ACARA PERESMIAN HURIA NA GOK , HKBP DOLOK SION KM 74 RESORT AGAPE PANGKALAN KERINCI

 

I.    PANGARADEON dohot SEREMONI

MONI

1.   Pkl.09. 30. -. Prosesi Pelayan Ibadah, Pandita, Parhalado Resort, Parhalado HKBP Dolok Sion Km. 74 dohot Panitia

                        -. Pengalungan bunga Kepada Praeses.Pendeta Resort ,Uluan

                        -.  Penyerahan bunga pangku kepada inang Praeses Pendeta Resort dan inang Uluan ni huria .

2.   Pkl. 09. 45  : Pembukaan Selubung Plakat dan Penandatanganan Prasasti Huria HKBP    Dolok Sion Km 74 (Oleh Praeses HKBP Distrik 22 Riau)

Penanda tanganan Prasasti

 Pengguntingan Pita 

3.   Pkl. 10.00   : Prosesi masuk ibadah di iringi tarian Remaja/NHKBP Dolok Sion Km. 74

II.     Joujou tu Parsaoran tu Hata ni Debata.

U         :   Hamu dongan sahuria na marlas ni roha sadarion, Horas ma dihamu saluhutna!

Huria   :   Horas ma nang dihamu parhalado nami!

U         :   Las rohanta bongot tu bagas joro ni Tuhanta on, laho mamuhai parsaoran pamujion tu Debata, jala di Minggu sadarion las rohanta, ala pasupasu ni Debata sejarah naimbaru di huria on gabe huria nagok ima Huria HKBP Dolok Sion Km. 74 Resort Pangkalan Kerinci

Huria   :   Ima tutu, sian nasa rohanami ma mangundukkon, asa gabe huria parsaoran ni naporsea ma huria on jala huria na tongtong mangharingkothon hasadaon.

U         :   Antong nuaeng pe marsaor ma hita dohot Tuhanta, magolophon denggan ni basaNa. Tapuji ma goarNa na sangap jala na marmulia i. Marende ma hita.

01.    MARENDE B.E. HKBP No. 569 : 1 – 3 “O DEBATA TUNG LONGANG DO ROHANGKU” BL. 569

^♫♪♫  O Debata, tung longang do rohangku, molo hubereng na tinompaMi.

Saluhut bintang, hilap dohot ronggur manghatindanghon hasangaponMi.

Marende au Tuhan mamuji Ho, o Debata sangap do Ho.

Marende au Tuhan mamuji Ho, o Debata sangap do Ho.

^♫♪♫  Di ladang, di adaran dohot tombak, marende pidong tung mansai sonang.

Punsu ni dolok, sunge dohot rura, mamaritahon sangapMi Tuhan.

Marende au Tuhan mamuji Ho, o Debata sangap do Ho.

Marende au Tuhan mamuji Ho, o Debata sangap do Ho.

------ (Musik) ------                                                                 (Jongjong)

^♫♪♫  Molo huingot balga ni holongMu marhite Jesus na tarsilang i.

Anak sasadaMi, o Debatangku dilehon Ho manobus jolma i.

Marende au Tuhan mamuji Ho, o Debata sangap do Ho.

Marende au Tuhan mamuji Ho, o Debata sangap do Ho.

02.    Votum – Introitus – Tangiang. (P: Paragenda ; H: Huria)

P   : Marhitehite Goar ni Debata Ama dohot Goar ni AnakNa, Tuhan Jesus Kristus dohot Goar ni Tondi Parbadia, na tumompa langit dohot tano on. Amen. Nunga tibu hian diida rohangku Jahowa, ninna Ibana do: Haholongon salelenglelengna Hubahen manghaholongi ho, dibahen i Hutaiti ho marhitehite denggan basa. Haleluya!

H  : (Mangendehon):   ^♫♪♫ Haleluya… Haleluya… Haleluya.

P   : Martangiang ma hita! Ale Tuhan Debata jala Amanami! Sai togutogu jala rajai ma rohanami marhitehite TondiMi, asa olo hami manangihon dohot manjalo HataM. Sai pahot ma HataM di bagasan rohanami, asa lam imbaru jala lam badia rohanami. Sai urupi ma, asa lam marhaposan hami tu AnakMu, Tuhan Jesus Kristus, asa jumpang hami hangoluan saleleng ni lelengna. Amen.                                                     (Hundul)

03.    MARENDE B.E. HKBP No. 781 : 1 + 3 “SAI HALASHON NA TINOMPA” BL. 781                                       

^♫♪♫  Sai halashon na tinompa ni Tuhanta Debata.

