu bangsotta Indonesia.