Ev: Psalmen 25:15-22 “ SAI TONG DO MANGARANAP MATANGKU TU JAHOWA”

 Bahan Sermon Parhalado Resort Agape Pangkalan Kerinci

Ev: Psalmen 25:15-22                                                 Ep: Johannes 9:1-11

“ SAI TONG DO MANGARANAP MATANGKU TU JAHOWA”

Parhalado HKBP Resort Agape Pangkalan Kerinci

A. Patujolo

Molo mangolu dihasiangan on dope hita godang do angka hamaolon dohot hasusaan na taadopi. Molo dilehon do tu hita pilihan naeng  ma nian dao  hita sian angka hamaolon  dohot hasusaan  i, alai saleleng hita mangolu diportibion nunga gabe turpuk ni parngoluan i saluhutna. Na porlu siingotonta, boha do hita mangadopi angka hamaolon i, jala haruar sian hamaolon i, tapangido ma tu Debata hagogoon asa margogo hita laho mamolus angka hamaolon na taadopi. Dipasombu Debata do hamaolon i, alai naeng adong do baga-baga ni Debata tu hita, ala ingkon Debata do donganta laho mangalugahon saluhutnai, asa gabe monang hita diangka hamaolon dohot hasusaan na taadopi i.

Secara khusus Psalmen 25 on ima Ende ni si David, na marisi tangiang mangido asi ni roha ni Debata laho mangurupi, paluahon, dohot mangondihon ibana mangadopi sitaonon dohot na hansit di ngoluna. Haluaon sian musu dohot sian dosana ima mangonjar roha ni si David laho martangiang. Molo nunga ro na dua i tu ngolu ni Jolma, maol do jumpang hasonangan jala boi do mambahen gale haporseaon. Ala ni i marhite tangiang pangidoan i, tarida do pangidoan ni si David na marsitutu tu Debata asa dipalua ibana sian musu nang dosana sandiri. Tangiang i pe borhat do sian perenungan na mansai bagas dohot panghilalaan na balga di pangurupion ni Debata. Ido umbahen di Psalmen 25 on, dihatindangkon si David holan Debata do na tuk paluahon ibana.

B. Hatorangan Ni Turpuk

Dijolo ni turpuk on, di hatindangkon si David do "Ho do Ale Jahowa dihalungunhon rohangku" "marhaposan tu Ho do ahu" "Dang tarurak angka na manghaposi Ho". Ayat 1-3 on ima patuduhon pos ni roha dohot balga ni panghirimon di pangurupion dohot haluaon sian sitaonon na masa tu ibana. Disi ma tarida hibul ni roha ni si David na pasahathon hadirionna tu Debata di sitaonon nai. Dang tarida disi ganggu ni roha, baliksa tarida do togu ni panghirimon di huaso ni Debata na tuk paluahon ibana. Di ayat 3 didok dang jadi marsuraksurak angka musuna mida si David, jala maila do sogot angka pangose soada Alana. Musu ni si David na di maksud dison ima si Saul dohot halak Pilistim na manghasogoon ibana ala tarpillit ibana gabe raja. Dipangidohon si David do marhite tangiangna asa Debata na mamillit ibana gabe raja, ima na mangurupi jala paluahoon ibana. Naeng patuduhon, hataridaan ni na mamillit do na pinillit. Na marlapatan hataridaan ni Debata na mamillit si David gabe raja. Manang ise na martahi na jat tu na niasianNa, Debata sandiri do mambaloshon dohot patupahon hamagoan tu nasida. Ima pos ni roha ni si David tu Debata na mamillit Ibana. Alani dipasahat si David do hadirionna tu Debata na tuk paluahon, jumpang punjung jala dangol ibana (ayat 16). Molo ditingki mangadopi angka hamaolon i hita sai songon na punjung jala dangol do tahilala. Laos hira mandao do angka donganta sian hita jala gabe hohom ma hita dung dipampe Tuhan i tu hita ( Andung 3: 28) ido didok ibana “sai tong do mangaranapi mataKu dompak Jahowa” ayat 15a.  Na patuduhon holan tu Debata sambing do ibana marsigantung Panghaporseaon dohot pos ni roha ni si David tu Debata, ido na mambahen ibana parorothon dirina tu ampuan ni Debata. Rade do ibana manjalo pangajarion ni Debata tu dirina. Dang dirina manang gogona na di pangasahon si David. Alai pangajarion ni Debata do na di pangasahon ibana di sitaonon na i. Di ayat 17-18, dirajumi si David do tung na mansai gale do ibana di sitaonon na, jala di rimangi ibana angka hasalaanna di adopan ni Debata naso tama mangido pangurupion tu Debata Jahowa, na dangol jala ngalut dihilala ibana alani dosana i, ima dosa uju dihaposoonai. Dibahen i dibagasan unduk nang serep ni roha jou-jou si David tu Debata di asi ni roha ni Debata. Dipangido si David do asa disesa dosana, jala dipangido ibana asa diingot Debata ibana marhite asi ni rohaNa. Na pos do rohani parpsalmen marhite panandaioan na tangkas tu Debata, pardenggan basa jala parasiroha do Debata, jala naso tupa muba jala lupa Ibana di asi dohot denggan basa ni Debata. Parasiroha jala pardengganbasa ima sada karakter ni na melekat tu diri ni Debata. na sai tongtong patuduhon asi ni rohaNa tu angka pardosa, jala na sai tongtong patuduhon dalan tu angka na manjou Ibana (Psalmen 37:5).

