(Pilippi 4: 10-19) Jamita Minggu XVI Dung Trinitatis ( 20 September 2026) Saluhutna Do Tarpatupa Ahu Marhite Ibana

 

Bahan Sermon Parhalado HKBP Resort Agape Pangkalan Kerinci

Jamita Minggu XVI Dung Trinitatis ( 20 September 2026)

Saluhutna Do Tarpatupa Ahu Marhite Ibana (Pilippi 4: 10-19)

I.                Patujolo

Surat Pilippi ima sada sian surat na sinurathon Apostel Paulus, jala Apostel Paulus do pajongjonghon huria di Pilipi. Disurathon apostel Pualus do on tingki di hurungan ibana, jala di hatiha i mangadopi paraloan do ibana sian sada kelompok ni halak Kristen na mangajarhon parpoda haliluon (ajaran sesat) di huria Pilippi. Ia tondi ni surat Pilippi on, i ma las ni roha dohot pos ní roha na mauliutus ruar sian haporseaon na mansai bagas sian Apostel Paulus di bagasan Kristus Jesus.

Jala dison disurathon Apostel paulus tu halak Kristen na di Pilippi silehonlehon nasida naung tinongoshon nasida laho mangurupi na ringkot di Apostel Paulus. Laos dipangke Apostel Paulus do surat on laho paposhon jala patoguhon haporseaon ni huria Pilippi, asa lam togu nasida jala lam marpos ni roha laho mangadopi paraloan na masa di huria i, dohot parungkilon pribadi na masa di ngolu nasida. Laos dipaingot do nasida di hasadaon ni ngolu nasida di bagasan Kristus, ima asi ni roha ni Debata dohot hadameon na nilehon ni Debata tu halak na sai tongtong mangolu di bagasan Kristus.

II.             Hatorangan ni Turpuk

Las ni roha di bagasan Tuhan huhut mandok mauliate (ayat 10-12)

Marlas ni roha do Apostel Paulus di bagasan Tuhan i di silehonlehon na jinalona sían huria Pilippi. Ndada godang ni silehonlehon i na rumingkot, alai roha na ungkap jala roha marpanarihon na tubu sian haporseaon di bagasan Tuhan i. Nian diboto Apostel Paulus do na sai tongtong disarihon huria Pilippi ibana. Alai marhite pangurupion on, dipapatar do holong ni roha ni Kristus. Lumobi  arga ni pangurupion na ro di tingki na une, ido las ni roha apala na umbalga di roha ni apostel Paulus. Jala martambatamba do las ni roha ni Apostel Paulus ala nunga marparbue barita na uli naung sinuanna di tonga ni huria Pilippi. Hata mauliate ni Apostel Paulus ndada ala na mansai mangkirim situtu ibana di pangurupion i. Alai holong ni roha i dohot roha na marpanarihon na sian huria Pilippi, i do alana umbahen na pola didok mauliate di bagasan Tuhan i.

Nunga somal Apostel Paulus manghasonangkon na adong. Ndada mangolu marlobilobi ibana. Alai mangolu do ibana di bagasan na marpangontik, nang pe diboto ibana do nang mangolu marlobilobi, nang marhahurangan. Kata autarkēs (αὐτάρκης) dalam Filipi 4:11, secara harfiah, autarkēs berasal dari kata autos (diri sendiri) dan arkeō (cukup/memadai), yang berarti memiliki cukup kemampuan dalam diri sendiri, mencukupkan diri dan puas dengan apa yang ada tanpa bergantung pada oranglain. Alani i ndang margantung ibana di pangurupion ni huria Pilippi di angka tingki na mangihut. Diboto ibana do manghasabamhon na adong. Jala pos do rohana di panarihon ni Debata na mangalehon na ringkot di tingkina, jala Debata dihaposi ibana, na tuk margogoihon ibana di nasa situasi dohot kondisi.

Saluhut do tarpatupa ahu marhitehite Ibana (Ayat 13-19)

Tubu do roha na marpanarihon molo mian holong ni roha na sian Kristus Jesus di ngolu ni ganup halak na porsea. Ido na patar di turpuk on, roha na marpanarihon na ro sian huria Pilippi tu apostel Paulus naung manuan barita na uli tu nasida. Roha na marpanarihon, i ma parbue ni haporseaon na marojahan di holong ni roha ni na di bagasan Kristus Jesus. Jala on ma haporseaonta tu Tuhanta, naparadehon dohot pasahathon las ni roha i di ngolutta. Uju masa angka sitaonon, parungkilon dohot haberniton di ngolunta, margogo ma hita, na porsea do hita ingkon urupion ni Tuhan i do hita mamolus sude ragam ni hamaolon i dingolunta jala porsea, pangurupion ni Tuhan i ndang hea tarlambat. Ai umbalga do holong, asi ni roha ni Tuhan i tu hita sian hita mangkaholongi dirinta sandiri. Gohan ni Debatangku do nasa na ringkot di hamu. On ma padan na pinasahat ni Debata tu angka na marsihohot di Ibana. Ai nasa na adong boi do dipangke Ibana laho pasauthon lomo ni rohaNa. I do na patuduhon Ibana do Debata na marhuaso sitompa langit dohot tano on.

III.           Sipahusorhusoron

Buku Ende 763 Mandok “ Molo Jesus Dongan mi Las Roham, Jesus i Pangurupim las roham” alai na gabe sungkun-sungkun Las ni roha songon dia do nuaeng na masa. Godang do las ni roha na masa diportibion. Alai jotjot do las ni roha ni portibi on mamboan jolma lam dao sian Debata. Jala mambaen jolma gabe ginjang roha na. Jala disi do hina asing ni lạs ni roha di bagasan Tuhan i, alai las ni roha dibagasan Tuhan ima na naeng gabe pasu-pasu. Jala Ungkap ni roha ni na porsea laho mangurupi angka naposo ni Debata. Dison mansai ringkot solidaritas jemaat laho mangulahon misi gereja  (Menjadi Berkat Bagi Dunia).

Tapangke ma las ni roha i, nang  pasu-pasu  na sian Debata laho mangulahon na denggan jala marbarita nauli. Taingot ma gomos hata na tarsurat di 2 Tim 4:2a : Jamitahon hata i, hajongjongkon di tingki na une nang so une’. Unang ma tadok angka parsorion dohot sitaonon nang angka ragam pergumulanta i mandok, dao manang na holang hita sian Tuhanta i. Songon halak Kristen hita, nang angka parhalado ni huria naeng ma nian marhite Las ni rohanta I nang hinorhon ni angka pergumulanta na taadopi i, bahenon jala patuduhononta asa lam marsangap jala marmulia Debata di atas ni saluhutna. Dipargogoi ma hita mangulahon hata ni Debata jala tadok ma songon hata ni si Paulus ‘Saluhut do tarpatupa ahu marhitehite ibana na margogoihon ahu. Amen

                                                                           C.Bvr Ernita Silaban S.Ag “HKBP Ebenezer Toro”