PASANGAP DEBATA MARHITE SALUHUTNA (Titus 2: 1 – 10)

 

Bahan Sermon Minggu XVIII Dung Trinitatis

Minggu, 04 Oktober 2026

Evangelium:  Titus 2: 1 – 10

PASANGAP DEBATA MARHITE SALUHUTNA

(Titus 2: 1 – 10)

Huria, i ma goar ni parpunguanta songon siihuthon Tuhan Jesus Kristus. Na gabe sungkunsungkun dihita saunari, Ise do huria i? Didià do hapataran ni huria i? Hapataran ni huria ndada holan marhite bagas joro na dipajongjong sian batu dohot pasir, manang marhite torop bilangan ni ruas na tarsurat di buku huria. Huria ima parpunguan ni angka na porsea tu Tuhan Jesus Kristus, ahu dohot hamu, hita saluhutna na so mansadi patuduhon parbue ni haporseaon di bagasan Jesus Kristus marhite pambahenan na pantun jala daulat di bagasan ngolu siganup ari. Ai didok do di Jakobus 2:17 “Haporseaon i pe songon i do: anggo so adong pangulaonna, naung mate do hadirionna”. Haporseaon ni halak Kristen na parjolo i ndada holan manaringoti Jesus na tubu di Betlehem, panghobasion-Na, hamatean, haheheon dohot hanangkok-Na tu Banua Ginjang, alai sahat do tu pangajarion dohot etika ni parhuriaon, ima manghatahon na tutu, na domu tu poda na tingkos, na marojahan tu haporseaon i (ayat 1).

Marhite turpuk on, diapoi si Paulus do si Titus asa dipatupa sada etika relasional (hapantunon tu dongan jolma) jala transformasional (na paubahon roha) na mangatur haulion ni huria na parjolo i. Songon on ma parturena:

1.tu angka natuatua baoa asa marroha na torang, daulat, toman, hisar marhaporseaon, marholong jala marbenget ni roha (ayat 2),

2,tu angka natuatua parompuan asa marparange na tama di na badia i, unang panihasnihasi, unang hatagian di anggur, angka sipodahon na denggan  .

3.parompuan naposo, asa manghaholongi sinondukna dohot anakhonna, mamarangehon hatomanon, hapormanon, mangaringkoti ulaonna di bagas na, marbasabasa, marunduk ni roha maradophon hamulianna be, unang hona insak hata ni Debata (ayat 4-5).

4.Tu  angka baoa naumposo asa marhatomanon, pajongjong diri tau tiruan di angka ulaon na denggan, polin di pangajarion, marhatomanon. Naeng ma tingkos poda i do tarsual, asa maila na mangalo i, ala so dapot na roa sidohononna maralohon saluhut halak Kristen i (ayat 6-8).

5.Tu angka  anak somang, asa dioloi ma indukna be, patupahon lomo ni rohana di na saluhutna, unang ma manggagai. Unang ma mangahuti; dipatuduhon ma nasida haposan di sasude, asa sandok marsangap poda ni Debata, Sipalua i (ayat 9-10).

Taida ma, adong be do na diondolhon tu ganup naung dijouhon di ayat 2-10, on do: manghaporseai Debata ndada holan marhite pamangan na mandok, "ahu porsea di Debata Ama, Anak, dohot Tondi Parbadia", alai naeng ma dipatuduhon marhite pangalaho siganup ari songon parbue ni haporseaon. Mamarangehon hata ni Debata marhite etika relational na transformasional ndada laho gabe "ajang pameran" alai patuduhon parsitutuon marhite roha biar mida Jahowa. Haporseaon manjou huria asa marbisuk marhite na mangalapati hata ni Debata jala tangkas diantusi aha do siulahonon songon hapataran ni haporseaon i. Dipamasa pe etika relasional on  asa   : unang hona insak hata ni Debata (ay, 4), asa maila na mangalo hata ni Debata, ala dang dapot nasida naroa sidohonon nasida taringot tu hakristenon i (ay.8), jala asa sandok marsangap poda ni Debata, Sipalua hita.

Molo taida poda parjamitaon sadari on, naeng ma hita marrujiruji tu dirinta be, jala panandaon na tutu tu Debata tarida do i sian hubungan manang etika relasional jala transformasional manghorhon hamubaon ni roha asa gabe imbaru ganup ari. Maradat situtu do pangalaho ni hakristenen i, ndang geregere manang marmeammeam manang marlomolomo marpangalaho, alai saurdot pangatusion dohot haporseon na patar di bagasan pangalaho. Songon lampu di bagasta be, na boi galak do sude lampu i molo denggan jaringan listrik mårhite kabel na denggan, ndang adong na putus, alai terhubung dohot denggan. Terhubung do hita di bagasta be marhite haporseoan di bagasan Jesus Kristus, na manjou hita marparange tu etika relasional transformasional. Ingkon denggan do arus hubunganta tu Debata asa denggan hubunganta tu donganta sabagas, laos ihut ma muse tu dongan na diduru ni bagasta. Unang ma adong hubungan na terputus asa marsinondang jala patar holong ni Debata tu saluhut na di humaliang. Ingkon menyala do arus hubunganta ganup ari, marhite angka etika sopan santun dohot parange relasional na gok holong. Marsinondang ma ganup hita, angka siihuthon Jesus Kristus.

Laos songon i ma ganup keluarga di tongatonga ni huria i, molo marpungu pe hita dos do na dipangido sian hita ima: etika relasional jala transformasional tu dongan sahuria, natuatua, naposo, dohot anak somang tongtong mamarengehon hapantunon na paimbaruhon haporseaonta. Molo sude huria mamparrohahon on, songon orkestra na balga ma hita. Marasing be do instrumen musik na tapangke, alai molo marlomolomo hita mamalu instrumen musik na adong dihita, gabe hagunturon do na tarbege, alai molo diida panduan dohot partitur jala diihuthon panduan ni na manguluhon ima dirigen habegean ma suara na mansai uli jala arga. Songon i ma hita ruas ni huria ingkon olo unduk tu hata ni Debata, tu aturan na binahen ni hurianta. Gabe harmonis ma hubunganta di tongatonga ni huria, jala onma sihatindanghononta di tongatonga ni masyarakat dohot portibi on. Adat hapantunon dohot parange na uli ndada boi ulahonon ni sasahalak alai ingkon rampak do huria i manjamothon.

Tahasomalhon, ma, marparange hapantunon dohot hadaulaton na gok holong ni Jesus Kristus di bagasan hubungan kekeluargaan, huria, masyarakat pe. Ai ingkon tu si do maporus halak Kristen. Nunga denggan dipungka natuatuanta najolo adat relasi marhite dalihan na tolu sipaopat sihalsihal, nuaeng tasondangi ma adat kekerabatan on marhite Tondi Parbadia na mamparbuehon parbue ni Tondi. Ai na pasangaphon Debata do hita molo pantun jala daulat parange dohot pingkiranta. Unang ma adong sian hita paginjanghon dirina ala ni angka status na dipamasa portibi on, saluhut do hita tarjou laho paimbaru diri marhite etika relasional jala transformasional. Amen.

Gr.B. Manurung,SPAK,gr