Sunge, laut, dohot tombak ro diparlangitan i, ro diparlangitan i.

^♫♪♫  Saluhutna na tinompa pasangaphon Debata.

Au pe dohot do mamuji pasangap goarNa i, pasangap goarNa i.

04.    Patik. (P: Paragenda ; H: Huria)

P   :    Tangihon hamu (Tatangihon) ma Patik ni Debata, i ma Konfessi 1996 Bindu V. KEBUDAYAAN DOHOT LINGKUNGAN HIDUP.

Tahaporseai jala tahatindanghon do:

1.     Ditompa Debata do jolma nang inganan parmianan dohot inganan pangulaonNa di portibi on. Ibana do nampuna sude, na mangalehon hangoluan tu sude na tinompaNa i. Inganan pangulaon ni jolma i ma darat, laut dohot hajanghajang (langit, ruang angkasa). Dilehon Debata do huaso tu jolma i laho paulihon portibi on di bagasan tanggung jawab na gok.

Dilehon Ibana nang parhataan, uninguningan, parhinaloan, kesenian, dohot parbinotoan songon ulaula ni jolma, songon i aturan laho mamuji Debata dalan laho pauliulihon dohot pajagarhon parsaoran ni jolma asa lam patar marbungaran harajaon ni Debata marhite kebudayaanna. Alai situlahon do kebudayaan na marlaok hasipelebeguon dohot na maralo tu Hata ni Debata.

2.     Ulaon ni Jesus Kristus paluahon jolma i, nasa na tinompa i songon i portibi on sandiri.

Marhite on:

Tahatindanghon do tanggungjawab ni jolma pangoluhon sude na tinompa ni Debata (melestarikan) asa boi ibana mangula, hipas, dohot marsonang (sejahtera).

Taalo do angka usaho na manegai lingkungan marhite na manutungi dohot manabai hau di tombak manang harangan. Taalo do angka usaho na mangalitohi aek dohot auangaauang (udara) nang aek panirisan (limbah) na marisi rasun sian angka pabrik-pabrik, marhite na so manganturehon halalaho ni aek panirisan i dohot pencemaran udara, pola tahe manegai aek siinumon dohot parhosaon ni jolma (polusi/pencemaran lingkungan).

I do sahatna. Antong, rap mangido gogo ma hita tu Tuhan Debata!

   P+H :   Ale Tuhan Debata! Sai pargogoi ma hami mangulahon na hombar tu PatikMi. Amen.

05.    MARENDE B.E. HKBP No. 411 : 1 + 3 “NANG PE RARA DOSAMU” BL. 274

^♫♪♫  Nang pe rara dosamu ias dibaen mudarHu.

Nang pe rara dosamu ias dibaen mudarHu.

Na dapdap songon hasumba songon itak do.

Nang pe rara dosamu, nang pe rara dosamu,

ias dibaen mudarHu, ias dibaen mudarHu.

------ (Jongjong) ------

^♫♪♫ SesaonNa dosamu, ndang dibaloshon tu ho.

SesaonNa dosamu, ndang dibaloshon tu ho.

Tu Jesus ro ho na loja, asa sabam ho.

SesaonNa dosamu, sesaonNa dosamu;

ndang dibaloshon tu ho, ndang dibaloshon tu ho.

06.    Manopoti Dosa. (P: Paragenda ; H: Huria)

P   : Tatopoti ma dosanta, martangiang ma hita!

Ale Tuhan Debata, Amanami, sitompa saluhut. Uli do ditompa Ho tano on nang sude pangisina. Alai nunga godang na sega angka tombak, sunge, tao dohot laut hinorhon ni dosanami jolma na manghorhon ragam ni parmaraan nang sahit tu jolma nang luhut na tinompaMi. Asi ma rohaM di hami, sai sesa ma nasa dosanami jala pargogoi ma hami manghangoluhon lomo ni rohaM. Sai panghulingi ma nang angka pamarenta ni angka negara di liat portibi on, asa nang nasida saurdot dohot Ho parsidohot pauliulihon na tinompaMi. Amen.

