(MATEUS 14:22-33) POSMA ROHA MUNA, UNANG HAMU MABIAR

 

EVANGELIUM MINGGU X DUNG TRINITATIS

09 AGUSTUS 2026

            POSMA ROHA MUNA, UNANG HAMU MABIAR

(MATEUS 14:22-33)

POSPEL HKBP DOLOK SION 74

1.     PATUJOLO

Adong 2 siberengonta marhite turpuk jamita tu Minggu 09 Agustus 2026 on. Naparjolo, ima taringot songon dia ngolu panghobasion ni Jesus gabe tiruan di hita jolma. Na paduhaon, gabe tubu panindangion ni angka sisean na mandok: “Tutu do Ho anak ni Debata”. Ima songon doktrin manang dogma taringot “ise do Jesus” marhite panindangion ni buku panurat Mateus i.  Jala turpukta on ma sada na pamorahon hita di pangantusion taringot tu haporseaon. Ima taringot tu Tuhan Jesus na mardalan di sisik ni tao, jala siseanNa si Simon Petrus na naeng maniru Tuhan Jesus mardalan di sisik ni tao i. Dia do tanda na marhaporseaon, “Uju na mardalan ido si Petrus di sisik ni tao i manang uju na mabiar i do ibana?

2.      HATORANGAN NI TURPUK

Ayat. 22-23, Jesus do marsuru siseanNa asa pajolohon marparau tu Bariba. Jala dioloi angka siseanNa do parsuruon ni Jesus i. Tanda pangoloion nasida, borhat ma angka sisean i marparau. Jala di pardalanannasida, masa ma galumbang na balga. Marhite on boi idaonta, boi do masa galumbang na balga di ngolunta ala ni pangalaosinta di Hata ni Tuhanta . Alai baliksa muse, boi do galumbang na balga i masa di ngolunta ala ni haunduhonta tu parsuruon ni Tuhanta. Ro galumbang i ala ni haporseaonta.  Hape di ayat 23 tangkas do dipaboa Hata ni Debata sada hataridaan ni haporseaon na sangat manusiawi, ima mangulahon hasomalan na denggan.

Ayat. 24, Anggo parau i nunga tarholang sian pasir, jala disosak galumbang Angka na malo mandok, jotjot do masa galumbang na balga di tao Galilea ala posisi ni tao on di toru ni permukaan laut, jala dihaliangi angka dolok do tao i. Jotjot ma alogo sian dolok i turun tu tao, gabe masa ma galumbang manang habahaba.   Alai, pangantusion ni galumbang dohot laut di Bibelta on ndada holan taringot tu masalah cuaca manang tekanan udara. Di partingkian ni Tuhan Jesus dohot di Padan na Robi, laut ima gombaran ni haetehon ni jolma (gambaran dari kekerdilan / ketidakmampuan manusia).  Lautan dan badainya, bukanlah sekadar urusan cuaca; lautan dan badainya, adalah simbol dari kuasa chaos. Alai atik pe songon i, tong do di toru ni huaso ni Debata laut dohot galumbang i. Di Psalmen 29:10 didok do, “Marhabangsa do Jahowa mangkorhon aek na sumar…” (Allah bersemayam di atas air bah). Jadi, di sada sisi, adong do di parngoluon ni jolma na gabe pusat kekacauan, alai di pusat kekacauan ipe  marhabangsa do Debata.         

Ayat. 26, Jadi dung diida nasida Jesus mardalan di sisik ni tao i, marlangan ma nasida, dirimpu tondi. Adong pandohan na mandok, “Satu-satunya hal yang harus kita takuti adalah rasa takut itu sendiri”. Boasa? Ala molo nunga mabiar jolma parjolo, garida pabiarhu, huting pe gabe hira serigala na ma dibereng. Ima ala nunga dirajai biarna ibana. On ma na masa di angka sisean. Ala nunga mabiar, manang pabiarhu, Tuhan Jesus pe (na sai rap dohot nasida, gariada baru dope patupa tanda halongangan mangalehon mangan 5000 halak), nunga hira begu na ma diida.   Ala ni ido, sian tolu pandohan ni Tuhan Jesus tu siseanNa, na parjolo sahali didok ima, “Pos Ma Rohamuna / Tenanglah”. On ma sada nai wujud kemanusiaan sian Iman. Atik pe boi Tuhan Jesus pademakhon habahaba, alai anggo pademakhon dirinta, ingkon hita sandiri do. Jala memang dirinta do musunta na gumogo. Ido umbahen didok di Poda 16:32 “  halak na mangarajai dirina, umbalga do i sian na papatu huta”.  Alani biar ni roha ni angka sisean, gabe dang boi nasida manghilala hajongjongan ni Tuhan Jesus di tongatonga nasida. Ido umbahen na ingkon dipatandahon Tuhan Jesus muse diriNa tu angka siseanNa, “Ahu do!”  Jadi inti ni masalah i dang galumbang i, alai dirinta sandiri do.