 

Panandaion ni si David tu Debata dang holan mananda Debata pardenggan basa, alai na mananda do ibana di Debata parasiroha huhut na sintong jala bonar do angka dalanNa. Dipatudu Debata do uhum dohot dalanNa tu angka jolma na dangol dohot na tarjepol (orang yang sesat dan rendah hati). Ido pos ni roha ni si David tu Debata, sai toguon ni Debata do ibana mardalan di dalanNa. Na marlapatan dalan ni Debata ima: lomo ni roha, sangkap, patik, uhum dohot hadirion ni Debata, na hot jala manontong (dang mubauba alani situasi). Ido na mambahen tung mansai pos situtu si David di Debata na so pasombuon ni Debata ibana mangadopi saluhutnai ai Debata do parsigantunganna dohot pangurupi di ngoluna (ayat 20), na tuk paluahon jala mangajari Ibana mangadopi sitaononna.. Alai dang holan dirina diharingkothon ibana dohot do Israel ditangiangkon ibana tu Tuhan i asa dipalua sian hagogotanna (ay, 22), diboto ibana do  Tuhan do marhuaso jala manggomgomi sandok portibion na mangondihon bangso Israel.

C. Sipahusorhusoron

Marhite  ende  na  marisi  panindangion  ni  si  David  di  bungku Psalmen 25 on, naeng ma sude halak na porsea :

-       Naeng tongtong mangolu dibagasan panghirimon tu Debata, ai dang  tarsirang  haporseaon  sian  panghirimon  (1  Korintus 13:13). Panghirimon i gabe hagogoon do i tu angka na porsea asa tongtong marsihohot di haporseaonna nang pe masa angka na suhar tu roha dohot pingkiran ala tarajumi dang murak angka na porsea bahenon ni panghirimon i (Rom 2:5a)

-       Molo  tung  pe  masa  angka  sitaonon  dohot  haporsuhon  ingkon halasonon ni angka na porsea i do, ai hinorhon ni haporsuhon i do habengeton ni roha, jala dihorhon habengeton ni roha i do hatauon, jala hatauon i manghorhon pangkirimon (Rom 5: 3-4)

-    Olo do Debata manesa dosanta asal naung tutu tatadingkon dosa i.

Jala olo hita paimbaru dirinta. Ala ni i pangido ma dibagasan tangiangmu hagogoon laho mangadopi angka hamaolon na ro ru ngolumu asa unang gabe lilu haporseonta. Ai molo Debata hagogoon dohot hamonanganta, dang adong be musu na olo mangganggu haporseaonta naung togu i tu Debata

-       Dung dilehon Debata tu hita asi ni rohaNa, gabe i ma petunjuk hidup di hita. Antong, tongtong ma hita mangolu di aturan na binahen ni Debata, songon ondolan ni ngolunta lao mandalani ari–ari ni nglunta. Amen

 

                   Bibelvrouw: Robinem Purba

HKBP Maranatha Rantau Baru