Ep : JONA 4 : 1-11 TOPIK: “SALUHUT DO TARPATUPA AHU MARHITE IBANA”

 

SERMON PARHALADO HKBP MADUMA

 EPISTEL MINGGU, XVI DUNGTRINITATIS, 20 SEPTEMBER 2026

Ev: Pilipi 4 : 10 – 19                                                                         Ep : JONA 4 : 1-11

TOPIK: “SALUHUT DO TARPATUPA AHU MARHITE IBANA”

 

 

Hatorangan

Di Jona bindu 3, las do rohanta manjaha barita taringot tu sada huta na balga ima Ninive naung mulak nasida sian dalan angka na roa, alani i gabe disolsoli Debata ma rohaNa taringot tu uhum hamagoan naung nilumbahonNa bahenonNa hian tu nasida, gabe ndang saut dilaluhon Debata uhumNa(Ay.10). Sian mulai raja, dohot pangisi ni huta i sahat tu angka pahanpahan nasida pe mulak rohana tu Debata. Ise na so las rohana molo jumpang sisongon i ? Alai molo tajaha dibagasan turpuk on, longang do rohanta ala si Jona naposo ni Debata sandiri, ndang las rohana, gariada tahe muruk do ibana, sogo rohana jala piripirion, didok ibana tu Debata: Dengganan do ahu mate asa mangolu (ay.1-3). Tumagon do ibana mamillit mate, unang marnida musuna mulak jala dijangkon Debata?

 

Taboto do ia  huta Ninive ima sada huta na ribur di hatiha i (sebuah kota besar di kerajaan Asyur) na digoar huta si sosop mudar (kota penumpahan darah) (Nahum 3:1). Disomba halak Ninive do Dewi Istar, ima dewi cinta songon tuhan di nasida, diulahon nasida do ragam ni angka hajahaton di jolo ni Debata. I do alana disuru Debata si Jona laho martingting dompak huta Ninive, ai nunga marrimas Debata mangida pangalaho nasida. Di mulana i, ndang olo si Jona borhat pasahathon lumbalumba hamubaon ni roha i. Ai lomo rohana molo saut diuhum Debata pangisi ni huta Ninive, di roha ni si Jona ndang sijamitahon be angka jolma pangisi ni huta sisongoni. Mansai hosom roha ni si Jona tu pangisi ni huta Ninive songon ibukota ni Assur marningot huaso, gogo dohot kekejaman nasida na hea gabe sada ancaman na balga laho  menindas bangso Israel. Alai dipatuduhon Debata do kepedulianNa tu saluhut bangso; marhite parsuruonNa  tu si Jona dilehon Debata kesempatan tu halak Ninive laho bertobat.

Ditonahon Debata marhite si Jona, molo so muba roha nasida maninggalhon angka hajahatonna, opatpulu arinai marongrong ma huta i. Hinorhon ni tona na pinasahat ni si Jona gabe disolsoli jala ditundalhon nasida ma angka dosana jala mulak ma nasida tu Debata. Alani i gabe disundati Debata do uhumna tu halak Ninive. Umbege i tarsonggot roha ni si Jona jala tarrimas (terbakar emosi karena tidak rela jika  Tuhan berbelas kasih kepada mereka).

 

Tung tangkas do dipatuduhon hata ni Debata marhite Jona 4:1-11, ia Debata Jahowa, Debata parasiroha jala pardengganbasa, na gok holong tu sude na tinompaNa, na mansai andul marasing sian hita jolma na jotjot  maol mengampuni/memaafkan.

 

Laho mangajari si Jona, asa tung diantusi boasa dihaholongi Debata pangisi ni huta Ninive (ayat 5-10), dipatupa Debata do sada na masa, i ma marhite na dipatubu Debata sada hau dulang. Mansai las do roha ni si Jona mandai hinatabo ni linggom ni hau i, tarlumobi ma di tongatonga ni partingkian na tongon jut rohana manjalo dohot mangantusi sangkap ni Debata. Hape dung bot ari, tompu do malos jala mate hau dulang i diruangi gulok. Alani i gabe didoit mata ni ari ma si Jona, gabe didok ma “dengganan ahu mate sian na mangolu”.