Ayat. 28,Dung i ninna si Petrus ma, Tuhan, anggo Ho do hape, dokhon ahu ro mandapothon Ho… Sada parsiajaran na arga sian ayat on ima, parsaoranta dohot Debata boi mambahen hita dang mananda dirinta sandiri. Holan diboto si Petrus na Tuhan Jesus i, pintor “marsigorgor haporseaonna”, gabe lupa diri ibana, pola naeng sarupa ibana dohot Tuhan Jesus. Pola disuru Ibana Tuhan Jesus laho marsuru ibana mandapothon Tuhan i. Jotjot do on masa di ngolu ni halak Kristen. Tanda na balga haporseaon ni sasahalak, gabe hira ibana na ma Tuhan. Boi marsurusuru Tuhan i, mamastihon hamamalum. On ma sada ujian di haporseaon. Iman yang benar adalah iman yang membuat kita sadar bahwa kita bukan Allah, melainkan hanya ciptaan yang lemah dan fana. Jala tutu ma antong, satongkin dope si Petrus madalan di sisik ni tao i, nunga pintor mabiar ibana. Dang ditanda ibana dirina. Di panatapan ni torop halak, pambahenan ni si Petrus on do tanda ni na marhaporseaon. Hape baliksa do, tanda ni na so marhaporseaosssn do pambahenan ni si Petrus i.   •

Ayat.30, Tuhan… palua ahu.  Holan dibereng si Petrus alogo i, pintor mabiar ma ibana huhut ma didok, “Tuhan, palua ahu”. On ma ringkot ni alogo di ngolunta, asa tatanda do dirinta. Marhite alogo i, mulak ma haporseaon ni si Petrus gabe haporseaon na sintong. Dang be songon Debata ibana na naeng mardalan di sisik ni tao. Alai nunga gabe mananda ibana di haetehonna dohot di habalgaon ni Tuhan Jesus. Dang sarupa hape ibana dohot Tuhan Jesus. Ido umbahen gabe didok ma, “Tuhan, palua ahu”.   Jala dung bongot nasida tu parau, angka ninna ma mandok Ibana, “Tutu do Ho Anak ni Debata”. Pandohan on marlapatan, holan Tuhan Jesus do Anak ni Debata. Jala di Hata Haporseaonta pe didok do, “Ahu porsea di Tuhan Jesus, Anak ni Debata na sasada i”. Hata “sasada” marlapatan, holan Tuhan Jesus do Anak ni  Debata na tutu Debata. Hita pe anak ni Debata do, alai dang Debata hita, jolma biasa do. Ala nii, tapaloas ma Ibana gabe Debata di ngolunta. Songon na nidok ni apostel Paulus, “Di tingki gale do ahu margogo”.

3.      Sipahusorhusoron

Songon angka sisean na dibagasan parau ido hita, ima na mangadopi persoalan ni ngolu, gabe ganggu roha alani boban na mansai dokdok. Songon alago na manghutur pardalan ni ngolunta. Alai unang lupa hita, Tuhan Jesus na sai tongtong mandongani hita didia pe hita mangula si ulaon. Songon nidokNa tu angka sisean i: "Ahu do, unang hamu mabiar". Asa nian unang pintor mabiar hita, alai ta paloas ma rohanta di Ibana. Na marhuaso do Ibana laho pasohon nasa persoalan ni ngolunta, asalma posrohanta di Ibana huhut mambahen ngolunta fokus di Ibana. Fokus ma hita di Ibana, unang fokus tu galumbang na manggugai parngolunta. Ai molo fokus do hita tu persoalan ekonomi, sahit, dohot angka na asing, ido na mambahen hita gabe lonong. Alai molo fokus do hita di Tuhan Jesus, na marhuaso pasohon angka galumbang ni portibion, na boi do tutu mardalan hita di atas ni aek i nangpe gogo galumbang i jala bagas aek i. Jesus do Tuhan, ima Debata na ro gabe jolma tu portibion. Antong tu Ibana ma tapasahat sandok pardalanan ni ngolunta.