TOPIK: DIHALOMOHON DEBATA DO HOLONG NI ROHA (ALLAH MENYUKAI KASIH SETIA)

                                        

SERMON TU JAMITA MINGGU 

MINGGU XIX DUNG TRINITATIS –  11 OKTOBER 2026 

EVANGELIUM: HOSEA 6 : 1 - 6 

      TOPIK: DIHALOMOHON DEBATA DO HOLONG NI ROHA 

(ALLAH MENYUKAI KASIH SETIA)

I. Patujolo

Hosea ima panurirang ni Debata, anak ni si Beri. Hosea ima bagian sian Horong Nabi-nabi Kecil di Padan Narobi. Manghobasi ma ibana sekitar abad 8 SM, di masa ni raja Uzia, Jotam, Ahas, dohot Hiskia, angka raja di Juda. Situasi na masa di hatiha i: gok angka konflik di politik, ugamo dohot sosial budaya na menyimpang hatiha i. Jala dipatuduhon si Hosea do gombaron hubungan ni bangso Israel dohot Debata Jahowa hira situasi ni parsaripeonna. Disuru Debata ibana asa mambuat sada boruboru sibabijalang (perempuan sundal) na margoar si Gomer. Dung dibuat si Hosea ima si Gomer, jala dung gabegabean, tong do ditadinghon si Gomer ia si Hosea. Jala ido na masa di tonga ni bangso i. Ditundalhon bangso Israel do Debata Jahowa, jala marsomba tu ganaganaan songon Baal. Nangpe songon i, marpangulahi do roha ni Jahowa mida bangso i, jala dipasahat do sosososo tu bangso i asa marhamubaon ni roha tu Debata. Asa lam tangkas, tajaha ma hatorangan ni turpuk on.

II. Hatorangan ni Turpuk

Ay. 1 - 3, diarahon si Hosea do bangso i asa mulak tu Jahowa. Hata “asa mulak hita” ima sian Hata Heber וְנָשׁוּבָה (wenāshûvāh) — marilah kita kembali, sian akar שׁוּב (shuv) - berbalik, kembali, bertobat. Saluhut bangso i disosoi Hosea asa mulak tu Jahowa, marhamubaon manadinghon dosana, huhut mangarahon diri tu Debata. Dipaingot muse bangso i asa marningot ulaon ni Debata na mangaribakhon nasida, huhut pamalum nasida. Nang pe diuhum bangso i, alai holan Debata do na boi pamalum nasida. Rade do Debata Jahowa paulihon, paturehon, pangoluhon, jala paheheon bangso i huminsat sian ngolu na na gok dosa, asal mulak nasida tu Debata. Diarahon si Hosea do bangso i asa tangkas mananda Debata, marhite na paubahon roha tu Debata, manadinghon parange na jat, manolsoli angka dosa, huhut mangarahon diri tu Debata, mual ni haluaon i. Dipatudos si Hosea do ia holong dohot pasupasu ni Debata songon udan nene na mamornohi tano i. Ido umbahen mansai balga do holong ni Debata dohot pasupasuNa, huhut mangalehon hamaluhon dohot hangoluan tu angka na mulak tu Debata jala na tumundalhon angka dosana (bertransformasi ke arah yang hidup, dan perilaku yang berkenan pada Tuhan).  

Ay. 4 - 6, mansai tangkas didok Jahowa marhite si Hosea, ingkon hamubaon situtu do na pinangido ni Jahowa tu bangso i. Unang na mardua roha manang na satonga. Allah melihat bahwa kasih setia Israel tidak konsisten atau tidak selaras. Hamubaon nasida gumodang na so hibul rohana tu Debata. Ido umbahen hadaulaton manang parsombaon nasida hira ombun dohot nambur manogot na tibu manaek. Ndang konsisten nasida patuduhon hadaulaton nang parsombaonnasida tu Debata. Alani ndang na hohom Debata marnida i. DitingkiNa, dibarbar Debata do bangso i marhite panurirang dohot hataNa asa adong pangantusion nasida, jala mulak nasida tu Debata huhut marhamubaon ni roha. Uhum ni Debata marhite hataNa dohot panurirangNa songon panondang tu nasida, asa haruar sian haholomon ni dosa i. Na diida Debata ima asi ni roha (hasatiaon na hibul sian roha) mida angka pelean situtuongon ni bangso i. Nangpe olo nasida pasahat pelean situtungon (terlihat seperti religius), alai roha nang ngolunasida ndang hibul tu Debata, alai tu na asing (portibi on, debata sileban, dna). Alani i, molo marhadaulaton manang marsomba tu Debata, ingkon marhite roha na satia jala na hibul tu Ibana, na sadalan di hata dohot dipambahenan maradophon Debata. 

III. Refleksi 

Turpuk on manosoi hita angka halak na porsea i asa rade paubahon roha, na borhat sian roha, pingkiran, dohot ngolu na rade manadinghon angka parange na hurang denggan, jala na gok dosa i, na rade dipaimbaru Debata ia ngoluna. Alani i, gabe refleksi ma on tu hita saluhutna, asa sai jonok hita jala mangarahon diri tu Debata, na pamalum hita sian angka hasalaan, hamagoan, nang dosanta. AMEN.

    

                                                                                  

                                                                                    C.Pdt.Jepri Simanjuntak S.Th