Bagabaga ni Debata taringot tu hasesaan ni dosa!

Munsat pe angka dolok, jala humuntal angka robean, alai anggo parasi ni rohangKu na so tupa munsat sian ho, jala padan ni hadameonKu na so tupa humordit, ninna Jahowa Siasii ho.

Hasangapon ma di Debata na di ginjang!

   P+H: Amen.                                                                                        (Hundul)

07.    MARENDE B.E. HKBP No. 699 : 1 + 3 “SINGKOP DO ASI NI ROHAM” BL. 699

^♫♪♫  Singkop do asi ni rohaM tu au na dangol on.

Na lilu ahu nahinan, nuaeng jumpang do.

^♫♪♫  Di dalanhi na rahis i, gok mara ngolungki.

Ala pangurupionMi malua tondingki.

08.    Epistel. (P: Paragenda ; H: Huria)

P   : Tangihon hamu (Tatangihon) ma Hata ni Debata turpuk Epistel di Minggu XVII Dung Trinitatis on, tarsurat  di Johannes 9 : 1 - 11. Dung i di na mamolus i Ibana, diida ma sada halak na mapitung tubu.

H : Gabe ninna angka siseanNa ma manungkun Ibana: “Ale Guru, ise do na mardosa, halak on do manang natorasna, umbahen na mapitung ibana tubu?”

P   : Jadi dialusi Jesus ma: “Ndada ala ni dosana manang ala ni dosa ni natorasna; alai naeng gabe patar angka ulaon ni Debata di ibana.

H : Ingkon ulaonHu do ulaon ni na marsuru Ahu saleleng arian; ai dung ro borngin, ndang tarbahen mangula disi manang ise.

P   : Panondang ni portibi on do Ahu, tagan di portibi on Ahu.”

H : Jadi dung didok songon i, ditijuri ma tano i mambahen gambo marhite sian ijurNa i, didalohon ma gambo i tu matana.

P   : Dung i didok ma tu ibana: “Laho ma ho marsuap tu dano Siloa (na mandok: Na sinuru).” Jadi laho ma ibana marsuap, gabe marnida ma ibana mulak.

H :  Dung i didok hombar bagasna ma ro di angka na marnida ibana na jolo mangidoido: ”Nda on do na somal hundul mangidoido?”

P   : Jadi adong ma deba na mandok: “Ibana do i.” Alai na deba mandok: “Ndangana, suman do ibana tusi.” Didok ibana do: “Ahu do i.”

H :  Dung i ninna nasida ma: “Beha do hamumungkap ni matami?”

P   : Jadi didok ma mangalusi: “Halak i na margoar Jesus, i do pauli gambo, didalohon ma i tu matangku, jadi disuru ahu marsuap tu dano Siloa; dung i laho ahu tusi marsuap, jadi marnida ma.”

I do sahatna. Martua do angka na tumangihon Hata ni Debata, jala na umpeopsa. Amen.

09.    MARENDE B.E. HKBP No. 783 : 1 + 5 “TUHAN SITOMPA SALUHUT” BL. 783

^♫♪♫  Tuhan sitompa saluhut, Ho do na marmulia i.

Ndang na tarasam saluhut, nilehonMi.

------ (Jongjong) ------

^♫♪♫  Dilehon Ho do TondiMi ro di sude na ringkot i.

Holong, huaso, ngoluMi, nilehonMi.

10.    REFLEKSI: Manghangoluhon Holong ni roha, tanda na mian hita dibagasan Tuhan (1 Joh 4:12)

P  : Huria na hinaholongan ni Tuhanta. Hata ni Tuhan sadari on mandok: “Ndang adong halak na marnida Debata. Molo masihaholongan hita, mian ma Debata dibagasan hita.... Alai, di tonga ni tantangan zaman on, tatangkasi ma jo rohanta dohot bagasta marsadasada: digohi holong do i manang naung hambar do hinorhon ni ngali ni parsaoran di zaman on?

