( Ev : Lukas 10 : 25 – 37 ) TOPIK : “MANGHAHOLONGI DEBATA DOHOT DONGAN JOLMA” “KASIH KEPADA ALLAH DAN SESAMA MANUSIA”

 

SERMON SA-RESSORT AGAPE PANGKALA KERINCI

MINGGU XIV DUNG TRINITATIS ( Ev : Lukas 10 : 25 – 37 )

TOPIK : “MANGHAHOLONGI DEBATA DOHOT DONGAN JOLMA”

           “KASIH KEPADA ALLAH DAN SESAMA MANUSIA”

 

        Pesta Puncak Transformasi dan Ultah ke 21 Resort Agape Pangkalan Kerinci 

I. Patujolo

Buku Evanggelium Lukas on ima buku na patoluhon sian na pa dua pulu pituhon di Padan Na Imbaru. Jala na manurat buku Lukas on ima si  Lukas sahalak parubat / Tabib / Doktor, jala ditongos si Lukas surat on tu si Teofilus halak na sangap (Luk 1:3) dohot tu sude jolma, tujuanna ima laho patoranghon Barita na uli taringot tu Jesus Kristus Anak ni Debata na parholong jala parasi roha dohot mamboan haluaon tu sude jolma.

Dungi muse na laho berengonta sian turpuk on ima : Sada cara ni Jesus laho pasahathon manang mangajari Hata  ni Debata  dohot patandahon Harajaon ni Debata tu angka jolma ima marhite tudosan (perumpamaan) dengan tujuan asa ummura diantusi dohot tarjalo roha ni na umbegesa. Laos ima na laho sipasahaton ni turpuk jamita on ima didia sahalak sibotopatik mangunjuni Jesus marhite sungkunsungkun.

 

ll. Hatorangan ni Turpuk

          Ayat 25-28, *sahalak sibotopatik hehe manungkun Jesus dalan laho mangunjuni Jesus boha ma asa madabu dohot maila bahkan terjebak Jesus dinatoropi. Sungkunsungkun na ima taringot tu sibahenon asa manean hangoluan salelenglelengna (Ay 25). *Dungi dialusi Jesus ma marhite na disungkun muse sibotopatik i taringot tu na diparsiajari dohot na binotona di Patik i (Ay.26),

*ido umbahen gabe sibotopatik i do tong mangalusi sungkunsungkunna sandiri, ima : Ingkon dihaholongi ho do Tuhan Debatami sian nasa ateatem, sian nasa tondim, sian nasa gogom dohot sian nasa roham, jala donganmi songon dirim! (Ay 27), Manghaholongi Tuhan Debata na marlapatan ma i ingkon boi hita jolma mangaradoti angka parenta dohot mangaradoti uhumNa (Berpegang pada ketetapan dan peraturan Tuhan Allah) dipardalanan ni ngoluon, dungi jaloonta ma hangoluan sian Tuhan i.

Jala marhite sian ayat 27 on  boi beregonta ima songon na nidok ni pribahasa na mandok : Senjata makan tuan, yang artinya: suatu niat atau rencana jahat untuk mencelakakan orang lain, tetapi justru berbalik menyerang dan mencelakai dirinya sendiri. Namarlapatan sibotopatik i do na manungkun tu Jesus, alai laos sibotopatik do dibahen Jesus laho mangalusi sungkunsungkunna sandiri di jolo ni jolma na torop i. marhite hata *Dungi didok Jesus ma: Tingkos do alusmi, ulahon ma i, gabe mangolu ma ho (Ay.28). Sian on boi berengonta ima godang do halak songon sibotopatik i. diboto do patik i jala malo hian mandok patik i, alai di na mangulahon tung mansai maol dan bahkan dang diulahon na binotona dohot na nidokna i marhite tindakan/pambahenan.

*Ay 29, di ayat on taida do pangalaho na so maila marhite naeng ma pintoranna dirina marhite na berusaha sibotopatik i laho mangunjuni Jesus marhite sungkunsungkun na paduahon ima : ai ise do donganhu goaron?.

*Ay 30-35, dialusi Jesus do sungkunsungkun sibotopatik na paduahon i marhite tudosan (perumpamaan) sahalak na disamun panamun jala dipukpuhi dungi ditadinghon matemate ne, dungi mamolus ma tolu halak :

1. Malim (imam) : di ida do alai dilaosi (Ay.31)

2. Sahalak Lepi (Lewi : Suku Israel yang dikhususkan Allah untuk melayani di Tabernakel dan Bait Suci) : di ida do alai dilaosi (Ay.32).

3. Sahalak Samaria na dianggap halak na lea (hina) : asi rohana marnidasa dungi didapothon dungi dipauli ma bugangna diboan tu parbornginan (penginapan) laos dipasarisari (merawatnya), laos dilehon halak Samaria i do muse dua rupia (2 dinar - 1 dinar jika dirupiahkan sekarang berkisar Rp. 50.000 – Rp. 150.000) tu nampuna bagas (Penginapan) i asa dipauli (Ay.33-35).

*Disungkun Jesus ma sibotopatik i ise ma sian na tolu i di roham gabe dongan ni na tarbodo i? (Ay.36). Jadi dialusi sibotopatik i ma : Na marasi roha (Sahalak Samaria) i. Gabe di dok Jesus ma tu sibotopatik i asa laho dungi mambahen songon na binahen ni halak Samaria i tu saluhutna jolma (Ay.37). Aha do na laho siberengonta sian on, haholongi donganmu jolma unang mangida rupa, jabatan, marga, suku, agama. Dos tabahen holong i tu sude jolma jala unang mardikkan, ai i do na niajarhon ni Debata dohot Jesus tu hita jolma.

 

III. Panimpuli

          Molo naeng manean hangoluan hita di ngolunta on’ naeng ma nian hita manghaholongi Tuhan Debata marhite na olo rade hita sian panghataionta, parangeta dohot pambahenanta mambahen lomo ni rohaNa gabe ojahan ni ngolunta. Jala hataridaan ni na manghaholongi Tuhan i ima rade jala olo manghaholongi dongan jolma doshon dirinta sandiri, lapatanna rade mangurupi dohot patupahon parasi ni rohaon songon na binahen ni halak Samaria i. jala unang olo mangunjuni dongan jolma songon nabinahen ni sibotopatik i, bohama asa madabu dohot maila donganna i dijolo ni jolma. Antong margogo ma hita laho paduduhon dohot mangulahon holong ni roha na sian Tuhan i dibagasan parngontaon. Amen…

 

 

Bvr.Ida Yenni Manalu. Uluan ni Huria HKBP Eko 2