 

Si Jona marlungun ni roha di na mate hau dulang i, hape so ibana manuan dohot patubuhon, sibasabasa do i tu ibana di partingkian sisangombas. Molo songon i marlungun ni roha si Jona diparmate ni hau dulang i, lam ma Debata so marsak rohaNa molo gabe tu hamagoan pangisi ni huta Ninive? Ditatap Debata do huta na bolon i, marasiniroha do Ibana di hosa ni si saratus dua pulu ribu halak pangisi ni huta Ninive na so umboto parsirangan ni siamunna dohot sihambirangna, ro di angka pinahan na sai deak. Marhite i naeng diperbandingkan Debata holong ni roha ni si Jona tu sada hau na so sinuanna, tu holong ni roha ni Debata tu si saratus dua pulu ribu halak pangisi ni huta Ninive.

 

Sipahusorhusoron

1.     Di turpukta on, si Jona muruk, mardandi, ala dipalua Debata pangisi ni huta Ninive. Rumang ni pangalaho songon na masa di turpuk on jotjot do masa nang di tongatonganta. Sogo do roha molo dapot pasupasu, mamora, naik pangkat, lulus ianakkon ni angka dongan na so hea marminggu. Taingot ma, ia hakekat ni Debata ndang hea muba sian najolo sahat ro di salelengnilelengna. Ibana sitompa saluhutna, Ibana na paluahon, jala na marasi ni roha di saluhut na tinompaNa. HolongNa ndang terikat tu rumang ni hajolmaon. Ndang boi dohononta, Debata “ndang adil” molo dihaholongi Debata angka parjahat. Didok Tuhanta Jesus “Bukan orang sehat yang memerlukan tabib, tetapi orang sakit. Aku datang bukan untuk memanggil orang benar, tetapi orang berdosa, supaya mereka bertobat (Luk. 5:31-32)”.

Sasintongna ndang disadari si Jona naung jumolo ibana manghilalahon holong ni roha ni Debata na manongtong i, ima di na diuji ibana mangalo parsuruon ni Debata, ingkon gabe didabuhon ibana tu bagasan laut; alai ala asi ni roha ni Debata dipalua do ibana sian hamagoan i. Asa ndang adong hita jolma na patut /layak dapotan haluaon di adopan ni Debata, nang si Jona, Israel, nang Asyur, nang hita pe. Taida ma puncak ni holong ni roha ni Debata dipapatar do di hau pinarsilang, mate Ibana laho manghophop hita angka pardosa, holan ala asi ni rohaNa (Sola Gratia.)

 

2.     Holong ni roha ni roha ni Debata  melampaui akal, etnis dan politik. Tuhan hadir bukanlah hanya bagi bangsa Israel tetapi  bagi seluruh manusia di bumi. Dihaholongi Debata do saluhut bangso (kasihNya Universal). Tutu si Jona manghaholongi bangsona, alai dengan tidak sadar ibana naeng membatasi holong ni roha ni Debata asa holan tu bangsona sambing. Holong ni rohana di hau dulang i pe, ima paduduhon na holan manarihon kenyamanan pribadina do si Jona; gariada tahe ibana manghalomohon uhum hamagoan ni Ninive. Hape ia lomo ni roha ni Debata, mulak ma nian angka parjahat i tumadingkon dalana asa mangolu ibana. Sada singotsingot na arga do i di hita paboa ndang adong dalanta nanggo saotik manghasogohon angka nahinaholongan ni Debata.

3.     Songon Debata na sai rade manesa dosanta, ingkon songon ima nang hita rade manesa dosa ni angka dongan na humurang maradophon hita. Hata ni Debata mandok di Mateus 5:44 “Holong ma hamu tu musumuna, jala tangianghon hamu ma halak na paburuburu hamu ”. Antong taulahon ma parsuruon ni Debata na tu hita. Molo tarjou hita patupahon na denggan, sotung tajua manang manimbil hita sian panjouonNa i, sian dalan na tinontuhonNa. Tutu sian hajolmaon, ulaon na maol do i, alai topik Minggunta manjouhon “Saluhutna do tarpatupa ahu marhitehite Ibana”. Amen!