Natoras:

Tuhan, di langgatanMon huokuhon hami ma, talu do hami binahen ni halojaon mangadopi ngolu on. Loja binahen ni krisis ekonomi dohot panosak ni haporluan siapari, holso dohot ganggu ni roha gabe manghuphupi las ni rohanami. Sipata do huboan hami  pangontak ni muruknami sian duru tu jabu, gabe muba ma bagasnami  sian inganan ni dame dohot las ni roha, gabe digohi parsualon.

Ianakhon:

Tuhan, di tonga ni hamajuon ni teknologi digital na patuseok on, hira na sopot so marama so marina do panghilalaannami di bagasnami sandiri. Layar ni handphon ma gabe haambalingannami, ala soaranami marsanggasangga do ditangihon di bagasanami.  Parsaoran di tonga ni keluarganami ndang manahan, manghatai pe hami marhite hata na di ketik do, ndang marhite simalolong na masitatapan dibagasan holong.

 

P  : Di ari on, na diida Tuhanta i ndada uli ni paheanta di parminggguon on. Na ditatap Ibana ima angka suhisuhi ni jabunta na buni. Ima angka inganan ni iluilu na marabur so adong marnida.

 

H  : Di hariburon ni kota, jotjot do huhilala hami langa di jabunami.  Sajabu do hami nian, alai ganup do hami lalap marnida angka HP na be. Huparungkilhon hami do taringot tu hepeng, alai ndang hea huparungkilhon hami songon dia na huparungkilhon hami be.

 

P  : Ditatap Tuhan i do nang angka jabu na di huta. Dihaliangi alam na uli do ngoluna, alai humasusa do angka ama manarihonn sipanganon ariari, songon i nang angka ina na manaon sihol ni rohana tu ianakhon na dao mangaranto, nang angka ianakhon na lungunan di tonga ni jabuna sandiri. Hamaolon ni ngolu nangetnanget do manguba hata na lambok gabe  hata na koras jala mambugangi panghilalaan.

 

H  : Marpaumati ma rohaM Tuhan, molo jotjot hami mulak tu jabu mardongan muruk. Ala naung loja mulaulaon, gabe tu angka na hinaholongan do panombosan ni muruknami.

 

P  :  Diboto Tuhan i do na gale hita. Alai di sadari on didok ma tu hita: “Haholongi ma keluargam”. Haholongi ma nasida atik pe ndang boi singkop nasida pasonang roham. Unang maila mangido maaf tu ama manang ina dohot ianakhon molo sala hita. Molo rade hita masianjuan di hahurangan jala papudi roha diri, patar ma hilalaonta na rap do hita dohot Debata na mangapusi iluilunta.

H  : Ale Tondi Parbadia, lehon ma di hami lambok ni roha. Pamalum ma angka roha na sanga mabugang di bagasnami. Hupangido hami, unang ma songon paisolat ho dibagasnami, alai Ho ma gabe Raja na mian di rohanami.

 

P  : Taboan ma dame i sian bagas na badia on tu bagasta ganup. Tapadimundimun ma parsoran na lam rosu di bagasta. Molo masihaholongan hita, dibagabagahon Tuhanta do, mian Ibana di tongatonganta jala pamenakhon galumbang na masa di bagasta ganup.

P & H:

Ale Tuhan Jesus, on ma keluarganami na mangadopi ragam ni parungkilon. Gohi ma jabunami, di huta nang di kota dohot holongMu na pamalumhon i.  Bahen ma ngolunami gabe panindangion paboa na mangolu do Ho jala mian di tongatonganami. Amen.

  P   : Tahatindanghon ma haporseaonta i, songon na hinatindanghon ni donganta sahaporseaon di sandok portibi on. Rap ma hita mandok Ahu porsea di Debata Jahowa…. d.u                                  (Hundul)

 

11.    KOOR :

12.    TINGTING

13.    KOOR :

14.    PAPUNGU PELEAN HUHUT MARENDE B.E. HKBP No. 372 : 1... “ROHANGKU SAI HALASHON MA” BL. 99 (Pelean Ia & Ib)

^♫♪♫  Rohangku sai halashon ma sude na sian Debata, luhut denggan basaNa.

Sai tatap hauma i sude, nang porlak dohot tombak pe;

na uli do rupana, na uli do rupana.

^♫♪♫  Sude na di balian i do pasangaphon goar ni Tuhanta Debatanta.

Nang eme na di hauma i, nang hau sude na rata i;

dipuji do Tuhanta, dipuji do Tuhanta.

------ (Musik) ------

^♫♪♫  Nang angka bungabunga pe, na’ndul umuli sasude, sian na hinadenggan

ni si Salomo raja i, i do paganda sangap ni;

Tuhanta na di ginjang, Tuhanta na di ginjang.

^♫♪♫  Ia manghuling pidong i, na denggan marsoara i, Tuhanta diendehon.

Sibigo, ambaroba pe, ro di donganna sasude;

na denggan i begeon, na denggan i begeon.

------ (Musik) ------

^♫♪♫  Antong beha roham disi, tung sip ma au umbege i, palias i rohangku.

Dibahen i sai dohot au, tumiru sasudena lao,

mamuji Debatangku, mamuji Debatangku.

^♫♪♫  Ia na denggan songon i di tano on sudena i, beha tagamon sogot

na uli na di surgo i, i ma pingkiri rohangki,

tusi ma ho palohot, tusi ma ho palohot.

------ (Musik) ------

^♫♪♫  I ma tutu sai naeng tusi palungunonhu tondingki, tu jolo ni Tuhanhu.

Disi marendeende au, disi marhasangapon au,

mamuji Debatangku, mamuji Debatangku.

15.    Jamit : Psalmen 25 : 15 – 22 (Praeses HKBP Distrik XXII Riau - Pdt. Hardy B. Lumbantobing, M.Th)

16.    PAPUNGU PELEAN HUHUT MARENDE B.E. HKBP No. 774 : 1... “TUNG MABAOR SIAN HO” BL. 774                                                               (Pelean II)

^♫♪♫  Tung mabaor sian Ho mual hangoluan i.

Ai torop pe batang aek, angka dolok dohot rura.

Nang pe langit dohot tano, Ho do na manompa i;

Ho do na manompa i, Ho do na manompa i,

Ho do na manompa i.

^♫♪♫  Ai huboto do tangkas hagogoonMi Tuhan.

Ho do na so hatudosan na tongtong Ho pasangapon.

Las rohangku pasangaphon, ro marsomba tu joloM.

Ro marsomba tu joloM, ro marsomba tu joloM,

ro marsomba tu joloM.

------ (Musik) ------

^♫♪♫  Tung tarapul rohangki mingot denggan basaMi.

Ndang tarasam be argana, ndang marbatas nang godangna.

Disondangi do rohangku, lao mamereng holongMi.

Lao mamereng holongMi, lao mamereng holongMi,

lao mamereng holongMi.

^♫♪♫  Huhilala holongMi na manogu rohangki.

Unang loas au be lilu manadinghon Ho Tuhanhu.

Pandang i do tujuonhu saleleng di ngolungki.

Saleleng di ngolungki, saleleng di ngolungki,

saleleng di ngolungki.

 

17.    MANGOJAKHON HURIA HKBP DOLOK SION KM 74 

1.     Marende BE No. 121:1 “Jesus Raja Ni Huria”

(Tingki marende ro ma, Parhalado, Panitia, jongjong mangadophon tujolo, jala ruas ni Huria i jongjong di inganan na be).

Ø Jesus Raja ni Huria na porsea na badia pasupasu ma au on.

Sai sungguli ma rohangku mangihuthon Ho Rajangku.

Pargogoi ma au tongtong, pargogoi ma au tongtong.

 

 

2.    Patujolo

         Hamu angka dongan sahaporseaon, huria ni Tuhanta i. Adong do tolu ulaon ni Huria, i ma: marsaor dibagasan hata ni Debata, marpanindangion, dohot manghobasi ulaon panghobasion. Tahamauliatehon do tu Debata ala dipasupasu do HuriaNa patupahon i. Asa lam pita panghobasion, asa lam matoras haporseaon, jala asa lam patar parbue hata ni Debata di angka ruas ni Huria, tapatupa do Distrik, Ressort dohot Huria. Jala ulaonta di tingki on i ma: PERESMIAN HURIA HKBP DOLOK SION KM 74 RESORT PANGKALAN KERINCI. Antong hupangido hami ma haradeon ni Parhalado, ruas dohot sude Parhalado Ressort dohot Uluan ni Huria sa Ressort on, jala ruas ni huria sa Ressort on jongjong di ingananna be. Mardomu tusi tabege ma jolo Aturan ni HKBP taringot tu Huria marsadasada, hajongjonganna dohot sihobasanna (Manjaha aturan Peraturan HKBP 2002 dung amandemen IV)

 

3.      Manjaha Aturan dohot Peraturan Taringot Parjongjong ni Huria

     

4.           Tabegema muse  Surat  Keputusan  Ephorus HKBP Taringot Tu Huria HKBP Dolok Sion Km 74 on.

 

5.           Peresmian Huria (Oleh Praeses HKBP Distrik 22 Riau)

U  : Hamu angka dongan Parhalado dohot ruas ni Huria on, nunga dibege hamu ojahan parjongjong dohot sihobasan ni Huria di HKBP marojahan tu Aturan dohot Peraturan HKBP dung amandemen pa IV hon, jala nunga dijahahon hamu surat pengakuanmuna. Antong alusi  hamu ma na husunghunhon on: Na olo do hamu patulushon saluhutna i marpamusatan tu na tolu panjouon ni Huria, i ma marparsaoran, parhobasan dohot panindangion?

R  : Na olo do hami sai dipargogoi jala dipatau Tuhan i ma hami mangulahon i, Amen!

U  : Antong ahu Praeses HKBP Distrik XXII Riau atas goar ni Ephorus HKBP mangaresmihon HKBP DOLOK SION KM 74 gabe huria na gok di Huria Kristen Batak Protestan, marhitehite Goar ni Debata Ama, Anak dohot Tondi Parbadia, Amen! Martangiang ma hita: Ale Tuhan Debata Amanami dibagasan Jesus Kristus Raja ni Huria. Ho do na pajongjong HuriaM di portibion, gabe parpunguan ni angka na porsea di GoarMu, asa marhite i lam patar pamatang ni Kristus di portibion, jala rarat BaritaM tu sude na tinompaM. Nunga dipaojak Ho Huria on laho mangulahon parsaoran, panindangion dohot panghobasion. Iringiring jala togutogu ma nasida marhitehite tanganMu na badia i asa lam hot haporseaon nasida manghajongjonghon Goar ni Tuhannami Jesus Kristus. Sai Ho ma na paulihon dohot patureturehon Huria on, asa dao nasa parsalisian dohot na so masiantusan, asa saluhut panggulmitonna patindanghon dohot patimbulhon HarohaonMu di portibion, marhite na mamaritahon Barita na uli tu sandok na tinompaM, sai sungguli ma roha ni Parhalado dohot ruas asa margogo nasida pauliulihon HuriaMi, jala asa marsitutu nasida mangulahon ulaon angka na pinasahat tu nasida be, anggiat marhite panghobasion nasida lam torop na porsea jala pasangap GoarMu na badia. Sai tangihon ma tangiangnami on, marhite asi dohot holong ni rohaM, Amen! (Hundul). 

 

III. PANGOJAKHONON ULUAN NI HURIA

2.     Marende BE. No. 132 : 2 “ Maribak Langit”

(tingki marende jongjong ma tu jolo Uluan ni Huria na naeng siojakhonon mangadop tu Pandita Resort)

Ø Dibahen i palas, pangolu, patiur liat tano on.

Papatar ma diriM pangolu, pardame tu portibion.

Disi ma halak sasudena mamuji asi ni rohaM.

Huhut marsinggang ma sudena sumomba Ho di habangsaM.

 

18.    Uluan ni Huria siojakhonon jongjong ma jolo mangadop Pandita Ressort.

Pdt. Ressort  : Huria ni Tuhanta. Sadarion Ojakhonon ma: St. Johan Manalu gabe Uluan ni Huria HKBP Dolok Sion Km 74 Resort Pangkalan Kerinci on, hombar tu Surat Penugasan nasida:

 

                      Manjaha Surat Penugasan Praeses HKBP Distrik XXII Riau

 

Pdt. Ressort  :Tabege ma ulaon ni Uluan ni Huria di Huria Kristen Batak Protestan Hombar tu Aturan dohot Paraturan HKBP 2002 dung amandemen IV hon :

1.   Manguluhon Huria marsadasada, sumangkapi dohot pasauthon angka ulaon panghobasion hombar tu sitolu panjouon ni huria.

2.   Manguluhon Parhalado na gok tingki hombar tu parsagi ni ulaonna be.

3.   Manguluhon Rapot ni Huria, Rapot Parhalado, Rapot Parhalado Partohonan dohot Rapot pamilliton ni angka Pangurus ni Dewan, seksi dohot Panitia Pembangunan.

4.   Patulushon na pinutushon ni Sinode Godang, Rapot Majelis Pekerja Sinode, Sinode Distrik, Rapot Majelis Pekerja Sinode  Distrik, Rapot Resort, Rapot Parhalado Resort, Rapot Huria, dohot Rapot Parhalado Partohonan.

5.   Mangaramoti, manogunogu dohot pahinsathon mutu ni panghobasion di parataon dihot administrasi ni huria i.

6.   Manjalo Laporan Pertanggungjawaban ni ganup Dewan.

7.   Pasahathon laporan taringot tu pangulaon, statistik dohot keuangan ni huria tu pandita Resort dohot tu Rapot Huria.

8.   Mangaramoti huhut mangevaluasi pelaksanaan ni pangirimon ni angka pelean kewajiban ni huria tu pusat marhite BPSK songon naung ditolophon 55% sian ganup pelean na masuk tu huria i.

 

Pdt. Ressort  : Di hamu Uluan ni Hurianami, St. Johan Manalu nunga dibege hamu Ulaon ni Uluan ni Huria Hombar tu Aturan/ Peraturan ni Huria Kristen Batak Protestan taon 2002. Dibahen i, husungkun ma hamu nuaeng di jolo ni Tuhan Jesus Kristus Raja ni Huria i dohot di jolo ni Huria na marpungu dison. “na olo do hamu Ojakhonon gabe Uluan ni Huria di HKBP Dolok Sion Km 74  Ressort Pangkalan Kerinci on, jala olo do hamu memelehon dirimuna mangaradoti Ulaon hombar tu Hata ni Debata dohot Aturan HKBP naung binegemuna i?

 

Na diojakkon: Na olo do ahu, sai didongani Asi ni roha ni Debata ma ahu patupahon saluhutna i.

 

Pdt. Resort: (huhut marsijalangan) Hamu Uluan ni Hurianami St. Johan Manalu, ahu Pandita Ressort HKBP Ressort Pangkalan Kerinci, Di bagasan goar ni Debata Ama, Anak dohot Tondi Parbadia hupaojak ma hamu gabe Uluan ni Huria di HKBP Dolok Sion Km 74 Resort Pangkalan Kerinci on, sai didongani jala dipatau Tuhan Debata Ama ni Tuhan Jesus Kristus marhite Tondi Parbadia i ma hamu mangaradoti ulaon i, asa marsangap goar ni Tuhanta marhite sandok panghobasionmuna. 

 

19.            Pasahathon tu Huria na diojakkon, humusor sambola hambirang mandompakhon ruas ni Huria.

Pdt. Ressort  : Hamu dongan sahuria HKBP Dolok Sion Km 74  Resort Pangkalan Kerinci on, janghon hamu ma amang St. Johan Manalu, di bagasan Jesus Kristus Ulu ni Huria i. Marsitangiangan jala masiurupan ma hamu, asa manjadi ulaon nasida di Huria on. Martangiang ma hita: Ale Tuhan Debata Amanami marhitehite Jesus Kristus Tuhannami, Raja jala nampuna Huria i. Mauliate ma di pasahat rohanami tu Ho, ala diparmudumudu jala dipadimundimun Ho do HuriaM i. Dipabangkit Ho do angka naposoM na burju jala na olo suruonMu mamaritahon hataM. Nunga dipaojak Ho St. Johan Manalu, gabe Uluan ni Huria HKBP Dolok Sion Km 74 Resort Pangkalan Kerinci on. Asi ma rohaM, lehon ma TondiM na Badia i margogoihon nasida. Parsahalai jala parbisuhi ma nasida asa polin BaritaM na Uli i dibaritahon. Patogu, pahiras rohanasida mangaradoti sude ulaon na pinasahatMu tu nasida, marhitehite Tuhan Jesus Kristus, Tuhannami. Amen.

 

20.    TANGIANG PANGUNJUNGI: Tangiang Pelean – Tangiang Ale Amanami - Tangiang Pasupasu, Amen 3x